Kutawuba Nekuthula Emhlabeni Wonkhe

Wonkhe umuntfu uyafisa kuhlala emhlabeni lonekuthula. Kuwo wonkhe umlandvo webantfu, babusi bemhlaba betamile kucedza kungevani futsi baletsa kuthula lapho bekungekho khona. Ngalesinye sikhatsi, imetamo yabo iyaphumelela kodvwa kwesikhashana. Lokubuhlungu kutsi lokuthula kuphindze kuphatamiseke. Kuyoke kwenteke yini kutsi umhlaba wonkhe ube nekuthula? Yebo! Cabanga ngaloko Jesu latokwenta nalakufundzisa.

Loko Jesu latokwenta

LiBhayibheli lisitjela ngaloko Jesu latokwenta madvutane kuze aletse kuthula emhlabeni wonkhe.

• “[Jesu] kutawutsiwa . . . Sikhulu Sekuthula. Kwandza kwekubusa kwakhe nekuthula angeke kuphele.” (Isaya 9:6, 7) NjengeNkhosi yeMbuso waNkulunkulu, Jesu utawuletsa kuthula kwaphakadze emhlabeni wonkhe.

• “Itawukhulula lohluphekile lokhalela lusito . . . naloyo lote longamsita.” (Tihlabelelo 72:12-14) Jesu utawusebentisa ligunya lanalo kuze aletse kuthula sibili, acedze timphi, budlova kanye nekuhlupheka.

• “Sive ngeke siphindze silwe nalesinye sive, futsi ngeke tiphindze ticeceshelwe kulwa imphi.” (Isaya 2:4) Nasekubusa Jesu, bonkhe bantfu batawufundza tindlela tekwakha kuthula kunekutsi baceceshelwe imphi.

Kuze ufundze ngendlela Jesu latawuletsa ngayo kuthula emhlabeni, bukela i-video letsi, Uyini UMbuso WaNkulunkulu?

Loko Jesu lakufundzisa

Ngisho nalamuhla, loko Jesu lakufundzisa kusita tigidzi tebantfu kutsi tihlale ngekuthula. ENshumayelweni yakhe yaseNtsabeni, Jesu wafundzisa ngetimiso letisita bantfu kutsi bakhe kuthula nalabanye ekuphileni kwamalanga onkhe. Cabanga ngetibonelo letimbalwa.

• “Bayajabula labo labatsandza kuthula.” (Matewu 5:9) Jesu wakhutsata balandzeli bakhe kutsi bangagwemi kucabana nje kuphela kodvwa bakhe nekuthula.

• “Cale wakhe kuthula naye, nasewente njalo sewungahamba uyewunikela ngalesipho sakho.” (Matewu 5:23, 24) Jesu wakhutsata labo lebebamlalele kutsi balungise kungevani ngekushesha. Wafundzisa kutsi kufanele sibe nekuthula nalabanye kuze sitoba nebuhlobo lobuhle naNkulunkulu.

• “Yekelani kwehlulela labanye, kuze nani ningatowehlulelwa.” (Matewu 7:1) Jesu wasecwayisa kutsi singabehluleli labanye noma sigadze kutsi bente tintfo natsi lesingakhoni kutenta, futsi simo sengcondvo lesinjalo sibanga kucabana. Jesu wafundzisa balandzeli bakhe kutsi ‘bachubeke batsetselelana’ kunekutsi banake kakhulu emaphutsa alabanye​—Lukha 6:37.

Bantfu emhlabeni wonkhe bayakusebentisa loko Jesu lakufundzisa. Ngisho nasetindzaweni letigcwele budlova nekungevani, bantfu bayakulungisa kungevani, bayacolelana futsi bakhombise lutsandvo ngisho nakubantfu labete umusa.

Kuze ubone kutsi timfundziso taJesu tibasite njani labanye kutsi bakhe kuthula, fundza sihloko lesitsi, “Kuba Nekuthula Ngisho Kunemphi Kanye Netiphitsiphitsi Letihambisana Nebudlova.”