ஊழியத்தில் திறமைகளை மெருகூட்ட... நற்செய்தி சிறுபுத்தகத்தைப் பயன்படுத்தி பைபிள் படிப்பு ஆரம்பியுங்கள்

ஏன் முக்கியம்? பைபிளை நன்றாகக் கற்றுக்கொடுக்கத் தெரிந்தால்தான் நிறைய பேரை சீடர்களாக்க முடியும். (மத். 28:19, 20) பைபிளில் இருக்கும் உண்மைகளைக் கற்றுக்கொடுக்க அமைப்பு நிறைய உதவிகளைச் செய்கிறது. முக்கியமாக, அமைப்பு வெளியிட்டிருக்கும் கடவுள் சொல்லும் நற்செய்தி! சிறுபுத்தகம் சிறந்த விதத்தில் கற்றுக்கொடுக்க உதவுகிறது. இதைப் பயன்படுத்தி, முதல் சந்திப்பிலேயே பைபிள் படிப்பை ஆரம்பிக்கலாம்.

எப்படிச் செய்யலாம்?

கீழே உள்ள பெட்டியில் இருப்பதுபோல் பேசிப் பழகுங்கள்.—மார்ச் 2013 நம் ராஜ்ய ஊழியத்தையும் பாருங்கள்.
உங்களுடைய நற்செய்தி சிறுபுத்தகத்தை மறக்காமல் ஊழியத்துக்கு எடுத்துச் செல்லுங்கள். ஊழியத்தில் கொடுக்க, தேவையான அளவு புத்தகம் இருக்கிறதா என்று பார்த்துக்கொள்ளுங்கள்.
ஊழியத்தில் பார்ப்பவரோடு ஒன்று அல்லது இரண்டு பாராக்களை மட்டும் கலந்து பேசுங்கள். 10 நிமிடத்திற்குள் பேசி முடித்துவிடுங்கள்.

இந்த மாதம் செய்து பாருங்கள்:

பைபிள் படிப்பு நடத்த வேண்டும் என்ற ஆசையை வளர்த்துக்கொள்ள ஜெபம் செய்யுங்கள். எப்படியாவது ஒரு பைபிள் படிப்பை ஆரம்பிக்க வேண்டும் என்றும் அதை நன்றாக நடத்த வேண்டும் என்றும் ஜெபம் செய்யுங்கள்.—பிலி. 2:13.
இந்தப் புத்தகத்தை ஊழியத்தில் எப்படிக் கொடுக்கலாம் என்று குடும்ப வழிபாட்டிலும் தனிப்பட்ட படிப்பிலும் பேசிப் பழகுங்கள். இப்படிச் செய்தால், ஊழியத்தில் தைரியமாகப் பேச முடியும். பைபிள் படிப்பை சுலபமாக ஆரம்பிக்கவும் முடியும்.

கவனமாக இருங்கள்: வீட்டு வாசலில் நின்று பேசும்போது யாராவது உங்களைக் கவனிப்பது தெரிந்தால் சுருக்கமாகப் பேசி முடித்துவிடுங்கள்.

வீட்டுக்கு வீடு ஊழியத்தில் இப்படிப் பேசலாம்:

“இந்த உலகம் போற போக்கை பார்த்தா என்ன ஆகுமோனு நிறைய பேர் பயப்படுறாங்க. உலக நிலைமைகள் என்னைக்காவது மாறும்னு நினைக்கிறீங்களா? [பதிலைக் கேளுங்கள்.] நிச்சயம் மாறும்னு பைபிள் சொல்லுது. அதை பத்திதான் இந்த புத்தகத்தில இருக்கு. அதை உங்களுக்கும் காட்டலாம்னு வந்தேன். [வீட்டுக்காரர் ஒத்துக்கொண்டால் தொடர்ந்து பேசுங்கள்.] இதுல நிறைய கேள்விகள் இருக்கு. எல்லா கேள்விக்கும் பைபிள்ல பதில் இருக்கு.” அவரிடம் நற்செய்தி சிறுபுத்தகத்தைக் கொடுத்து கடைசி பக்கத்தில் இருக்கும் கேள்விகளைக் காட்டுங்கள். எதைப் பற்றித் தெரிந்துகொள்ள அவருக்கு ஆசை என்று கேளுங்கள். பிறகு, அந்தப் பாடத்தில் ஒரு பகுதியை அவரோடு படியுங்கள். மற்ற கேள்விகளுக்கு அடுத்த முறை பதில் சொல்வதாகச் சொல்லுங்கள்.