Setembru

Ita presiza hakaʼas an laʼós deʼit atu sai ema maduru maibé mós atu mantein maduru. Ita labele hanoin katak se ita maduru ona ita la presiza haburas tan ita-nia relasaun ho Jeová. (1 Kor 10:12) Ita presiza “kontinua koko” ita-nia an atu haree katak ita kontinua laʼo ba oin ka lae. Iha ninia karta ba ema Kristaun iha Koloso, apóstolu Paulo énfaze tan katak sira presiza mantein maduru. Maski sira mak maduru ona, Paulo fó avizu ba sira atu kuidadu hodi la simu mundu neʼe nia hanoin. (Kol 2:​6-10) No Epafras neʼebé hatene didiʼak irmaun-irmán sira iha kongregasaun, halo orasaun beibeik atu sira bele “sai kompletu” ka sai maduru. (Kol 4:12) Paulo no Epafras komprende katak atu bele mantein maduru presiza hakaʼas an no simu Maromak nia apoia. Sira hakarak ema Koloso atu kontinua maduru maski hasoru susar naran deʼit. w24.04 p. 6-7 par. 16-17

Bainhira ita hamtaʼuk Jeová, ita sei hadomi nia liután no ita lakohi halo buat neʼebé halo nia triste. Ita hakarak tebes atu aprende kona-ba diferensa entre buat neʼebé loos no sala, entre lia-loos no lia-bosok atu nuneʼe Jeová bele simu ita. (Prov 2:​3-6; Ebr 5:14) Se ita taʼuk liu ba ema duké Maromak, neʼe bele halo ita husik tiha lia-loos. Hanoin toʼok kona-ba espiaun naʼin-12 neʼebé bá hafuhu rai neʼebé Jeová promete atu fó ba povu Izraél. Ba espiaun naʼin-10, sira-nia sentimentu taʼuk ba ema Kanaan mak boot liu fali sira-nia domin ba Jeová. Sira hatete ba povu Izraél: “Ita labele bá atu kontra hasoru povu neʼe, tanba sira forte liu ita.” (Núm 13:​27-31) Tuir ema nia haree, ema Kanaan mak forte liu. No neʼe loos. Maibé se ema ida dehan katak ema Izraél labele manán sira-nia inimigu, neʼe katak nia la rekoñese kona-ba Jeová nia kbiit. w24.07 p. 9 par. 5-6

Ita bele fiar metin katak bainhira Jeová tesi-lia ba ema, nia sempre halo desizaun neʼebé loos! Abraão komprende ho didiʼak katak Jeová mak “Juís ba mundu tomak” neʼebé perfeitu, matenek, no laran-sadiʼa. Jeová treinu ona ninia Oan-Mane no fó knaar ba nia atu tesi-lia ba ema. (João 5:22) Jeová no Jesus bele haree ema hotu nia laran. (Mt 9:4) Iha situasaun hotu, sira sei “halo buat neʼebé loos”! Mai ita deside metin atu tau fiar ba Jeová no ninia desizaun sira. Ita rekoñese katak ita labele tesi-lia ba ema, maibé Jeová bele! (Isa 55:​8, 9) Tan neʼe mak ita tau fiar ba Jeová no ninia Oan-Mane atu tesi-lia. No ita mós hatene katak ita-nia Liurai Jesus banati-tuir Jeová nia justisa no laran-sadiʼa ho perfeitu.—Isa 11:​3, 4. w24.05 p. 7 par. 18-19

Ita bele aprende tanbasá importante atu iha laran neʼebé moos husi Jesus kuandu nia foin hasoru Natanael. Bainhira Filipe lori Natanael atu hasoru Jesus ba dala primeiru, buat úniku ida akontese. Maski Jesus nunka hasoru Natanael, maibé Jesus hatete: “Haree bá, nia mak ema Izraél neʼebé la iha lia-bosok iha nia.” (João 1:47) Maibé kona-ba Natanael, Jesus haree nia nuʼudar ema laran-moos iha dalan neʼebé boot liu. Hanesan ita, Natanael mós la perfeitu, maibé nia la laran-makerek no hatudu onestu iha buat hotu. Jesus admira no gaba Natanael kona-ba neʼe. Buat barak neʼebé hakerek iha Salmo 15 mak kona-ba hahalok neʼebé ita presiza hatudu ba ema seluk hodi halo Jeová kontente. Salmo 15:3 hatete katak bainaka iha Jeová nia tenda “la uza ninia nanál atu koʼalia aat no hafoʼer ema seluk nia naran, nia la halo aat ba ninia maluk, no nia la hafoʼer ninia belun nia naran”. Se ita uza sala ita-nia nanál, neʼe bele hakanek ema seluk.—Tgo 1:26. w24.06 p. 10 par. 7, 9; p. 11 par. 10

