Hetan benefísiu husi arranju kona-ba grupu haklaken

1-2. Ema barak sente oinsá ho arranju kona-ba grupu haklaken?

ITA hanoin-hetan tempu neʼebé Ita foin sai haklaken-naʼin ka lae? Iha tempu neʼebá, Ita sente kontente tanba sai parte ba grupu boot husi Jeová nia atan neʼebé hahiʼi ninia naran. (Sal 148:​1, 2, 12, 13) Maibé iha tempu hanesan, karik Ita mós sai parte ba grupu haklaken neʼebé kiʼik hamutuk ho irmaun-irmán balu deʼit husi kongregasaun. Grupu kiʼik neʼe ajuda ita kumpre ita-nia knaar atu haklaken liafuan diʼak kona-ba Maromak nia Ukun “iha mundu tomak”.—Mt 24:14.

² Ita sente oinsá ho arranju kona-ba grupu haklaken? Irmán ida naran Wendya hatete: “Arranju neʼe ajuda tebes haʼu. Haʼu aprende atu haklaken no hanorin iha dalan diʼak liután, hetan ajuda atu halo planu espirituál no kumpre ida-neʼe, no mós hetan belun diʼak sira. Neʼe mak rezultadu husi arranju neʼebé domin.” Irmaun ida naran Rich hatete: “Haʼu sente katak serbí nuʼudar katuas ba grupu haklaken mak priviléjiu ida. Maski haklaken-naʼin ida mak ajuda ema ida atu laʼo ba oin toʼo hetan batizmu, maibé katuas ba grupu haklaken iha oportunidade úniku atu ajuda ema neʼe atu sai Jeová nia atan neʼebé diʼak liután ba tinan sira tuirmai.” Irmán ida naran Dina hatete: “Arranju neʼe mak furak tebes! Haʼu haree haʼu-nia grupu nuʼudar haʼu-nia família.”

3. Iha lisaun neʼe, ita sei koʼalia kona-ba saida?

³ Iha lisaun neʼe, ita sei koʼalia kona-ba katuas ba grupu haklaken no ninia asistente nia knaar no oinsá sira ajuda haklaken-naʼin sira iha grupu. Tuirmai, ita sei koʼalia kona-ba oinsá mak ita ida-idak bele apoia ema seluk iha ita-nia grupu. Ikusliu, ita sei haree oinsá ita bele hetan benefísiu husi arranju kona-ba grupu haklaken.

KATUAS BA GRUPU HAKLAKEN NO NINIA ASISTENTE

4. (a) Objetivu husi katuas ba grupu haklaken mak saida? (b) Oinsá mak nia tau matan ba sira neʼebé iha ninia grupu? (Haree kaixa “Sujestaun ba katuas neʼebé tau matan grupu”.)

⁴ Grupu katuas mak hili katuas idab atu serbí nuʼudar katuas ba grupu haklaken ho objetivu atu ajuda haklaken-naʼin sira laʼo ba oin iha dalan espirituál. Oinsá mak nia halo ida-neʼe? Primeiru, nia hatudu interese ba ema ida-idak iha ninia grupu. (Prov 27:23) Nia sai bibi-atan neʼebé matan-moris no hanoin bibi sira hodi buka-hatene sira hotu nia kondisaun espirituál. Hodi halo nuneʼe, nia bele ajuda haklaken-naʼin sira iha dalan espirituál, emosionál, no fó apoiu tuir sira ida-idak nia presiza. (Prov 12:25; Isa 32:2; Tgo 2:​15-17) Segundu, nia ajuda haklaken-naʼin ida-idak atu haklaken ho badinas. Nia hatudu ezemplu kona-ba haklaken ho laran-manas, liuliu iha findesemana. Nia mós haklaken ho ema ida-idak iha ninia grupu atu bele anima no fó treinu. Se dala ruma nia labele tuir grupu, nia presiza konfirma katak ninia asistente ka haklaken-naʼin neʼebé kumpre kritéria atu tau matan. Terseiru, nia ajuda irmaun sira neʼebé batizmu ona atu kumpre kritéria hodi bele kaer responsabilidade oioin iha kongregasaun. (1 Tim 3:1) Nia gaba sira ho laran, fó konsellu husi Bíblia, no treinu beibeik hodi sira bele sai atan ba kongregasaun no katuas. Tanba katuas ba grupu haklaken nia knaar mak importante, grupu katuas sei hili katuas neʼebé kumpre liu kritéria atu kaer knaar neʼe.

