ஊழியத்தில் திறமைகளை மெருகூட்ட... புதியவர்களுக்கு சொல்லிக்கொடுங்கள்

ஏன் முக்கியம்: இயேசு “கட்டளையிட்ட எல்லாவற்றையும்” செய்ய புதியவர்கள் கற்றுக்கொள்ள வேண்டும். முக்கியமாக, மற்றவர்களுக்கு பைபிள் படிப்பு எடுக்கவும் கற்றுக்கொள்ள வேண்டும். (மத். 28:19, 20) புதியவர்கள் பைபிளை படிக்கும்போதே சொந்தக்காரர்களிடமும் நண்பர்களிடமும் பைபிளைப் பற்றி பேச ஆரம்பித்துவிடுகிறார்கள். முன்னேற்றங்களை செய்து ஊழியப் பள்ளியிலும் பேச்சு கொடுக்கிறார்கள். போகப் போக, பைபிளை பற்றி எல்லாரும் தெரிந்துகொள்ள வேண்டும் என்று யெகோவா ஆசைப்படுகிறார் என்பதைப் புரிந்துகொள்கிறார்கள். அதனால், சபையோடு சேர்ந்து ஊழியம் செய்ய ஆசைப்படுகிறார்கள். (ரோ. 10:13, 14) ஊழியத்துக்குப் போக ஆரம்பித்ததும் அவர்களுக்கு நிறைய விஷயங்களை சொல்லிக்கொடுக்க வேண்டும். அப்போதுதான் அவர்கள் தொடர்ந்து முன்னேற முடியும், ஊழியத்தில் திறமையாகவும் தைரியமாகவும் பேச முடியும்.—லூக். 6:40.

எப்படி செய்வது?

ஊழியத்திற்கும் பைபிள் படிப்பிற்கும் தேவையான புத்தகங்களை வாங்குவதற்கு உதவி செய்யுங்கள். ஊழியத்திற்கு கொண்டுபோகும் பையில் எல்லாவற்றையும் ஒழுங்காக வைக்க சொல்லிக்கொடுங்கள். அதோடு, ஒவ்வொரு புத்தகத்தையும் அமைப்பு எதற்காக தயாரித்திருக்கிறார்கள் என்று சொல்லுங்கள்.
நம் ராஜ்ய ஊழியத்தில் “இப்படி பேசிப் பாருங்கள்” என்ற பகுதியில் இருக்கும் விஷயத்தை புதிய நபருடன் சேர்ந்து நடித்துப் பாருங்கள். அதை அப்படியே மனப்பாடம் செய்யாமல், மனதிலிருந்து சொல்லச் சொல்லுங்கள். எந்த சூழ்நிலைகளில் எல்லாம் பைபிளை பற்றி மற்றவர்களிடம் பேசலாம் (பேச்சு அமைப்புகள்) என்று ஊழியப் பள்ளி புத்தகம் பக்கம் 82-ல், கொடுத்திருக்கிறார்கள். அதில், நீங்கள் ஊழியம் செய்யும் இடத்திற்கு ஏற்ற சூழ்நிலைகளைத் தேர்ந்தெடுத்து பேசிப் பாருங்கள். நிறைய இடங்களில் பிரச்சினைகள் வருவதால் ஜாக்கிரதையாக நடந்துகொள்வது ஏன் முக்கியம் என்பதை சொல்லிக் கொடுங்கள். ஊழியத்திற்கு அடக்கமான உடையில் போவது ஏன் முக்கியம் என்பதையும் சொல்லுங்கள்.—2 கொ. 6:3, 4.
கொஞ்சம் கொஞ்சமாக சொல்லிக்கொடுங்கள். பிராந்திய அட்டையை அதாவது ஊழியம் செய்யும் இடத்தின் வரைபடத்தை காட்டுங்கள். ஆர்வம் காட்டும் நபரை பற்றி வீட்டுக்கு வீடு பதிவு சீட்டில் எப்படி எழுதி வைக்கலாம் என்று சொல்லிக்கொடுங்கள். சகல தேசத்து மக்களுக்கும் நற்செய்தி புத்தகத்தையும் jw.org வெப்சைட்டையும் ஊழியத்தில் பயன்படுத்த சொல்லிக்கொடுங்கள். ஊழியத்தில் ஆர்வம் காட்டும் நபர்களை திரும்பவும் போய் பார்த்து பைபிள் படிப்பு ஆரம்பிக்க உதவுங்கள்.—1 கொ. 3:6.
பொறுமையாகச் சொல்லிக்கொடுங்கள். அவர்களை மனதார பாராட்டுங்கள். (நீதி 25:11) முன்மாதிரியாக இருங்கள். நீங்கள் ஆர்வமாக ஊழியம் செய்வதையும், அவர்கள்மேல் அக்கறை காட்டுவதையும் எப்போதுமே அவர்கள் மறக்கமாட்டார்கள்.

இந்த மாதம் இதை செய்து பாருங்கள்:

உங்களிடம் பைபிள் படிப்பவர்களோடு சேர்ந்து ஊழியம் செய்யுங்கள். மறுசந்திப்பிற்கும் பைபிள் படிப்பிற்கும் அழைத்துச் செல்லுங்கள். அல்லது சபையில் இருக்கும் புதியவர்களை அழைத்துச் செல்லுங்கள்.