Abríl

Atu bele hetan benefísiu husi Jesus nia isin no raan, ita presiza hatudu fiar ba Jesus nia sakrifísiu. (Éf 1:7) Klaru katak sira neʼebé Jesus bolu nuʼudar ‘bibi seluk’ labele no la presiza han paun ka hemu tua-uvas iha Naʼi nia Han-Kalan. (João 10:16) Maski nuneʼe, sira nafatin hetan benefísiu husi Jesus Kristu nia isin no raan. Sira hetan benefísiu neʼe liuhusi hatudu fiar ba Jesus nia sakrifísiu neʼebé folin-boot. (João 6:53) La hanesan ho bibi seluk, sira neʼebé han paun no hemu tua-uvas iha Naʼi nia Han-Kalan hatudu katak sira mak parte ba aliansa foun no iha esperansa atu ukun hamutuk ho Jesus iha lalehan. Tan neʼe, maski ita iha esperansa atu bá lalehan ka moris iha rai, ita tenke iha fiar neʼebé metin ba Jesus nia sakrifísiu atu bele hetan moris ba nafatin. w24.12 p. 13 par. 14, 16

Durante Naʼi nia Han-Kalan, Jesus oferese paun neʼebé la iha fermentu ba ninia apóstolu sira no hatete katak paun neʼe reprezenta ninia isin. Tuirmai nia fó ba sira tua-uvas no hatete katak neʼe reprezenta “raan aliansa nian”. (Mc 14:​22-25; Lc 22:20; 1 Kor 11:24) Aliansa neʼe bolu nuʼudar “aliansa foun”. Neʼe mak aliansa neʼebé Jeová halo ho “umakain Izraél [espirituál]” neʼebé sei ukun hamutuk ho Jesus iha “Maromak nia Ukun”. (Ebr 8:​6, 10; 9:15) Buat neʼebé Jesus hatete durante Naʼi nia Han-Kalan aplika deʼit ba “bibi-lubun kiʼik”. Ema primeiru neʼebé sai parte ba grupu kiʼik neʼe mak apóstolu sira neʼebé hamutuk ho Jesus iha ninia han-kalan ikus. Sira mak ema neʼebé sei hamutuk ho Jesus iha lalehan. w24.12 p. 11 par. 9-10

Jesus nia belun ida faʼan nia. Tuirmai ninia inimigu sira kaer nia, insulta nia, duun matak nia, tesi-lia ba nia, no fó-terus ba nia. Ikusmai soldadu sira prega nia ba ai-riin. Nuʼudar Jesus tahan moras hotu neʼebé nia sente, ninia Aman sente moras liu fali buat neʼebé Jesus sente. Jeová hadomi tebes ninia Oan, no nia mós iha forsa no kbiit atu hapara susar neʼebé ninia Oan hasoru. Maibé tanbasá nia la halo ida-neʼe? Neʼe tanba domin ba ema. Jesus nia sakrifísiu prova duni katak Jeová hadomi tebetebes Ita. Jeová fó ninia Oan neʼebé nia hadomi nuʼudar sakrifísiu no tahan ninia laran-kanek atu salva Ita husi sala no mate. (1 João 4:​9, 10) Sin, nia hakarak ajuda ita ida-idak atu luta hasoru sala, no manán! w24.08 p. 6 par. 13-14

Ita bele komprende liután Jeová nia domin ba ita se ita medita kona-ba Jeová nia sentimentu bainhira ema fó-terus no oho ninia Oan. Satanás duun katak la iha ema ida mak sei laran-metin ba Jeová bainhira hasoru susar. Atu prova katak Satanás mak bosok-teen, Jeová husik Jesus hetan uluk terus antes mate. (Job 2:​1-5) Jeová haree bainhira ulun-naʼin relijiaun sira goza Jesus, soldadu sira baku nia ho xikote, no prega nia iha ai-riin. Tuirmai, Jeová mós haree ninia Oan doben mate iha dalan neʼebé aat tebes. (Mt 27:​28-31, 39) Jeová iha forsa atu hapara situasaun neʼe iha tempu naran deʼit. (Mt 27:​42, 43) Maibé se Jeová halo nuneʼe, Jesus sei labele fó ninia moris nuʼudar sakrifísiu no ita sei la iha esperansa. Tan neʼe mak Jeová husik ninia Oan atu hetan terus toʼo mate. w25.01 p. 22 par. 7

