Budlova Abusilo Likhambi

Bantfu labanyenti lamuhla bakholelwa kutsi kulwa kuyindlela lekahle yekucedza tinkinga nome kungevani. Kodvwa lendlela bantfu labacabanga ngayo ayihambisani naloko Jesu lakufundzisa nendlela lebekenta ngayo. Cabanga ngaloko lakusho nalakwenta.

Lokwashiwo nguJesu

Enshumayelweni yakhe yaseNtsabeni, Jesu wafundzisa kutsi intfukutselo, lulaka nebudlova akusiyo indlela lekahle yekucatulula kungevani. Nati tibonelo letimbalwa.

• “Tonkhe tintfo lenifuna bantfu batente kini, nani tenteni kubo.” (Matewu 7:12; Lukha 6:31) Lomyalo, ngalokuvamile lobitwa ngekutsi ngumtsetfo weligolide,a usikhutsata kutsi siphatse labanye ngendlela natsi lesingatsandza kutsi basiphatse ngayo. Njengoba natsi singakutsandzi kuphatfwa kabi, kufanele siphatse labanye ngemusa nangenhlonipho, ngisho nome singavumelani kuletinye timo.

• “Nobe ngubani lokushaya esihlatsini sangesekudla, mvumele akushaye nakulesi lesinye.” (Matewu 5:38, 39; Lukha 6:29) Jesu bekangakhutsati kutsi bantfu abavumele kuphatfwa kabi. Kunaloko, Jesu bekalungisa imfundziso lengemanga lokungenteka beyifundziswa baholi benkholo, kutsi kuvumelekile kutiphindziselela. Bekafundzisa balandzeli bakhe kutsi akukafaneli baphindzisele, kunaloko kufanele babe nemusa ngisho nobe baphatfwa kabi.b

• “Chubekani nitsandza titsa tenu.” (Matewu 5:43, 44; Lukha 6:27) Jesu wafundzisa kutsi kufanele sibatsandze labo labasitondzako nome labasiphatsa kabi, kodvwa bekangasho kutsi nabasiphatsa kabi basuke benta kahle.c Nanobe kunjalo, nangabe sibaphatsa ngemusa labo labasitondzako, loko kungabasita behlise umoya futsi nabo basiphatse ngemusa.

Lokwentiwa nguJesu naloko latawukwenta

Jesu wafundzisa kutsi kulwa akusiyo indlela lekahle yekulungisa kungevani, futsi indlela lebekaphila ngayo beyikukhombisa loko. Ngalesikhatsi Jesu aboshwa, lomunye webalandzeli bakhe, naketama kumlwela Jesu watsi: “Buyisela inkemba yakho endzaweni yayo, ngobe bonkhe labasebentisa inkemba batawubhujiswa ngenkemba.” (Matewu 26:52) Jesu wakhombisa kutsi uyatitsandza titsa takhe ngekutsi abacolele lebebamphatsa kabi futsi waze wabathandazela!​—Lukha 23:33, 34; 1 Phetro 2:23.

LiBhayibheli letsembisa kutsi masinyane, Jesu njengeSikhulu Sekuthula utawucedza lonkhe luhlobo lwebudlova. (Isaya 9:6, 7) Kuze ufundze lokunyenti mayelana nalesetsembiso lesihle ngelikusasa, fundza sihloko lesitsi “Indlela Imphi Kanye Netiphitsiphitsi Letihambisana Nebudlova Lokutawucedvwa Ngayo.”