Buyoke Buphele Yini Bucala Lobuhambisana Nenzondo—Litsini LiBhayibheli?

Sebuyandza bucala lobuhambisana nebudlova lobubangelwa yinzondo nobe lubandlululo. Bantfu bayahlaselwa ngenca yebuve babo, inkholo, luhlanga bulili nobe lokunye. Lobucala benta bantfu kutsi besabe, kubalimate emtimbeni nasendleleni labativa ngayo, kantsi labanye baze bafe ngisho nekufa.

LiBhayibheli laveta kutsi esikhatsini lesiphila kuso kutawuba nebantfu ‘labanelulaka, labangakutsandzi lokuhle, nalabete lutsandvo.’ (2 KuThimothi 3:1-5) Ngako, buyoke buphele yini vele lobucala lobuhambisana nenzondo? Litsini LiBhayibheli?

Indlela Lobutawuphela Ngayo Lobucala

LiBhayibheli liyasicinisekisa kutsi Nkulunkulu angaticedza letento letite umusa, futsi utaticedza.

• “Bantfu lababi batawucedvwa, . . Kodvwa labamnene batawudla lifa lemhlaba, futsi batawujabulela kuthula lokukhulu.” (Tihlabelelo 37:9-11) Nkulunkulu angeke avumele kutsi bantfu labanebudlova bachubeke balimata labanye.

• “[Nkulunkulu] uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona.” (Sembulo 21:4) Nkulunkulu utawulungisa umonakalo lobangelwe nguletento letimbi emitimbeni yebantfu etingcondvweni kanye nasendleleni labativa ngayo.

• “Labalungile nalabangakalungi batawuvuswa ekufeni.” (Imisebenti 24:15) Nkulunkulu utawuvusa tigidzi tebantfu letafa, lokufaka ekhatsi labo lababulawa ngenca yalobucala lobuhambisana nenzondo.

Kulwisana nenzondo lamuhla

Ngetulu kwekusiniketa litsemba, liBhayibheli liphindze lisisite ngekutsi singabhekana njani nenzondo levamile lamuhla. Sicela uhlole timphendvulo letiseBhayibhelini talemibuto lebalulekile lelandzelako:

• Yini lesingayenta nyalo kuze sincobe inzondo leyenta bantfu babe nebudlova? Buka loko liBhayibheli lelikufundzisako ku-Sicongosekulindza lesinesihloko lesitsi “Singayincoba Inzondo.”

• Yini leyenta Nkulunkulu avumele kuhlupheka lokungaka kutsi kuchubeke? Tfola inchazelo lecacile levela eBhayibhelini kule-video letsi Kungani Nkulunkulu Avumela Kuhlupheka?