నేను డ్రైవింగ్‌ చేయడం ఆపేయాలా?

మీ ఇంట్లో కూడా ఇదే గోలా? అయితే, మీరు డ్రైవింగ్‌ చేయాలా ఆపేయాలా అనేది దేన్ని బట్టి నిర్ణయించుకోవచ్చు?

కొన్ని దేశాల్లో ఓ వయసు దాటిన తర్వాత, డ్రైవింగ్‌ లైసెన్స్‌ని రెన్యువల్‌ చేసుకోవాలంటే డాక్టర్‌ సర్టిఫికెట్‌ కావాలి. ఆ దేశాల్లో ఉంటున్న క్రైస్తవులు ఆ నియమాలకు లోబడతారు. (రోమా. 13:1) కానీ మీరు ఎక్కడున్నా మీరు డ్రైవింగ్‌ బాగా చేయగలుగుతారో లేదో మీరే ఒక అంచనా వేసుకోవచ్చు.

మీ డ్రైవింగ్‌ని అంచనా వేసుకోండి

మీ డ్రైవింగ్‌ని అంచనా వేసుకోవడానికి ముందుగా ఈ క్రింది ప్రశ్నలను వేసుకోమని అమెరికాలో ఉన్న నేషనల్‌ ఇన్‌స్టిట్యూట్‌ ఆన్‌ ఏజింగ్‌ (NIA) అనే వెబ్‌సైట్‌ చెప్తుంది.

• నాకు రోడ్డు మీద ఉన్న సైన్‌ బోర్డులు స్పష్టంగా కనిపిస్తున్నాయా లేదా రాత్రిపూట నాకు అన్నీ స్పష్టంగా కనిపిస్తున్నాయా?

• కారు అద్దాల్ని చూడ్డానికి అలాగే అద్దంలో కనపడని చోట్లు చూడ్డానికి నా తలను తిప్పగలుగుతున్నానా?

• నేను ఇంకా చురుగ్గానే ఉన్నానా, అంటే నేను నా కాళ్లతో యాక్సిలేటర్‌ను, బ్రేక్‌ను వెంటవెంటనే తొక్కగలుగుతున్నానా?

• నేను ట్రాఫిక్‌కి ఇబ్బంది కలిగేలా మరీ నెమ్మదిగా నడుపుతున్నానా?

• ఈ మధ్య నాకు ఎప్పుడైనా ప్రమాదం తృటిలో తప్పిందా, లేదా దేన్నైనా గుద్దేయడం వల్ల నా బండికి సొట్టలు-గీతలు పడ్డాయా?

• నా డ్రైవింగ్‌ వల్ల పోలీసులు ఎప్పుడైనా ఆపారా?

• నేను కారు నడుపుతూ ఎప్పుడైనా నిద్రలోకి జారుకున్నానా?

• నేను వాడే మందుల వల్ల డ్రైవింగ్‌ చేయడం కష్టమా?

• నా కుటుంబ సభ్యులు లేదా స్నేహితులు నా డ్రైవింగ్‌ గురించి కంగారు పడుతున్నారా?

ఆ ప్రశ్నల్లో ఒకటి లేదా రెండిటికి మీ సమాధానం అవును అయితే, మీరు కొన్ని మార్పులు చేసుకోవాల్సి రావచ్చు. ఉదాహరణకు, మీరు డ్రైవింగ్‌ చేయడాన్ని తగ్గించవచ్చు, ముఖ్యంగా రాత్రిపూట నడపడాన్ని తగ్గించవచ్చు. ఎప్పటికప్పుడు మీరు డ్రైవింగ్‌ ఎలా చేస్తున్నారో చూసుకుంటూ ఉండండి. మీరు కావాలనుకుంటే, మీ డ్రైవింగ్‌ ఎలా ఉందో ఒక కుటుంబ సభ్యుణ్ణి గానీ, స్నేహితుణ్ణి గానీ అడిగి తెలుసుకోండి. అవసరం అనుకుంటే, సురక్షితంగా డ్రైవింగ్‌ ఎలా చేయాలో నేర్పించే కోర్సులో చేరండి. ఒకవేళ, పైన ప్రశ్నల్లో చాలా వాటికి మీ జవాబు అవును అయితే, బహుశా మీరు డ్రైవింగ్‌ ఆపేయడమే మంచిదేమో ఆలోచించండి.a