Se Ita prepara didiʼak ba haklaken, neʼe bele ajuda Ita atu la sente taʼuk bainhira haklaken. Antes Jesus haruka ninia dixípulu sira bá haklaken, nia ajuda sira atu prepara. (Lc 10:​1-11) Tanba sira halo tuir buat neʼebé Jesus hanorin, sira bele kumpre buat diʼak oioin, no neʼe halo sira sente kontente tebes. Oinsá mak ita bele prepara ba haklaken? Ita presiza hanoin kona-ba oinsá ita bele fó sai lia-loos ho ita-nia liafuan rasik. Diʼak mós atu hanoin kona-ba dalan ida ka rua neʼebé baibain ema hatán, no tuirmai hanoin kona-ba oinsá ita bele responde iha situasaun sira-neʼe. Kuandu koʼalia ho ema, koko atu kalma nafatin, hatudu oin-midar, no laran-diʼak. w24.04 p. 16 par. 6-7

Razaun importante liu tanbasá ita haklaken liafuan diʼak mak tanba hadomi Jeová no ninia naran. Ita haree serbisu haklaken nuʼudar dalan ida atu fó hahiʼi ba Maromak neʼebé ita hadomi. Ita ho laran tomak konkorda ho liafuan: ‘Maromak Jeová merese simu glória, respeitu, no kbiit’ husi ninia atan sira neʼebé laran-metin. Ita neʼebé serbí Jeová, fó glória no respeitu ba nia kuandu ita fó sai ba ema seluk katak nia “kria ona buat hotu” no nia mak fó moris mai ita. Ita fó kbiit tomak ba nia kuandu ita uza ita-nia tempu, enerjia, no buat neʼebé ita iha atu haklaken tuir ita-nia situasaun. (Mt 6:33; Lc 13:24; Kol 3:23) Ita gosta atu koʼalia kona-ba Maromak neʼebé ita hadomi, no domin book ita atu fó sai ba ema seluk kona-ba ninia naran no hahalok. w24.05 p. 17 par. 11

Jeová fó ba ita dame no kontente agora, no sei fó ba ita moris ba nafatin iha futuru. Ita bele tau esperansa ba Jeová, no fiar metin katak nia iha hakarak no kbiit atu fó kolen mai ita. Tanba ita iha fiar neʼebé metin, neʼe book ita atu nafatin badinas iha ita-nia adorasaun ba Jeová, hanesan buat neʼebé ninia atan sira halo iha tempu uluk. Neʼe mak buat neʼebé Timóteo halo. (Ebr 6:​10-12) Timóteo tau esperansa ba Maromak neʼebé moris. (1 Tim 4:10) Tan neʼe, nia hakaʼas an no halo serbisu ho badinas. Iha dalan oinsá? Apóstolu Paulo anima nia atu aumenta ninia matenek nuʼudar mestre iha serbisu haklaken no kongregasaun. Timóteo mós presiza hatudu ezemplu neʼebé diʼak ba irmaun-irmán sira neʼebé joven no mós idade. Nia mós hetan knaar balu neʼebé susar, neʼe inklui fó konsellu neʼebé makaʼas ba sira neʼebé presiza, maibé ho domin. (1 Tim 4:​11-16; 2 Tim 4:​1-5) Timóteo fiar katak Jeová sei fó kolen ba nia.—Rom 2:​6, 7. w24.06 p. 22-23 par. 10-11

Dala barak Jeová uza ninia profeta sira atu fó avizu no korrije povu Izraél. Porezemplu, Maromak koʼalia liuhusi Jeremias: “Fila fali mai haʼu, oh Izraél neʼebé ulun-toos . . . Haʼu sei la hateke tun ba ó ho hirus, tanba haʼu laran-metin. Haʼu sei la rai hirus ba nafatin, naran katak ó rekoñese ó-nia sala, tanba ó kontra hasoru ona Jeová.” (Jer 3:​12, 13) Liuhusi Joel, Jeová hatete: “Fila fali mai haʼu ho imi-nia laran tomak.” (Joel 2:​12, 13) Nia haruka Isaias atu fó sai: “Halo imi-nia an sai moos; hasai tiha imi-nia hahalok aat iha haʼu-nia oin; labele halo tan buat neʼebé aat.” (Isa 1:​16-19) No liuhusi Ezequiel Jeová dehan: “Haʼu la kontente bainhira ema aat ida mate. Haʼu-nia hakarak mak nia husik tiha ninia hahalok aat no kontinua moris. Haʼu la kontente bainhira ema ida mate. Tan neʼe, arrepende an bá no kontinua moris.” (Eze 18:​23, 32) Jeová kontente tebes kuandu povu Izraél arrepende sala, tanba nia hakarak sira atu moris ba nafatin! w24.08 p. 9 par. 5-6

