Tanbasá Ita bele haksolok kuandu ema odi Ita?

1. Jesus hatete saida no tanbasá ninia liafuan halo ita hakfodak?

IHA diskursu iha foho, Jesus hatete: “Ksolok ba imi kuandu ema odi imi.” (Lc 6:22) Karik liafuan neʼe halo rona-naʼin sira hakfodak. Tuir loloos, la iha ida mak hakarak ema seluk atu odi nia. Se nuneʼe, tanbasá Jesus hatete hanesan neʼe? Diʼak atu hanoin kona-ba pergunta neʼe tanba ema barak ohin loron odi ema neʼebé halo tuir Jesus. Ita sei koʼalia kona-ba tanbasá ema odi ita no tanbasá ita bele sente haksolok kuandu ema odi ita.

TANBASÁ EMA ODI ITA?

2-3. Tanbasá ema odi Jeová nia povu, no neʼe halo ita sente oinsá kona-ba kontradór sira? (João 16:​2, 3)

² Ema odi ita tanba ita adora Jeová. Kona-ba ema neʼebé fó-terus no oho Jesus nia dixípulu sira, nia hatete: “Sira la hatene Aman no haʼu.” (Lee João 16:​2, 3.) Sé mak book ema atu odi Jeová nia povu? Satanás. Nia mak “maromak mundu neʼe nian”. (2 Kor 4:​3, 4) Nia hanetik ema atu labele hatene lia-loos kona-ba Jeová no book sira atu kontra hasoru ema neʼebé hadomi Jeová. (João 8:​42-44) Neʼe halo ita sente oinsá kona-ba kontradór sira? Bainhira ita hatene katak Satanás mak lohi sira, neʼe ajuda ita atu la odi fali sira.

³ Hanoin toʼok ezemplu husi irmaun ida naran Pavel.a Nia hela iha nasaun neʼebé governu bandu ita-nia atividade. Tanba nia kontinua adora Jeová ho laran-metin, polísia kaer nia, baku nia, no hatama nia mesak iha sela ba fulan barak. Pavel hatete: “Haʼu hatene katak Satanás no ninia anju aat sira mak koko atu hapara ita serbí Jeová. Maibé ema maioria neʼebé serbisu iha prizaun la odi ita no sira halo deʼit sira-nia serbisu.” Irmaun ida iha Kroásia neʼebé hetan susar boot husi ninia inan-aman, hatete: “Haʼu komprende katak loloos haʼu-nia inimigu mak Satanás, laʼós haʼu-nia inan-aman.”—Éf 6:12.

4. Saida mak ita aprende husi Jesus no Estevão nia ezemplu? (Haree mós foto.)

⁴ Ita la odi ema neʼebé kontra ita. Tuir loloos, ita hakarak halo orasaun ba sira-nia diʼak. (Mt 5:44) Ita bele aprende husi Jesus no Estevão nia ezemplu. Bainhira soldadu Roma prega Jesus iha ai-riin, Jesus halo orasaun: “Aman, perdua sira bá.” (Lc 23:34) Jesus husu Jeová atu fó perdua ba soldadu sira neʼebé simu orden atu fó-kastigu mate ba nia. Karik Jesus mós koʼalia kona-ba ema-lubun neʼebé hakilar atu oho nia tanba hetan influénsia husi ulun-naʼin relijiaun sira. Jesus rekoñese katak ema sira-neʼe la hatene buat neʼebé sira halo daudaun. Hanesan neʼe mós ho Estevão, nia halo orasaun ba Jeová atu fó perdua ba ema neʼebé atu oho nia. (Após 7:​58-60) Jeová hatán ba Jesus no Estevão nia orasaun ka lae? Sin. Ema barak neʼebé envolve an atu oho Jesus ikusmai arrepende an, hatudu fiar ba Jesus, no hetan batizmu. (Após 2:​36-41) No mane ida neʼebé apoia atu oho Estevão mós sai ema Kristaun, neʼe mak Saul husi Tarsu. Nia arrepende an kona-ba buat aat oioin neʼebé uluk nia halo tanba seidauk hatene lia-loos.—1 Tim 1:13.