5. Saida deʼit mak bele halo susar ba katuas ba grupu haklaken?

⁵ Iha buat barak neʼebé halo susar ba katuas ba grupu haklaken atu ajuda sira neʼebé iha ninia grupu. Hanoin toʼok katuas ida naran Jorg husi Alemaña. Hanesan katuas sira seluk, nia tenke kaer knaar barak iha kongregasaun. Nia hatete: “Kaer knaar oioin iha tempu hanesan mak la fasil. Tan neʼe, susar atu kumpre haʼu-nia planu atu kontaktu ema hotu iha haʼu-nia grupu.” Katuas ida husi Uganda naran Abel ho idade 70 hatete: “Ami-nia kongregasaun iha katuas no atan uitoan deʼit. Tan neʼe, grupu haklaken ida-idak mak boot. Neʼe halo susar mai haʼu atu anima beibeik ema ida-idak.” No katuas ida naran Obed husi Suriname hatete: “Haʼu gosta fó treinu ema seluk. Maibé neʼe han tempu no enerjia, no presiza tempu kleur atu haree rezultadu. Tan neʼe, haʼu ladún treinu sira tanba okupadu ho buat seluk.” Saida mak bele ajuda katuas sira neʼebé hasoru situasaun hanesan neʼe?

6. Kuandu grupu haklaken mak kiʼik, oinsá neʼe bele ajuda katuas ba grupu atu halaʼo ninia knaar?

⁶ Se bele, grupu haklaken tenke kiʼik atu katuas ba grupu bele koñese didiʼak ema hotu iha grupu no ajuda sira atu metin nafatin iha lia-loos. Oinsá se iha katuas uitoan deʼit? Duké halo grupu neʼebé boot toʼo katuas ba grupu labele kumpre ninia objetivu, grupu katuas bele fó knaar temporáriu ba atan ba kongregasaun atu tau matan ba grupu. Kuandu grupu ida-idak mak kiʼik, neʼe sei ajuda katuas ba grupu halaʼo ninia knaar neʼebé importante liu, neʼe mak atu ajuda irmaun-irmán ida-idak atu nafatin laran-metin ba Jeová no tahan hasoru susar sira.

7. Se kongregasaun iha katuas uitoan deʼit, katuas ba grupu bele halo saida? (1 Pedro 5:2) (Haree mós foto.)

⁷ Se Ita-nia kongregasaun iha katuas uitoan deʼit no Ita mak katuas ba grupu, fokus treinu Ita-nia asistente atu ajuda tau matan ba Maromak nia bibi sira. (Lee 1 Pedro 5:2.) Fó knaar balu ba nia. Porezemplu, dala ruma Ita bele husu nia atu dirije grupu haklaken. Halo orasaun no koʼalia hamutuk ho nia kona-ba haklaken-naʼin sira-nia kondisaun espirituál. Lori Ita-nia asistente atu halo vizita bibi-atan nian no fó matadalan ba nia antes no depois vizita. Neʼe sei ajuda Ita-nia asistente atu kumpre kritéria nuʼudar katuas ba grupu haklaken iha futuru. (2 Tim 2:2) Ita mós bele husu maluk Kristaun neʼebé maduru atu treinu haklaken-naʼin sira. Pioneiru no haklaken-naʼin neʼebé iha esperiénsia bele haklaken ho sira neʼebé foun ka ladún iha esperiénsia. No haklaken-naʼin neʼebé maduru bele hanorin oinsá atu hahú konversa, halo vizita fali, no halaʼo estudu Bíblia. Agora, mai ita haree dalan tolu oinsá ita ida-idak bele apoia ita rasik nia grupu haklaken.

OINSÁ ITA BELE APOIA ITA-NIA GRUPU HAKLAKEN?

