Oan sira mak “liman-rohan husi Jeová”

LIAFUAN “liman-rohan” halo Ita hanoin kona-ba saida? Karik Ita hanoin kona-ba osan, rai, ka sasán ruma neʼebé Ita-nia família fó tutan husi jerasaun ba jerasaun. Liman-rohan mak buat neʼebé folin-boot no ita hakarak tau matan ba ida-neʼe ho didiʼak.

Bíblia hatete: “Oan sira mak liman-rohan husi Jeová.” (Sal 127:3) Tan neʼe, inan-aman Kristaun sei haree sira-nia oan nuʼudar prezente folin-boot husi sira-nia Aman iha lalehan. Sira halo buat hotu neʼebé sira bele atu tau matan ba oan sira-nia presiza iha dalan fíziku, emosaun, no espirituál.

Maibé triste mak inan-aman balu la haree sira-nia oan nuʼudar prezente husi Maromak. (Isa 49:15; 2 Tim 3:​1-3) Balu fali hakarak tau matan ba sira-nia oan ho didiʼak maibé sente susar. Saida deʼit mak halo susar ba inan-aman atu tau matan ba sira-nia oan? Jeová hakarak inan-aman atu halo saida? No oinsá mak inan-aman Kristaun bele haboot sira-nia oan ho diʼak?

SUSAR SIRA

• Presaun husi komunidade no família. Iha rai balu, ema respeitu liu inan-aman neʼebé iha oan barak. Tan neʼe, família ka viziñu sira fó presaun ba feen-laʼen balu atu iha oan barak maski neʼe lori susar.

• Hanoin barak kona-ba futuru. Iha rai neʼebé labarik barak mate tanba malnutrisaun, moras, no ladún iha doutór, ema hanoin atu iha oan barak hodi nuneʼe oan balu bele toʼo idade boot. Iha mós feen-laʼen neʼebé hakarak iha oan barak hodi nuneʼe oan sira bele tau matan ba sira kuandu sai ferik-katuas. Ema barak hanoin hanesan neʼe liuliu iha rai neʼebé governu ladún tau matan ba ferik-katuas sira-nia presiza.

• Planeamentu familiár. Feen-laʼen balu ladún iha opsaun kona-ba métodu atu prevene isin-rua. Ema balu taʼuk kona-ba ai-moruk neʼebé kualidade la diʼak no fó impaktu aat ba saúde. Iha mós ema neʼebé la iha osan atu hola ai-moruk sira-neʼe.a

JEOVÁ HAKARAK INAN-AMAN ATU HALO SAIDA?

Tau matan ba oan nia presiza. Jeová tau fiar ba inan-aman atu sustenta oan sira. Nia hakarak inan-aman atu serbisu hodi bele fó ai-han, roupa, no hela-fatin ba oan sira. Jeová mós hakarak inan-aman atu eduka sira-nia oan. Tan neʼe, inan-aman Kristaun lakohi haruka sira-nia oan atu bá eskola iha fatin dook, maibé hakarak sira-nia oan hela hamutuk ho sira, no ajuda sira atu hetan skill ruma hodi bele sustenta sira-nia moris kuandu sira sai boot. Inan-aman mós fó sira-nia tempu ba oan ida-idak atu nuneʼe sira bele sente seguru no domin. Iha tempu hanesan, Jeová la espera inan-aman atu sai riku. Tuir loloos, inan-aman neʼebé Jeová hili atu haboot ninia Oan-Mane mak ema neʼebé moris simples maibé serbisu ho badinas.—Mt 13:​55, 56; Lc 2:24.

Bíblia nia prinsípiu: “Se ema ida la tau matan ba ninia família, no liuliu ba sira neʼebé iha ninia umakain rasik, nia nega ona ninia fiar no aat liu fali ema neʼebé la iha fiar.”—1 Tim 5:8.

Jeová komprende katak inan-aman sira karik presiza hetan ajuda bainhira sira sai ferik-katuas. Dalan ida neʼebé oan sira hatudu respeitu ba inan-aman mak hodi ajuda sira nuʼudar sira-nia idade aumenta. (Éx 20:12; 1 Tim 5:4) Maski nuneʼe, Jeová kontente bainhira inan-aman sira hanoin liu kona-ba oinsá atu tau matan ba sira-nia oan duké hanoin oinsá mak sira-nia oan sei tau matan ba sira.—2 Kor 12:14.

