Pergunta husi lee-naʼin

Bainhira mak nasaun sira sei deklara “dame no hakmatek”?

Hanesan ita aprende ona husi “Pergunta husi lee-naʼin” neʼebé fó sai iha Livru Haklaken foin lalais neʼe,a lakleur tan Jeová sei tau “ninia hanoin” iha “dikur sanulu” (governu hotu) nia laran, neʼe mak atu fó sira-nia kbiit ba ‘animál fuik neʼebé kór-mean’ neʼebé reprezenta Nasoins Unidas. Bíblia temi kona-ba animál kór-mean neʼe nuʼudar “animál fuik nia estátua”. (Apok 13:​14, 15; 17:​3, 16, 17) Tuirmai, “dikur sanulu” ho animál fuik neʼebé hetan ona kbiit sei halakon relijiaun falsu hotu iha mundu. Entaun, nasaun sira sei deklara “dame no hakmatek”b antes ka depois relijiaun falsu lakon?—1 Tes 5:3.

Resposta simples mak ita la hatene ho loloos bainhira mak nasaun sira sei deklara “dame no hakmatek”. Se ita hatene didiʼak kona-ba neʼe, ita sei la presiza matan-moris. Maibé Jesus fó konsellu beibeik ba ninia dixípulu sira atu “matan-moris nafatin”. (Mt 24:42; 25:13; 26:41) Agora, mai ita buka-hatene didiʼak profesia neʼebé apóstolu Paulo fó sai iha ninia karta ba ema Tesalónika.

Paulo hakerek: “Bainhira sira dehan: ‘Dame no hakmatek!’, tuirmai sira sei lakon derrepente deʼit.” (1 Tes 5:​2, 3) Toʼo agora, ita-nia publikasaun sira esplika Paulo nia liafuan iha dalan tuirmai neʼe: Nasaun sira sei deklara “dame no hakmatek” foin antes terus boot hahú, no buat primeiru neʼebé akontese iha terus boot mak Babilónia Boot ka relijiaun falsu iha mundu tomak sei lakon. Deklarasaun kona-ba “dame no hakmatek” mak sei sai sinál neʼebé hatudu katak terus boot besik atu hahú.

Maibé, hodi estuda didiʼak Bíblia, haree hanesan iha posibilidade ida tan atu esplika profesia neʼe. Karik depois relijiaun falsu lakon ona mak nasaun sira sei deklara “dame no hakmatek”. Tanbasá bele hatete hanesan neʼe? Hanoin toʼok pergunta sira tuirmai.

Oinsá mak relijiaun falsu envolve iha nasaun sira-nia funu? Bíblia esplika: “Iha sidade neʼe [“Babilónia Boot”, ka “feto-aat”] . . . iha raan husi sira hotu neʼebé ema oho tiha iha mundu.” (Apok 17:​1, 5; 18:24) Husi tempu uluk toʼo ohin loron, feto-aat neʼebé hanaran Babilónia Boot mak promove funu entre nasaun sira no hamosu terrorizmu. Relijiaun falsu mak hun ba funu no violénsia duké haburas dame no hakmatek. Tan neʼe, karik nasaun sira sei deklara “dame no hakmatek” depois Babilónia Boot lakon tiha. Neʼe mak posibilidade deʼit, ita labele hatene ho loloos.

Saida mak sei akontese depois nasaun sira deklara “dame no hakmatek”? Paulo hatete: “Sira sei lakon derrepente deʼit.” (1 Tes 5:3) Se nasaun sira deklara uluk “dame no hakmatek” no tuirmai mak relijiaun falsu lakon, karik presiza tempu kleur uitoan atu nasaun sira lakon mohu. Maibé Paulo dehan katak nasaun sira sei lakon depois sira deklara “dame no hakmatek”. Tan neʼe, posibilidade mak relijiaun falsu sei lakon uluk no depois mak nasaun sira sei deklara “dame no hakmatek”, no tuirmai nasaun hotu sei lakon derrepente.

Jeová nia povu nia reasaun mak oinsá bainhira buat sira-neʼe sei akontese? Paulo hatete: “Maun-alin sira, imi laʼós iha nakukun laran, atu loron neʼe la kaer toman imi derrepente deʼit.” (1 Tes 5:4) Hanoin toʼok: Se relijiaun falsu lakon tiha mak nasaun sira sei deklara “dame no hakmatek”, Jeová nia povu sei hatene katak lakleur tan nasaun sira sei lakon. Maibé, hanesan hakerek iha 1 Tesalónika 5:​2, nasaun sira sei hakfodak bainhira lakon derrepente tanba neʼe sei mai hanesan naʼok-teen ida.

Buat neʼebé ita hatene ho klaru mak neʼe: Lakleur tan, “dikur sanulu” no animál fuik neʼebé hetan ona kbiit mak sei halakon relijiaun falsu. Ho akontesimentu ida-neʼe mak terus boot sei hahú. Ita mós hatene katak iha momentu ida, nasaun sira sei deklara “dame no hakmatek”. Ida-neʼe sei akontese bainhira? Iha posibilidade rua. Posibilidade primeiru: Nasaun sira sei deklara “dame no hakmatek” antes relijiaun falsu lakon. Posibilidade segundu: Nasaun sira sei fó sai deklarasaun neʼe depois sira halakon tiha relijiaun falsu. Ita presiza hein no buka-hatene saida mak sei akontese. Dala barak ita bele komprende ho loloos Bíblia nia profesia kuandu profesia neʼe kumpre daudaun ka depois sira sai loos ona ho kompletu.—Kompara ho João 12:16.

Nuʼudar ita hein ba tempu neʼe, buat neʼebé importante liu mak laʼós kona-ba bainhira mak nasaun sira sei deklara “dame no hakmatek”, maibé oinsá Ita hatudu laran-metin ba Maromak. Ita tenke “hadeer nafatin no kontinua matan-moris” hodi bele prepara an maski hasoru situasaun naran deʼit.—1 Tes 5:6.