Je, Umejitayarisha kwa Ajili ya Changamoto Utakazokabili Baada ya Kubatizwa?

1-2. Ni hatua gani tunazoweza kuchukua ili kujitayarisha kwa ajili ya changamoto tunazoweza kukabili katika kweli? Toa mfano.

TUNATARAJIA kukabili matatizo katika ulimwengu wa Shetani. Yesu aliwaonya wafuasi wake hivi: “Lazima vikwazo vije.” (Mt. 18:7) Tukiwa na onyo hilo akilini, tunahitaji kuwa tayari kukabili changamoto ambazo huenda zikatia ndani kutoelewana na waabudu wenzetu.

² Fikiria mfano huu. Watu wa Yehova wametiwa moyo kujitayarisha kwa ajili ya majanga ya asili. Tunajitayarishaje? Kwanza, tunahitaji kujua ni majanga gani yanayoweza kutokea katika eneo letu. Ni muhimu kufanya hivyo hasa ikiwa sisi ni wageni katika eneo hilo. Baada ya kujua majanga yanayoweza kutokea, tunahitaji kupanga mambo tunayoweza kufanya ili kukabiliana na majanga hayo. (Met. 21:5) Vivyo hivyo, tunaweza kutambua changamoto tunazoweza kukabili katika kweli na kujiandaa sasa ili tuwe tayari ikiwa zitatokea katika maisha yetu. Kwa njia hiyo, tutaweza kukabiliana na changamoto hizo kwa njia nzuri zaidi na hazitaharibu uhusiano wetu na Yehova. (Zab. 17:5) Hivyo, acheni tuzungumzie changamoto tatu zinazoweza kutokea na jinsi tunavyoweza kujitayarisha kwa ajili ya kila moja.a

NDUGU AU DADA ANAPOKUKOSEA

3. Tunaweza kukabili changamoto gani kutanikoni?

³ Je, unakumbuka ulivyohisi mara ya kwanza ulipohudhuria mkutano na kujionea upendo miongoni mwa watu wa Yehova? Je, ulisadiki kwamba umeipata kweli? (Yoh. 13:35; Kol. 3:12) Hivyo ndivyo Blancab alivyohisi. Hata hivyo, baada ya kubatizwa alikabili hali ambayo hakutarajia. Anasema hivi: “Dada mmoja alinitendea kwa ukali. Pia, nilitambua kuwa alizungumza kwa njia isiyofaa kuwahusu wengine. Sikutarajia jambo hilo; nilikuwa nimejifunza kwamba Mashahidi wa Yehova wanajitahidi kufanya amani na kuonyesha upendo.” Bila shaka, ndugu na dada zako wanajitahidi sana kuboresha sifa zao za Kikristo, lakini watu wa Yehova si wakamilifu. (Efe. 4:​23, 24; 1 Yoh. 1:8) Kwa hiyo, nyakati nyingine mmoja wao anaweza kusema au kutenda jambo ambalo litakuumiza. (Yak. 3:8) Kwa kuhuzunisha, changamoto kama hizo zimewafanya baadhi ya watu waache kumtumikia Yehova.

4. Ni nini kinachoweza kutusaidia kuwa tayari ikiwa ndugu au dada atatukosea? (Waefeso 4:32)

⁴ Unaweza kufanya nini sasa ili kuwa tayari ikiwa ndugu au dada atakuumiza au kukukosea? Uwe na kawaida ya kutumia ushauri unaopatikana katika Waefeso 4:32. (Soma.) Ukijitahidi kabisa kuonyesha fadhili na huruma, utaepuka matatizo mengi. Jiwekee lengo la kuwasamehe wengine kwa hiari wanapokukosea. Ni nini kinachoweza kukusaidia kufanya hivyo? Fikiria ni mara ngapi unamwomba Yehova akusamehe makosa yako na jinsi anavyofanya hivyo kwa hiari. (Mt. 6:12) Unapokazia fikira na kuthamini jinsi ambavyo Yehova amekuwa akikusamehe kwa njia kubwa, itakuwa rahisi zaidi kwako kuwasamehe wengine.

5. Ni kanuni gani ya Biblia inayoweza kutusaidia mtu anapotukosea? (Methali 19:11) (Tazama pia picha.)

⁵ Soma Methali 19:11. Biblia inasema kwamba tunapokosewa, ufahamuc unaweza kutuliza hasira yetu. Kanuni hiyo imemsaidia Rima, ambaye alibatizwa miaka kadhaa iliyopita. Anasema hivi: “Ninapoona ndugu na dada wakitenda kwa njia ninayoona kuwa yenye kuumiza au isiyofaa, kwanza ninakumbuka Methali 19:11. Ninafikiria hali na malezi yao, na kujitahidi kufikiria kwa nini wametenda kwa njia hiyo. Pia, ninajitahidi kuhubiri pamoja nao. Ninapofanya hivyo, ninawafahamu vizuri zaidi.” Ni vema kuwafahamu vizuri zaidi ndugu na dada zako sasa. Kadiri unavyowafahamu vizuri zaidi, ndivyo itakavyokuwa rahisi zaidi kuwasamehe ikiwa watakuumiza.