Jeová fó ai-han espirituál no nia dirije no proteje ninia atan hotu. Dalan neʼebé Jeová hatudu katak nia la todan ba sorin mak hodi fó Bíblia ba ema hotu iha mundu tomak. Uluk ema hakerek Bíblia iha língua tolu deʼit, neʼe mak língua Ebraiku, Aramaiku, no Gregu. Ema neʼebé hatene língua sira-neʼe mak iha relasaun besik liu ho Jeová duké ema seluk ka lae? Lae. (Mt 11:25) Atu Jeová simu ita nuʼudar ninia bainaka, neʼe la depende ba ita-nia edukasaun ka ita-nia matenek kona-ba língua. Maibé, Jeová fó ninia matenek ba ema hotu iha mundu tomak, laʼós deʼit ba sira neʼebé iha edukasaun boot. Ninia Liafuan Bíblia tradús ona ba língua rihun ba rihun. Tan neʼe, ema iha mundu tomak bele hetan benefísiu husi ninia hanorin, no aprende oinsá sira bele sai ninia belun.—2 Tim 3:​16, 17. w24.06 p. 6-7 par. 13-15

Jesus fó-hatene nanis katak ema Judeu nia sistema sei lakon, no profesia neʼe lakleur tan sei akontese. Ema Kristaun presiza uza sira-nia tempu atu prepara an hodi hametin sira-nia fiar no kbiit atu tahan. (Ebr 10:25; 12:​1, 2) Lakleur tan, ita mós sei hasoru susar neʼebé boot liu fali ema Kristaun Ebreu hasoru. (Mt 24:21; Apok 16:​14, 16) Aprende kona-ba konsellu balu neʼebé Jeová fó ba ema Kristaun sira-neʼe tanba neʼe mós bele ajuda ita. Iha apóstolu Paulo nia karta ba ema Ebreu, nia anima ninia maluk fiar-naʼin atu estuda kleʼan Maromak nia Liafuan. (Ebr 5:14–6:1) Hodi uza Eskritura Lian Ebraiku, nia esplika tanbasá mak dalan neʼebé ema Kristaun adora Jeová mak diʼak liu fali ema Judeu nian. Paulo anima ema Kristaun atu estuda no komprende diʼak liután lia-loos husi Bíblia hodi nuneʼe sira bele rekoñese hanorin falsu no la simu ida-neʼe. w24.09 p. 8-9 par. 2-3; p. 10 par. 6

Jesus nia dixípulu sira presiza hetan anima. Tanbasá? Sira balu husik ona sira-nia hela-fatin, família, no serbisu atu bele laʼo tuir Jesus. (Mt 19:27) Sira balu ema trata aat tanba hili atu sai Jesus nia dixípulu. (João 9:22) Sira halo sakrifísiu oioin tanba fiar katak Jesus mak Mesias neʼebé promete nanis ona. (Mt 16:16) Maibé bainhira ema oho Jesus, sira hanoin katak sira-nia esperansa lakon ona. Jesus komprende katak normál ba dixípulu sira atu sente triste, no nia hatene katak sira triste laʼós tanba sira-nia fiar mak fraku. Iha loron neʼebé nia moris hiʼas, nia komesa kedas anima ninia belun sira. Porezemplu, nia mosu ba Maria Madalena neʼebé tanis hela iha rate. (João 20:​11, 16) Nia mós mosu ba dixípulu naʼin-rua neʼebé bá Emaus. No nia mosu ba apóstolu Pedro. w24.10 p. 13 par. 5-6

