Lusito Kulabo Labangaboni Emehlweni
Emhlabeni wonkhe, kulinganiselwa kutsi bantfu labangu-43 million ababoni emehlweni, kantsi labangaba ngu-295 million banenkinga yekungaboni kahle.a Lokubuhlungu kutsi linyenti lalabantfu aliphatfwa kahle.
Nkulunkulu utiva njani ngebantfu labangaboni emehlweni? LiBhayibheli litsini ngabo? BoFakazi BaJehova babasita njani bantfu labangaboni emehlweni lamuhla?
Nkulunkulu utiva njani ngebantfu labangaboni emehlweni
LiBhayibheli liveta kutsi Jehovab ubatsandza kakhulu nebantfu labangaboni emehlweni. Ufuna kutsi nabo baphatfwe kahle futsi bafundze ngaye, futsi ubaniketa litsemba lelikusasa lelihle.
UmBhalo: “Ucalekisiwe loyo lowenta umuntfu longaboni emehlweni aduke endleleni yakhe.”—Dutheronomi 27:18.
Lokushiwo ngulomBhalo: Endvulo, umtsetfo Nkulunkulu lebekawunikete bantfu bakhe bewuvikela bantfu labangaboni kuze bangaphatfwa kabi.
UmBhalo: “Nkulunkulu akakhetsi.”—Imisebenti 10:34
Lokushiwo ngulomBhalo: Nkulunkulu utsandza bantfu labangaboni ngendlela latsandza ngayo labo lababonako emehlweni.
UmBhalo: Jesu “welapha nalabangaboni emehlweni, wabenta babona.”—Lukha 7:21.
Lokushiwo ngulomBhalo: Ngesikhatsi alapha emhlabeni, Jesu waveta loko lebekutokwentiwa nguMbuso waNkulunkulu esikhatsini lesitako, ngekutsi ente labangaboni emehlweni baphindze babone.
UmBhalo: “Emehlo alabangaboni ayawuvuleka.”—Isaya 35:5.
Lokushiwo ngulomBhalo: Jehova wetsembisa kutsi madvutane nasekubusa uMbuso wakhe emhlabeni, bonkhe labangaboni batawubona.
BoFakazi BaJehova babasita njani bantfu labangaboni emehlweni
Emhlabeni wonkhe, tsine njengaBoFakazi BaJehova siyabacocela bantfu labangaboni umlayeto weliBhayibheli loniketa litsemba. Sikhona njani kukwenta konkhe loku?
Sikhicita emaBhayibheli, tincwadzi letisekelwe eBhayibhelini kanye nema-video ngetinhlobo letehlukene, lokufaka ekhatsi i-braille, tincwadzi letibhalwe ngemagama lamakhulu, kanye nalokulalelwako, lokusita labangaboni emehlweni kanye nalabo labangakhoni kubona kahle.
Njalo, siba nemihlangano yebuKhristu levulekele wonkhe muntfu, lokufaka ekhatsi nalabo labangaboni emehlweni.
Siniketa wonkhe muntfu litfuba lekutsi adadishe liBhayibheli nalotsite.c
Konkhe loku sikwenta mahhala. Leni? Ngenca yekutsi Jesu watsi: “Niphiwe mahhala, nani phanini mahhala.”—Matewu 10:8.
BoFakazi BaJehova babakhatsalela mbamba bantfu labangaboni. Labo labafuna kukhonta Nkulunkulu kanye natsi batawutfola bangani labakahle nalabalusito. Naka naku lokushiwo ngulabanye BoFakazi BaJehova labangaboni emehlweni.
Talita Alnashi, waseSweden, watalwa angaboni kahle emehlweni. Tfola kutsi yini leyentiwe batali bakhe kuze bamfundzise liBhayibheli, kanye nekutsi yena nemndeni wakhe balutfole njani lusito ngekusekelwa bangani.
James Ryan, waseMelika, watalwa angeva etindlebeni futsi ngekuhamba kwesikhatsi wase akasaboni nasemehlweni. Tfola kutsi yini lementa ajabule futsi enetiseke ekuphileni.
Cynthia Pablo, wasePhilippines, akeva etindlebeni futsi akaboni nasemehlweni. Bamsita njani labo lakhonta nabo ngesikhatsi lesimatima se-COVID-19? Tfola lokunyenti kulesihloko lesitsi, “Congregation Supports Deaf and Blind Sister During Pandemic, lesitfolakala ngesiNgisi.”
Ngumaphi emathuluzi ekufundzisa lasekelwe eBhayibhelini lesiwalungiselele labo labangaboni?
Tincwadzi te-Braille. Sikhicita emaBhayibheli e-braille laphelele nobe layincenye ngetilwimi letehlukahlukene. (Kuze ubone letilwimi, buka libhokisi lelitsi, “LiBhayibheli Lelihumusho Lemhlaba Lomusha nge-Braille.”) Siphindze sikhicite tincwadzi letisekelwe eBhayibhelini nge-braille. Sikhicite incwadzi letsi Learn to Read Braille, leyentelwe labo labo labafise kufundza i-braille. Yentelwe kusita umuntfu longaboni kutsi afundze i-braille asitwa ngumuntfu lobonako emehlweni.