8. Oinsá mak ita bele apoia ita-nia grupu haklaken? (Roma 1:12)

⁸ Tuir grupu. Ita bele “anima no hametin malu” hodi haklaken hamutuk ho ema seluk iha Ita-nia grupu. (Lee Roma 1:12.) Haklaken hamutuk mós bele ajuda Ita sente seguru no fiar an kuandu koʼalia ho ema. Se Ita-nia serbisu halo susar ba Ita atu apoia grupu haklaken, karik Ita bele husu ba Ita-nia patraun atu halo mudansa ba Ita-nia oráriu serbisu. Karik Ita sei hakfodak ho ninia resposta. (Neem 2:​4-6) Se Ita mak idade ka saúde ladún diʼak atu tuir grupu, Ita bele koʼalia ho katuas neʼebé tau matan ba Ita-nia grupu. Karik nia bele halo arranju atu Ita bele tuir grupu liuhusi vídeo konferénsia, hakerek karta ka haklaken liuhusi telefone ho ema seluk. Se Ita mak joven no saúde diʼak maibé sente susar atu bá haklaken beibeik, Ita mós bele planu nanis ho ema ruma iha Ita-nia grupu hodi bele haklaken semana-semana. Karik Ita mós presiza halo mudansa ba Ita-nia prioridade ka oráriu. (Rom 12:11; Kol 4:5) Ita-nia hakaʼas an sei lori bensaun. Halo orasaun ba Jeová atu fó Ita “hakarak no kbiit atu halo buat neʼebé nia hakarak”.—Flp 2:13.

9. Oinsá ita bele halo ema seluk iha ita-nia grupu sente domin? (Roma 12:13)

⁹ Simu ema ho laran-diʼak. Sira neʼebé iha ita-nia grupu sei sente domin kuandu ita iha “toman atu simu ema ho laran-diʼak”. (Lee Roma 12:13.) Porezemplu, ita bele husu atu halaʼo grupu haklaken iha ita-nia uma. Kongregasaun balu arranja atu grupu ida-idak hatudu laran-luak hodi han hamutuk ho oradór neʼebé mai husi kongregasaun seluk atu hatoʼo diskursu. No maski oradór neʼe labele han hamutuk, grupu balu nafatin ransu hamutuk depois reuniaun. Pioneiru espesiál ida naran Sarah hatete: “Haʼu hanoin barak kuandu konvida ema mai haʼu-nia uma, tan neʼe atu hamenus haʼu-nia estrese, haʼu koko fokus atu koñese malu hodi teʼin hahán simples deʼit.” Kuandu ita kria ambiente neʼebé domin, ita sei halo grupu haklaken sai hanesan família ida, no neʼe ajuda ita atu hakbesik liután ba Jeová no ba malu.—Neem 8:10; Após 20:35.

10. Saida mak ita presiza halo se ita hakarak aumenta ita-nia matenek atu haklaken no hanorin? (Provérbios 1:5; 27:17) (Haree mós foto.)

¹⁰ Foti inisiativu. Kuandu ita aumenta ita-nia matenek atu haklaken no hanorin, neʼe sei halo ita kontente liután atu haklaken ho ita-nia grupu. Iha buat ruma neʼebé Ita presiza halo atu sai matenek kona-ba haklaken no hanorin ka lae? Diʼak atu foti inisiativu hodi husu ajuda husi ema seluk hanesan pioneiru ka haklaken-naʼin neʼebé iha esperiénsia. (Lee Provérbios 1:5; 27:17.) Fó-hatene katuas ba grupu haklaken kona-ba Ita-nia hakarak. Nia bele ajuda Ita kumpre ida-neʼe. Ita mós bele husu ema seluk atu ajuda Ita. Irmán ida naran Heather halo nuneʼe maski nia moedór. Nia hatete: “Haʼu husu pioneiru ida ajuda haʼu atu halo vizita fali. Nia hatudu laran-diʼak mai haʼu no halo arranju atu haklaken beibeik ho haʼu. Nia mós ajuda haʼu atu hahú estuda Bíblia ho haʼu-nia vizita fali ida. Haʼu kontente tebes tanba husu ajuda no agora haʼu gosta atu haklaken.” Klaru katak ita bele halo buat barak atu apoia ita-nia grupu haklaken.

BENEFÍSIU SAIDA MAK ITA HETAN HUSI GRUPU HAKLAKEN?

11-12. Benefísiu espirituál saida mak Ita bele hetan husi arranju kona-ba grupu haklaken? Temi toʼok esperiénsia.

