యెహోవాసాక్షులకు సైన్స్‌పై ఎలాంటి అభిప్రాయం ఉంది?

సైన్స్‌ సాధించిన ఫలితాలను మేం గౌరవిస్తాం. రుజువులతో సహా సైన్స్‌ కనిపెట్టిన విషయాలను మేం నమ్ముతాం.

“సైన్స్‌ అంటే, ప్రకృతిని, ప్రకృతిలో ఉన్నవాటి పనితీరును తెలుసుకోవడానికి చేసే అధ్యయనం, దాన్నుండి పొందే జ్ఞానం.” (కోలిన్స్‌ కోబిల్డ్‌ అడ్వాన్స్‌డ్‌ లెర్నర్స్‌ ఇంగ్లీషు డిక్షనరీ) బైబిలు ఒక సైన్స్‌ పుస్తకం కాకపోయినా, చుట్టూ ఉన్న ప్రకృతిని అధ్యయనం చేయమనీ, అలాగే వేరేవాళ్లు చేసిన అధ్యయనం నుండి నేర్చుకోమనీ ప్రజల్ని ప్రోత్సహిస్తుంది. కొన్ని ఉదాహరణలు చూడండి:

• ఖగోళశాస్త్రం: “మీ కళ్లు పైకెత్తి ఆకాశాన్ని చూడండి. వీటిని ఎవరు సృష్టించారు? వాటిలో ఒక్కోదాన్ని లెక్కపెడుతూ వాటి సైన్యాన్ని బయటికి తీసుకొస్తున్న దేవుడే కదా; ఆయన వాటన్నిటినీ పేరు పెట్టి పిలుస్తాడు.”—యెషయా 40:26.

• జీవశాస్త్రం: “సొలొమోను, లెబానోనులో పెరిగే దేవదారు చెట్టు నుండి గోడ మీద పెరిగే హిస్సోపు వరకు రకరకాల చెట్ల గురించి; అలాగే జంతువుల గురించి, పక్షుల గురించి, పాకే ప్రాణుల గురించి, చేపల గురించి మాట్లాడాడు.”—1 రాజులు 4:33.

• వైద్యశాస్త్రం: “ఆరోగ్యంగా ఉన్నవాళ్లకు వైద్యుడు అవసరంలేదు, రోగులకే అవసరం.”—లూకా 5:31.

• అంతరిక్షశాస్త్రం: “మంచు గోదాముల్లోకి నువ్వు అడుగుపెట్టావా? వడగండ్ల గోదాముల్ని నువ్వు చూశావా? ... భూమ్మీద వీచే తూర్పు గాలి ఎక్కడ మొదలౌతుందో నీకు తెలుసా?”—యోబు 38:22-24.

మా ప్రచురణలు ప్రకృతి గురించి, సైన్స్‌ సాధించిన ఫలితాల గురించి ఆర్టికల్స్‌ను వివరిస్తూ ప్రచురించడం ద్వారా సైన్స్‌పై గౌరవాన్ని పెంచుతాయి. యెహోవాసాక్షులైన తల్లిదండ్రులు తమ పిల్లల్ని చదువుకోమని ప్రోత్సహిస్తారు. అప్పుడు పిల్లలు తమ చుట్టూ ఉన్న ప్రపంచాన్ని ఇంకా బాగా అర్థంచేసుకోగలుగుతారు. యెహోవాసాక్షుల్లో చాలామంది బయోకెమిస్ట్రీ, మ్యాథ్స్‌, ఫిజిక్స్‌ అలాగే సైన్స్‌తో సంబంధం ఉన్న ఇతర విభాగాల్లో పనిచేస్తున్నారు.

సైన్స్‌కున్న పరిమితులు

మనుషులకు ఉన్న అన్నీ ప్రశ్నలకు సైన్స్‌ జవాబివ్వగలదని మేం నమ్మం.a ఉదాహరణకు, భూవిజ్ఞాన శాస్త్రజ్ఞులు భూమి దేనితో తయారుచేయబడిందో పరిశోధన చేస్తారు. జీవశాస్త్రజ్ఞులు మనిషి శరీరం పనిచేసే తీరును అధ్యయనం చేస్తారు. ఇంతకీ జీవులు మనుగడ సాగించగలిగే చక్కని వాతావరణం భూమిపై ఎందుకు ఉంది? మానవ శరీరభాగాలు ఒకదానితో ఒకటి సహకరించుకుంటూ ఇంత చక్కగా ఎలా పనిచేస్తున్నాయి?

ఆ ప్రశ్నలకు బైబిలు మాత్రమే సరైన జవాబులు ఇవ్వగలదనే ముగింపుకు మేము వచ్చాం. (కీర్తన 139:13-16; యెషయా 45:18) కాబట్టి సరైన జ్ఞానం కావాలంటే సైన్స్‌ గురించి అలాగే బైబిలు గురించి నేర్చుకోవాలని మేం నమ్ముతాం.

కొన్నిసార్లు సైన్స్‌ బైబిలుకు విరుద్ధంగా ఉన్నట్లు అనిపించవచ్చు. కానీ బైబిలు నిజంగా ఏమి చెప్తుందో సరిగ్గా అర్థం చేసుకోకపోవడం వల్లే చాలావరకు అలా అనిపిస్తుంటుంది. ఉదాహరణకు, 24 గంటల వ్యవధి ఉన్న ఆరు రోజుల్లో భూమి చేయబడిందని బైబిలు చెప్పట్లేదు.—ఆదికాండం 1:1; 2:4.

చాలామంది, సైన్స్‌పరంగా కొన్ని సిద్ధాంతాలు సరైనవని అనుకుంటున్నారు, కానీ అవి నిజమనడానికి సరిపడా ఆధారాల్లేవు. అంతేకాదు గొప్ప పేరున్న కొంతమంది శాస్త్రవేత్తలు సైతం వాటిని ఒప్పుకోవడం లేదు. ఉదాహరణకు ప్రకృతిలోని రకరకాల ప్రాణుల్ని చూస్తే వాటిని రూపొందించిన తీరులో ఎంతో తెలివి కనిపిస్తుంది. కాబట్టి చాలామంది జీవశాస్త్రజ్ఞులు, రసాయన శాస్త్రజ్ఞులు, ఇతరుల్లాగే మేము కూడా జీవం పరిణామం వల్ల వచ్చిందని నమ్మట్లేదు.