5. Ita aprende saida husi César nia esperiénsia?

⁵ Jeová mós rona ba ita bainhira ita halo orasaun kona-ba ema neʼebé kontra ita. Hanoin toʼok kona-ba César husi Venezuela. Ninia aman kontra makaʼas lia-loos no halo violénsia ba nia. César hatete: “Haʼu-nia amá mak feen no inan neʼebé diʼak tebes. Nia tau uluk Jeová iha ninia moris, maibé nia mós sempre tau matan ba apá. Nia hanorin ami oan sira atu respeitu apá no halo tuir apá, se neʼe la kontra Maromak nia hakarak.” Liutiha tinan barak, ninia aman nia hahalok komesa troka. César hatete: “Loron ida, haʼu halo orasaun ho laran, tuirmai haʼu husu ba apá se nia hakarak estuda Bíblia ho haʼu ka lae. Nia hatete sin no neʼe halo haʼu kontente tebetebes.” Ikusmai César nia aman hetan batizmu. Klaru katak laʼós ema hotu mak halo mudansa hanesan neʼe. Maibé ema balu troka sira-nia hahalok tanba haree ita koʼalia ho respeitu no hatudu hahalok diʼak. Ita kontente tebes kuandu neʼe akontese! Ita mós hein namanas atu haree oinsá Jeová nuʼudar “Juís ba mundu tomak” bele hatudu laran-sadiʼa ba sira no dada sira atu hakbesik ba nia.—Gén 18:25.

6. Tuir Marcos 13:​13, ema odi ita ho razaun saida tan?

⁶ Ema odi ita tanba ita apoia Jesus. Jesus hatete katak ema hotu sei odi ema Kristaun neʼebé loos ‘tanba ninia naran’. (Lee Marcos 13:13.) Jesus nia “naran” reprezenta saida? Naran neʼe reprezenta Jesus nia reputasaun no kbiit nuʼudar Liurai ba Maromak nia Ukun. Ema odi ita tanba sira tau fiar ba ukun-naʼin sira iha mundu neʼe, laʼós ba Jesus Kristu neʼebé Jeová hili atu ukun universu tomak. Jesus sai ona Liurai ba Maromak nia Ukun iha tinan 1914. Lakleur tan, nia sei halakon ema nia governu hotu neʼebé kontra nia.

7-8. Razaun saida tan mak ema odi ita? (João 15:​18-20) (Haree mós foto.)

⁷ Ema odi ita tanba ita la hanesan ho ema iha Satanás nia mundu. Jesus esplika katak ema sei odi ninia dixípulu sira tanba sira “laʼós mundu neʼe nian”. (Lee João 15:​18-20.) Hanesan ho ema Kristaun iha apóstolu sira-nia tempu, ita mós la halo tuir ema iha mundu neʼe nia atitude, hahalok, no liafuan neʼebé aat. Rezultadu mak irmaun-irmán barak hetan susar iha serbisu-fatin ka eskola tanba ema goza sira. (1 Ped 4:​3, 4) Maibé ita kontente tanba ema balu ikusmai troka sira-nia hanoin no komesa hatudu respeitu ba ita.

⁸ Haree toʼok Ignacio husi Amérika Sentrál nia esperiénsia. Iha eskola, mestre ida goza nia ba tinan barak tanba nia kaer metin ba morál neʼebé aas. Maibé, antes Ignacio remata eskola, mestre neʼe husu nia oinsá nia bele moris tuir Bíblia nia prinsípiu sira maski ema barak la respeitu nia. Ignacio esplika katak nia haree Maromak nia matadalan nuʼudar protesaun ida. Tuirmai nia konvida mestre neʼe atu tuir reuniaun. Ignacio hakfodak bainhira haree mestre neʼe tuir reuniaun! Mestre neʼe admira tebes domin neʼebé nia sente iha kongregasaun no nia kontinua tuir reuniaun sira. Ikusmai, mestre neʼe rasik mós hetan susar husi ema seluk tanba estuda Bíblia. Maski nuneʼe, nia kontinua laʼo ba oin no hetan batizmu.

9-10. (a) Razaun saida tan mak ita la hanesan ho ema iha Satanás nia mundu? (b) Ita bele aprende saida husi apóstolu Paulo nia ezemplu?

