Respeitu ema seluk nia desizaun

1-2. Tanbasá dala ruma Ita-nia desizaun la hanesan ho ema seluk nian?

ITA iha esperiénsia kona-ba ema ruma kritika Ita tanba desizaun neʼebé Ita halo ka lae? Ka Ita rasik mós tesi-lia ba maluk Kristaun ruma nia desizaun ka lae? Karik ita hotu sei hatán sin ba pergunta sira-neʼe.

² Dala ruma ita-nia desizaun la hanesan ho ita-nia maluk Kristaun, maibé ita la presiza hakfodak. Tanbasá? Tanba ita hotu la hanesan. Ita ida-idak iha hanoin la hanesan. Ita hetan influénsia husi kultura, família, no ita rasik nia esperiénsia. Maibé ita labele husik ida-neʼe atu estraga dame no unidade iha kongregasaun.—Éf 4:3.

3. Karik ita sei halo saida se ita la konkorda ho maluk Kristaun ida nia desizaun?

³ Kuandu ita la konkorda ho maluk Kristaun ida nia desizaun, karik ita sente katak ita presiza koʼalia ba nia atu troka ninia desizaun, ka ita hakarak koʼalia ho ema seluk kona-ba neʼe. Karik ita halo nuneʼe ho motivu neʼebé diʼak. Ita hadomi irmaun-irmán sira, no ita hakarak buat neʼebé diʼak liu ba sira. (Prov 17:17) Tan neʼe, ita lakohi sira halo desizaun neʼebé ikusmai sira arrepende ka bele estraga sira-nia relasaun ho Jeová.

4-5. Saida mak ita presiza halo se irmaun ka irmán ida halo desizaun neʼebé la hanesan ho ita-nian?

⁴ Se ita sente katak irmaun ka irmán ida halo desizaun neʼebé la diʼak, ita presiza koʼalia ba nia ka lae? Dala ruma sin, dala ruma lae. Porezemplu, se ita hatene katak nia hanoin atu halo buat neʼebé kontra Bíblia nia mandamentu, ita presiza ajuda nia atu hadiʼa ninia hanoin tanba ita hadomi nia. (Prov 27:​5, 6) Maibé, saida mak ita presiza halo se irmaun ida deside atu halo buat neʼebé la kontra Bíblia maibé ninia desizaun la hanesan ho ita-nian? Ita bele hetan resposta husi eskritura tema ba lisaun neʼe. Ita ‘la tesi-lia ba nia tuir ita-nia hanoin rasik’.—Rom 14:1.

⁵ Maski nuneʼe, karik ita sente susar atu hatudu respeitu ba ninia desizaun. Iha lisaun neʼe, ita sei koʼalia kona-ba tanbasá ita presiza respeitu ema seluk nia desizaun no oinsá ita bele halo ida-neʼe. Maibé ulukliu, mai ita hanoin kona-ba situasaun balu neʼebé bele book ita atu tesi-lia ba ema seluk nia desizaun pesoál.

DESIZAUN PESOÁL NEʼEBÉ BELE BOOK ITA ATU TESI-LIA BA EMA SELUK

6-7. Temi toʼok situasaun neʼebé bele book ita atu tesi-lia ba ema seluk nia desizaun.

⁶ Hanesan ita koʼalia ona, karik ita iha hanoin neʼebé metin kona-ba buat balu tanba hetan influénsia husi família ka ita-nia esperiénsia rasik. Karik ita hein katak ema seluk mós iha hanoin hanesan ho ita. Maibé, tuir loloos laʼós sempre hanesan neʼe. Hanoin toʼok situasaun balu. Situasaun 1: Iha irmaun ida neʼebé ninia apá mak lanu-teen. Depois irmaun neʼe aprende lia-loos, nia tuir festa no haree irmaun-irmán sira hemu tua. Irmaun neʼe la kontente no hatete katak buat neʼebé sira halo mak sala. Situasaun 2: Uluk irmán ida moras todan maibé sai diʼak fali. Ikusmai, nia rona katak irmán ida seluk mós hetan moras neʼebé hanesan. Entaun nia hakarak ajuda no obriga irmán neʼe atu hetan tratamentu hanesan ninian. Nia haruka irmán neʼe atu halo dieta ka hemu ai-moruk neʼebé uluk nia hemu. Situasaun 3: Irmaun ida lakohi duni atu iha ligasaun ho relijiaun neʼebé uluk nia tuir. Bainhira nia hatene katak maluk Kristaun ida tuir funerál iha igreja, nia sai hirus.a

