Nembeza​—Sebentisa Timiso TeliBhayibheli Kuze Uwuceceshe

1-2. (a) Ngusiphi sipho bo-Adamu na-Eva lebebaniketwe sona? (b) Bebangakhombisa njani kutsi bayabonga ngalesipho?

TILWANE tenta tintfo kuye ngendlela letidaleke ngayo. Imishini leminyenti yakhiwe ngendlela yekutsi isebente ngendlela letsite. Kodvwa bantfu behlukile. Sidalwe saba nesipho lesikhetsekile, onkhe emaKhristu eliciniso lasitsatsa njengalesiligugu kakhulu. Lesipho yinkhululeko yekutikhetsela, lokulikhono lekutentela tincumo ekuphileni. LiBhayibheli lisitjela kutsi indvodza yekucala, lokungu-Adamu, yadalwa yaba ngumfanekiso waNkulunkulu, nobe yafanana naye. (Gen. 1:26, 27) Njengobe Adamu nemfati wakhe Eva bebatidalwa letihlakaniphile, baniketwa likhono lekutentela tincumo.

² Jehova akazange anike Adamu na-Eva imitsetfo leminyenti. Wabatjela nje kutsi banakekele umhlaba, bawugcwalise ngebantfwana babo, futsi bahloniphe lilungelo lakhe lekubeka imincele ngaloko labavumeleke kukwenta. (Gen. 1:28; 2:16, 17) Bo-Adamu na-Eva bekufanele bakhombise njani kutsi bayabonga kuLoyo lobanike lesipho senkhululeko yekutikhetsela? Nasicabanga ngako konkhe Jehova lebekabanikete kona, bekufanele ngabe balalela lemitsetfo ngobe bamtsandza, futsi banesifiso sekumjabulisa.​—Taga 23:15.

3. Bo-Adamu na-Eva basisebentisa njani sipho sabo senkhululeko yekutikhetsela?

³ Njengobe umlandvo loseBhayibhelini uveta, bo-Adamu na-Eva abazange bayisebentise kahle inkhululeko yabo yekutikhetsela. Kunaloko, bancuma kungamlaleli Jehova. Sincumo sabo besingacondziswa kutsandza Jehova kanye nekumbonga, kunaloko besicondziswa kuticabangela bona. (Gen. 3:1-7) Umphumela wesincumo sabo solo usasidvonsisa kamatima nalamuhla.​—Rom. 5:12.

4. (a) Ngekusho kwembhalo waKubaseGalathiya 6:5, yini sonkhe lokufanele siyente? (b) Ngusiphi lesinye sipho lesitawucoca ngaso kulesihloko?

⁴ Tinyenti tintfo letimatima letentekako ekuphileni kwetfu lamuhla. Njalo ngelilanga, kufanele sente tincumo letinyenti. (Fundza KubaseGalathiya 6:5.) Letinye tato timelula, kodvwa letinye timatima. Singatenta njani tincumo letitawujabulisa Jehova? Kufanele sicale sivume kutsi siyaludzinga lusito lwaJehova. (Taga 16:3; Jer. 10:23) Ngisho naJesu lebekete sono wabona kutsi uyakudzinga kusitwa nguNkulunkulu. (Heb. 5:7) Njengobe sibantfu labanesono, sikudzinga kakhulu kucondziswa kwendlula Jesu. Nyalo asesicoce ngalesinye sipho lesisinikwe nguNkulunkulu lesitasisita sente tincumo letikahle, lokungunembeza.

UYINI NEMBEZA?

5. (a) Uyini nembeza? (b) Ungasisita njani nembeza? (KubaseRoma 2:14, 15)

⁵ Nembeza nguloku lokungekhatsi kitsi lokusisita sati lokuhle nalokubi. Ngisho nemuntfu longati lutfo ngemitsetfo yaNkulunkulu unaye nembeza. (2 Khor. 4:2) Nembeza wetfu singamfananisa nelijaji lelingekhatsi kitsi lelisitjela kutsi loko lesikucabangako nobe lesikwentako kuhle nobe kubi. (Fundza KubaseRoma 2:14, 15.) Nembeza wetfu ungasecwayisa kutsi singakwenti loko lesatiko kutsi kubi. (1 Sam. 26:8-11) Nobe ungasibangela kutsi sente loko lesatiko kutsi kuhle. Kuba nenkhululeko yekutikhetsela kukodvwa akusho kutsi sonkhe sincumo lesisentako siyemukeleka kuJehova. Nembeza wetfu kufanele usisite sibone umehluko emkhatsini wesincumo lesihle nalesibi.