Inan-aman, ajuda Ita-nia oan atu defende ninia fiar ba Kriadór. Karik Ita bele haree ho oan informasaun kona-ba “Evolusaun no kriasaun” iha jw.org. Tuirmai, Ita-nia oan bele hili parte neʼebé karik bele ajuda ema komprende katak iha duni Kriadór ida. Anima nia atu esplika iha dalan neʼebé simples no lójiku se ema ida hakarak koʼalia kona-ba tópiku neʼe. Porezemplu, karik ninia kolega dehan: “Haʼu fiar deʼit ba buat neʼebé haʼu bele haree, no haʼu nunka haree Maromak.” Karik Ita-nia oan bele hatán: “Imajina toʼok ó laʼo iha ai-laran neʼebé dook husi sidade no haree moru ida neʼebé hada ho fatuk. Ó sei hanoin oinsá? Tenke iha ida mak harii moru neʼe, loos ka lae? Nuneʼe mós kona-ba ita-nia planeta no kriatura hotu neʼebé moris, tenke iha ida mak kria buat sira-neʼe!” w24.12 p. 18 par. 16

Ita hotu presiza matadalan atu halo desizaun diʼak. Ita bele hetan matadalan oioin husi katuas kongregasaun no irmaun-irmán neʼebé maduru. Se sira mak idade liu ita, ita labele hanoin katak matadalan neʼebé sira fó mak tuan demais. Jeová hakarak ita aprende husi sira neʼebé idade ona. Ita bele aprende buat barak husi sira-nia esperiénsia no matenek. Iha Bíblia nia tempu, Jeová uza fiar-naʼin sira neʼebé idade atu hametin no dirije ninia povu. Porezemplu, hanoin toʼok kona-ba Moisés, David, no apóstolu João. Sira moris iha tempu no situasaun neʼebé la hanesan. Bainhira sira besik atu mate, sira fó matadalan neʼebé matenek ba ema neʼebé idade kiʼik. Fiar-naʼin sira-neʼe hanorin katak halo tuir Maromak mak importante tebes. Maski idade kiʼik ka boot, ita hotu bele hetan benefísiu husi sira-nia konsellu.—Rom 15:4; 2 Tim 3:16. w24.11 p. 8 par. 1-2

Iha Noé nia tempu, Maromak bandu ema atu han raan. (Gén 9:​3, 4) Jeová fó sai fali mandamentu neʼe iha ninia Ukun-Fuan ba ema Izraél. Ema naran deʼit neʼebé han raan “tenke mate”. (Lev 7:27) Jesus hanorin ema Judeu atu halo tuir Moisés nia Ukun-Fuan hotu. (Mt 5:​17-19) Tan neʼe, ita bele fiar katak Jesus la haruka ema Judeu atu han ninia isin no hemu ninia raan rasik. Jesus temi kona-ba ninia isin no raan iha dalan simbóliku. Neʼe hanesan tempu neʼebé nia koʼalia ba feto Samaria ida, hodi dehan: “Bee neʼebé haʼu fó, . . . sei . . . fó . . . moris rohan-laek.” (João 4:​7, 14) Jesus la hatete katak feto Samaria neʼe sei hetan moris rohan-laek hodi hemu duni bee husi bee-matan ruma. Hanesan neʼe mós, Jesus la dehan katak ema-lubun sei moris ba nafatin se sira han ninia isin no hemu ninia raan. w24.12 p. 9 par. 4-6

Laʼen Kristaun sira presiza kuidadu atu la husik mundu fó influénsia ba sira-nia hanoin kona-ba feto. Tanbasá? Razaun ida mak ema nia hanoin bele fó impaktu ba sira-nia hahalok. Apóstolu Paulo hakerek karta ba ema Kristaun iha Roma neʼebé iha esperansa atu bá lalehan, hodi dehan: “Keta halo tuir mundu ohin neʼe.” (Rom 12:​1, 2) Bainhira Paulo hakerek karta neʼe, sira balu sai ona ema Kristaun ba tinan barak. Maski nuneʼe, Paulo nia liafuan hatudu katak ema balu iha kongregasaun nafatin hetan influénsia husi mundu nia hanoin no kostume. Tan neʼe, Paulo fó konsellu ba sira atu troka sira-nia hanoin no hahalok. Klaru katak konsellu neʼe mós bele aplika ba laʼen Kristaun ohin loron. Triste mak laʼen balu hetan influénsia husi mundu nia hanoin no trata aat sira-nia feen. w25.01 p. 9 par. 4