⁷ Situasaun 4: Irmaun ida boot iha tempu neʼebé ema barak hanoin katak la diʼak ba mane atu husik hasarahun naruk ka feto hatais kalsa ba reuniaun ka haklaken. Irmaun neʼe hatene katak tuir matadalan foun, la sala atu irmaun husik hasarahun ka irmán hatais kalsa tixu. Maibé nia kontinua koʼalia ba ema seluk katak irmaun sira labele husik hasarahun no irmán sira tenke hatais saia ka vestidu kuandu halaʼo atividade espirituál. Situasaun 5: Katuas kongregasaun ida hatene kona-ba irmaun ida neʼebé aumenta edukasaun no ikusmai husik lia-loos. Agora nia rona katak irmaun joven ida iha ninia kongregasaun deside atu aumenta edukasaun. Katuas neʼe hanoin barak no koʼalia ho irmaun joven neʼe no ninia inan-aman hodi husu sira atu troka sira-nia hanoin.

8. (a) Saida mak bele book inan-aman atu iha hanoin negativu kona-ba inan-aman seluk? (b) Oinsá mak hanoin negativu kona-ba ema seluk bele afeta kongregasaun?

⁸ Hanoin mós kona-ba situasaun neʼebé bele afeta inan-aman sira. Situasaun 6: Ita hakaʼas an haboot Ita-nia oan “ho dixiplina no ho hanorin neʼebé tuir Jeová nia hakarak”. (Éf 6:4) Maibé Ita haree katak inan-aman Kristaun seluk husik sira-nia oan livre. Porezemplu, sira husik sira-nia oan atu fila uma tarde, halimar vídeo game neʼebé la iha violénsia, ka iha telefone maski oan sira idade sei kiʼik. Rezultadu mak Ita-nia oan sente la kontente ho lei neʼebé Ita halo ba sira. Karik oan husu: “Tanbasá apá no amá la hanesan ho haʼu-nia kolega nia inan-aman?” Situasaun hanesan neʼe bele book Ita atu hanoin negativu kona-ba inan-aman seluk. Klaru, kuandu ema Kristaun seluk halo desizaun neʼebé ita la konkorda, neʼe bele halo ita la kontente no tesi-lia ba sira. Porezemplu, Ita la konkorda ho dalan neʼebé ema seluk gasta osan, bá feriadu, ka atividade neʼebé sira hili. Maibé ita labele husik ita-nia sentimentu sai importante liu fali unidade iha kongregasaun.

9. Ita presiza hanoin-hetan kona-ba saida? (Haree mós dezeñu.)

⁹ Karik ema Kristaun ida-idak nia desizaun mak la hanesan, maibé neʼe la dehan katak sempre ida mak loos no ida mak sala. (Rom 14:5) Bainhira Bíblia haruka ema Kristaun atu “iha hanoin neʼebé hanesan”, neʼe katak ita hotu presiza halo tuir Jeová nia hakarak, laʼós tenke iha hanoin neʼebé hanesan kona-ba buat pesoál hotu. (2 Kor 13:11) Ita bele kompara ita-nia desizaun pesoál ho ita-nia viajen atu bá fatin ruma. Baibain, iha dalan barak atu toʼo iha fatin ida, no ita hili dalan neʼebé tuir ita-nia hakarak no kbiit. Hanesan neʼe mós, ema Kristaun bele halo desizaun pesoál neʼebé la hanesan, maibé ita hotu nia objetivu mak ida deʼit: Neʼe mak atu halo Jeová kontente. Tan neʼe, ita la tesi-lia kona-ba desizaun pesoál neʼebé ema seluk halo.—Mt 7:1; 1 Tes 4:11.