6. Nguyiphi inkinga lekhona ngabonembeza betfu?

⁶ Kodvwa kunenkinga lekhona nganembeza wetfu. Njengobe sinesono, nanembeza wasitfola sono. Ungalinyatwa yindlela lesikhule ngayo, emasiko etfu, kanye netifiso tetfu letimbi. LiBhayibheli litsi nembeza ungaba ‘butsakatsaka,’ ‘ungcole,’ ‘ushe njengensimbi yekubeka luphawu,’ nobe uze ube ‘mubi.’ (1 Khor. 8:12; Thit. 1:15; 1 Thim. 4:2; Heb. 10:22) Nembeza lonjalo angeke usasicondzisa kahle. Ufana nesikali lesifile lesidzinga kulungiswa. Ngako-ke, nembeza wetfu kufanele sihlale siwunakekela kahle kuze uhlale usesimeni lesikahle. (1 Phet. 3:16) Singakwenta njani loko?

SINGAWUCECESHA NJANI NEMBEZA WETFU?

7-8. (a) Yini letasisita siceceshe bonembeza betfu? (b) Timiso teliBhayibheli tisicondzisa njani? Fanekisa. (Buka nesitfombe.)

⁷ Singawucecesha njani nembeza wetfu? Kufanele sifundze liBhayibheli njalo, futsi sifundze kutsi yini lenhle nalembi ngekwembono waJehova. Kudadisha imitsetfo yaNkulunkulu kutasisita siyicondze indlela lacabanga ngayo. Kodvwa njengobe sibonile esihlokweni lesendlulile, imitsetfo letsite ingahle ingasebenti kuletinye timo. Kungako kufanele sifune timiso, njengobe tisisita sicondze indlela Jehova lacabanga ngayo nalativa ngayo ngemcondvo lobanti.​—Isa. 55:9.

⁸ Luhambo lwetfu ekuphileni lungafananiswa nekuhamba ehlane. Asewucabange ngelihlane lelite imigwaco, indlela nobe timphawu temgwaco. Kuma kwelilanga netinkhanyeti kungasikhombisa indlela lokufanele sihambe ngayo kuze sifike lapho siya khona. Kodvwa libalave lelikhombisa loko lesitakubona njengobe sisahamba, njengetintsaba nobe imifula, lingasisita kakhulu. Lelibalave lingasicinisekisa kutsi sihamba endleleni lengiyo futsi lingasisita sibone nangabe sesilahleka. Umgomo wetfu ekuphileni kujabulisa Jehova. LiBhayibheli linjengelibalave lelisikhombisa indlela. Timiso teliBhayibheli tifana naletintfo lesitatibona njengobe sisahamba, letinjengetintsaba nemifula. Nasihamba ngekuvumelana naletimiso sitawufika lapho siya khona, nobe sifinyelele lomgomo.

9. Ngekusho kwembhalo waKubaseRoma 9:1, yini lenye lengasisita kutsi siceceshe bonembeza betfu?

⁹ Kuze siceceshe kahle bonembeza betfu, sidzinga lusito lwemoya longcwele waNkulunkulu. (Fundza KubaseRoma 9:1.) Umoya longcwele utasisita siyicondze indlela Nkulunkulu lacabanga ngayo etimeni letitsite. Ungaphindze usikhutsate futsi usinikete emandla ekwenta tintfo ngendlela levumelana nentsandvo yaJehova. (Fil. 2:13) Kodvwa yini lesingayenta kuze umoya longcwele waJehova usisite?

10. Singalutfola njani lusito lwemoya longcwele? (Lukha 11:10, 13)

¹⁰ Thantazela umoya longcwele. (Fundza Lukha 11:10, 13.) Singaciniseka kutsi Jehova uvule sandla nakutiwa endzabeni yekusipha umoya longcwele. (Joh. 3:34) Ubapha ngesandla lesivulekile labo labamlalelako. (Taga 1:23; Jak. 1:5) Kodvwa yini lenye letasisita siceceshe bonembeza betfu?

11. (a) Kufanele ube yini umgomo wetfu loyinhloko ekuphileni? (b) Kubaluleke ngani kuciniseka kutsi bonembeza betfu baceceshiwe futsi basebenta kahle?

¹¹ Hlale ufuna kujabulisa Jehova. (Taga 8:34, 35) Lona kufanele kube ngumgomo wetfu loyinhloko ekuphileni. Nangabe sihlale sinalomgomo engcondvweni kunobe ngutiphi timo lesibhekana nato ekuphileni, loku kungasisita kutsi siceceshe nembeza wetfu. Nembeza loceceshwe kahle wakhiwa yingcondvo lehambisana nendlela Jehova lacabanga ngayo kanye nenhlitiyo lenendzaba nendlela lativa ngayo. Nasicabanga kutsi tinyenti kangakanani tinkinga lesibhekana nato lamuhla, siyabona kutsi kubaluleke ngani kuba nanembeza loceceshwe kahle. Sivame kubhekana netimo lokungakhulunywa ngato ngalokucondzile eBhayibhelini. Letimo tingafaka ekhatsi kwekutijabulisa, umsebenti, imfundvo nobe budlelwane lesinabo nalabanye. Ngako yini lengasicinisekisa kutsi Jehova uyatemukela tincumo lesitentako kuletimo?​—2 Khor. 1:12.