Katuas sira ohin loron mós okupadu. Sira mak haklaken-naʼin. (2 Tim 4:5) Sira ho badinas dirije serbisu haklaken, organiza área haklaken, no treinu ita atu haklaken no hanorin iha dalan neʼebé diʼak. Sira mós nuʼudar juís neʼebé laran-diʼak no la todan ba sorin. Bainhira ema Kristaun ida halo sala neʼebé sériu, katuas sira hakaʼas an ajuda nia atu hadiʼa fali ninia relasaun ho Jeová. Iha tempu neʼebé hanesan, sira tau matan ba kongregasaun atu moos nafatin. (1 Kor 5:​12, 13; Gal 6:1) Katuas sira-nia knaar importante liu mak nuʼudar bibi-atan. (1 Ped 5:​1-3) Sira prepara didiʼak diskursu hodi uza Eskritura sira, hakaʼas an atu koñese ema hotu iha kongregasaun, no halo vizita nuʼudar bibi-atan. Katuas balu mós ajuda iha serbisu konstrusaun no tau matan ba Reuniaun-Fatin, organiza reuniaun boot, no serbí iha Komisaun neʼebé Komunika ho Ospitál no Grupu neʼebé Vizita Pasiente. Katuas sira serbisu makaʼas atu ajuda ita! w24.10 p. 20 par. 9

Bíblia hatete katak tanba Maromak fó ona Jesus nuʼudar sakrifísiu, neʼe katak nia sosa fali ita, ka ita sai livre ona. Apóstolu Pedro hatete: “Imi hatene katak laʼós ho buat neʼebé sei mohu hanesan osan-mutin ka osan-mean mak Maromak halo imi sai livre [orj., “Maromak sosa fali imi”] husi imi-nia dalan moris nian neʼebé folin-laek, neʼebé imi simu husi imi-nia beiʼala sira. Maibé nia salva imi ho Kristu nia raan neʼebé folin-boot, neʼebé hanesan raan husi bibi-malae oan neʼebé la iha aat ida no la foʼer.” (1 Ped 1:​18, 19; nota) Liuhusi Jesus nia sakrifísiu, ita bele livre husi sala no mate. (Rom 5:21) Ita agradese tebes tanba Jeová no Jesus halo ita livre liuhusi Jesus nia raan neʼebé folin-boot, ka ninia moris. w25.02 p. 5 par. 15-16

Oinsá mak ita bele proteje an husi tentasaun no sala? Haree toʼok saida mak ita bele aprende husi mane joven ida neʼebé temi iha Provérbios kapítulu 7. Nia halo sala seksuál ho feto neʼebé la iha morál. Versíkulu 22 hatete katak “lakleur deʼit” ka derrepente deʼit mane joven neʼe laʼo tuir feto neʼe. Maibé versíkulu sira antes neʼe hatudu katak nia halo ona hakat balu neʼebé neineik-neineik halo fasil ba nia atu monu ba sala. Saida mak nia halo antes monu ba sala? Primeiru, iha kalan “nia laʼo besik [feto neʼebé la iha morál] nia dalan sikun”. Tuirmai, nia laʼo atu bá feto neʼe nia uma. (Prov 7:​8, 9) No bainhira nia haree feto neʼe, nia la hasees an. Maibé nia husik feto neʼe reʼi nia no rona ba feto neʼe nia liafuan katak feto neʼe hasaʼe ona sakrifísiu, karik atu halo nia hanoin katak feto neʼe mak ema diʼak. (Prov 7:​13, 14, 21) Se mane joven neʼe la halo hakat sira neʼebé beik, nia bele hasees an husi tentasaun no la monu ba sala. w24.07 p. 16 par. 8-9; p. 19 par. 19

Jeová la husik deʼit ema neʼebé halo sala sériu no la arrepende an atu nafatin iha kongregasaun. Ema balu karik hanoin katak tanba Jeová mak “laran-sadiʼa”, nia bele husik deʼit ema neʼebé la arrepende an atu nafatin iha kongregasaun. Maibé hanoin hanesan neʼe mak la loos. Maski Jeová mak laran-sadiʼa, maibé nia la simu deʼit hahalok sala, no nia mós la troka ninia matadalan kona-ba morál. (Judas 4) Se Jeová husik deʼit ema neʼebé la arrepende sala atu nafatin iha kongregasaun, neʼe la hatudu laran-sadiʼa tanba neʼe sei lori perigu ba kongregasaun. (Prov 13:20; 1 Kor 15:33) Jeová lakohi ema ida atu lakon, nia hakarak ema hotu hetan salvasaun. Nia hatudu laran-sadiʼa ba ema neʼebé troka sira-nia hanoin no hahalok no hakarak atu serbí fali nia. (Eze 33:11; 2 Ped 3:9) Tan neʼe, bainhira mane iha Korinto arrepende an no troka ninia hahalok, Jeová uza apóstolu Paulo atu esplika ba kongregasaun katak sira presiza fó perdua no simu fali nia. w24.08 p. 17 par. 7; p. 18-19 par. 14-15