TANBASÁ ITA PRESIZA RESPEITU EMA SELUK NIA DESIZAUN?

10. Tuir Tiago 4:​12, ita la iha direitu atu halo saida, no tanbasá?

¹⁰ Bíblia fó sai razaun tanbasá ita presiza respeitu ema seluk nia desizaun. Hanoin toʼok razaun balu. Ita la iha direitu atu tesi-lia ba ema seluk nia desizaun pesoál. (Lee Tiago 4:12.) Só Jeová deʼit mak iha direitu atu fó ukun-fuan no tesi-lia. Tan neʼe, ita-nia irmaun-irmán sira tenke hatán ba Jeová, laʼós mai ita. (Rom 14:10) Ita la iha direitu atu tesi-lia ka kritika ema seluk nia desizaun hodi tuir ita-nia hanoin no sentimentu rasik.b

11. Oinsá mak ita bele haburas unidade iha kongregasaun laran? (Haree mós foto.)

¹¹ Jeová hakarak ninia atan sira iha unidade, maibé la espera katak ema hotu tenke hanesan. Tuir loloos, Jeová gosta buat oioin neʼebé diferente! Ita haree ida-neʼe liuhusi kriasaun. Porezemplu, ai-tahan ida-idak iha modelu neʼebé la hanesan. No hanoin toʼok kona-ba ita ema. Populasaun iha mundu mak biliaun ualu liu, maibé la iha ema ida mak hanesan duni ho ema seluk kona-ba dalan atu hanoin no hahalok. Jeová kria ita ida-idak la hanesan. Nia lakohi ema hotu mak hanesan deʼit, maibé hakarak ita atu iha unidade. Tan neʼe, bainhira ema seluk halo buat neʼebé diferente ho ita, diʼak atu nafatin haburas dame duké husik ida-neʼe haketak ita. Ba ita, unidade iha kongregasaun mak importante liu fali ita-nia hanoin no hakarak.—Rom 14:19.

OINSÁ ATU HATUDU RESPEITU BA EMA SELUK NIA DESIZAUN

12-13. Saida mak ita presiza hanoin-hetan se ita sente katak ema ruma “laʼo sala dalan”? (Galásia 6:1; haree mós kaixa “Bainhira Ita la konkorda”.)

¹² Kuandu ema seluk halo desizaun pesoál. Husu Ita-nia an: ‘Ema neʼe “laʼo sala dalan”, ka ninia dalan mak la hanesan deʼit ho haʼu-nian?’ Se nia laʼo sala dalan duni hodi kontra Bíblia nia mandamentu, husu Ita-nia an: ‘Haʼu iha direitu tuir Bíblia atu koʼalia ba nia, ka iha ema ruma neʼebé diʼak liu atu halo ida-neʼe?’ Se Ita iha direitu atu ajuda nia, koko halo ida-neʼe ho laran-maus. (Lee Galásia 6:1.) Dala barak buat neʼebé ema seluk halo mak laʼós kontra Bíblia, maibé la hanesan deʼit ho buat neʼebé ita hakarak. Se nuneʼe, keta duvida ho nia ka koʼalia negativu kona-ba ninia desizaun. Hatudu respeitu ba ninia direitu atu halo desizaun ba ninia an, no keta tesi-lia.—Rom 14:​2-4.

¹³ Hanoin toʼok ezemplu neʼe: Se Ita bá restaurante ho kolega ida, Ita sei obriga nia atu hameno hahán neʼebé hanesan ho Ita ka lae? Lae. Ita hakarak hatudu respeitu hodi husik nia hili rasik buat neʼebé nia hakarak. No loloos, hahán neʼebé nia hili sei la fó impaktu boot ba Ita. Ita mós lakohi Ita-nia kolega obriga Ita atu han buat neʼebé tuir ninia hakarak. Hanesan neʼe mós, ita bele hatudu respeitu ba ema seluk hodi husik sira halo desizaun rasik no la koko atu obriga sira tuir ita-nia hakarak.

