కార్ట్‌ ఉపయోగిస్తూ ఎలా సాక్ష్యం ఇవ్వాలి?

వినే మనసున్నవాళ్లను సత్యంవైపు ఆకర్షించడానికి కార్ట్‌ లేదా టేబుల్‌ ఉపయోగించి సాక్ష్యమివ్వడం వల్ల మంచి ఫలితాలు వస్తున్నాయి. (యోహా. 6:44) అందుకే, సంఘ క్షేత్రంలో ఎక్కువ మంది నడిచే ప్రాంతాల్లో బహిరంగ సాక్ష్యం ఇచ్చే ఏర్పాట్లు చేయమని పెద్దలను ప్రోత్సహించారు. కార్ట్‌లను ఎప్పుడూ ఒకేచోట ఉంచం కాబట్టి, సాధారణంగా అధికారుల అనుమతి అడగాల్సిన అవసరం లేదు. కార్టును ఉపయోగించి సాక్ష్యం ఇస్తున్నప్పుడు అక్కడ ఎవరెవరు ఉండవచ్చు? వివేచన చూపిస్తూ, మర్యాదగా, నైపుణ్యంతో మాట్లాడే ప్రచారకులు కార్ట్‌ దగ్గర ఉండవచ్చు. ఈ పని ఇంకా చక్కగా చేయడానికి కొన్ని సలహాలు కింద ఉన్నాయి:

చేయాల్సినవి:

ప్రజలతో స్నేహశీలులుగా ఉండండి, వాళ్లను ఆహ్వానించండి, సహాయం చేయండి. మన ప్రచారకుల్లో కొందరు చక్కని చిరునవ్వుతో, స్నేహపూర్వకంగా పలకరిస్తారు. ఎవరైనా కార్టు దగ్గరకు వచ్చి దానివైపు చూస్తే, మీరు ఇలా అనవచ్చు, “మీకు నచ్చితే వీటిని తీసుకోవచ్చు.”
కార్ట్‌కు సముచితమైన దూరంలో నిలబడండి. కార్ట్‌కు దగ్గర్లో నిలబడితే మంచి ఫలితాలు వస్తున్నాయని కొందరు సహోదరులు చెప్తున్నారు. కానీ అలా నిలబడితే, ప్రజలు కార్టు దగ్గరకు రావడానికి వెనకాడుతున్నారని ఇంకొందరు చెప్తున్నారు, అందుకే ఎవరైన కార్ట్‌ దగ్గరకు వచ్చేవరకు సహోదరులు దూరంగా నిలబడివుంటారు. వచ్చినవాళ్లతో ఇలా సంభాషణ మొదలుపెడతారు, “ఈ ప్రశ్న గురించి ఇంతకముందు ఎప్పుడైనా ఆలోచించారా?”
వీలైనప్పుడల్లా బైబిల్ని ఉపయోగించండి.
బైబిలు బోధిస్తోంది లాంటి అధ్యయన పుస్తకాలను తీసుకున్నవాళ్లకు బైబిలు గురించి ఇంకా నేర్చుకునే ఏర్పాటును వివరించండి. ఎలక్ట్రానిక్‌ డివైస్‌లో బైబిలు ఎందుకు చదవాలి? వీడియోను చూపించవచ్చేమో అడగండి.
కుదిరితే, ఆసక్తి చూపించినవాళ్ల దగ్గర ఫోన్‌నెంబర్‌, అడ్రస్‌ లాంటివి తీసుకోండి. ఆ వ్యక్తి మీ క్షేత్రంలో ఉండేవాడు కాకపోతే, ప్లీజ్‌ ఫాలో అప్‌ (S-43) ఫారమ్‌ నింపి, వీలైనంత త్వరగా కార్యదర్శికి ఇవ్వండి.
ఆటంకపరిచే వాళ్లు ఎవరైనా ఉన్నారేమో చూస్తూ అప్రమత్తంగా ఉండండి. మనం చేసే పనిని ఎవరైనా కోపంగా వ్యతిరేకిస్తే ఆ ప్రాంతం నుండి వెళ్లిపోవడం మంచిది.

చేయకూడనివి:

కోప్పడకండి, బలవంతం చేయకండి, లేదా కాపలాదారునిలా కార్ట్‌ పక్కనే నిలబడకండి.
ఈ పద్ధతిలో సాక్ష్యం ఇస్తున్నప్పుడు దీన్ని కేవలం ప్రచురణలను పంచిపెట్టడానికి ఉన్న ఒక విధానంగా చూడకండి. మనం పరిచర్య చేస్తున్నప్పుడు, బైబిలు అధ్యయనాలు మొదలుపెట్టాలన్నదే మన లక్ష్యం కాబట్టి ఇతరులతో మాట్లాడడానికి ప్రయత్నించాలి.
దారికి అడ్డంగా నిలబడకండి లేదా మీతోపాటు ఉన్నవాళ్లతో మాటల్లో మునిగిపోకండి. మీకు అవసరమై ఫోన్‌ మాట్లాడాలనుకుంటే, సాధారణంగా కార్ట్‌కు దూరంగా వెళ్లి మాట్లాడితే మంచిది.
వ్యతిరేకించే వాళ్లతో వాదనలకు దిగకండి. వాళ్లు తిడుతుంటే వేరే చోటకు వెళ్లడం మంచిది.