Tfola incwadzi ye-braille ngekutsi ukhulume nalomunye waBoFakazi baJehova, nobe ufake sicelo sekuvakashelwa.
Ku-jw.org, ungatitsatsela emafayela lentelwe kutsi avuleke ku-notetaker.d
Tincwadzi letibhalwe ngemagama lamakhulu kanye nendlela yekukhulisa emagama etintfweni tebuchwephesha. Tincwadzi tetfu letibhalwe ngemagama lamakhulu tentelwe labo labangaboni kahle emehlweni. I-website yetfu letsi jw.org yentiwe ngendlela yekutsi nangabe umuntfu akhulisa emagama, tonkhe tintfo tivele kahle. I-JW Library app nayo yentiwe ngendlela yekutsi umuntfu akhone kunciphisa nobe akhulise emagama.
Tfola incwadzi ye-braille ngekutsi ukhulume nalomunye waBoFakazi baJehova, nobe ufake sicelo sekuvakashelwa.
Ku-jw.org, titsatsele tincwadzi letibhalwe ngemagama lamakhulu letifana naletiphrintiwe.
Lokulalelwako. Sikhicita Lihumusho Lemhlaba Lomusha leliBhayibheli lelilalelwako ngetilwimi letingetulu kwa-200. Ngetulu kwaloko, siphindze sirekhode linyenti letincwadzi tetfu letisekelwe eBhayibhelini. Letincwadzi letirekhodiwe tifaka ekhatsi kuchazwa kwetitfombe.
Lalela nobe utitsatsele lokurekhodiwe lokulalelwako ku-jw.org kanye naku-JW Library app.
Ku-jw.org, titsatsele emafayela lentelwe tinhlelo tekufundza njengema-screen reader kanye nema-digital talking book player.e
Ema-video lanema-audio descriptions.f BoFakazi BaJehova bakhicita ema-video lasekelwe eBhayibhelini lanema-audio descriptions, ngetilwimi letingetulu kwa-100. Lama-video asita bantfu kutsi bakucondze futsi bakusebentise loko lokufundziswa liBhayibheli.
Buka nalu luchungechunge lwema-video lolulandzelako lolunema-audio descriptions:
Imihlangano kanye nemibutsano. Emhlabeni wonkhe, sinemabandla lesihlangana kuwo njalo ngeliviki kuze sifundze siphindze sikhonte Jehova. Siphindze sibe nemibutsano lemikhulu njalo ngemnyaka lapho sifundza khona liBhayibheli. Kulemibutsano yetfu leba nema-video, setama kwenta lokulalelwako lokunema-audio descriptions eceleni. Nakukhona longaboni futsi angeva emihlanganweni yetfu lemikhulu nalemincane, kuba khona lobahumushelako ngekubatsintsa tandla. Wonkhe muntfu wemukelekile futsi asecwayi muntfu.
Tfola umhlangano welibandla.
Fundza ngemihlangano yetfu yesifundza yaminyaka yonkhe.
Bani khona eSikhumbutweni sekufa kwaJesu, lokungumbutsano lomcoka kakhulu kitsi emnyakeni.
José Luis Ayala uhlala eMexico. Watalwa angeva etindlebeni futsi ngekuhamba kwesikhatsi nakaneminyaka lengu-29 wase akasaboni emehlweni. Tfola kutsi imihlangano yetfu imsite njani ekuphileni kwakhe, nekutsi yini lemsite kutsi abe ngumfundzisi lophumelelako weliBhayibheli.
a “Umuntfu longaboni kahle emehlweni” ngumuntfu lonenkinga lengalungiseki, letsintsa nendlela lenta ngayo tintfo. Kulesihloko ligama lelitsi, “kungaboni” lifaka ekhatsi labangaboni sanhlobo emehlweni nalabangaboni kahle.
b Jehovah ligama laNkulunkulu. (Tihlabelelo 83:18) Buka sihloko lesitsi “Ungubani Jehova?”
c Ungacela lotsite akukhombise kutsi sichutjwa njani sifundvo seliBhayibheli.
d I-Notetaker yintfo yebuchwephesha lephatfwa ngesandla leveta lokubhalwe nge-braille, iphindze ibe nelivi lelikhulumako nobe ibenako kokubili. Inetinkinobho letehla tenyuka tibhala tinhlavu temagama nge-braille. Ema-notetakers anciphisa sidzingo sekutsi umuntfu abenetincwadzi letiphrintiwe te-braille.
e Ema-Screen readers nema-digital talking book players afundza lokubhaliwe, asebentisa livi noma lokulalelwako lokurekhodiwe. Letintfo tebuchwephesha tisita labo labatisebentisako kutsi bakutfole kamelula loko labakufunako etincwadzini tetfu.
f Ema-audio descriptions ngemagama lachaza loko lokwentekako ku-video.