Iha loron 16 Nisan 33 EC, Jesus nia dixípulu sira sente triste, taʼuk, no la hatene atu halo saida. Dixípulu naʼin-rua sai husi Jeruzalein hodi bá Emaus. Mane oin-foun ida hakbesik ba sira no laʼo hamutuk ho sira. Dixípulu sira-neʼe konta ba mane neʼe kona-ba buat neʼebé akontese ba Jesus. Tuirmai mane neʼe komesa koʼalia kona-ba buat neʼebé sira sei nunka haluha. Nia uza Eskritura sira “hahú husi Moisés no Profeta sira hotu nia liafuan” atu esplika tanbasá Mesias tenke hasoru susar no mate. Toʼo tiha Emaus, dixípulu sira rekoñese katak mane neʼe mak Jesus neʼebé moris hiʼas ona! (Lc 24:​13-35) Jesus mosu dala barak ba ninia dixípulu sira durante ninia loron 40 ikus iha rai. Durante tempu neʼebá, Jesus nia dixípulu sira neʼebé triste sai kontente fali no aten-brani atu haklaken no hanorin liafuan diʼak kona-ba Maromak nia Ukun. w24.10 p. 12 par. 1-3

Nuʼudar tempu liu daudaun, labarik ida sei sai boot. Maibé ema Kristaun la sai maduru automátiku deʼit. Porezemplu, irmaun-irmán sira iha Korinto simu liafuan diʼak, hetan batizmu, simu espíritu santu, no aprende husi buat neʼebé Paulo hanorin. (Após 18:​8-11) Maski nuneʼe, tinan balu liutiha husi tempu neʼebé sira hetan batizmu, sira barak nafatin la maduru. (1 Kor 3:2) Atu bele sai maduru, ita presiza haburas uluk ita-nia hakarak atu sai maduru. Ema neʼebé ‘hadomi hahalok beik’ lakohi aprende liután kona-ba buat espirituál, no nunka bele sai maduru. (Prov 1:22) Ita lakohi sai hanesan ema neʼebé boot ona iha dalan fíziku maibé kontinua sadere ba inan-aman atu halo desizaun ba sira. Maibé, ita hakarak atu kaer responsabilidade rasik hodi kontinua hametin ita-nia relasaun ho Jeová. Se Ita hakaʼas an daudaun atu sai maduru, halo orasaun atu Jeová ‘fó ba Ita hakarak no kbiit atu halo buat neʼebé nia hakarak’.—Flp 2:13. w24.04 p. 4 par. 9-10

Jeová ho laran-diʼak fó sai kona-ba saida mak nia sente bainhira nia tesi-lia ba ema. (Eze 33:11) Jeová la ansi atu halakon ema ba nafatin. Nia mak Maromak neʼebé laran-sadiʼa no nia hatudu laran-sadiʼa bainhira situasaun permite. Saida mak ita hatene kona-ba ema neʼebé sei la hetan moris-hiʼas? Bíblia temi kona-ba ezemplu balu deʼit. Jesus hatete katak Judas Iscariotes sei la hetan moris-hiʼas. (Mc 14:21; João 17:12) Judas hatene katak buat neʼebé nia halo mak kontra duni Jeová no Jesus, maibé nia nafatin halo ida-neʼe. (Mc 3:29) Jesus mós hatete katak ulun-naʼin relijiaun balu neʼebé kontra nia sei mate no la hetan moris-hiʼas. (Mt 23:33; João 19:11) No apóstolu Paulo fó avizu katak apóstata sira neʼebé la arrepende an mós sei la hetan moris-hiʼas.—Ebr 6:​4-8; 10:29. w24.05 p. 4 par. 10-11

Bainhira ita nafatin hakbesik ba Jeová, buat aat hotu neʼebé Satanás halo sei la fó impaktu mai ita ba nafatin. (1 João 3:8) Iha mundu foun, Jeová sei kontinua proteje ninia belun sira laʼós deʼit iha dalan espirituál, maibé mós husi mate. (Apok 21:4) Ita iha priviléjiu atu sai bainaka iha Jeová nia tenda no iha relasaun diʼak ho nia ba nafatin. (Eze 37:27) Ita presiza hatudu hahalok saida atu bele kontinua sai ninia bainaka? Se ema ida konvida Ita ba ninia uma, Ita presiza hatene saida mak nia hakarak Ita atu halo. Klaru katak ita mós presiza hatene saida mak Jeová hakarak ninia bainaka sira atu halo. Ita-nia domin ba Jeová book ita atu halo buat naran deʼit hodi “halo nia kontente iha buat hotu”. (Kol 1:10) Ita presiza hanoin-hetan ida-neʼe no sempre hatudu respeitu kleʼan ba nia. Bainhira ita hatudu respeitu kleʼan ba nia, neʼe sei ajuda ita atu la halo hahalok neʼebé halo nia laran-kanek. Ita hakarak ‘laʼo hamutuk ho ita-nia Maromak ho haraik an’.—Miq 6:8. w24.06 p. 4 par. 8-9