⁹ Ita mós la hanesan ho ema iha Satanás nia mundu tanba ita neutrál kona-ba funu no polítiku. (João 18:36) Ita hakaʼas an atu halo tuir governu nia lei sira hodi tuir konsellu iha Roma 13:1. Maibé, nuʼudar ema Kristaun, ita nafatin neutrál kona-ba buat polítiku, tan neʼe ita la kandidata an ka vota. Tanbasá? Tanba ita laran-metin ba Jeová no apoia Jesus nuʼudar Liurai ba Ninia Ukun. Testemuña ba Jeová barak tama ona komarka tanba sira-nia fiar. Maibé, irmaun-irmán sira neʼebé iha komarka laran kontinua haklaken. Sira banati-tuir apóstolu Paulo neʼebé moris nuʼudar dadur ba tinan barak iha uma no komarka. (Após 24:27; 28:​16, 30) Nia kontinua haklaken kona-ba liafuan diʼak ba ema hotu neʼebé hakarak rona, inklui guarda, juís, governadór, liurai, no karik ema-boot sira neʼebé serbisu ba Imperadór Roma Nero.—Após 9:15.

¹⁰ Ohin loron mós irmaun-irmán sira neʼebé tama komarka haklaken ba ema hotu neʼebé hakarak rona, inklui juís, funsionáriu, no guarda sira. Irmaun ida neʼebé tama komarka ba tinan neen liu tanba neutrál hatete katak nia haree tempu neʼebé nia iha komarka laʼós nuʼudar kastigu, maibé nuʼudar knaar ida neʼebé nia simu husi Jeová atu buka ema laran-moos. Ita kontente tebes kuandu Jeová uza ita atu haklaken liafuan diʼak ba ema hanesan neʼe! (Kol 4:3) Mai ita hanoin razaun seluk tan neʼebé bele halo ita sente haksolok kuandu ema odi ita tanba serbí Jeová.

TANBASÁ ITA BELE HAKSOLOK KUANDU EMA ODI ITA?

11. Oinsá mak hodi hasoru susar bele hametin ita-nia fiar? Fó toʼok ezemplu.

¹¹ Ita hatene katak neʼe kumpre Bíblia nia profesia. Iha profesia primeiru neʼebé temi iha Bíblia, Jeová fó-hatene nanis katak Satanás no sira neʼebé apoia nia sei odi ema neʼebé hadomi no serbí Jeová. (Gén 3:15) Jesus mós hatete beibeik katak ema sei odi ninia dixípulu sira. (Mt 10:22; Mc 13:​9-12; Lc 6:​22, 23; João 15:20) No hakerek-naʼin seluk ba Bíblia mós fó sai buat neʼebé hanesan. (2 Tim 3:12; Tgo 1:2; 1 Ped 4:​12-14; Jud 3, 17-19) Tan neʼe bainhira ema fó susar ba ita, ita la hakfodak, maibé sente kontente tanba neʼe kumpre Bíblia nia profesia. Neʼe halo ita fiar liután katak ita serbí Maromak neʼebé loos. Irmán ida husi rai neʼebé bandu ita-nia atividade balu, hatete: “Bainhira haʼu dedika an ba Jeová, haʼu hatene katak ema sei kontra haʼu. Tan neʼe haʼu la taʼuk ka hakfodak bainhira hetan susar.” Ema barak inklui ninia laʼen mós kontra nia. Ninia laʼen trata aat nia no sunu ninia Bíblia ho livru sira. Maibé, duké taʼuk, ninia fiar sai metin liután. (Ebr 10:39) Irmán neʼe hatete: “Haʼu hatene neʼe sei akontese duni hodi tuir Bíblia nia profesia. Situasaun hanesan neʼe halo haʼu fiar katak neʼe mak relijiaun neʼebé loos.”

12. Saida mak ajuda irmaun ida atu tahan susar?

¹² Maski ita hatene katak ema sei fó-terus ita, maibé ita bele sente susar nafatin atu tahan. Irmaun ida konta kona-ba tempu neʼebé nia iha komarka: “Dala ruma haʼu hanoin barak, laran-kraik, no tanis deʼit.” Saida mak ajuda nia atu tahan? Nia hatete: “Haʼu sempre halo orasaun. Kuandu haʼu hadeer, haʼu halo kedas orasaun. Durante loron, haʼu halo orasaun se situasaun susar mosu. No kuandu haʼu hirus tanba ema trata aat haʼu, haʼu tama ba hariis-fatin no halo orasaun.” Irmaun neʼe mós hanoin kleʼan kona-ba ema neʼebé hatudu laran-metin iha Bíblia nia tempu no ohin loron. Neʼe ajuda nia atu tahan hasoru susar no sente dame hanesan Jesus promete ona ba ninia dixípulu sira.—João 14:27; 16:33.

