బైబిల్లో దేవుని మాటలు ఉన్నాయి

యెహోవా మనకు బైబిలు అనే గొప్ప బహుమతిని ఇచ్చాడు, అందులో 66 చిన్న పుస్తకాలు ఉన్నాయి. అయితే, ‘బైబిలు ఎక్కడి నుండి వచ్చింది? దాన్ని ఎవరు రాశారు?’ అనే ప్రశ్నలు మీకు రావచ్చు. ఆ ప్రశ్నలకు మనం ఈ పాఠంలో జవాబులు చూస్తాం.

1. బైబిల్ని మనుషులు రాసినప్పుడు, అది దేవుని నుండి వచ్చిందని ఎలా చెప్పవచ్చు?

బైబిల్ని దాదాపు 40 మంది మనుషులు రాశారు. బైబిల్ని రాయడానికి సుమారు 1,600 సంవత్సరాలు పట్టింది (క్రీస్తు పూర్వం 1513 నుండి దాదాపు క్రీస్తు శకం 98 వరకు). బైబిల్ని రాసినవాళ్లలో పశువుల కాపరులు, జాలర్లు, రాజులు ఇలా రకరకాల మనుషులు ఉన్నారు. అయినా బైబిలంతా ఒకేలా ఉంది. ఇదెలా సాధ్యం? దాన్ని రాయించింది దేవుడే కాబట్టి అది సాధ్యమైంది. (1 థెస్సలొనీకయులు 2:13 చదవండి.) బైబిల్ని రాసినవాళ్లు తమ సొంత ఆలోచనల్ని కాదుగానీ, “పవిత్రశక్తితోa ప్రేరేపించబడి, దేవుని నుండి వచ్చిన విషయాలు” రాశారు. (2 పేతురు 1:21) దేవుడు పవిత్రశక్తిని ఉపయోగించి తన ఆలోచనల్ని వాళ్ల మనసులో పెట్టాడు, అప్పుడు వాళ్లు వాటిని రాశారు.—2 తిమోతి 3:16.

2. బైబిలు ఎవరెవరికి అందుబాటులో ఉంది?

“ప్రతీ దేశానికి, తెగకు, భాషకు, జాతికి చెందిన ప్రజలు” బైబిల్లో ఉన్న మంచివార్త నుండి ప్రయోజనం పొందవచ్చు అని దేవుడు చెప్పాడు. (ప్రకటన 14:6 చదవండి.) దేవుడు చెప్పినట్టే, ఈ రోజు బైబిలు చాలా భాషల్లో ఉంది. వేరే ఏ పుస్తకం కూడా ఇన్ని భాషల్లో లేదు. బైబిలు దాదాపు అన్ని ప్రాంతాల, అన్ని భాషల ప్రజలకు అందుబాటులో ఉంది.

3. యెహోవా బైబిల్ని ఎలా భద్రపర్చాడు?

మొదట్లో బైబిల్ని జంతు చర్మాలతో లేదా పపైరస్‌ మొక్కలతో తయారుచేసిన కాగితాల మీద రాశారు. కానీ అవి త్వరగా పాడైపోయేవి. అందుకే, బైబిల్ని ప్రేమించినవాళ్లు దాన్ని చాలా జాగ్రత్తగా తమ చేతితో ఎన్నో కాపీలు రాశారు. అధికారం-పలుకుబడి ఉన్నవాళ్లు, మత బోధకులు బైబిల్ని అంతం చేయాలని చూసినా, చాలామంది తమ ప్రాణాలకు తెగించి దాన్ని కాపాడారు. ఇవన్నీ దాటుకుని బైబిలు మన కాలం వరకు వచ్చేలా యెహోవా దాన్ని భద్రపర్చాడు. అవును, “దేవుని వాక్యం ఎప్పటికీ నిలిచివుంటుంది.”—యెషయా 40:8.

ఎక్కువ తెలుసుకోండి

4. బైబిలుకు మూలం ఎవరో బైబిలే చెప్తుంది

వీడియో చూడండి. 2 తిమోతి 3:16 చదవండి, తర్వాత ఈ ప్రశ్నల్ని చర్చించండి.