Jeová husu Abraão atu fó ninia oan Isaac nuʼudar sakrifísiu. Neʼe halo Abraão sente laran-susar tebes. Maski nuneʼe, nia halo tuir Jeová. Bainhira Abraão besik atu oho Isaac, Maromak hapara nia. Ezemplu neʼe hanorin lisaun importante kona-ba saida mak Jeová sei halo. Jeová prontu atu fó ninia Oan-Mane neʼebé nia hadomi nuʼudar sakrifísiu. Neʼe hatudu katak Jeová hadomi tebes ema. (Gén 22:​1-18) Tinan barak liu tiha, Jeová fó Ukun-Fuan ba nasaun Izraél atu hasaʼe sakrifísiu oioin hodi bele hamoos sira-nia sala. (Lev 4:​27-29; 17:11) Sakrifísiu sira-neʼe hatudu katak Jeová sei prepara sakrifísiu ida neʼebé diʼak liu atu bele salva ema husi sala iha dalan neʼebé kompletu. Maromak haruka ninia profeta sira atu hakerek kona-ba bei-oan neʼebé promete nanis ona, neʼe mak Maromak nia Oan-Mane mesak neʼebé sei hasoru terus no hetan kastigu-mate atu salva ema inklui Ita, husi sala no mate!—Isa 53:​1-12. w24.08 p. 4 par. 7-8

Bainhira Ita lee Bíblia, diʼak atu buka dalan oinsá atu aplika buat neʼebé Ita lee. Nuʼudar Ita lee parte ida husi Bíblia, husu ba Ita-nia an: ‘Oinsá mak haʼu bele aplika informasaun neʼe agora ka iha futuru?’ Nuʼudar ezemplu, imajina toʼok Ita lee 1 Tesalónika 5:​17, 18. Depois lee tiha versíkulu sira-neʼe, Ita bele para no hanoin kona-ba Ita rasik nia orasaun. Porezemplu, Ita rasik halo orasaun beibeik no ho laran ka lae? Ita mós bele hanoin kona-ba razaun oioin atu fó agradese. Karik Ita bele deside atu fó agradese ba Jeová kona-ba buat espesífiku tolu. Maski Ita uza minutu balu deʼit atu halo hanesan neʼe, neʼe sei ajuda Ita atu komprende Maromak nia Liafuan no halo tuir. Se Ita iha toman atu lee Bíblia no halo tuir prosesu sira-neʼe loroloron, neʼe sei ajuda Ita atu sai Jeová nia atan neʼebé diʼak liután. w24.09 p. 4-5 par. 9-10

Jeová kria ita ho abilidade espesiál. Maski ita sente kontente kuandu simu, maibé ita sei sente kontente liután kuandu ita fó. Ita sente kontente kuandu ita bele ajuda ita-nia maluk fiar-naʼin, no kuandu sira hatudu agradese. Maski ema hatudu agradese ka lae, ita bele sente kontente tanba halo buat neʼebé loos. Hanoin-hetan katak “Jeová iha kbiit atu fó fali ba Ita barak liu fali” buat neʼebé Ita fó. (2 Krón 25:9) Sin, Jeová sempre fó ba ita buat barak. No bainhira ita simu kolen husi Jeová, neʼe mak kolen neʼebé diʼak liu. Tan neʼe, mai ita hakaʼas an banati-tuir ita-nia Aman Jeová neʼebé laran-luak. w24.09 p. 30-31 par. 20-21

