విరిగిన మనసును త్వరగా అతికించేద్దాం!

దీని గురించి ఒక ఉదాహరణ చూద్దాం. మన శరీరంలో ఏదైనా ఎముక విరిగితే, వెంటనే డాక్టర్‌ దగ్గరికి వెళ్లి, వైద్యం చేయించుకోవాలి. అప్పుడే నొప్పి తగ్గుతుంది, ఎముక బాగా అతుకుతుంది. మీరు దాన్ని వెంటనే పట్టించుకోకపోతే, నొప్పి ఇంకా ఎక్కువైపోతుంది. ఆ ఎముక సరిగ్గా అతకదు, ఎప్పటికీ అలానే ఉండిపోతుంది.

ఒక ఎముక విరిగిపోయినప్పుడు దాన్ని ఎలాగైతే వెంటనే బాగుచేసుకుంటామో, బ్రదర్స్‌-సిస్టర్స్‌తో మనకున్న సంబంధం పాడైనప్పుడు కూడా దాన్ని వెంటనే బాగుచేసుకోవాలి. లేకపోతే, మన మనసుకైన గాయం అలాగే ఉండిపోతుంది. మెల్లమెల్లగా ద్వేషం పెరిగి, మన స్నేహితున్ని దూరం చేసుకుంటాం. అందుకే, యేసు ఇలా చెప్పాడు: ‘త్వరగా రాజీపడు.’ (మత్త. 5:25) కాబట్టి మీ స్నేహితుని దగ్గరికి వెళ్లి ఏ దాపరికం లేకుండా, దయగా జరిగినదాని గురించి మాట్లాడండి. అలా చేయడం ఎందుకు కష్టంగా అనిపించవచ్చో చెప్పే రెండు కారణాల్ని చూద్దాం.

మొదటిది, జరిగినదాని గురించి వాళ్లతో మాట్లాడడం మనకు ఇబ్బందిగా అనిపిస్తుంది కాబట్టి, ఆ సమస్యని పరిష్కరించుకోకుండా అలాగే వదిలేస్తాం.b యువొదియ, సుంటుకే అనే ఇద్దరు సహోదరీల మధ్య కూడా అదే జరిగింది. వాళ్ల మధ్య వచ్చిన మనస్పర్థల్ని వాళ్లు పరిష్కరించుకోలేదు. అందుకే సమస్య అలానే ఉండిపోయింది. అది ఎక్కడో రోములో ఉన్న పౌలు దాకా వెళ్లింది; ఆయన వాళ్లను మళ్లీ కలిసిపోమని బ్రతిమాలాడు. (ఫిలి. 4:2) వాళ్లు వినయంగా జరిగినదాని గురించి మనసువిప్పి మాట్లాడుకుని, క్షమించుకుంటే ఆ స్నేహం మళ్లీ చిగురిస్తుంది.

రెండవది, ఎదుటి వ్యక్తే తప్పును ఒప్పుకోవాలని మనం ఎదురుచూస్తూ ఉండవచ్చు. తప్పు ఎవరిది అని నిరూపించుకోవడం కన్నా, వాళ్లతో ఉన్న సంబంధాన్ని బాగుచేసుకోవడమే మన ఉద్దేశం. ఎముక విరిగిందని డాక్టర్‌ దగ్గరికి వెళ్లినప్పుడు, ఆయన దాన్ని ఎలా బాగుచేయాలనే ఆలోచిస్తాడు గానీ, అది ఎందుకు విరిగిందనే దాని గురించే ఆలోచిస్తూ కూర్చోడు కదా! అలాగే, మీ స్నేహితునితో మాట్లాడుతున్నప్పుడు, తప్పు ఎవరిది అని ఆలోచించే బదులు మీ స్నేహం ఎంత అమూల్యమైనది, దాన్ని ఎలా బాగుచేసుకోవాలి అనే దానిమీద మనసుపెట్టండి.

మీ స్నేహాన్ని బాగుచేసుకుని, దాన్ని నిలబెట్టుకోవడానికి ఈ రోజే వెళ్లి, ఆ బ్రదర్‌తో లేదా ఆ సిస్టర్‌తో మాట్లాడి చూడండి. “సూర్యుడు అస్తమించే లోపే మీ కోపాన్ని తీసేసుకోండి.” (ఎఫె. 4:26) విరిగిన మనసును అతికించుకోవడానికి వెంటనే ప్రయత్నిస్తే, ‘ఐక్యతను కాపాడుకోగలుగుతాం.’—ఎఫె. 4:1-3.