12. Yini letasisita sati kutsi bonembeza betfu basicondzisa kahle yini? (Kubase-Efesu 5:10)

¹² Cabangisisa ngaloko lokufundza eVini laNkulunkulu. (Hla. 49:3) Nawufundza liBhayibheli, buka timiso letitakusita ucondze indlela Jehova lacabanga ngayo. (Fundza Kubase-Efesu 5:10.) Njengobe sisafuna indlela yekubhekana netimo letimatima ekuphileni, kufanele sifune timiso eBhayibhelini letitasisita sati kutsi bonembeza betfu basisita kutsi sente tincumo letikahle yini. (Taga 2:4-9, 11-13) Letimiso tingasisita silungise bonembeza betfu futsi sente loko Jehova lafuna sikwente.​—Heb. 5:14.

13. Yini lokufanele sigweme kuyenta? Niketa sibonelo.

¹³ Ungenti sincumo bese ufuna timiso letitawusekela leso sincumo. Asifuni kulingisa ema-Israyeli lasala kaJuda ngemuva kwekubhujiswa kweJerusalema nga-607 B.C.E. Atjela Jeremiya atsi: “Shengatsi Jehova Nkulunkulu wakho angasitjela kutsi nguyiphi indlela lokufanele sihambe ngayo nekutsi yini lokufanele siyente.” (Jer. 42:3-6) Kodvwa lama-Israyeli besekavele akuncumile loko lebekatawukwenta. Ngesikhatsi angakutsandzi loko Jehova lawatjela kona, anamatsela kulesincumo lebekasentile. Loku kwaholela enhlekeleleni. (Jer. 42:19-22; 43:1, 2, 4) Ngako ngaphambi kwekutsi sente sincumo lesitsite, kufanele sifune timiso teliBhayibheli letiveta indlela Jehova lacabanga ngayo futsi sente ngekuvumelana nato.

14. Kubaluleke ngani kutsi sisebentise timiso teliBhayibheli nasenta tincumo?

¹⁴ Yenta tincumo letisekelwe etimisweni teliBhayibheli. (Mat. 7:24-29; Jak. 1:23-25) Nasenta tincumo letisekelwe etimisweni teliBhayibheli, sisuke sibambisana nemoya longcwele. Ngenca yaloko, Jehova uyachubeka asipha umoya wakhe. (Imis. 5:32) Kodvwa nangabe singavumi kucondziswa ngumoya waJehova, singatikhandza sesiwuvisa “buhlungu,” nobe sesimelana nawo. (Ef. 4:30; Isa. 63:10; Imis. 7:51) Jehova angaze asigodlele umoya wakhe. (Hla. 51:11; 1 Thes. 5:19) Loko kungaba kubi kakhulu ngobe siyawadzinga emandla lesiwatfola ngemoya longcwele.​—Ef. 3:16.

UNGATITFOLA NJANI TIMISO TELIBHAYIBHELI LETINGAKUSITA?

15-16. (a) Singatitfola njani timiso teliBhayibheli letisebenta endzabeni letsite? (b) Ngutiphi timiso teliBhayibheli letingasita umfundzi atfole emandla ekuyekela kubhema?

¹⁵ Wasebentise emathulusi ekucwaninga. Ngaphambi kwekutsi sisebentise timiso teliBhayibheli, kufanele sikhone kutibona emiBhalweni. Sibonelo nje, yini longayenta nangabe lofundza naye liBhayibheli asengakatimiseli kuyekela kubhema? Mhlawumbe utsi: ‘Akukhulunywa ngekubhema eBhayibhelini. Ngako sati ngani kutsi kukabi?’ Ungamsita njani atfole timiso teliBhayibheli letisebentako kulesimo futsi acabangisise ngato? Lokunye longakusebentisa Lithulusi Lekucwaninga LaBoFakazi BaJehova. Ungamkhombisa sihloko lesitsi “Ligwayi Nekubhema.” Ngephansi kwalesihloko, utawubona lesinye sihloko lesikumagazini lesitsi “Utsini Umbono WaNkulunkulu Ngekubhema?” (Buka Sicongosekulindza saJuly 1, 2014.) Njengobe afundza lesihloko, ngumiphi imibhalo netimiso latatitfola?