Jeová laran-sadiʼa no laran-diʼak. (Sal 103:13; Isa 49:15) Nia hanoin ita no komprende ita-nia sentimentu. (Zac 2:8) Nia halo fasil ba ita atu hakbesik ba nia nuʼudar Belun. (Sal 25:14; Após 17:27) No nia haraik an, tan neʼe “nia hakruʼuk atu haree ba lalehan no rai, nia halo ema kiʼik hamriik husi rai-rahun”. (Sal 113:​6, 7) Tanba razaun sira-neʼe mak ita hakarak fó glória ba Jeová. Ita fó glória ba Jeová tanba hakarak atu ema koñese nia. Ema barak la hatene lia-loos kona-ba Jeová. Tanbasá? Tanba Satanás taka netik sira-nia neon liuhusi lia-bosok oioin kona-ba Jeová. (2 Kor 4:4) Satanás halo ema fiar katak Jeová mak Maromak neʼebé hirusdór, la hanoin ema, no hamosu susar barak iha mundu neʼe. Maibé ita hatene lia-loos kona-ba ita-nia Maromak! Ita iha oportunidade espesiál atu fó-hatene ema seluk lia-loos kona-ba Maromak no ajuda sira atu fó glória ba nia.—Isa 43:10. w25.01 p. 3 par. 6-7

Maski Jesus mak Maromak nia Oan-Mane neʼebé perfeitu no halo milagre barak, maibé Satanás uza ema balu atu habelar lia-bosok oioin kona-ba Jesus. Porezemplu, ulun-naʼin relijiaun hatete ba povu katak Jesus hetan kbiit husi “anju aat sira-nia ukun-naʼin” atu duni sai anju aat sira. (Mc 3:22) Bainhira Jesus hetan tesi-lia iha tribunál, ulun-naʼin relijiaun sira duun katak Jesus koʼalia aat Maromak no sira book povu atu husu hodi Jesus hetan kastigu-mate. (Mt 27:20) Tuirmai, bainhira Kristu nia dixípulu sira haklaken liafuan diʼak, kontradór sira “book ema husi nasaun seluk hodi hanoin aat no kontra” dixípulu sira-neʼe. (Após 14:​2, 19) Menara Pengawal 1 Dezembru 1998 esplika kona-ba Apóstolu 14:2: “Ema Judeu neʼebé sai nuʼudar kontradór laʼós deʼit la simu mensajen kona-ba liafuan diʼak, maibé sira mós halo buat aat oioin hodi book ema husi nasaun seluk atu la simu liafuan diʼak no mós kontra ema Kristaun.” Ohin loron, Satanás nafatin “lohi ema iha mundu tomak”. w24.04 p. 11 par. 15; p. 13 par. 16

Ema nia moris ba nafatin la depende ba bainhira mak nia mate. Jeová mak Juís neʼebé perfeitu, no nia sempre tesi-lia iha dalan neʼebé loos no tuir justisa. (Sal 33:​4, 5) Ita bele fiar katak “Juís ba mundu tomak” sei halo buat neʼebé loos. Ita mós bele dehan katak ema nia moris ba nafatin la depende ba fatin neʼebé nia hela bá. Jeová sei nunka tesi-lia ba ema millaun ba millaun nuʼudar “bibi-timur” tan deʼit sira hela iha rai neʼebé nunka hetan oportunidade atu aprende kona-ba liafuan diʼak. (Mt 25:46) Jeová, Juís ba mundu tomak hadomi tebes ema sira-neʼe. Ita la hatene oinsá Jeová sei kontrola situasaun sira durante terus boot. Maibé karik sira balu sei hetan oportunidade atu aprende kona-ba Jeová, tau fiar ba nia, no hili atu apoia Jeová kuandu nia halo ninia naran santu iha mundu tomak.—Eze 38:16. w24.05 p. 12 par. 14-15

Jeová nia povu kontente atu ajuda malu. (2 Kor 8:4) Maibé, dala ruma presiza aten-brani atu halo ida-neʼe. Porezemplu, bainhira akontese funu, katuas sira rekoñese katak irmaun-irmán sira presiza hetan anima, apoia, no karik presiza loroloron nian no mós Bíblia no publikasaun sira. Tanba hadomi bibi sira, katuas sira tau sira-nia moris iha perigu laran atu fó ajuda bainhira presiza. Iha situasaun hanesan neʼe, importante atu nafatin unidade. Halo tuir matadalan neʼebé mai husi sukursál. (Ebr 13:17) Katuas sira presiza haree beibeik matadalan kona-ba oinsá atu prepara ba tempu dezastre no saida mak sira presiza halo bainhira dezastre akontese. (1 Kor 14:​33, 40) Hatudu aten-brani, maibé matan-moris. (Prov 22:3) Hanoin uluk antes halo buat ruma. Keta halo buat ruma neʼebé lori risku, se la presiza. Sadere ba Jeová. Nia sei apoia Ita atu ajuda irmaun-irmán sira ho seguru. w24.07 p. 4 par. 8; p. 5 par. 11