Iha ai-knanoik kona-ba bibi-malae no bibi-timur, Jesus hatete katak nia sei tesi-lia ba ema bazeia ba dalan neʼebé sira apoia Kristu nia alin sira. (Mt 25:​31-46) Iha “terus boot” nia rohan, foin antes funu Armagedon hahú, Jesus sei tesi-lia ba ema. (Mt 24:21) Hanesan bibi-atan ida haketak bibi-malae husi bibi-timur, Jesus sei haketak sira neʼebé apoia ninia alin sira ho laran-metin husi sira neʼebé la apoia. Nuʼudar Juís neʼebé Jeová hili ona, Jesus sei tesi-lia tuir justisa. (Isa 11:​3, 4) Jesus buka-hatene ema ida-idak nia hahalok, hanoin, no liafuan, inklui oinsá sira trata Jesus nia alin sira. (Mt 12:​36, 37) Jesus sei hatene sé mak apoia ninia alin sira no serbisu neʼebé sira halo. Dalan importante ida atu apoia Kristu nia alin sira mak hodi hola parte iha serbisu haklaken. w24.09 p. 20-21 par. 3-4

Bainhira ita duvida kona-ba buat ruma, ita presiza buka-hatene saida mak Bíblia hatete kona-ba neʼe. Porezemplu, hanoin toʼok kona-ba joven ida neʼebé duvida katak nia iha folin ba Jeová. Diʼak ka lae se nia husik deʼit ninia dúvida neʼe? Lae, nia presiza “buka-hatene uluk buat hotu” hodi bele komprende Jeová nia hanoin kona-ba neʼe. Kuandu ita lee Maromak nia Liafuan, ita “rona” Jeová koʼalia mai ita. Maibé atu hetan resposta ba ita-nia pergunta neʼebé espesífiku, la toʼo atu lee liu deʼit Bíblia. Ita presiza buka-hatene no aprende kona-ba eskritura sira neʼebé bele ajuda ita hatán ba ita-nia pergunta. Ita bele halo peskiza kona-ba pontu neʼe hodi uza ekipamentu sira neʼebé Jeová nia organizasaun fó. (Prov 2:​3-6) Ita mós presiza halo orasaun atu husu Jeová nia ajuda hodi bele hetan resposta. Tuirmai, ita bele buka Bíblia nia prinsípiu no informasaun neʼebé bele aplika ba ita-nia situasaun. w24.10 p. 25 par. 4-5

Jeová sei la haraik bensaun ba ema neʼebé foti an no sente katak sira mak ema neʼebé importante liu. (1 Kor 10:​24, 33; 13:4) Dala ruma, Jesus nia belun sira mós hakarak hetan priviléjiu, maibé ho motivu neʼebé sala. Hanoin toʼok kona-ba apóstolu Tiago no João. Sira husu Jesus atu fó knaar espesiál ba sira iha ninia Ukun. Jesus korrije sira no esplika ba apóstolu naʼin-12, hodi dehan: “Ema neʼebé hakarak sai ema-boot iha imi-nia leet tenke serbí imi. No mós ema neʼebé hakarak atu sai boot iha imi-nia leet tenke sai atan ba imi hotu.” (Mc 10:​35-37, 43, 44) Irmaun neʼebé iha motivu neʼebé loos hakarak atu serbí ema seluk, no nia sei sai bensaun ba kongregasaun.—1 Tes 2:8. w24.11 p. 15-16 par. 7-8

Bainhira halo desizaun, domin sei motiva ita atu “buka uluk ema seluk nia diʼak” no hatudu respeitu ba sira. (1 Kor 10:​23, 24, 32; 1 Tim 2:​9, 10) Tuirmai, ita sei halo desizaun neʼebé bazeia ba domin no respeitu. Antes halo desizaun importante ruma, hanoin kona-ba oinsá atu implementa ida-neʼe. Jesus hanorin ita atu “tuur uluklai hodi sura” ita-nia gastu. (Lc 14:28) Tan neʼe, hanoin kona-ba tempu, osan, no enerjia neʼebé Ita presiza gasta atu kumpre Ita-nia desizaun. Iha situasaun balu, diʼak mós atu koʼalia ho Ita-nia família kona-ba oinsá mak sira ida-idak bele apoia desizaun neʼe. Tanbasá neʼe diʼak? Karik neʼe sei ajuda Ita atu hatene se Ita presiza halo mudansa ruma, ka hili opsaun seluk. No kuandu Ita envolve Ita-nia família no rona ba sira-nia opiniaun, neʼe sei halo fasil ba sira atu apoia Ita kumpre Ita-nia desizaun. w25.01 p. 18-19 par. 14-15

