2 కొరింథీయులు

6 మీరు దేవుని నుండి పొందిన అపారదయను నిర్లక్ష్యం చేయొద్దని దేవుని తోటిపనివాళ్లమైన మేము మిమ్మల్ని వేడుకుంటున్నాం. 2  ఎందుకంటే, “అనుకూలమైన సమయంలో మీ మొర విన్నాను, రక్షించే రోజున మీకు సహాయం చేశాను” అని దేవుడు చెప్తున్నాడు. ఇదిగో! ఇదే ఎంతో అనుకూలమైన సమయం. ఇదిగో! ఇదే రక్షించే రోజు.

3 మా పరిచర్యను తప్పుబట్టే అవకాశం ఏమాత్రం ఇవ్వకూడదని మేము ఎవ్వరికీ ఏ విషయంలోనూ ఎలాంటి ఆటంకం కలిగించడం లేదు. 4 అయితే, అన్ని విధాలుగా మమ్మల్ని మేము దేవుని పరిచారకులుగా సిఫారసు చేసుకుంటున్నాం; మేము ఎంతో సహించాం, శ్రమల్ని, ఇబ్బందుల్ని, కష్టాల్ని ఎదుర్కొన్నాం, 5 దెబ్బలు తిన్నాం, చెరసాలల్లో ఉన్నాం, అల్లరిమూకల్ని ఎదుర్కొన్నాం, కష్టపడి పనిచేశాం, నిద్రలేని రాత్రులు గడిపాం, కొన్నిసార్లు పస్తులున్నాం; 6 స్వచ్ఛమైన జీవితాన్ని గడుపుతున్నాం, జ్ఞానం ప్రకారం నడుచుకుంటున్నాం, ఓర్పునూ దయనూ చూపిస్తున్నాం, పవిత్రశక్తి నిర్దేశం ప్రకారం నడుచుకుంటున్నాం, వేషధారణలేని ప్రేమ చూపిస్తున్నాం, 7 నిజం మాట్లాడుతున్నాం, దేవుని శక్తిమీద ఆధారపడుతున్నాం. కుడి చేత్తో,* ఎడమ చేత్తో* నీతి ఆయుధాలు పట్టుకున్నాం; 8 కొందరు మమ్మల్ని గౌరవిస్తున్నారు, కొందరు అవమానిస్తున్నారు; కొందరు మా గురించి చెడుగా మాట్లాడుతున్నారు, కొందరు మంచిగా మాట్లాడుతున్నారు. ప్రజలు మమ్మల్ని మోసగాళ్లుగా ఎంచుతున్నారు కానీ మేము నిజమే మాట్లాడుతున్నాం; 9 తెలియనివాళ్లుగా చూస్తున్నారు కానీ మేము బాగా తెలిసినవాళ్లమే; చనిపోతున్నవాళ్లుగా* ఎంచుతున్నారు కానీ ఇదిగోండి మేము బ్రతికే ఉన్నాం; శిక్షించబడినవాళ్లుగా* చూస్తున్నారు కానీ మేము చనిపోలేదు; 10 దుఃఖంలో ఉన్నవాళ్లుగా ఎంచుతున్నారు కానీ మేము ఎప్పుడూ సంతోషంగానే ఉన్నాం; పేదవాళ్లుగా ఎంచుతున్నారు కానీ చాలామందిని ధనవంతులుగా చేస్తున్నాం; ఏమీ లేనివాళ్లుగా ఎంచుతున్నారు కానీ మా దగ్గర అన్నీ ఉన్నాయి.

11 కొరింథు సోదరులారా, మేము దాపరికం లేకుండా మాట్లాడుతున్నాం, మీ కోసం మా హృదయాలను విశాలంగా తెరిచాం. 12 మేము మీమీద ప్రేమ చూపించే విషయంలో ఎలాంటి హద్దులు పెట్టుకోలేదు. కానీ మీరు మాత్రం మా మీద ప్రేమ చూపించే విషయంలో హద్దులు పెట్టుకున్నారు. 13 అందుకే, మీరు నా పిల్లలు అనుకొని చెప్తున్నాను, మీరు కూడా మీ హృదయాలను విశాలంగా తెరచుకోండి.

14 అవిశ్వాసులతో జతకట్టకండి.* నీతికి, అవినీతికి ఏమైనా పొత్తు ఉంటుందా? వెలుగుకు, చీకటికి ఏమైనా సంబంధం ఉంటుందా? 15 క్రీస్తుకు, బెలియాలుకు* ఏమైనా పొంతన ఉంటుందా? విశ్వాసికి, అవిశ్వాసికి ఏమైనా పోలిక ఉంటుందా? 16 దేవుని ఆలయంలో విగ్రహాలకు చోటు ఉంటుందా? మనం సజీవుడైన దేవుని ఆలయంగా ఉన్నాం; ఎందుకంటే దేవుడు ఇలా చెప్పాడు: “నేను వాళ్లతో ఉంటాను, వాళ్ల మధ్య ఉంటాను, నేను వాళ్లకు దేవునిగా ఉంటాను, వాళ్లు నా ప్రజలుగా ఉంటారు.” 17 “‘అందుకే, వాళ్ల మధ్య నుండి బయటికి వచ్చేసి, వేరుగా ఉండండి,’ ‘అపవిత్రమైనదాన్ని ముట్టకండి,’ అని యెహోవా* చెప్తున్నాడు”; “‘నేను మిమ్మల్ని స్వీకరిస్తాను.’” 18 “‘నేను మీకు తండ్రిని అవుతాను, మీరు నాకు కొడుకులు, కూతుళ్లు అవుతారు’ అని సర్వశక్తిమంతుడైన యెహోవా* చెప్తున్నాడు.”