Liurai David hatene didiʼak Jeová, no tau fiar ba Nia. Bainhira inimigu sira, inklui Liurai Saul koko atu oho nia, David halo orasaun ba Jeová atu ajuda nia. Depois Maromak hatán tiha ninia orasaun no salva nia, David hatete: “Jeová mak Maromak neʼebé moris!” (Sal 18:46) David nia liafuan neʼe katak sá? Referénsia ida esplika katak David uza liafuan sira-neʼe atu hatudu katak nia tau fiar ba Jeová nuʼudar Maromak neʼebé moris no sempre ajuda ninia atan sira. Sin, David rasik sente duni katak ninia Maromak mak moris, no neʼe hametin David atu kontinua serbí no fó hahiʼi ba Jeová. (Sal 18:​28, 29, 49) Bainhira ita fiar katak Jeová mak Maromak neʼebé moris, neʼe ajuda ita atu serbí nia ho laran-manas. Ita sei iha forsa atu tahan hasoru susar naran deʼit no motiva ita atu kontinua halo Maromak nia serbisu ho badinas. No mós ajuda ita deside metin atu nafatin hakbesik ba Jeová. w24.06 p. 20-21 par. 3-4

Saida mak ita aprende husi apóstolu Paulo nia liafuan ba ema Kristaun iha Tesalónika? Bainhira ita rona kona-ba buat ruma neʼebé la hanesan ho buat neʼebé ita aprende husi Bíblia, ka bainhira ita rona istória falsu, ita presiza uza ita-nia kbiit atu tetu didiʼak. Iha tempu eis-Uniaun Soviétika, kontradór balu fahe karta ba irmaun sira no dehan katak karta neʼe mai husi sede-jerál. Karta neʼe anima irmaun balu atu forma organizasaun ketak. Haree hanesan karta neʼe fó sai buat neʼebé loos, maibé irmaun sira neʼebé laran-metin la monu ba lia-bosok neʼe. Sira rekoñese katak liafuan iha karta neʼe la tuir buat neʼebé sira aprende ona. Ohin loron, dala ruma kontradór sira uza teknolojia atu halo ita konfuzaun no haketak ita. Duké ‘husik ema seluk troka lalais ita-nia hanoin’, ita bele proteje ita-nia an hodi buka-hatene se buat neʼebé ita lee ka rona mak tuir duni lia-loos neʼebé ita aprende ona ka lae.—2 Tes 2:2; 1 João 4:1. w24.07 p. 12 par. 14-15

Desizaun neʼebé importante liu mak atu dedika an ba Jeová no sai parte ba Ninia família. Jeová hakarak ema hotu atu halo nuneʼe. Tanbasá? Nia hakarak sira atu iha relasaun diʼak ho nia no moris ba nafatin. (Deut 30:​19, 20; Gal 6:​7, 8) Jeová la obriga ema atu adora nia. Nia husik ema ida-idak atu deside saida mak sira sei halo. Oinsá se ema ida neʼebé batizmu ona la halo tuir Jeová nia ukun-fuan no halo sala neʼebé sériu? Se nia la arrepende sala, kongregasaun tenke hasai nia. (1 Kor 5:13) Maski nuneʼe, Jeová hakarak tebes ema neʼe atu fila fali ba Nia. Loloos razaun importante tanbasá Jeová fó Jesus nia sakrifísiu mak atu fó perdua ba ema neʼebé arrepende an. Jeová mak Maromak neʼebé nakonu ho domin, no nia hakarak tebes ema atu arrepende sala.—Zac 1:3; Rom 2:4; Tgo 4:8. w24.08 p. 14 par. 1-2

Iha tempu neʼebé nia hakerek karta terseiru, ema balu komesa habelar hanorin falsu no neʼe fó ameasa ba kongregasaun nia unidade. Maibé iha mós ema neʼebé “laʼo iha lia-loos”. Sira halo tuir Jeová no “moris tuir ninia ukun-fuan sira”. (2 João 4, 6) Ema sira-neʼe lori ksolok ba João no mós ba Jeová. (Prov 27:11) Lisaun mak saida? Laran-metin lori ksolok. (1 João 5:3) Porezemplu, ita haksolok hodi hatene katak ita halo Jeová kontente. Jeová haksolok kuandu haree ita tahan hasoru tentasaun husi mundu no halo tuir nia. Anju sira mós haksolok. (Lc 15:10) Ita mós haksolok bainhira haree ema seluk kontinua laran-metin. (2 Tes 1:4) No kuandu Satanás nia mundu lakon ona, ita sei kontente tanba laran-metin ba Jeová. w24.11 p. 12 par. 17-18