14. Oinsá mak Ita bele haburas unidade kuandu halo desizaun pesoál? (1 Korinto 8:​12, 13)

¹⁴ Kuandu Ita rasik mak halo desizaun pesoál. Ita bele haburas unidade hodi hakaʼas an atu foti desizaun neʼebé la halo ema seluk sidi. (Lee 1 Korinto 8:​12, 13.) Dala ruma Ita hatene katak desizaun neʼebé Ita atu foti mak la kontra Bíblia. Maibé desizaun neʼe sei “lori diʼak” ba ema seluk ka lae?c (1 Kor 10:​23, 24) Iha situasaun hanesan neʼe, duké hanoin ‘Neʼe haʼu-nia direitu’, diʼak liu atu hanoin kona-ba ema seluk nia sentimentu. (Rom 15:1) Maibé, ita foin koʼalia katak ema seluk presiza hatudu respeitu ba ita-nia desizaun pesoál, loos ka lae? Sin. Sira presiza respeitu ita-nia desizaun no ita mós respeitu sira-nia desizaun. Maibé ita mós presiza hanoin kona-ba Roma 12:​18, neʼebé dehan: “Se bele karik, hakaʼas an atu moris iha dame ho ema hotu.” Tan neʼe, ita halo buat hotu neʼebé ita bele atu mantein unidade no lakohi halo ema seluk sidi ho ita-nia desizaun.

15. Oinsá mak katuas sira bele haburas unidade iha kongregasaun? (1 Korinto 4:6)

¹⁵ Katuas kongregasaun respeitu ema seluk nia desizaun. Katuas sira haburas unidade iha kongregasaun hodi la halo lei kona-ba asuntu pesoál no la “halo liu fali buat neʼebé hakerek tiha ona” iha Bíblia. (Lee 1 Korinto 4:6.) Neʼe katak sira mós la fó sai konsellu neʼebé liu fali buat neʼebé hakerek iha ita-nia publikasaun sira. Kuandu maluk Kristaun ida husu ajuda, katuas sira sei kuidadu atu la sadere deʼit ba sira-nia esperiénsia rasik, maibé sira tenke fó konsellu neʼebé bazeia ba Bíblia.—Isa 48:​17, 18.

16. Oinsá mak katuas ida bele hatudu respeitu ba desizaun neʼebé grupu katuas halo?

¹⁶ Katuas sira mós hatudu respeitu ba desizaun neʼebé grupu katuas halo. Bainhira grupu katuas halo orasaun hodi husu espíritu santu nia ajuda, hanoin didiʼak Bíblia nia matadalan, no halo desizaun hamutuk, katuas hotu presiza apoia desizaun neʼe maski sira ida iha ideia seluk no maioria la konkorda ho nia. (Éf 5:17) Katuas sira mós presiza halo tuir didiʼak matadalan husi Bíblia no ita-nia organizasaun no labele koko atu aplika matadalan tuir deʼit sira rasik nia hanoin. Porezemplu, katuas ida labele uza deʼit fraze ida husi informasaun iha ita-nia publikasaun atu apoia ninia ideia, maibé nia presiza haree ba informasaun neʼe kompletu.

17. Kuandu Ita respeitu ema seluk nia desizaun, neʼe bele lori benefísiu saida?

¹⁷ Hanesan ita aprende ona, ita ida-idak mak úniku. Ita ida-idak iha hanoin no hakarak rasik. Maibé neʼe mak buat neʼebé diʼak! Tanba ita hotu mai husi situasaun moris la hanesan, no hahalok la hanesan, neʼe halo kongregasaun sai furak liu no halo ita kontente. Tan neʼe, keta husik ita-nia diferensa haketak ita, maibé haburas dame. Ita respeitu ema seluk nia desizaun pesoál no kuidadu atu la foti desizaun neʼebé halo ema seluk sidi. Ita-nia hakaʼas an sei la sai saugati deʼit. Ita sei hetan bensaun, haksolok, no unidade iha kongregasaun.—Sal 133:1; Mt 5:9.