6. Ni nini kinachoweza kutusaidia kuwa na uhusiano mzuri na wengine kutanikoni?

⁶ Unaweza kufanya nini ili ufurahie uhusiano mzuri na ndugu na dada kutanikoni? Kadiri unavyowafahamu vizuri zaidi ndugu na dada zako, hakikisha kwamba unakazia fikira sifa zao nzuri. (Linganisha Methali 10:12; Rom. 12:10; Flp. 2:​2, 3) Ona jinsi ambavyo kufanya hivyo kulimsaidia ndugu aliyebatizwa hivi karibuni anayeitwa Mark. Alipoanza kutumia wakati mwingi zaidi pamoja na ndugu na dada katika kutaniko lao, alitambua udhaifu wao. Ni nini kilichomsaidia Mark asikwazwe na makosa yao? Anasema hivi: “Nilitambua kwamba nilikuwa nikikazia fikira makosa madogo-madogo ambayo hayawezi kulinganishwa na dhambi nzito wanazofanya watu ulimwenguni. Ikawa wazi kwangu kwamba sipaswi kukazia fikira udhaifu wa waabudu wenzangu. Hivyo, nilikazia fikira sifa zao nzuri.” Ukifanya hivyo, utafurahia kuwa na uhusiano mzuri na wengine kutanikoni.

UNAPOANZA KUTAMANI MAMBO ULIYOACHA NYUMA

7. Ni nini kinachoweza kutufanya tuanze kutamani mambo tuliyoacha nyuma?

⁷ Ulipoanza kujifunza kweli, bila shaka ulifurahia kuuacha ulimwengu mwovu wa Shetani. Huenda unajiuliza hivi, ‘Mtu anawezaje kutamani kurudi katika ulimwengu huo?’ Hata hivyo, unapokabili majaribu magumu unaweza kukumbuka—na hata kutamani—baadhi ya mambo uliyoacha ulipoanza kumtumikia Yehova. (Linganisha Hesabu 11:​4-6.) Kwa mfano, huenda baadhi ya akina ndugu waliamua kuacha kazi nzuri yenye mshahara mnono lakini iliyochukua muda wao mwingi. Huenda wengine walikuwa na marafiki wa karibu ambao waliacha kushirikiana nao walipoanza kujifunza Biblia. Huenda wengine walishinda uraibu ambao ingawa ulikuwa mchafu, uliwaletea furaha kwa njia fulani. Litakuwa jambo lenye kuhuzunisha sana ikiwa Mkristo ataruhusu jambo fulani katika maisha yake ya zamani lisababishe apeperuke mbali kutoka kwa Yehova! Unaweza kufanya nini sasa ili usirudie kamwe mambo ambayo kwa kufaa uliyaacha nyuma, haidhuru utakabili changamoto gani?

8. Tunaweza kujifunza nini kutokana na mfano wa Abrahamu na Sara?

⁸ Biblia ina mifano ya waabudu waaminifu ambao huenda wangeweza kuanza kukumbuka mambo waliyoacha nyuma. Kwa mfano, Abrahamu na Sara walitii agizo la Yehova kwa kuhama kutoka katika jiji la Uru lenye kuta imara na kuishi kwenye mahema. (Ebr. 11:​8, 9) Bila shaka, huenda pindi fulani wangekumbuka maisha yao yenye kustarehesha katika jiji la Uru. Lakini “kama wangeendelea kukumbuka” au ikiwa wangetamani maisha yao ya zamani, wangeweza kushawishika kurudia maisha hayo. Hata hivyo, walikazia fikira wakati ujao.—Ebr. 11:​15, 16.