Isaias fó sai tanbasá ita bele “haksolok no kontente” iha paraízu espirituál. Jeová mak kria paraízu espirituál. (Isa 65:​18, 19) Tan neʼe, ita la hakfodak katak Jeová uza ita atu ajuda ema seluk sai parte ba paraízu espirituál no husik tiha mundu nia organizasaun sira neʼebé la hanorin lia-loos! Ita sente kontente tebes kona-ba bensaun neʼebé ita sei simu tanba hatene lia-loos, no ita laran-manas fahe ida-neʼe ba ema seluk. (Jer 31:12) Ita mós sente agradese no laran-manas kona-ba esperansa neʼebé ita iha tanba tama ba paraízu espirituál. Bíblia promete katak ita sei “harii uma no hela iha laran, [no] kuda uvas iha toʼos no han ninia fuan”. Ita-nia “serbisu makaʼas sei la sai saugati deʼit” tanba “Jeová fó ona bensaun”. Nia promete ba ita moris neʼebé seguru, kontente, no iha objetivu. Nia hatene ema ida-idak nia presiza no nia sei “halo kontente kriatura hotu neʼebé moris hodi fó buat neʼebé sira hakarak”.—Isa 65:​20-24; Sal 145:16. w24.04 p. 22-23 par. 11-12

Ita halo Jeová sai nuʼudar ita-nia Fatuk Boot, kuandu ita tau fiar tomak ba nia. Ita fiar katak hodi halo tuir nia maski iha tempu susar, ita sei hetan benefísiu. (Isa 48:​17, 18) Bainhira ita sente Jeová nia ajuda iha ita-nia moris, ita-nia fiar ba nia sei metin liután. No ho Jeová nia ajuda ita sei sai prontu atu hasoru susar naran deʼit. Hanesan ho fatuk neʼebé boot, Jeová nunka troka. Ninia hahalok no hakarak nunka troka. (Mal 3:6) Bainhira Adão no Eva kontra Jeová iha jardín Eden, Jeová nia hakarak ba ema la troka. Hanesan buat neʼebé apóstolu Paulo hakerek, Jeová “labele nega ninia an rasik”. (2 Tim 2:13) Neʼe katak maski buat naran deʼit akontese ka buat neʼebé ema seluk halo, Jeová nia hahalok, hakarak, no matadalan sira nunka troka. Tanba Jeová nunka troka, ita hatene katak nia sei ajuda ita iha tempu neʼebé susar, no nia sei kumpre ninia promesa kona-ba futuru.—Sal 62:​6, 7. w24.06 p. 27-28 par. 7-8

Se Ita mak namora hela, saida mak bele ajuda Ita deside atu kaben ka lae? Neʼe mak koñese malu didiʼak. Karik Ita bele aprende buat balu kona-ba ema ruma antes hahú namora. Maibé tempu namora mak oportunidade atu Ita hatene kona-ba buat neʼebé iha ema neʼe nia laran. Buka-hatene liután buat neʼebé subar hela iha ema nia laran envolve aprende kona-ba ninia planu espirituál, hahalok, no hanoin. Nuʼudar tempu liu daudaun, Ita presiza hatán ba pergunta sira hanesan: ‘Ema neʼe diʼak atu sai haʼu-nia kaben ka lae?’ (Prov 31:​26, 27, 30; Éf 5:33; 1 Tim 5:8) ‘Ami bele apoia malu iha dalan emosaun ka lae? Haʼu bele tahan ninia fraku sira ka lae?’ (Rom 3:23) Bainhira Ita koñese malu, hanoin-hetan katak buat neʼebé importante liu mak laʼós kona-ba buat neʼebé hanesan entre Ita ho ema neʼe, maibé oinsá mak imi bele komprende malu kona-ba buat neʼebé diferente. w24.05 p. 27 par. 5