Ba tempu hira mak Ita presiza buka-hatene didiʼak kona-ba ema neʼe antes fó sai Ita-nia sentimentu romántiku? Se Ita lalais atu hakbesik ba ema ida, karik nia bele hanoin katak Ita la hanoin uluk antes atu foti desizaun. (Prov 29:20) Maibé, se ema neʼe nota ona katak Ita gosta nia, no Ita hein ba tempu kleur, karik nia sei hanoin katak Ita demora atu foti desizaun. (Ecle 11:4) Hanoin-hetan, antes atu hakbesik ba ema ida, Ita la presiza deside nanis katak Ita sei kaben duni ho nia. Maibé Ita presiza fiar katak Ita prontu duni atu kaben, no mós fiar katak ema neʼe bele sai duni pár neʼebé diʼak ba Ita. Oinsá se Ita nota katak ema ida gosta Ita? Se Ita la interese atu namora ho nia, koko hatudu ida-neʼe ho klaru liuhusi Ita-nia hahalok. Se Ita lakohi namora ho ema neʼe, no Ita halo nia hanoin katak Ita hakarak atu namora ho nia, neʼe la hatudu domin.—Éf 4:25. w24.05 p. 22-23 par. 9-10

Kristu nia alin sira neʼebé laran-metin deʼit mak sei ukun hamutuk ho Jesus iha lalehan. Kristu nia alin sira neʼebé la kontinua matan-moris sei la sai “ema neʼebé Maromak hili ona”. (Mt 24:31) Nuneʼe mós Maromak nia povu hotu, maski sira iha esperansa atu bá lalehan ka moris iha rai, sira hotu presiza matan-moris no laran-metin nafatin. Ita hatene didiʼak Jeová, tan neʼe ita tau fiar ba Jeová nia desizaun hotu. Ita la hanoin barak kuandu Jeová hili ema balu neʼebé laran-metin atu bá lalehan iha ita-nia tempu. Ita hanoin-hetan Jesus nia ai-knanoik kona-ba toʼos-uvas no serbisu-naʼin neʼebé hahú serbisu iha tuku lima lokraik. (Mt 20:​1-16) Sira neʼebé simu konvite atu serbisu ba oras uitoan deʼit mós simu kolen neʼebé hanesan ho sira neʼebé serbisu ba oras barak. Ema neʼebé iha esperansa atu bá lalehan mós sei simu kolen neʼebé hanesan maski Jeová hili sira iha tempu neʼebé la hanesan, naran katak sira laran-metin nafatin. w24.09 p. 24 par. 15-17

Jesus fó ezemplu perfeitu kona-ba oinsá atu tahan situasaun la justisa. Hanoin toʼok susar saida deʼit mak Jesus hetan husi ninia família no ema seluk. Ninia família rasik hatete katak nia bulak ona, ulun-naʼin relijiaun sira duun katak nia hetan kbiit husi anju aat sira, no soldadu Roma goza nia, halo violénsia, no oho nia. (Mc 3:​21, 22; 14:55; 15:​16-20, 35-37) Maski nuneʼe, Jesus tahan buat sira-neʼe hotu no la vinga sira. Ninia ezemplu neʼe hanorin saida mai ita? (1 Ped 2:​21-23) Jesus fó ezemplu neʼebé perfeitu atu ita halo tuir kuandu hasoru situasaun la justisa. Nia hatene bainhira mak atu nonook no koʼalia. (Mt 26:​62-64) Bainhira ema duun nia, dala ruma nia la koʼalia buat ida. (Mt 11:19) Maibé kuandu nia koʼalia, nia la insulta ka ameasa kontradór sira. w24.11 p. 4-5 par. 9-10