9. Mtume Paulo alionaje vitu alivyoacha nyuma? (Wafilipi 3:​7, 8, 13)

⁹ Mtume Paulo alibadili njia yake ya maisha ili amtumikie Yehova. Kabla ya kuwa Mkristo alifundishwa na Gamalieli, mwalimu wa Sheria aliyeheshimika sana. (Mdo. 22:3) Paulo angeweza kupata cheo chenye kuheshimika sana katika dini ya Kiyahudi. (Gal. 1:​13, 14) Hata hivyo, alipokubali habari njema, aliacha nyuma mambo hayo yote. Je, sikuzote maisha yake yalikuwa rahisi baada ya kuwa Mkristo? Hapana. Alipigwa, alifungwa gerezani, na alichukiwa na Wayahudi wenzake. (2 Kor. 11:​23-26) Ikiwa angekazia fikira tu majaribu hayo na kulinganisha maisha yake ya wakati huo na ya awali, huenda angefikia mkataa kwamba alikuwa na maisha mazuri zaidi kabla ya kuwa Mkristo. Badala yake, Paulo alikazia fikira pendeleo kubwa ambalo alikuwa nalo la kumtumikia Kristo Yesu akiwa anatazamia wakati ujao wenye utukufu. Paulo alikuwa na uhakika kwamba baraka hizo zilizidi kwa mbali mambo yoyote aliyodhabihu.—Soma Wafilipi 3:​7, 8, 13.

10. Tunapaswa kutafakari kuhusu nini kwa ukawaida? (Marko 10:​29, 30) (Tazama pia picha.)

¹⁰ Tunajifunza nini? Ikiwa utaanza kufikiria mambo uliyoacha ili kuwa Mkristo, hakikisha pia kwamba unakumbuka kwa nini uliacha mambo hayo. (Mhu. 7:10) Linganisha mambo uliyoacha nyuma na baraka ulizopata kwa kujifunza kweli. Una urafiki wa karibu na Mwenye Enzi Kuu ya ulimwengu wote. (Met. 3:32) Umezungukwa na familia ya kiroho yenye upendo. (Soma Marko 10:​29, 30.) Na una wakati ujao mzuri sana! (Isa. 65:​21-23) Ikiwa utatafakari kwa ukawaida baraka zinatokana na kumtumikia Yehova, haitakuwa rahisi kwako kutamani mambo uliyoacha nyuma.

11. Unajifunza nini kutokana na kisa cha Rosemary?

¹¹ Dada anayeitwa Rosemary, alibatizwa alipokuwa na umri wa miaka 50 hivi. Ona alichofanya ili kuepuka kutamani mambo aliyoacha nyuma. Anasema hivi: “Mwanzoni, nilitamani kusherehekea Krismasi, kwa sababu sikuzote ilikuwa pindi yenye shangwe pamoja na familia yangu. Nilifurahia kuwapa zawadi wapendwa wangu. Nilipenda kuwaona watoto wakiwa wamezunguka mti wa Krismasi na nyuso zao zikiwa na furaha walipokuwa wakifungua zawadi zao.” Ni nini ambacho kimemsaidia? Rosemary anasema hivi: “Nimepata njia badala ya kufurahia ushirika pamoja na familia. Kila mwaka katika siku tofauti na Krismasi, ninakusanya familia yangu, ninawapa zawadi, na kuwaeleza kwa nini ninawathamini.” Rosemary alikabili changamoto nyingine pia. Anasema hivi: “Nilipojifunza kweli, marafiki wangu wa zamani waliniacha. Nyakati nyingine, niliwakosa sana na kuhisi upweke.”d Ni nini kilichomsaidia? Alianza kufanya mipango ya kuhubiri na dada tofauti-tofauti. Anasema hivi: “Kwa kufanya hivyo, nimepata marafiki wapya ninaowapenda na kuwathamini.” Unaweza kujifunza nini kutoka kwa dada huyo? Huenda ukatamani jambo fulani lililokupa furaha kabla ya kujifunza kweli, lakini unaweza kulibadili na jambo lingine linalofaa. (Flp. 4:​8, 9) Na kumbuka: Ukiwa na Yehova sikuzote utapata mambo mengi zaidi kuliko uliyopoteza.

WENGINE WANAPOMWACHA YEHOVA

12. Ni changamoto gani kutanikoni ambayo inaweza kuwa vigumu kukabiliana nayo?

¹² Ulipokuwa Shahidi, ulifurahi sana kuacha nyuma ulimwengu uliopotoka na kujiunga na kikundi cha watu wa kiroho na wenye maadili mazuri. (Isa. 65:14) Hata hivyo, huenda pindi fulani ukasikia kuhusu mtu aliyefanya dhambi nzito kutanikoni. Huenda hata mtu akaondolewa kutanikoni. (1 Kor. 5:13) Ona jinsi hali kama hiyo ilivyomwathiri dada anayeitwa Samar. Anasema hivi: “Muda mfupi baada ya kubatizwa, mzee wa kutaniko alitenda dhambi nzito na kuondolewa kutanikoni. Nilikuwa karibu kukwazika kwa sababu sikuamini kwamba ingewezekana kwa mzee wa kutaniko kumtendea dhambi Yehova na kutaniko.” Bila shaka, sikuzote tunapaswa kuamini kwamba ndugu na dada zetu wanampenda Yehova na wanataka kushikamana naye. (1 Kor. 13:​4, 7) Hata hivyo, inasikitisha kwamba kila mwaka baadhi ya ndugu na dada wanaondolewa kutanikoni. Jambo hilo linaweza kuwa changamoto hasa ikiwa mtu wa karibu au tunayemheshimu anaamua kumwacha Yehova.