Liurai David halo sala sériu. Maibé bainhira profeta Natan fó konsellu ba nia, David ho haraik an arrepende an. (Sal 51:​3, 4, 17, introdusaun) Liurai Ezequias mós halo sala hasoru Jeová. (2 Krón 32:25) Maibé hanesan David, Ezequias ho haraik an arrepende ninia sala. (2 Krón 32:26) No ikusmai Jeová haree nia nuʼudar liurai neʼebé laran-metin neʼebé “kontinua halo buat neʼebé loos”. (2 Reis 18:3) Saida mak ita aprende husi ezemplu sira-neʼe? Ita presiza arrepende ita-nia sala sira no hakaʼas an atu la repete tan sala sira-neʼe. Oinsá se ita simu konsellu husi katuas kongregasaun, maski ita hanoin neʼe mak sala neʼebé kiʼik deʼit? Ita labele hanoin katak Jeová la simu ona ita ka katuas sira la gosta ita. Liurai Izraél sira neʼebé diʼak mós simu konsellu no hetan dixiplina. (Ebr 12:6) Bainhira ita hetan konsellu, ita presiza (1) simu ho haraik an, (2) halo mudansa, no (3) kontinua serbí Jeová ho laran tomak. Se ita arrepende ita-nia sala, Jeová sei perdua ita.—2 Kor 7:​9, 11. w24.07 p. 21 par. 8; p. 22 par. 9, 11

Kongregasaun hasai ema neʼebé halo sala sériu kuandu ema neʼe lakohi troka ninia hahalok maski katuas sira koko ona dala barak atu ajuda. (2 Reis 17:​12-15) Ninia hahalok hatudu katak nia deside atu la halo tuir Jeová nia matadalan. (Deut 30:​19, 20) Sei iha anúnsiu katak agora ema neʼe laʼós Testemuña ba Jeová. Objetivu ba avizu neʼe laʼós atu hamoe ema neʼebé halo sala, maibé atu irmaun-irmán sira bele halo tuir Bíblia nia matadalan hodi “la ransu tan” ho ema neʼe no ‘la han’ hamutuk ho nia. (1 Kor 5:​9-11) Matadalan neʼe lori benefísiu mai ita. Apóstolu Paulo dehan: “Fermentu uitoan bele halo masa tomak saʼe.” (1 Kor 5:6) Se ema neʼebé lakohi arrepende an mak kontinua iha kongregasaun laran, neʼe bele halo ema seluk hanoin katak sira mós la presiza halo tuir Jeová nia matadalan.—Prov 13:20; 1 Kor 15:33. w24.08 p. 26-27 par. 3-4

Ita labele fó forsa ka kbiit ba ema seluk hanesan Jeová, maibé ita bele uza ita-nia forsa atu ajuda ema seluk. Porezemplu, karik ita bele ajuda irmaun-irmán sira neʼebé idade ka moras hodi tau matan ba sira-nia uma ka halo kompras ba sira. Ka ita bele ajuda hamoos ka tau matan Reuniaun-Fatin. Hanoin-hetan katak liafuan mós iha kbiit. Porezemplu, Ita hanoin-hetan ka lae ema ruma neʼebé bele hetan benefísiu husi liafuan gaba? Ita hatene ema ruma neʼebé presiza hetan kmaan? Se nuneʼe, Ita bele hakbesik ba nia atu fó-hatene katak Ita hanoin nia. Ita bele vizita nia, telefone, ka karik haruka karta, email, ka mensajen. Keta hanoin barak kona-ba saida mak Ita sei koʼalia. Liafuan simples husi laran mós bele ajuda maluk fiar-naʼin sira atu kontinua tahan ho laran-metin ka sente diʼak ho sira-nia situasaun.—Prov 12:25; Éf 4:29. w24.09 p. 28 par. 8-10

Se Ita serbí ona nuʼudar atan kongregasaun ba tempu balu, karik Ita haburas ona hahalok diʼak balu neʼebé katuas kongregasaun presiza hatudu. Se nuneʼe, Ita hakarak halo ‘serbisu diʼak’ neʼe ka lae? Katuas sira-nia knaar mak saida deʼit? Neʼe mak atu hatudu ezemplu diʼak kona-ba haklaken, tau matan no hanorin bibi sira, no hametin kongregasaun liuhusi liafuan no hahalok. Tan neʼe, Bíblia temi katuas sira nuʼudar “prezente”. (Éf 4:8) Oinsá Ita bele kumpre kritéria atu serbí nuʼudar katuas? Kritéria atu sai katuas la hanesan ho kritéria atu hetan serbisu iha kompañia ruma. Se Ita atu hetan serbisu, Ita presiza iha abilidade neʼebé patraun sira buka. Maibé atu serbí nuʼudar katuas, la toʼo atu iha deʼit matenek atu haklaken no hanorin. Ita presiza kumpre kritéria neʼebé temi iha 1 Timóteo 3:​1-7 no Tito 1:​5-9. w24.11 p. 20 par. 1-3