¹¹ Benefísiu iha dalan espirituál. Arranju kona-ba grupu haklaken bele lori benefísiu espirituál mai ita hotu. Porezemplu, sira neʼebé Jeová hanoin tebes hanesan feto-faluk, oan-kiak, no ferik-katuas sira bele hetan ajuda no anima husi bibi-atan iha tempu neʼebé loos. (1 Tes 2:8; Tgo 1:27) Ita mós bele hetan treinu atu haklaken no hanorin iha dalan oioin. Irmaun sira neʼebé batizmu ona bele hetan ajuda atu bele kaer responsabilidade liután iha kongregasaun.—1 Tim 3:10.

¹² Haree oinsá irmán Wendy neʼebé temi ona hetan benefísiu husi arranju kona-ba grupu haklaken. Nia hatete: “Tanba haʼu-nia apá kontra lia-loos, haʼu-nia amá labele tuir grupu findesemana nian. Maibé, haʼu bele bá, no haʼu halo nuneʼe duni. Irmán pioneiru ida neʼebé idade ona sai haʼu-nia belun no haklaken hamutuk ho haʼu dala barak. Nia treinu haʼu atu haklaken ho diʼak no halo buat barak liután iha kongregasaun. Haʼu hanoin-hetan katuas neʼebé tau matan ba grupu ho domin fó matadalan husi Bíblia mai haʼu, no neʼe ajuda haʼu toʼo ohin loron.”

13. Benefísiu saida mak ita bele hetan kuandu ita apoia ita-nia grupu haklaken? (Haree mós foto.)

¹³ Benefísiu iha dalan emosionál. Ita sai belun ho sira neʼebé iha ita-nia grupu nuʼudar ita “apoia malu” hodi haklaken hamutuk. (Flp 1:27) Grupu haklaken neʼebé kiʼik halo fasil ba sira neʼebé moedór ka ladún koʼalia barak atu haburas relasaun belun ho ema seluk. (2 Kor 6:13) Ita bele hetan ajuda husi belun sira iha grupu durante tempu susar, porezemplu bainhira moras, laran-kraik, ka triste tanba ema neʼebé ita hadomi mate. (1 Tes 5:14) Klaru katak ita sei presiza liután belun diʼak sira nuʼudar terus boot besik daudaun. (Mt 24:21) Karik ita-nia problema la lakon, maibé se ita iha irmaun-irmán sira neʼebé hadomi no apoia ita, neʼe sei ajuda ita atu tahan.—Prov 17:17.

14. Oinsá mak ita hetan benefísiu husi grupu haklaken durante tempu dezastre ka emerjénsia?

¹⁴ Benefísiu durante tempu dezastre ka emerjénsia. Ita hetan ajuda husi grupu haklaken iha tempu neʼebé loos durante pandemia, dezastre naturais, emerjénsia médiku, krize ekonomia, no ema fó-terus. Porezemplu, iha kongregasaun ida-idak, Komisaun Administrasaun ba Kongregasaun serbisu hamutuk ho katuas ba grupu haklaken atu halo planu kona-ba oinsá atu ajuda sira neʼebé presiza apoiu. Katuas ba grupu buka-hatene didiʼak ema ida-idak iha ninia grupu nia kondisaun no presiza, inklui ajuda médiku, hahán, bee, hela-fatin, no roupa, no tuirmai koʼalia hamutuk ho komisaun atu fó ajuda. Jeová tau matan duni ita liuhusi arranju kona-ba grupu haklaken!

15. Jeová nia atan hotu ho unidade hakaʼas an atu halo saida?

¹⁵ Jeová nia organizasaun mak boot tebes. Iha lalehan, iha anju millaun ba millaun neʼebé serbí Jeová ho laran-metin. Iha rai, Jeová iha atan naʼin millaun sia liu no neʼe aumenta ba beibeik. (Zac 8:23; Apok 5:11) Jeová nia atan hotu iha lalehan no rai ho unidade hakaʼas an atu fó sai liafuan diʼak kona-ba Maromak nia Ukun! (Apok 14:​6, 7) Mai ita hetan benefísiu husi arranju kona-ba grupu haklaken, tanba neʼe ajuda duni ita atu fó hahiʼi ba Jeová ho laran tomak.—Sal 111:1.