వీడియో: బైబిలుకు మూలం ఎవరు?—చిన్నభాగం (2:48)

• బైబిల్ని రాసింది మనుషులైతే, అది దేవుని వాక్యం ఎలా అవుతుంది?

• దేవుడు తన ఆలోచనల్ని భూమ్మీద ఉన్న మనుషులకు తెలియజేయగలడు అని మీరు నమ్ముతున్నారా?

5. బైబిలు ఎన్నో దాడుల్ని తట్టుకుని నిలిచింది

వీడియో: వాళ్లు బైబిల్ని విలువైనదిగా ఎంచారు—చిన్నభాగం (విలియమ్‌ టిండేల్‌) (6:17)

• చాలామంది తమ ప్రాణాలకు తెగించి బైబిల్ని ఎలా కాపాడారో తెలుసుకున్నాక, మీకు దాన్ని చదవాలనిపిస్తుందా? ఎందుకు?

కీర్తన 119:97 చదవండి, తర్వాత ఈ ప్రశ్నను చర్చించండి:

• బైబిల్ని అనువదించడానికి, పంచిపెట్టడానికి చాలామంది ఎందుకు తమ ప్రాణాల్ని పణంగా పెట్టారు?

6. అందరికీ అందుబాటులో ఉన్న పుస్తకం

చరిత్రలో అన్నిటికన్నా ఎక్కువ భాషల్లోకి అనువదించిన, పంచిపెట్టిన పుస్తకం బైబిలు. అపొస్తలుల కార్యాలు 10:34, 35 చదవండి, తర్వాత ఈ ప్రశ్నల్ని చర్చించండి:

• తన వాక్యం ఎక్కువ భాషల్లోకి అనువాదం అవ్వాలని, పంచిపెట్టబడాలని దేవుడు ఎందుకు కోరుకుంటున్నాడు?

• బైబిలుకు సంబంధించి మీకు ఏ విషయం బాగా నచ్చింది?

ఒక్కమాటలో

బైబిలు దేవుని వాక్యం. అది అందరికీ అందుబాటులో ఉండేలా దేవుడు చూసుకున్నాడు.

మీరేం నేర్చుకున్నారు?

• బైబిల్ని మనుషులు రాసినప్పుడు, అది దేవుని వాక్యం ఎలా అవుతుంది?

• బైబిలు గురించి ఈ పాఠంలో నేర్చుకున్న విషయాల్లో మీకు ఏది బాగా నచ్చింది?

• బైబిల్ని మీ వరకు తీసుకురావడానికి దేవుడు ఇంత చేశాడని తెలుసుకున్నాక మీకు ఏమనిపిస్తుంది?

ఇవి కూడా చూడండి

ప్రాచీన రాతప్రతుల నుండి నేటి అనువాదాల వరకు ఉన్న బైబిలు చరిత్రను తెలుసుకోండి.

“బైబిలు మన వరకు ఎలా వచ్చింది?” (తేజరిల్లు! ఆర్టికల్‌)

బైబిలు మూడు పెద్దపెద్ద దాడుల్ని తట్టుకొని ఎలా నిలిచిందో తెలుసుకోండి.

“బైబిలు దాడుల్ని తట్టుకొని నిలిచింది” (కావలికోట ఆర్టికల్‌)

బైబిల్ని అనువదించడానికి కొంతమంది తమ ప్రాణాల్ని ఎలా పణంగా పెట్టారో చూడండి.

వాళ్లు బైబిల్ని విలువైనదిగా ఎంచారు (14:26)

బైబిల్ని చాలాసార్లు నకలు రాశారు, అనువదించారు. అయినా అందులో ఏ మార్పులూ జరగలేదని మీరు ఎందుకు నమ్మవచ్చు?

“బైబిలుకు మార్పులు-చేర్పులు జరిగాయా?” (jw.org ఆర్టికల్‌)