Kuelewa Maana ya Ubatizo

1. Tunajuaje kwamba fundisho la ubatizo ni fundisho la msingi la Biblia?

TUNAFURAHI sana wapya wanapobatizwa! Je, ulijua kwamba kulikuwa na shangwe kama hiyo katika mkutano wa kwanza kabisa wa kutaniko la Kikristo? Mkutano huo ulitia ndani ubatizo na hotuba iliyofafanua fundisho la msingi kuhusu ubatizo. (Mdo. 2:​38, 40, 41) Mtume Paulo aliandika kwamba “fundisho la msingi kumhusu Kristo” linatia ndani “fundisho kuhusu aina mbalimbali za ubatizo.” (Ebr. 6:​1, 2) Ingawa fundisho la ubatizo linaweza kuonwa kuwa la msingi, tunahitaji kulielewa vizuri. Kwa nini?

2. Kwa nini tunahitaji kuelewa kwa kina kuhusu ubatizo?

² Kama tu ambavyo msingi thabiti wa nyumba unaweza kuisaidia iwe imara, ndivyo uelewaji wa kina kuhusu ubatizo unavyoweza kutusaidia kuwa na imani yenye nguvu. Tunahitaji uelewaji huo iwe sisi tunafanya maendeleo ili kufikia ubatizo au miaka mingi imepita tangu tubatizwe. Hivyo, katika makala hii tutajibu maswali yafuatayo: Ubatizo unamaanisha nini? Ubatizo wa Kikristo unahusisha nini? Na kwa nini tunabatizwa katika jina la Baba, na la Mwana, na la roho takatifu?

UBATIZO WAKO UNAMAANISHA NINI?

3. Ubatizo ni wonyesho wa hadharani wa nini?

³ Ubatizo ni wonyesho wa hadharani kwamba umekubali kweli kumhusu Yehova Mungu na Kristo Yesu, umetubu dhambi zako, umerekebisha njia yako ya maisha ili umtumikie Yehova, umemtambua Yesu kuwa njia ya Mungu ya kuleta wokovu, na umemweleza Mungu katika sala kwamba unatamani kutoka moyoni kufanya mapenzi yake kwa kushirikiana na tengenezo Lake. Unapoweka ahadi hiyo, au kujiweka wakfu, na kubatizwa, unaanza njia ya maisha inayoongoza kwenye uzima wa milele.

4. Kuzamishwa kabisa katika maji kunamaanisha nini? (Tazama pia picha.)

⁴ Unapobatizwa, unazamishwa kabisa katika maji, kisha unainuliwa kutoka katika maji,a kana kwamba ulikuwa umezikwa na kisha kufufuliwa. (Linganisha Wakolosai 2:12.) Ubatizo unaonyesha mabadiliko makubwa uliyofanya katika maisha yako. Jinsi gani? Unapoingia kwenye maji, unaonyesha kwamba umeacha njia yako ya maisha ya awali. Unapotoka kwenye maji, unaanza maisha mapya yanayokazia kufanya mapenzi ya Mungu.

5. Jitihada unayofanya ili kujitayarisha kwa ajili ya ubatizo inalinganaje na kazi ambayo Noa alifanya ya kujenga safina? (1 Petro 3:​18-21)

⁵ Soma 1 Petro 3:​18-21. Kwa njia fulani, tunaweza kulinganisha jitihada unazofanya ili uwe tayari kwa ajili ya ubatizo na kazi ambayo Noa alifanya ili kujenga safina. Ikiwa ndio umeanza tu kujifunza kumhusu Yehova, huenda unaona kazi iliyo mbele yako kuwa ngumu sana, labda hata sawa na kazi kubwa ya kujenga safina ya Noa. Je, kweli ni muhimu kufanya jitihada hiyo yote? Bila shaka ilikuwa muhimu kwa Noa. Mungu mwenyewe ndiye aliyebuni safina, na Noa alihitaji kufuata kwa ukaribu maagizo hayo ili aokoe uhai wakati wa Gharika. Kwa imani na msaada wa Mungu, Noa alitii na kujenga safina. Kama Noa, wewe pia unaweza kufanikiwa kufanya ‘mambo yote ambayo Mungu amekuamuru.’—Mwa. 6:22.

6. Ni kwa njia gani ubatizo unaweza kukuokoa?

⁶ Katika mstari wa 21, mtume Petro aliandika kwamba ubatizo ‘unakuokoa.’ Bila shaka, kitendo tu cha kuingizwa ndani ya maji hakikuwezeshi kupata wokovu; wala kusafisha dhambi zako. Ni damu ya Yesu tu inayoweza kukusafisha kutoka katika dhambi. (1 Yoh. 1:7) Hata hivyo, ubatizo ni hatua muhimu ili kufanya yote ambayo Mungu ameamuru na ni “ombi linalotolewa kwa Mungu ili kupata dhamiri njema.” Yehova atafurahia kukupa kile ulichoomba. Kwa njia hiyo, ubatizo ‘unakuokoa,’ au unakuongoza kwenye wokovu.