¹⁶ Cabanga ngetimiso letisihlanu lokukhulunywe ngato kulesihloko. (1) Akukafaneli sibe tigcili tentfo lengasibulala. (Rom. 6:16) (2) Kufanele sigweme nobe yini lengalimata umtimba wetfu. (2 Khor. 7:1) (3) Jehova ufuna simkhonte ngemphefumulo wetfu wonkhe. (Mat. 22:37) (4) Akukafaneli silimate labanye ngaloko lesikwentako. (Mat. 22:39; 1 Khor. 10:24) (5) Jehova angasiniketa emandla ekwenta lokulungile. (Fil. 4:13) Ngako ngisho nobe kubhema kungakhulunywa ngako ngalokucondzile eBhayibhelini, timiso letitfolakala kulo tingasita umfundzi abone indlela Jehova lacabanga ngayo.

17. EmaKhristu latsandzanako lalungiselela umshado angatitfola njani timiso teliBhayibheli letingawasita?

¹⁷ EmaKhristu latsandzanako lalungiselela umshado angatitfola njani timiso teliBhayibheli letisebentako kulendzaba, letingawasita ente tincumo letikahle? Nalana, Lithulusi Lekucwaninga lingasita. Ngephansi kwesihloko lesitsi “Imishado Nemadzili,” kuneluhla lwetihloko letinetimiso teliBhayibheli. Cabanga ngetimiso letisitfupha letingawasita lamaKhristu. (1) Konkhe lokutawentiwa kufanele kudvumise Jehova. (1 Khor. 10:31, 32) (2) Kufanele sigcoke kahle nangesizotsa futsi singabakhubi labanye. (1 Thim. 2:9; 1 Phet. 3:3, 4) (3) Kufanele sigweme kubukisa lokwentiwa kulelive laSathane. (Joh. 17:14; Jak. 1:27; 1 Joh. 2:15, 16) (4) Konkhe lokuhleliwe kufanele kuhleleke. (1 Khor. 14:40) (5) Emadzili kufanele angabi yimicimbi lengalawuleki lapho khona bantfu banatsa kakhulu baze badzakwe. (Gal. 5:21) (6) Kufanele kube nalotsite locondzisa lomshado.​—Joh. 2:8, 9.

18-19. (a) Nguliphi lelinye lithulusi lelingasisita? (b) Ngutiphi timiso longatitfola kulelithulusi letingakusita uncume kutsi utakuya yini emkhosini lotsite? (Buka libhokisi lelitsi “Ungatibona Yini Timiso?”)

¹⁸ Lelinye lithulusi lelisite labanyenti yincwadzi letsi ImiBhalo Lecondzisa Kuphila KwemaKhristu. Lencwadzi ineluhla lwemibhalo lengephansi kwetihloko letehlukahlukene. Nasewukhetse sihloko, utawubona luhla lwemibuto kanye nemibhalo lengakusita ubone timiso teliBhayibheli. Sibonelo nje, umKhristu angatibuta kutsi aye yini emkhosini lotsite. Nakabuka sihloko lesitsi “Imikhosi,” utawubona sihlokwana lesitsi “Imikhosi emaKhristu langayigubhi.”

¹⁹ Cabanga ngalokunye lokuvetwe ngephansi kwencenye letsi: “Kubi ngani kugubha imikhosi lehlobene nenkholo yemanga? (1Kt 10:21; 2Kt 6:14-18; Efe 5:10, 11).” Kubese kuba netibonelo temikhosi lengakalungi. Ngephansi kwesihlokwana lesitsi “Imikhosi yelive,” kuneluhla lwetimiso teliBhayibheli umKhristu langatisebentisa nangabe ancuma kutsi utawuya yini emkhosini welive logubha umlandvo wetepolitiki, nakukhunjulwa timphi letiliwe ngulelive nobe nangabe lomkhosi unika umuntfu ludvumo lokufanele ngabe lunikwa Jehova. Sibonga kakhulu ngekutsi inhlangano yaJehova isiniketa emathulusi lanjengalawa kuze asisite siceceshe bonembeza betfu!

KHOMBISA KUTSI UNANEMBEZA LOCECESHWE KAHLE

20. Singakhombisa njani kutsi sibaceceshe kahle bonembeza betfu?

²⁰ Siligugu kitsi lesipho senkhululeko yekutikhetsela. Kodvwa siyati nekutsi kufanele siceceshe bonembeza betfu kuze sikhone kuyisebentisa kahle lenkhululeko yekutikhetsela. Nembeza loceceshwe kahle utasisita sente tincumo letidvumisa Jehova futsi letihambisana nentsandvo yakhe. Kuze sikwente loko, siyaludzinga lusito lwemoya longcwele waJehova. Ngako kufanele sichubeke siwucela umoya longcwele futsi siwuvumele usicondzise. Timiso teliBhayibheli titawuphindze tisisite siceceshe bonembeza betfu. Shengatsi singatisebentisa kahle letipho, futsi siwabone emandla eliVi laNkulunkulu ekuphileni kwetfu.​—2 Thim. 3:16, 17; Heb. 4:12.