Hatudu aten-brani no laran-metin hanesan Benaias

Benaias mak funu-naʼin ida neʼebé ho aten-brani apoia Liurai David no Salomão. Benaias mak amlulik nia oan. Baibain amlulik nia jerasaun la halo funu no la uza armas funu nian, maibé Benaias sempre hola parte iha Jeová nia funu sira. Nia hatudu aten-brani. Porezemplu, nia oho leaun ida iha bee-posu. Nia mós oho mane isin-boot neʼebé kaer diman. David tau fiar ba Benaias no foti nia nuʼudar ulun ba guarda sira.—2 Sam 23:​20-23.

Benaias hatudu laran-metin ba David bainhira Absalão no Adonias kontra David. (2 Sam 8:18; 15:18; 1 Reis 1:8) No bainhira David katuas ona, Benaias nafatin apoia nia hodi ajuda Salomão sai liurai. (1 Reis 1:​32-40) Sin, Benaias hatudu laran-metin ba Jeová no liurai neʼebé Nia hili maski ema seluk la hatudu laran-metin.

Ita mós presiza aten-brani atu kontra hasoru Satanás no ema neʼebé halo tuir ninia hakarak. No ita presiza deside metin atu kontinua moris tuir Jeová nia matadalan sira. (Éf 6:11; 1 Ped 5:​8, 9) Maski ema seluk husik Jeová, ita hakarak laran-metin nafatin ba Nia hodi fiar katak Nia sei fó kolen mai ita.—2 Sam 22:26.