UBATIZO WA KIKRISTO UNAHUSISHA NINI?

7. Ubatizo unapaswa kufanywa kwa njia gani?

⁷ Kando na takwa la kuzamishwa kabisa katika maji, Biblia haitaji habari nyingi kuhusu ubatizo. Hata hivyo, Maandiko yanatusaidia kujua mambo yanayofaa inapohusu ubatizo. Kwa mfano, kanuni za Biblia zinawasaidia wale wanaotaka kubatizwa kujua jinsi ya kuvalia na pia zinawasaidia watazamaji kujua jinsi ya kujiendesha. (1 Kor. 14:40; 1 Tim. 2:9) Leo, mzee wa kutaniko ndiye hufanya ubatizo, na tunaepuka kuwatendea kwa njia ya pekee walio na pendeleo hilo. (1 Kor. 1:​14, 15) Ubatizo unakubalika iwe umeshuhudiwa na watu wengi au la.—Mdo. 8:36.

8. Wale wanaotaka kubatizwa wanaulizwa maswali gani, na kwa nini? (Matendo 2:​38-42) (Tazama pia picha.)

⁸ Biblia inaonyesha kwamba tunapaswa kufanya “tangazo la hadharani ili [tupate] wokovu,” yaani, kuonyesha imani yetu. (Rom. 10:​9, 10; tazama habari za utafiti, “publicly declare,” nwtsty.) Basi, inafaa kabisa kwamba tunafanya hivyo tunapobatizwa, kitendo kilicho muhimu sana kwa ajili ya wokovu! Kwa sababu hiyo, wale wanaotaka kubatizwa wanaulizwa maswali mawili. Swali la kwanza ni, “Je, umetubu dhambi zako, ukajiweka wakfu kwa Yehova, na kukubali njia yake ya wokovu kupitia Yesu Kristo?” Swali hili linakazia jinsi mtu alivyojitayarisha kwa ajili ya ubatizo, na linafanana na himizo alilotoa Petro kwa umati wa watu katika siku ya Pentekoste. Swali la pili ni, “Je, unaelewa kwamba ubatizo wako unakutambulisha kuwa mmoja wa Mashahidi wa Yehova anayeshirikiana na tengenezo la Yehova?” Swali hili linatukumbusha kwamba tunaishi kulingana na wakfu wetu kwa kuunga mkono mwongozo unaotolewa kupitia tengenezo la Yehova na kwa kumtumikia Mungu pamoja na Wakristo wenzetu, kama walivyofanya wanafunzi katika karne ya kwanza. (Soma Matendo 2:​38-42.) Wale ambao wanaweza kujibu ndiyo kutoka moyoni maswali hayo mawili wanastahili kubatizwa.

9. Ni lazima kila mtu achukue hatua gani ili kupata kibali cha Mungu?

⁹ Huenda hata kabla ya kuanza kujifunza kweli, uliishi maisha mazuri kwa kiwango fulani na hukutenda dhambi zozote nzito. Au huenda ulilelewa na wazazi Wakristo waliokusaidia kumpenda Yehova. Je, bado unahitaji kutubu na kubatizwa ili upate kibali cha Mungu? Ndiyo. Haidhuru malezi yetu, ni lazima sisi sote tutambue kwamba tumerithi dhambi iliyotutenganisha na Mungu. (Zab. 51:5) Hata hivyo, kadiri tunavyomjua zaidi Yehova, tunachagua kutanguliza mapenzi yake badala ya mapenzi yetu. Tunapofanya hivyo, tunaweza kutubu dhambi zozote tulizofanya, kugeuka, na kuanza njia ya maisha inayompendeza Baba yetu wa mbinguni. Kisha, tunaweza kubatizwa.—Mdo. 3:19.

10. Unapaswa kufanya nini ikiwa awali ulibatizwa ulipokuwa mshiriki wa dini nyingine?

¹⁰ Ikiwa awali ulibatizwa ulipokuwa mshiriki wa dini nyingine, bado unahitaji kubatizwa na kuwa Shahidi wa Yehova. Kwa nini? Kwa sababu wakati huo hukuelewa kikamili ukweli kumhusu Yehova Mungu na Yesu. Na hata ikiwa ulijiweka wakfu kwa Mungu katika sala, ahadi yako haikutegemea uelewaji sahihi wa mapenzi yake. Mtume Paulo alipokutana na wanaume katika jiji la Efeso, ambao awali walikuwa wamebatizwa bila kuwa na uelewaji unaohitajika wa fundisho la Kikristo, alifanya mipango ili wabatizwe tena.b (Mdo. 19:​1-5) Leo pia, ubatizo unakubalika ikiwa tu unategemea ujuzi sahihi wa mapenzi ya Mungu.

