Saida mak sei akontese ba relijiaun?—Saida mak Bíblia fó sai

Ita sente la kontente ka hakribi ho relijiaun ka lae? Maski relijiaun fó impaktu pozitivu ba komunidade no ema balu, maibé relijiaun mós hamosu problema barak. Livru Ensiklopédia kona-ba Relijiaun no Funu hatete: “Funu balu neʼebé aat liu iha istória mak akontese tanba relijiaun la hanesan.” Ulun-naʼin relijiaun sira dala barak uza relijiaun laʼós ba adorasaun, maibé atu kumpre sira-nia hakarak kona-ba buat polítiku nian. Ulun-naʼin relijiaun sira seluk subar sala hanesan abuzu seksuál ka korrupsaun.

Se Ita la kontente ho relijiaun, karik Ita hakarak hatene oinsá Maromak nia hanoin kona-ba ida-neʼe. Bíblia fó sai katak Maromak la kontente ho relijiaun barak tanba buat aat neʼebé sira halo ona. Bíblia mós iha profesia sira neʼebé esplika kona-ba buat neʼebé Maromak sei halo. Hodi uza liafuan simbóliku, Bíblia esplika katak lakleur tan Maromak sei halo asaun ruma hasoru relijiaun sira iha mundu tomak, no neʼe mak buat neʼebé seidauk akontese iha ema nia istória.

Saida mak Bíblia hatete kona-ba relijiaun nia futuru?

Profesia: Livru Apokalipse koʼalia kona-ba feto-aat ida naran Babilónia Boot. Feto-aat neʼe tuur iha animál fuik kór-mean nia leten. Maibé ikusmai, animál fuik neʼe fila kontra no oho fali feto-aat neʼe.—Apokalipse 17:3, 5, 16.

Signifikadu: Feto-aat neʼebé ho naran Babilónia Boot, reprezenta relijiaun falsu hotu, katak relijiaun neʼebé Maromak la simu.a Animál fuik kór-mean reprezenta Nasoins Unidas (ONU).b Bíblia dehan katak feto-aat neʼe tuur iha animál fuik kór-mean nia leten, no neʼe hatudu katak relijiaun falsu koko atu fó influénsia no kontrola ONU. Bíblia mós hatete katak animál fuik neʼe oho feto-aat, neʼe hatudu katak ONU no nasaun sira neʼebé apoia nia sei kontra hasoru relijiaun falsu hotu iha mundu no halakon sira. Eventu úniku ida-neʼe sei lori duni susar barak.

Oinsá mak relijiaun falsu sei lakon?

Profesia: “Dikur sanulu neʼebé ó haree no mós animál fuik neʼe, sira sei odi feto-aat neʼe no sei halakon nia no . . . sunu hotu nia iha ahi. Tanba Maromak tau ninia hanoin iha sira-nia laran [ulun-naʼin polítiku sira-nia laran] atu kumpre Maromak nia hakarak, sin, atu kumpre sira-nia hanoin neʼebé ida deʼit hodi fó sira-nia ukun ba animál fuik neʼe . . . Ninia susar hotu sei kona nia iha loron ida deʼit, neʼe katak mate, tanis, hamlaha boot, no ahi sei han hotu nia, tanba Maromak Jeovác neʼebé tesi-lia ba nia, mak iha forsa.”—Apokalipse 17:16, 17; 18:8.

Signifikadu: Maromak sei kuda “ninia hanoin” iha nasaun sira iha mundu neʼe. Nia sei book sira atu fó “sira-nia ukun” ka sira-nia podér polítiku nian ba ONU. Tuirmai, ONU neʼebé foin simu kbiit husi nasaun sira, sei halakon relijiaun falsu iha mundu tomak. Neʼe sei akontese ho lalais no derrepente deʼit hanesan “iha loron ida deʼit”, no neʼe sei halo ema barak hakfodak.—Apokalipse 18:21.

Tanbasá mak relijiaun falsu sei lakon?

Profesia: “Ninia sala sira sai barak tebes toʼo lalehan no Maromak sei tesi-lia ba nia tanba ninia hahalok neʼebé la iha justisa.”—Apokalipse 18:5.