13. Tunawezaje kujiimarisha sasa ili tusikwazike ikiwa mtu wetu wa karibu anamwacha Yehova?

¹³ Unawezaje kujitayarisha sasa ili usikwazike ikiwa mtu wako wa karibu anaamua kumwacha Yehova? Endelea kuimarisha uhusiano wako wa kibinafsi pamoja na Yehova. (Yak. 4:8) Usiruhusu uhusiano wako na Mungu utegemee uaminifu wa mtu mwingine. Kwa mfano, ingawa huenda mara nyingi tunaabudu pamoja tukiwa familia na kutanikoni, tunahitaji pia kuwa na ratiba yetu ya kibinafsi ya kusali na kusoma Biblia.—Zab. 1:2; 62:8.

14. Tunajifunza nini kutokana na mfano wa mtume Petro? (Yohana 6:​66-68)

¹⁴ Pia, tunaweza kujifunza kutokana na jinsi mtume Petro alivyotenda wanafunzi wengi walipoacha kumfuata Yesu. Huenda pindi hiyo Petro mwenyewe alikuwa hajaelewa maneno ya Yesu. Lakini ona kile alichosema katika Yohana 6:​66-68. (Soma.) Badala ya kukazia fikira mambo ambayo wengine walikuwa wanafanya, Petro alikazia fikira maneno ya kweli aliyopokea kutoka kwa Yesu. Matokeo ni kwamba Petro hakukwazika. Leo pia, matendo ya watu wengine hayabadili thamani ya kweli uliyopata kwa msaada wa tengenezo la Mungu. Shikamana na kweli hiyo! Samar, aliyetajwa awali, anasema hivi: “Sikuzote mimi hujikumbusha kwamba makosa ya mtu mmoja hayamaanishi kwamba watu wote kutanikoni au katika tengenezo wanafanya makosa hayo; na Yehova ni Mungu mwenye sifa nzuri, hata wanadamu wakitenda isivyofaa.”

15. Unajifunza nini kutokana na kisa cha Emily?

¹⁵ Fikiria mfano wa Emily. Juma moja tu baada ya Emily kubatizwa, mama yake aliitelekeza familia na akaondolewa kutanikoni. Emily anasema hivi: “Sikuwahi kuwazia kamwe kwamba jambo kama hilo lingeweza kutokea. Jambo hilo limekuwa changamoto kubwa zaidi maishani mwangu, na ninamkosa sana mama yangu.” Ni nini kilichomsaidia Emily? Anasema hivi: “Siko peke yangu. Ninategemezwa na baba yangu, lakini pia na wengine kutanikoni ambao wamekuwa kama familia yangu. Kila mtu anakabili jaribu fulani. Hivyo, ni muhimu kuwa karibu na wengine na kutiana moyo.” (1 Pet. 5:9) Huhitaji kusubiri hadi ukabili changamoto ndipo uimarishe uhusiano wako pamoja na ndugu na dada zako. Endelea kufanya hivyo sasa. Kwa njia hiyo, haidhuru utapitia hali gani, hutajihisi ukiwa peke yako.

16. Tunapaswa kukumbuka nini? (Tazama pia picha.)

¹⁶ Kumbuka pia kwamba Yehova huwatia nidhamu wale anaowapenda. (Ebr. 12:6) Anataka wote wanaoondolewa kutanikoni warudi. (2 Pet. 3:9) Hivyo, ikiwa mtu wako wa karibu ataondolewa kutanikoni, unaweza kuwa na uhakika kwamba wazee watafanya yote wawezayo ili kumsaidia amrudie Yehova.—2 Tim. 2:​24, 25.

17. Tunaweza kuwa na uhakika gani?

¹⁷ Tumezungumzia baadhi ya changamoto ambazo huenda ukakabili baada ya kubatizwa. Ni kweli kwamba baadhi ya changamoto hizo zinaweza kuonekana kuwa ngumu, lakini huna sababu ya kuogopa. Kuna mengi unayoweza kufanya ili kujitayarisha. Na usisahau kamwe kwamba una msaada mkubwa zaidi unaoweza kupatikana: Yehova Mungu. Tayari amekusaidia, na anataka kukusaidia milele! (1 Pet. 5:10) Sikuzote atakuimarisha na kukusaidia kuvumilia jaribu lolote utakalokabili. Kadiri unavyoendelea kukubali msaada wa Yehova, hakuna changamoto itakayokuondoa kutoka kwake!—Zab. 119:165; Rom. 8:​38, 39.