“KATIKA JINA LA BABA NA LA MWANA NA LA ROHO TAKATIFU”

11. Inamaanisha nini kubatizwa “katika jina la Baba na la Mwana na la roho takatifu”? (Mathayo 28:​18-20)

¹¹ Yesu aliamuru kwamba wanafunzi wapya wabatizwe “katika jina la Baba na la Mwana na la roho takatifu.” (Soma Mathayo 28:​18-20.) Alimaanisha nini? Katika Biblia, mara nyingi “jina” hurejelea sifa ya mtu. Pia, linaweza kurejelea cheo na mamlaka inayowakilishwa na jina. Hivyo, tunapofanya jambo “katika jina la” mtu au kitu, tunatambua mamlaka inayowakilishwa na jina hilo. (Linganisha Mathayo 10:41; tazama habari za utafiti, “because he is a prophet,” nwtsty.) Fikiria jinsi unavyoweza kutambua cheo na mamlaka ya Baba na ya Mwana na pia jukumu la roho takatifu ya Mungu.

12. Tunabatizwaje katika jina la Baba? (Ufunuo 4:11) (Tazama pia picha.)

¹² Katika jina la Baba. Tunamtambua Yehova kuwa Baba yetu wa mbinguni, au Mpaji-Uhai. Yeye ni Mungu Mweza-Yote, Muumba wa vitu vyote. (Soma Ufunuo 4:11.) Tunamtambua kuwa Msikiaji wa sala, na tunatumia jina lake la kibinafsi kwa heshima na uhuru tunaposali kwake na kuzungumza na wengine kumhusu. (Zab. 65:2) Hata hivyo, mengi zaidi yanahusika inapohusu kubatizwa katika jina la Baba. Wale waliomsikiliza Petro katika siku ya Pentekoste tayari walimjua Yehova, lakini sasa walihitaji kumtambua akiwa Mwandalizi mwenye upendo wa wokovu wa milele kupitia Yesu Kristo.—Rom. 5:8.

13. Tunabatizwaje katika jina la Mwana? (Tazama pia picha.)

¹³ Katika jina la Mwana. Tunamtambua Yesu kuwa Mwana mzaliwa pekee wa Mungu. Yesu ndiye “njia,” na kupitia yeye tu tunaweza kuwa na uhusiano mzuri na Yehova. (Yoh. 14:6) Yesu pia ndiye Mkombozi wetu, ambaye alikufa kwa ajili yetu ili tupate uzima. Ujuzi huo unatuchochea kufuata mfano wake kila siku ya maisha yetu, si tu siku tuliyobatizwa. (1 Yoh. 2:6) Hivyo, kama yeye, tunahubiri kwa bidii, na haturuhusu kitu chochote kitukengeushe. (Luka 4:43) Hata tuko tayari kuvumilia mateso kwa sababu tunamtumikia Mungu kwa ushikamanifu. (2 Tim. 3:12) Tunamheshimu Yesu akiwa “kichwa cha kutaniko,” hivyo kwa furaha tunajitiisha chini ya wale aliowapa jukumu la kuongoza na kuwatunza wafuasi wake.—Efe. 4:​8, 11, 12; 5:23.

14. (a) Tunabatizwaje katika jina la roho takatifu? (Tazama pia picha.) (b) Watiwa-mafuta hupitia aina gani nyingine za ubatizo? (Tazama sanduku “Aina za Ubatizo Ambazo Watiwa-Mafuta Hupitia.”)

¹⁴ Katika jina la roho takatifu. Tunakubali ukweli kuhusu roho takatifu. Roho takatifu si mtu au sehemu ya Utatu, bali ni nguvu ya utendaji ya Mungu. Tunatambua kwamba roho takatifu iliwaongoza manabii na waandikaji wa Biblia, hivyo tunasoma kwa ukawaida Biblia na kufuata mafundisho yake. (2 Pet. 1:​20, 21) Na tunaepuka kutenda dhambi nzito, kwa kuwa kufanya hivyo kunaweza kutuzuia kupata roho ya Mungu na pia kuzuia roho hiyo kutenda kwa uhuru kutanikoni.—Efe. 4:30.

15. Unapaswa kuazimia kufanya nini?

¹⁵ Ikiwa tayari wewe ni Mkristo aliyebatizwa, azimia kuelewa mambo yote yanayohusika katika “fundisho kuhusu aina mbalimbali za ubatizo”c na uishi kulingana na ahadi uliyompa Yehova ulipojiweka wakfu na kubatizwa. Lakini namna gani ikiwa wewe si Mkristo aliyebatizwa? Je, kuna jambo linalokuzuia kubatizwa? Makala inayofuata itazungumzia jinsi unavyoweza kuendelea kujitahidi kufikia ubatizo.