Ajuda oan aprende kona-ba Jeová. Inan-aman Kristaun mós iha responsabilidade atu ajuda sira-nia oan hadomi no serbí Jeová. Ba Jeová, neʼe mak buat importante liu neʼebé inan-aman sira presiza hanorin ba oan sira.—Deut 6:​6, 7.

Bíblia nia prinsípiu: “Kontinua haboot [imi-nia oan] ho dixiplina no ho hanorin neʼebé tuir Jeová nia hakarak.”—Éf 6:4.

JEOVÁ HAKARAK AJUDA ITA

Halo planu uluk. Se Ita hanoin atu iha oan, hanoin didiʼak uluk kona-ba Ita-nia situasaun. Porezemplu, Ita iha osan natoon atu fó ai-han, roupa, no edukasaun ba oan barak ka lae? Se lae, koʼalia hamutuk ho Ita-nia kaben kona-ba atu iha oan naʼin-hira. Hanoin-hetan katak imi presiza tau matan ba oan ida-idak tuir Jeová nia hakarak. Klaru, Jeová komprende katak dala ruma buat neʼebé imi planu nanis la sai loos. (Ecle 9:11) Maibé Jeová sei haraik bensaun ba imi-nia hakaʼas an atu sai inan-aman neʼebé diʼak.

Bíblia nia prinsípiu: “Ema badinas nia planu sei hetan duni susesu, maibé ema hotu neʼebé ansi sei sai kiak duni.”—Prov 21:5.

“Se ema ida hakarak harii uma-andár, nia sei tuur uluklai hodi sura ninia osan, loos ka lae? Nia halo nuneʼe hodi bele hatene se nia iha osan toʼo atu halo hotu uma neʼe.”—Lc 14:28.

Tau uluk Jeová iha Ita-nia família nia moris. Keta haluha katak serbí Jeová mak importante liu. Se Ita iha oan, hanorin oan ida-idak atu hadomi Jeová. Ajuda sira atu tau atensaun no aprende iha reuniaun sira. Halaʼo Adorasaun Família nian semana-semana. Treinu Ita-nia oan oinsá atu haklaken. Keta fó fali Ita-nia responsabilidade nuʼudar inan-aman ba Ita-nia oan neʼebé boot ka ba ema seluk. Ita presiza tempu no hakaʼas an atu ajuda oan hadomi Jeová, maibé Ita sei kontente tebes kuandu haree sira serbí Jeová.

Bíblia nia prinsípiu: “La iha buat ida neʼebé halo haʼu haksolok liu fali ida-neʼe: katak haʼu rona haʼu-nia oan sira kontinua laʼo iha lia-loos.”—3 João 4.b

Tau fiar ba Jeová. Maski Ita hanoin atu iha oan ka iha oan ona, keta haluha katak Jeová nia hakarak mak importante liu duké ema nia toman no kultura.

Se Ita deside atu iha oan uitoan deʼit, fiar katak Jeová sei tau matan ba Ita kuandu Ita sai idade. Keta hanoin katak presiza iha oan atu sira bele sustenta Ita kuandu sai ferik-katuas. Ita la presiza hanoin barak katak la iha ema ida mak sei ajuda Ita. Jeová promete atu tau matan ba Ita, no nia sempre halo tuir ninia promesa.—Jos 23:14.

Bíblia nia prinsípiu: “Tau fiar ba Jeová ho ó-nia laran tomak, no labele sadere ba ó-nia matenek rasik. Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.”—Prov 3:​5, 6.

“Uluk haʼu joven no agora haʼu idade ona, maibé haʼu seidauk haree Maromak husik hela ema laran-loos, no seidauk haree ninia oan sira husu hahán.”—Sal 37:25.

“Kontinua buka uluk Maromak nia Ukun no buat neʼebé loos tuir Maromak nia haree, no nia sei fó mós buat sira seluk ba imi.”—Mt 6:33.

Oan sira mak prezente folin-boot neʼebé Jeová fó ba inan-aman. Jeová kontente tebes bainhira kaben-naʼin Kristaun haboot sira-nia oan hodi tuir ninia hakarak. Sira ho domin fó buat neʼebé oan sira presiza iha dalan fíziku, emosaun, no espirituál. Sira planu kona-ba atu iha oan hira, no tau uluk Jeová nia hakarak liu fali ema nia toman no kultura. Hodi halo nuneʼe, sira hatudu katak sira-nia oan mak “liman-rohan husi Jeová”.