పెద్దవాళ్ల నిర్దేశం, సలహాలకున్న విలువ

నిర్దేశాలు, సలహాలు ఎవరు ఇవ్వవచ్చు?

పిల్లలకు వాళ్ల జీవితంలో వాళ్లను నడిపించి, సలహాలు ఇచ్చే పెద్దవాళ్లు అవసరం. తల్లిగా లేదా తండ్రిగా, మీకన్నా బాగా ఆ పని చేయగలిగేవాళ్లు ఇంకెవ్వరూ లేరు. నిజానికి అది మీ బాధ్యత. అయితే, అనుభవం ఉన్న ఇతరులు కూడా మీ పిల్లలకు కావాల్సిన సహాయం, సలహాలు ఇవ్వవచ్చు.

పెద్దవాళ్ల సహాయం ఎందుకు ముఖ్యం?

చాలా దేశాల్లో పిల్లలు పెద్దవాళ్లతో చాలా తక్కువ సమయం గడుపుతారు. వీటిని పరిశీలించండి:

• పిల్లలు ఎక్కువ సమయం స్కూల్లోనే గడుపుతారు. అక్కడ టిచర్లు, పెద్దవాళ్లకన్నా పిల్లలే ఎక్కువమంది ఉంటారు.

• అమ్మానాన్న ఇద్దరూ ఉద్యోగానికి వెళ్లిపోవడం వల్ల స్కూల్‌ తర్వాత కొంతమంది పిల్లలు ఇంటి దగ్గర ఒంటరిగా ఉంటారు.

• ఒక అధ్యయనం ప్రకారం, అమెరికాలో 8 నుండి 12 సంవత్సరాల మధ్య వయసు ఉన్న పిల్లలు రోజుకు సగటున ఆరు గంటలు వినోద కార్యక్రమాల కోసం వెచ్చిస్తున్నారు.a

హోల్డ్‌ ఆన్‌ టు యువర్‌ కిడ్స్‌ అనే పుస్తకం ఇలా చెప్తుంది: “పిల్లలు, ఎలా ఉండాలి ఏమి చేయాలి అనే విషయాల్లో సలహాలు, నిర్దేశం కోసం అమ్మానాన్నలు, టీచర్లు, బాధ్యతగల ఇతర పెద్దవాళ్ల దగ్గరకు కాకుండా . . . తోటి వయసు ఉన్న పిల్లల దగ్గరకు వెళ్తున్నారు.”

పిల్లలకు నిర్దేశం, సలహాలు ఎలా ఇవ్వాలి?

మీ పిల్లలతో సమయం గడపండి.

మంచి సూత్రాలు: “బాలుడు నడువవలసిన త్రోవను వానికి నేర్పుము వాడు పెద్దవాడైనప్పుడు దానినుండి తొలగిపోడు.”—సామెతలు 22:6.

పిల్లలు సాధారణంగా సలహాల కోసం తల్లిదండ్రుల వైపు చూస్తారు. నిజానికి పిల్లలు టీనేజ్‌లోకి అడుగుపెడుతున్నప్పుడు కూడా తోటి పిల్లలు ఇచ్చే సలహాల కన్నా తల్లిదండ్రులు ఇచ్చే సలహాలకే ఎక్కువ విలువ ఇస్తారు. “పెద్దవాళ్లు అవుతుండగా పిల్లల స్వభావం, వాళ్ల ప్రవర్తన పైన తల్లిదండ్రుల ప్రభావం చాలా ఎక్కువగా ఉంటుంది” అని డా. లారెన్స్‌ స్టీన్‌బర్గ్‌ యు అండ్‌ యువర్‌ ఎడాలసెంట్‌ అనే పుస్తకంలో రాశాడు. ఆయన తల్లిదండ్రులను సూచిస్తూ ఇంకా ఇలా చెప్తున్నాడు, ‘ఎదుగుతున్న పిల్లలు మీరు ఏమి ఆలోచిస్తున్నారో తెలుసుకోవాలనుకుంటారు, మీరు ఏమి చెప్తున్నారో వింటారు. వాళ్లు ఈ విషయాన్ని బయటకు చూపించకపోవచ్చు, మీరు చెప్పే ప్రతీ విషయాన్ని ఒప్పుకోకపోవచ్చు, కానీ అది నిజం.’

సలహాలకు, సహాయానికి పిల్లలు సహజంగా తల్లిదండ్రుల దగ్గరికి వస్తారు. వాళ్లకున్న ఈ సహజ అలవాటుని ఉపయోగించుకుని వాళ్లతో సమయం గడపండి. మీ అభిప్రాయాలను, విలువలను, మీ అనుభవాలను వాళ్లకు చెప్పండి.

అనుభవం ఉన్న పెద్దవాళ్ల సహాయం ఏర్పాటు చేయండి.

మంచి సూత్రాలు: “జ్ఞానుల సహవాసము చేయువాడు జ్ఞానముగలవాడగును.”—సామెతలు 13:20.

ఎదుగుతున్న పిల్లలకు మంచి ఆదర్శంగా ఉండే పెద్దవాళ్ల సహాయం మీరు తీసుకోగలరా? అలాంటి వాళ్లను మీ బాబుతో లేదా పాపతో సమయం గడిపేలా ఎందుకు ఏర్పాటు చేయకూడదు? దానర్థం తల్లిదండ్రులుగా మీకున్న అధికారాన్ని, బాధ్యతను మీరు వదిలేయాలని కాదు. మీ పిల్లలకు హాని చేయరని మీకు నమ్మకం ఉన్న పెద్దవాళ్లను మీ పిల్లలకు సహాయం చేసేలా ఏర్పాటు చేయండి. అది మీరు ఇచ్చే శిక్షణకు అదనంగా ఉండాలి. బైబిల్లో తిమోతి పెద్దవాడు అయ్యాక కూడా అపొస్తలుడైన పౌలు సహవాసం నుండి ఎంతో ప్రయోజనం పొందాడు, పౌలు కూడా తిమోతి స్నేహం నుండి ప్రయోజనం పొందాడు.—ఫిలిప్పీయులు 2:20, 22.

ఇదివరకులా, కుటుంబంలో అందరూ ఒకేచోట ఉండడం లేదు. గడిచిన శతాబ్దంలో, చాలా కుటుంబాల్లో అమ్మమ్మ-తాతయ్యలు, పెద్దనాన్న-పెద్దమ్మలు, మిగతా బంధువులు వేర్వేరు ప్రాంతాల్లో ఉంటున్నారు. అలాంటప్పుడు, మీరు కోరుకునే మంచి లక్షణాలు మీ పిల్లల్లో వచ్చేలా మీరు ఏం చేయవచ్చు? ఆ లక్షణాలు ఉన్న పెద్దవాళ్ల దగ్గర మీ పిల్లలు నేర్చుకునేలా మీరే ఏర్పాటు చేయవచ్చు.