శుభ్రంగా ఉండే ప్రజలంటే యెహోవాకు ఇష్టం

“చేతులు కడుక్కో. గది శుభ్రం చేయి. ఇల్లు ఊడువు. చెత్త పడేయి.” చాలామంది తల్లిదండ్రులు పిల్లలకు ఎలా శుభ్రంగా ఉండాలో నేర్పిస్తారు. నిజానికి శుభ్రంగా ఉండడం మన పవిత్ర దేవుడైన యెహోవా దగ్గర నుండి మొదలైంది. (నిర్గ 30:18-20; ద్వితీ 23:14; 2 కొరిం 7:1) మనం మన శరీరాన్ని, మన వస్తువుల్ని శుభ్రంగా ఉంచుకుంటే యెహోవాను ఘనపరుస్తాం. (1 పేతు 1:14-16) మన ఇల్లు, పరిసరాల సంగతేంటి? రోడ్ల మీద, పార్కుల్లో ఎక్కడ పడితే అక్కడ చెత్త పడేసే వాళ్లలా కాకుండా క్రైస్తవులు భూమిని శుభ్రంగా ఉంచడానికి బాగా కష్టపడతారు. (కీర్త 115:16; ప్రక 11:18) చాక్లెట్‌ కాగితాలను, కూల్‌డ్రింక్‌ బాటిళ్లను, బబుల్‌ గమ్‌లను ఎక్కడ పడేస్తాం, ఎలా పడేస్తాం లాంటివి చిన్నచిన్న విషయాలే కావచ్చు, కానీ శుభ్రత విషయంలో మన అభిప్రాయం ఏంటో అవి తెలియజేస్తాయి. జీవితంలోని ప్రతీ విషయంలో మనల్ని మనం “దేవుని పరిచారకులుగా సిఫారసు” చేసుకోవాలన్నదే మన కోరిక.—2 కొరిం 6:3, 4.

శుభ్రంగా ఉండే ప్రజలంటే దేవునికి ఇష్టం వీడియో చూసిన తర్వాత ఈ ప్రశ్నలకు జవాబులు చెప్పండి:

• తమ వస్తువుల్ని శుభ్రంగా పెట్టుకోకపోవడానికి కొంతమంది ఎలాంటి సాకులు చెప్తారు?

• శుభ్రత విషయంలో యెహోవా అభిప్రాయాన్ని మోషే ధర్మశాస్త్రం ఎలా తెలియజేసింది?

• మనం ఏమీ మాట్లాడకుండానే యెహోవా గురించి ఎలా సాక్ష్యం ఇవ్వగలం?