Signifikadu: Relijiaun falsu halo ona buat barak neʼebé kontra Maromak durante tinan atus ba atus nia laran. Haree toʼok “ninia sala” balu neʼebé halo Maromak deside atu halakon nia:

Envolve iha polítiku. Jesus Kristu hanorin ninia dixípulu sira atu la envolve an iha buat polítiku nian, maibé tau sira-nia esperansa ba Maromak nia Ukun, neʼe mak governu ida iha lalehan neʼebé sei troka ema nia ukun hotu.d (Daniel 2:44; Mateus 6:9, 10; João 6:15; 18:36) Maibé, relijiaun falsu halo buat neʼebé kontráriu. Tanba relijiaun falsu envolve an makaʼas iha buat polítiku nian, duké laran-metin ba Maromak, tan neʼe profesia iha Apokalipse esplika katak Babilónia Boot halo “sala seksuál” no bolu nia nuʼudar “feto-aat neʼebé naran-boot”.—Apokalipse 17:1, 2; Tiago 4:4.



Violénsia. Bíblia hatete katak relijiaun falsu simu sala ba “sira hotu neʼebé ema oho tiha iha mundu”. (Apokalipse 18:24) Relijiaun barak la hanorin sira-nia membru atu buka dame. Sira apoia fali funu no terrorizmu, aat liután mak sira anima sira-nia membru atu halo buat sira-neʼe.



Kaan-teen. Relijiaun falsu “halibur ona rikusoin hodi la moe”. (Apokalipse 17:4; 18:7) Relijiaun barak uza sira-nia influénsia no ligasaun atu halibur rikusoin neʼebé boot tebes. Sira-nia hahalok kaan-teen neʼe halo Maromak la kontente.—Tito 1:7.



Bosok. Relijiaun falsu hanorin ema atu fiar no halo buat sira neʼebé kontra lia-loos husi Bíblia.e Tanba relijiaun falsu mak hun ba hanorin no toman oioin neʼebé lohi ema no la respeitu Maromak, profesia neʼe bolu relijiaun falsu nuʼudar “inan ba . . . buat foʼer hotu iha rai”.—Apokalipse 17:5; 18:23.

Relijiaun hotu sei lakon ka lae?

Lae. Livru Apokalipse koʼalia kona-ba grupu ida husi nasaun oioin neʼebé hanaran “ema-lubun boot”. (Apokalipse 7:9) Bíblia dehan katak ema-lubun boot neʼe “hatais roupa mutin”, neʼe katak sira ho laran-metin adora Maromak tuir ninia matadalan sira. Ema sira-neʼe moris liu “terus boot”, neʼe mak tempu neʼebé Bíblia bolu nuʼudar tempu neʼebé relijiaun falsu no Maromak nia inimigu sira seluk sei lakon. (Apokalipse 7:13, 14; 19:11, 19-21) Ema-lubun boot neʼebé hatais roupa mutin mak parte ba relijiaun neʼebé loos neʼebé sei iha ba nafatin.f

Relijiaun falsu nia rohan signifika saida ba Ita?

Ita bele hetan kmaan hodi hatene katak Maromak la gosta buat aat neʼebé relijiaun halo ona. Ita bele hein ba futuru ho esperansa, hodi hatene katak lakleur tan relijiaun hotu neʼebé la respeitu Maromak no haterus ema sei la iha tan.

Ita mós bele fiar katak iha dalan neʼebé loos atu adora Maromak. Bíblia hatete katak “ema neʼebé adora Aman iha dalan loos sei adora ho espíritu no lia-loos, tanba Aman buka ema sira hanesan neʼe atu adora nia”. (João 4:23) Nia fó-hatene sira: “Haʼu-nia povu, sai husi nia [Babilónia Boot], atu nuneʼe imi labele hola parte iha ninia sala sira, no labele hola parte iha ninia kastigu sira.” (Apokalipse 18:4, 5) Sin, Maromak konvida ema atu adora nia ho lia-loos. (1 Timóteo 2:3, 4) Nia promete ba ema neʼebé simu ninia konvite katak sira sei moris ba nafatin.—1 João 2:17.