13. Saida mak bele ajuda ita atu tahan?

¹³ Ita iha domin neʼebé boot liu fali ódiu. Jesus hadomi ninia Aman ho laran toʼo nia mate, no nia mós hadomi ninia belun sira. (João 13:1; 15:13) Bainhira ita haburas domin hanesan neʼe ba Jeová no irmaun-irmán sira, ita mós bele tahan maski ema odi ita. Oinsá? Atu hetan ninia resposta, mai ita haree apóstolu Paulo nia ezemplu.

14. Saida mak ajuda Paulo atu laran-metin nafatin?

¹⁴ Antes Paulo hetan kastigu-mate, nia hakerek ba ninia belun Timóteo: “Espíritu neʼebé Maromak fó ba ita la hamosu hahalok taʼuk-teen, maibé fó ita kbiit, [no] domin.” (2 Tim 1:7) Liafuan neʼe katak sá? Paulo hakarak dehan katak domin boot ba Jeová mak book ema Kristaun atu tahan hasoru susar naran deʼit. (2 Tim 1:8) Ita la duvida katak domin ba Jeová mós ajuda Paulo atu laran-metin nafatin no aten-brani maski nia hatene katak nia sei hetan kastigu-mate.—Após 20:​22-24.

15. Oinsá mak irmaun-irmán sira hatudu domin neʼebé la hanoin an deʼit? (Haree mós foto.)

¹⁵ Ita hadomi tebes irmaun-irmán sira neʼebé nafatin hamriik metin maski ema fó-terus. Sira balu prontu atu tau sira-nia an iha perigu laran atu ajuda maluk sira, hanesan Áquila no Priscila neʼebé prontu tau sira-nia moris iha perigu laran atu ajuda Paulo. (Rom 16:​3, 4) Porezemplu, iha Rúsia, irmaun-irmán barak bá tribunál atu anima sira neʼebé polísia kaer. Irmán ida neʼebé atu tuir julgamentu iha tribunál haree maluk barak neʼebé mai atu fó apoiu ba nia, no neʼe halo nia sente kmaan tebes toʼo la hatene atu koʼalia saida. Maluk sira-neʼe hatudu duni domin neʼebé la hanoin an deʼit, no neʼe hametin ninia fiar iha tempu neʼebé nia presiza. Sin, ita bele sente haksolok tanba ita iha domin neʼebé boot liu fali ódiu!

16. Tanbasá apóstolu Pedro hatete katak ema neʼebé hetan susar tanba serbí Jeová iha razaun atu kontente? (1 Pedro 4:14)

¹⁶ Ita hatene katak Maromak sei kontente ho ita kuandu ita tahan. (Lee 1 Pedro 4:14.) Apóstolu Pedro hatete katak ema neʼebé hetan susar tanba serbí Jeová iha razaun diʼak atu kontente. Tanbasá? Bainhira ema odi ita, neʼe prova katak Maromak nia espíritu ‘hela daudaun iha ita’. Pedro hatene ida-neʼe liuhusi ninia esperiénsia rasik. Lakleur depois Pentekostes 33 EC, ulun-naʼin Judeu sira iha templu haruka ema atu kaer Pedro no apóstolu sira seluk tanba sira haklaken. Maibé Pedro defende ninia fiar ho aten-brani. (Após 5:​24-29) Maski hetan baku, Pedro no apóstolu sira seluk la para atu haklaken. Duké rende an, sira haksolok tanba sira “iha priviléjiu atu hetan moe tanba Jesus nia naran”. Ita mós bele haksolok kuandu ema fó-terus ita.—Após 5:​40-42, nota.

17. Iha kalan antes Jesus mate, nia hatete saida ba dixípulu sira?

¹⁷ Iha kalan antes Jesus mate, nia hatete ba dixípulu sira: “Ema neʼebé hadomi haʼu, haʼu-nia Aman mós sei hadomi nia, no haʼu sei hadomi nia.” (João 14:21) Furak tebes kuandu tempu toʼo mai bainhira ita sei sente deʼit domin, laʼós odi tanba serbí Jeová! (2 Tes 1:​6-8) Antes tempu neʼe, mai ita deside metin atu hanoin kona-ba razaun barak neʼebé bele halo ita haksolok kuandu ema odi ita.