Imajina toʼok Ita fó prezente espesiál ba ema ida neʼebé Ita hadomi tanba hatene katak neʼe bele ajuda nia. Ita sei sente kontente kuandu ema neʼe uza didiʼak prezente neʼe no hatudu agradese ba Ita. Maibé Ita sei triste tebes se ema neʼe rai deʼit prezente neʼe no nunka hanoin fali kona-ba neʼe. Saida mak ita bele aprende? Jeová fó ninia Oan-Mane atu mate mai ita. Klaru katak Jeová kontente tebes kuandu ita hatudu agradese ba prezente neʼe no domin neʼebé nia hatudu hodi fó ninia Oan-Mane nuʼudar sakrifísiu! (João 3:16; Rom 5:​7, 8) Nuʼudar tempu liu daudaun, karik ita komesa haree Jesus nia sakrifísiu nuʼudar buat baibain deʼit. Neʼe hanesan ita rai deʼit Maromak nia prezente neʼebé folin-boot no la hanoin fali kona-ba neʼe. Atu neʼe la akontese, ita presiza hanoin beibeik kona-ba buat neʼebé Maromak no Kristu halo ona mai ita. w25.01 p. 26 par. 1-2

Irmaun neʼebé serbí nuʼudar katuas kongregasaun mak “laʼós ema neʼebé foin sai fiar-naʼin”. Neʼe la dehan katak Ita presiza batizmu ba tinan barak, maibé Ita presiza tempu atu sai ema Kristaun neʼebé maduru. Antes serbí nuʼudar katuas, Ita presiza halo tuir Jesus nia ezemplu kona-ba haraik an no hein atu simu knaar naran deʼit husi Jeová ho kontente. (Mt 20:23; Flp 2:​5-8) Ita bele hatudu katak Ita “laran-metin” ba Jeová hodi moris tuir ninia matadalan sira no ninia organizasaun. Bíblia dehan katak katuas sira presiza iha kbiit atu hanorin. Neʼe katak Ita tenke matenek atu hatoʼo diskursu ka lae? Lae. Laʼós katuas hotu mak matenek atu hatoʼo diskursu, maibé sira hatene oinsá atu haklaken no hanorin irmaun-irmán sira hodi uza Bíblia ho didiʼak. w24.11 p. 23 par. 14-15

Bainhira Ita lee eskritura ruma iha Bíblia no ladún komprende, diʼak atu halo peskiza. Tuirmai, medita loron tomak kona-ba buat neʼebé Ita estuda, no saida mak Ita aprende kona-ba Jeová no ninia Oan-Mane nia domin ba Ita. (Sal 119:​97, nota) Keta sai laran-kraik bainhira Ita la hetan buat foun ruma kuandu lee Bíblia ka halo peskiza. Imajina katak Ita mak hanesan ho ema neʼebé buka osan-mean. Baibain ema neʼebé buka osan-mean gasta oras barak no loron barak toʼo ikusmai hetan osan-mean, maski neʼe mak kiʼik deʼit. Maibé, sira la rende an no nafatin pasiénsia tanba hatene katak osan-mean neʼebé kiʼik mós iha folin-boot. Klaru katak lia-loos husi Bíblia mak folin-boot liu fali osan-mean! (Prov 8:10) Tan neʼe, hatudu pasiénsia hodi kontinua lee Bíblia no halo peskiza.—Sal 1:2. w25.01 p. 24-25 par. 14-15

Jeová hakarak ita atu prontu fó perdua ba ema neʼebé hakanek ita. (Sal 86:5; Lc 17:4; Éf 4:32) Dala ruma ema ida nia liafuan no hahalok bele hakanek duni ita-nia laran, liuliu se neʼe mak ita-nia belun ka família ida. (Sal 55:​12-14) Iha situasaun hanesan neʼe, ita bele sente hanesan ema sona ita. (Prov 12:18) Karik ita koko atu ignora ita-nia sentimentu. Maibé se ita halo nuneʼe, neʼe hanesan ita hetan tiha sona ho tudik, no husik tudik neʼe nafatin belit iha ita-nia isin. Nuneʼe mós, ita-nia sentimentu sei la sai diʼak se ita ignora deʼit ida-neʼe. Bainhira ema ida hakanek ita, karik ita-nia reasaun primeiru mak hirus. No Bíblia mós rekoñese ida-neʼe. Maski nuneʼe, Bíblia fó ita avizu atu la husik sentimentu neʼe domina ita. (Sal 4:4; Éf 4:26) Tanbasá? Tanba sentimentu hirus la lori rezultadu neʼebé diʼak. (Tgo 1:20) Hanoin-hetan, sai hirus mak reasaun, maibé nafatin hirus mak desizaun. w25.02 p. 15 par. 4-6

