జంతువులు పరలోకానికి వెళ్తాయా?

బైబిలు ఇచ్చే జవాబు

భూమ్మీద చాలా రకాల ప్రాణులు ఉన్నప్పటికీ, కేవలం కొద్దిమంది మనుషులే పరలోకానికి వెళ్తారని బైబిలు చెప్తుంది. (ప్రకటన 14:1, 3) అక్కడ వాళ్లు యేసుతో కలిసి రాజులుగా, యాజకులుగా పరిపాలన చేస్తారు. (లూకా 22:28-30; ప్రకటన 5:9, 10) కానీ మనుషుల్లో చాలామంది పరదైసుగా మారిన భూమ్మీద శాశ్వతంగా జీవించడానికి పునరుత్థానం అవుతారు.—కీర్తన 37:11, 29.

అయితే పెంపుడు జంతువులకు, కుక్కలకు ఒక పరలోకం ఉన్నట్లు బైబిలు చెప్పట్లేదు. అందుకు సరైన కారణమే ఉంది. ఎందుకంటే “పరలోక పిలుపు” పొందడానికి అర్హత సంపాదించే సామర్థ్యం జంతువులకు లేదు. (హెబ్రీయులు 3:1) అలా అర్హత సంపాదించాలంటే దేవుని గురించి తెలుసుకోవాలి, విశ్వాసం ఉంచాలి, దేవుని ఆజ్ఞల్ని పాటించాలి. (మత్తయి 19:17; యోహాను 3:16; 17:3) కాబట్టి కేవలం మనుషులు మాత్రమే శాశ్వతకాలం జీవించేలా సృష్టించబడ్డారు.—ఆదికాండం 2:16, 17; 3:22, 23.

చనిపోయిన ప్రాణి పరలోకానికి వెళ్లాలంటే పునరుత్థానం అవ్వాలి. (1 కొరింథీయులు 15:42) బైబిల్లో ఎన్నో పునరుత్థానాల గురించిన ప్రస్తావన ఉంది. (1 రాజులు 17:17-24; 2 రాజులు 4:32-37; 13:20, 21; లూకా 7:11-15; 8:41, 42, 49-56; యోహాను 11:38-44; అపొస్తలుల కార్యాలు 9:36-42; 20:7-12) అయితే అవన్నీ మనుషుల పునరుత్థానాలే గానీ జంతువుల పునరుత్థానాలు కాదు.

• చనిపోయిన జంతువులకు ఏమౌతుంది?

• జంతువులు పాపం చేస్తాయా?

• జంతువుల పట్ల క్రూరంగా ప్రవర్తించవచ్చా?

చనిపోయిన జంతువులకు ఏమౌతుంది?

దేవుడు జంతువుల ప్రాణాన్ని, మనుషుల ప్రాణాన్ని రెండింటినీ ఒకేలా చూస్తున్నాడని బైబిలు చెప్తుంది. (సంఖ్యాకాండం 31:28) మనుషులైనా, జంతువులైనా “నేల మట్టి,” “జీవ వాయువు” నుండే తయారుచేయబడ్డాయి.—ఆదికాండం 2:7.

మనుషుల్లాగే జంతువులు కూడా చనిపోతాయని బైబిలు చెప్తుంది. (నిర్గమకాండం 19:13) చనిపోయాక మనుషులైనా, జంతువులైనా తిరిగి మట్టిలో కలిసిపోవాల్సిందే. (ప్రసంగి 3:19, 20) ఇంకో మాటలో చెప్పాలంటే అవి ఉనికిలో ఉండవు.

జంతువులు పాపం చేస్తాయా?

లేదు. పాపం చేయడం అంటే దేవుని ప్రమాణాలకు విరుద్ధంగా ఆలోచించడం, భావించడం, ప్రవర్తించడం. ఏది మంచో ఏది చెడో నిర్ణయించుకునే సామర్థ్యం ఉన్న ప్రాణులే పాపం చేయగలుగుతాయి. కానీ జంతువులకు ఆ సామర్థ్యం లేదు. అవి జీవితకాలమంతా వాటి సహజ స్వభావం ప్రకారమే ప్రవర్తిస్తాయి. (2 పేతురు 2:12) ఏ పాపం చేయకపోయినా వాటి జీవితకాలం పూర్తయ్యాక అవి చనిపోతాయి.

జంతువుల పట్ల క్రూరంగా ప్రవర్తించవచ్చా?

ప్రవర్తించకూడదు. దేవుడు మనుషులకు జంతువుల మీద అధికారం ఇచ్చాడు గానీ వాటితో క్రూరంగా ప్రవర్తించే హక్కు ఇవ్వలేదు. (ఆదికాండం 1:28; కీర్తన 8:6-8) దేవుడు చిన్నపక్షులతో సహా ప్రతీ జంతువు మీద శ్రద్ధ చూపిస్తాడు. (యోనా 4:11; మత్తయి 10:29) తన సేవకులు జంతువులతో దయగా ప్రవర్తించాలని ఆయన ఆజ్ఞాపించాడు.—నిర్గమకాండం 23:12; ద్వితీయోపదేశకాండం 25:4; సామెతలు 12:10.