బైబిలు సూత్రాలను మనసులో ఉంచుకోండి

మనకు తెలియకుండానే రోజురోజుకు డ్రైవింగ్‌ చేసే మన సామర్థ్యం తగ్గిపోతూ ఉండొచ్చు. అలాగే కారు నడపడం ఆపేయాలనే విషయం మనకు మింగుడు పడకపోవచ్చు. అయితే, ఈ విషయంలో మనం సరిగ్గా ఆలోచించేలా, తెలివైన నిర్ణయం తీసుకునేలా ఏ బైబిలు సూత్రాలు సహాయం చేస్తాయి? ఇప్పుడు రెండిటిని చూద్దాం.

అణకువతో ఉండండి. (సామె. 11:2) మన వయసు పైబడే కొద్దీ కంటి చూపు తగ్గుతుంది, చెవులు సరిగ్గా వినబడవు, కాళ్లుచేతుల్లో ఇంతకుముందులా పట్టుండదు, చకాచకా తిరగడానికి శరీరం సహకరించదు. ఉదాహరణకు, చాలామంది ఒక వయసు వచ్చిన తర్వాత, కొన్ని రకాల ఆటలు ఆడడం ఆపేస్తారు. ఎందుకంటే ఈ వయసులో అవి ఆడితే, వాళ్లకు ఈజీగా దెబ్బలు తగులుతాయి. అదే సూత్రం డ్రైవింగ్‌కు కూడా వర్తిస్తుంది. అందుకే అణకువ ఉన్న వ్యక్తి, తన భద్రతను దృష్టిలో ఉంచుకొని, తన జీవితంలో ఏదోక సమయంలో డ్రైవింగ్‌ ఆపేయాలని నిర్ణయించుకోవచ్చు. (సామె. 22:3) అలాగే డ్రైవింగ్‌ చేయొద్దని ఎవరైనా చెప్పినప్పుడు, అణకువ ఉన్న వ్యక్తి దానికి చక్కగా స్పందిస్తాడు, చెప్పింది వింటాడు.—2 సమూయేలు 21:15-17 తో పోల్చండి.

రక్తాపరాధాన్ని మూట కట్టుకోకండి. (ద్వితీ. 22:8) సరిగ్గా నడపకపోతే కారే మనుషుల్ని చంపే ఒక ఆయుధంగా మారిపోవచ్చు. కారు నడిపే సామర్థ్యం తగ్గిపోతున్నా సరే, ఒకవ్యక్తి దాన్ని పట్టించుకోకుండా నడుపుతూ ఉంటే ఆయన తన ప్రాణాన్నే కాదు ఇతరుల ప్రాణాల్ని కూడా ప్రమాదంలో పడేస్తాడు. అలాగే తనవల్ల ఏదైనా పెద్ద యాక్సిడెంట్‌ జరిగితే, ఆ రక్తాపరాధం తనమీద ఉంటుంది.

ఇప్పుడు డ్రైవింగ్‌ చేయాలా వద్దా అనే కష్టమైన నిర్ణయం మీ ముందుందా? అయితే డ్రైవింగ్‌ ఆపేస్తే మీ విలువ, గౌరవం తగ్గిపోతాయని అనుకోకండి. మీలో ఉన్న అణకువ, వినయం, ఇతరుల్ని పట్టించుకోవడం లాంటి మంచిమంచి లక్షణాల్ని యెహోవా ఇష్టపడతాడు. ఆయన మిమ్మల్ని చూసుకుంటానని, మిమ్మల్ని ఓదారుస్తానని మాటిస్తున్నాడు. (యెష. 46:4) ఆయన మిమ్మల్ని ఎప్పటికీ వదిలేయడు. కాబట్టి వివేచనను, బైబిల్లో ఉన్న తెలివిని ఉపయోగించి డ్రైవింగ్‌ విషయంలో ఒక మంచి నిర్ణయం తీసుకునేలా సహాయం చేయమని యెహోవానే అడగండి.