Jesus konta ai-knanoik kona-ba mane ida neʼebé halo desizaun la matenek tanba halibur deʼit rikusoin maibé la sai “riku ba Maromak”. (Lc 12:​16-21) La iha ema ida mak hatene saida mak sei akontese iha loron aban. (Prov 23:​4, 5; Tgo 4:​13-15) Ita hasoru susar tanba ita mak Jesus nia dixípulu. Jesus hatete katak ita tenke prontu atu “husik hela” ita-nia rikusoin hodi bele laʼo tuir Jesus. (Lc 14:33) Iha tempu uluk, ema Kristaun iha Judeia la lakon sira-nia ksolok maski hasoru situasaun hanesan neʼe. (Ebr 10:34) Ohin loron mós irmaun-irmán barak lakon ona sira-nia osan no serbisu tanba lakohi hola parte iha buat polítiku. (Apok 13:​16, 17) Saida mak ajuda sira? Sira tau fiar tomak ba Jeová nia promesa neʼebé dehan: “Haʼu sei nunka husik ó, no haʼu sei nunka fila kotuk ba ó.” (Ebr 13:5) Ita hakaʼas an atu prepara ba futuru, no se situasaun susar ruma akontese, ita tau fiar ba Jeová nia apoiu. w25.03 p. 29 par. 13-14

Jeová sei ajuda ita atu sai maduru. Nia fó bibi-atan no mestre sira iha kongregasaun atu ajuda ita “atu sai hanesan ema boot” iha dalan espirituál, “neʼe katak sai maduru hanesan ho Kristu”. (Éf 4:​11-13) Jeová mós fó ninia espíritu santu atu ajuda ita iha “Kristu nia hanoin”. (1 Kor 2:​14-16) Liután neʼe, Maromak fó mai ita Evanjellu haat neʼebé hatudu kona-ba Jesus nia dalan atu hanoin, koʼalia, no hahalok durante iha rai. Hodi banati-tuir Jesus, Ita bele kumpre Ita-nia planu atu sai ema Kristaun neʼebé maduru. Maibé atu bele sai maduru, ita labele aprende deʼit “hanorin báziku kona-ba Kristu”, katak Bíblia nia hanorin báziku sira. w24.04 p. 4-5 par. 11-12

Loroloron, ita presiza halo desizaun oioin. Desizaun balu mak fasil, porezemplu, atu han saida ka bainhira mak atu toba. Maibé iha mós desizaun balu neʼebé susar. Karik neʼe sei fó impaktu ba ita-nia saúde, ita-nia ksolok, ema neʼebé ita hadomi, ka ita-nia adorasaun. Ita hakarak halo desizaun neʼebé sei lori benefísiu mai ita no ita-nia família. Importante liu mak ita-nia desizaun bele halo Jeová kontente. (Rom 12:​1, 2) Hakat importante atu halo desizaun diʼak mak buka faktu sira. Tanbasá importante? Imajina toʼok, pasiente ida bá konsulta iha doutór kona-ba problema saúde neʼebé sériu. Tuir Ita-nia hanoin, diʼak ka lae se doutór neʼe deside kedas kona-ba ai-moruk ruma hodi la buka-hatene uluk pasiente nia kondisaun ka husu pergunta ruma? Klaru katak lae. Hanesan ho doutór, Ita mós sei halo desizaun neʼebé diʼak se Ita buka uluk faktu sira neʼebé kona Ita-nia situasaun. w25.01 p. 14 par. 1-3

Saida mak ita hatene kona-ba Jeová nia laran-sadiʼa? Oinsá mak nia hatudu ona katak nia “lakohi ema ida lakon”? (2 Ped 3:9) Hanoin toʼok kona-ba oinsá Jeová hatudu laran-sadiʼa bainhira ema halo sala neʼebé sériu. Liurai David halo sala sériu oioin, inklui adultériu no oho ema. Maibé, Jeová hatudu laran-sadiʼa no fó perdua ba David tanba nia arrepende an. (2 Sam 12:​1-12) Liurai Manasés halo hahalok aat barak durante ninia moris. Maski nuneʼe, Jeová hatudu laran-sadiʼa no fó perdua ba nia tanba nia arrepende an. (2 Krón 33:​9-16) Ezemplu sira-neʼe fó-hanoin ita katak Jeová sei hatudu laran-sadiʼa bainhira nia iha razaun atu halo ida-neʼe. Nia sei fó moris-hiʼas ba ema hanesan neʼe tanba sira rekoñese katak sira halo ona sala neʼebé sériu no arrepende an. w24.05 p. 4 par. 12