Courtesy Jamie Christiani/Bulletin of the Atomic Scientists
HLALANI NILINDZILE!
Lilanga Lembubhiso Selisondzele Kakhulu
Nga January 27, 2026, bososayensi basondzete sikhatsi sekufika kwelilanga lembubhiso (Doomsday Clock)a. Loku kusho kutsi sekusedvute kutsi inhlekelele letawubangelwa bantfu yenteke emhlabeni.
I-“The Bulletin of the Atomic Scientists Science and Security Board isondzete sikhatsi selilanga lembubhiso ngemizuzwana lengu-85, futsi asizange lesikhatsi senhlekelele sesisondzele kakhulu kangaka.”—Bulletin of the Atomic Scientists.
“Kusebaleni loko bososayensi labazama kusitjela kona ngelilanga lembubhiso. Setinyenti tintfo letimbi naletiyingoti letentekako emhlabeni, bantfu abasebenti ngekubambisana kuze bacatulule tinkinga tabo, kantsi nesikhatsi sekute. Bantfu kudzingeka bente lushintjo futsi bangalwenta, kodvwa kudzingeka bacele baholi babo kutsi bente lolushintjo ngekushesha.”—Alexandra Bell, mengameli na-CEO,we-Bulletin of the Atomic Scientists.
Sekusondzele yini vele kubhujiswa kwebantfu kanye nekweplanethi yetfu? Kufanele yini silesabe likusasa? Litsini liBhayibheli?
Lisiphatseleni likusasa
LiBhayibheli litsi “umhlaba utawuhlala ukhona kuze kube phakadze.” futsi bantfu batawuhlala “kuwo kuze kube phakadze.” (Umshumayeli 1:4; Tihlabelelo 37:29) Ngako bantfu angeke bawubhubhise umhlaba nobe bente kungasahlaleki kuwo.
Nobe kunjalo, liBhayibheli liyakhuluma ngekuphela. Sibonelo nje, litsi “live liyendlula.”—1 Johane 2:17.
Kuze utfole kutsi lisho kutsini liBhayibheli nalikhuluma ngekubhubha kwemhlaba, fundza sihloko lesitsi “Ingabe Umhlaba Usuzogoqwa? Ingabe IBhayibheli Lithi Konke Kuzobhujiswa?” lesitfolakala ngesiZulu.
Kuze utfole kutsi liBhayibheli litsi tentakalo letitsite titakwenteka nini, fundza sihloko lesitsi “Uzobhubha Nini Umhlaba?” lesitfolakala ngesiZulu.
Hlale unembono lokahle
LiBhayibheli lingasisita kutsi sihlale sinembono lokahle ngisho nangetulu kwetinkinga letikhona emhlabeni. Kanjani?
LiBhayibheli lisiniketa seluleko lesingasisebentisa. (2 KuThimothi 3:16, 17) Sibonelo nje, fundza sihloko lesitsi “Indlela Yekulawula Kukhatsateka” kuze utfole indlela liBhayibheli lelingakusita ngayo uhlale unembono lokahle ngisho ubhekene netinkinga.
LiBhayibheli lisiniketa litsemba lelicinisekisiwe ngelikusasa. (KubaseRoma 15:4) Lisitjela loko lokufanele sikulindzele nyalo nasesikhatsini lesitako, lokusisita singesabi ngisho kwentekani emhlabeni.
Kuze ufundze lokunyenti eBhayibhelini, sikumema kutsi wetame kufundza natsi liBhayibheli mahhala.
a “I-Doomsday Clock liwashi lelingumfanekiso lelentelwe kwecwayisa bantfu ngekusondzela kwembubhiso letawubangelwa tintfo tebuchwephesha letiyingoti letentiwe bantfu. Lifanekisela tinkinga letiyingoti lokufanele tilungiswe nangabe sifuna umhlaba ungabhubhi.”—Bulletin of the Atomic Scientists.