Yenta Tincumo Letihlakaniphile Mayelana Nekufundzela

1-2. (a) Ngutiphi tincumo bantfu labasebasha lokufanele batente? (b) Lisho kutsini ligama lelitsi “kufundzela”? (Buka “Inchazelo Yeligama.”)

“UFUNA kuba yini nasewumdzala?” Nangabe usemusha, kungenteka sewubutwe kanyenti lombuto. Umsebenti loncono kakhulu longawukhetsa, ngumsebenti wasikhatsi sonkhe. Nanobe kunjalo, utayidzinga imali kuze utisekele. (2 Thes. 3:10) Siyaciniseka kutsi sewucabangile ngekutsi yini lofuna kuyenta nasewukhulile.

² Kuze batfole umsebenti, ngalokuvamile, labanye bantfu labasha ngekucondziswa batali bakhetsa kufundzela ngemuva kwekucedza imfundvo lokulindzeleke kutsi bonkhe bantfwana bayitfole.a Mhlawumbe uke watibuta kutsi kufanele yini ufundzele. Nangabe kunjalo, kufanele ufundzele ini? Lesihloko sitawucoca ngetimiso teliBhayibheli letingakusita ucabange ngendlela lehlakaniphile mayelana nemfundvo. Kucabanga ngendlela lehlakaniphile kutawenta kutsi wente tincumo letihlakaniphile. Nanobe ngalokuyinhloko lesihloko sikhuluma nalabasebasha, singasita nobe ngumuphi umKhristu locabanga kufundzela. Letimiso tingasita nebatali kutsi bacondzise bantfwana babo.

KUFANELE YINI UFUNDZELE?

3. Yini lengenta lamanye emaKhristu akhetse kufundzela?

³ Kuletinye tindzawo, umuntfu angahola imali leyenele kuze aphile ngisho nobe angakafundzeli. Kantsi kuletinye tindzawo kufundzela kungasita umuntfu kutsi atfole umsebenti lotamholela kancono, nobe angasebenti ema-awa lamanyenti. KumKhristu, loko kungamvulelab ematfuba ekutsi acitse sikhatsi lesinyenti emsebentini wekushumayela, nobe ente leminye imisebenti yebuKhristu. Nanobe kunjalo, kufundzela kudzinga kutidzela futsi kungeta netinkinga tako.

4. Ngubani lokufanele ancume kutsi umKhristu afundzele yini? (Buka nembhalo longentasi.)

⁴ LiBhayibheli litsi “nguloyo naloyo utawutetfwalela umtfwalo wakhe.” (Gal. 6:5, buka liphuzu lelicwaningiwe.) Ngako umKhristu ngamunye losekamdzala ngekusho kwemtsetfo, kufanele atentele yena sincumo mayelana nekutsi utawufundzela yini.c Batali nabo kufanele bentele bantfwana babo labasebancane tincumo mayelana nemfundvo. (Ef. 6:1) Ngetulu kwaloko, sicondziso sabo singalungiselela lomntfwana kutsi ente sincumo lesihlakaniphile mayelana nemfundvo nasekafike eminyakeni yekukwenta loko.​—Taga 22:6.

5. Umuntfu kufanele acale kucabanga nini ngekufundzela, futsi ngasiphi sizatfu? (Buka nesitfombe lesisekhasini lekucala.)

⁵ Ngalokuvamile, bantfu labasha kufanele bente sincumo sekutsi batawufundzela yini ngaphambi kwekutsi bacedze sikolwa. Kuliciniso kutsi kukuhlakanipha ngemuntfu losemusha kutsi acoce nebatali bakhe ngalendzaba ngaphambi kwekutsi kudzingeke ente lesincumo. Loko kutawubanika sikhatsi sekutsi babambisane bacwaninga ngalokunye langakwenta. Bangahle bakhone nekukhetsa tifundvo langatifundza esikolweni letitamsita kutsi alungele kufundzela nakacedza sikolwa nobe atfole umsebenti. Lesincumo kufanele basente ngaphambi kwekutsi lomntfwana acedze sikolwa yini? Cha. (Taga 21:5) Labanye labasebasha bancume kucedza sikolwa, batfole umsebenti, futsi baba ngemahlahlandlela njengobe basancuma kutsi bafundzele yini. Ngisho nangemuva kweminyaka, umuntfu kungahle kudzingeke acabange ngalesincumo.

6. Yini lengasita umuntfu kutsi ente sincumo lesihlakaniphile mayelana nekufundzela?

⁶ Yini lengakusita kutsi wente sincumo lesihlakaniphile mayelana nekufundzela? Thantaza ngalendzaba. (Jak. 1:5) Ngetulu kwaloko, yenta naku lokulandzelako. Kwekucala, yetsembeka njengobe utihlola kutsi yini leyenta ufune kufundzela. (Hla. 26:2) Kwesibili, cabangisisa ngalemfundvo lofuna kuyitfola. (Taga 14:15) Ase sicoce ngaletintfo.

TIHLOLE KUTSI YINI LEYENTA UFUNE KUFUNDZELA

7. Yini emaKhristu lokufanele ayinake nangabe acabanga kufundzela?

⁷ Nangabe ucabanga kufundzela, nangu umbuto lobalulekile lokufanele utibute wona: ‘Yini leyenta ngifune kufundzela loku?’ Bantfu labanyenti bayafundzela kuze batfole umsebenti labatawujabulela nobe loholela kahle. Kukabi yini loko? Cha. (1 Thim. 5:8) Nobe kunjalo, liBhayibheli lisecwayisa ngetingoti tekutsandza umcebo kanye nekufuna sivikelo kulelive. (Taga 23:4, 5; 1 Thim. 6:8-10; 1 Joh. 2:17) Nangabe tizatfu takho kutsi ufuna kunjinga nobe kuhlonishwa, kungenteka ngeke ugcine nje ngekutiva ungakenetiseki, kodvwa ungaphindze ukhweshelane naJehova.

8-9. (a) EmaKhristu kufanele abe namuphi umbono ngemfundvo? (Matewu 6:33) (b) Yini loyifundzako kuloko lokushiwo nguJosefina, Morine, na-Iris?

⁸ Ngako-ke, kufanele ube namuphi umbono ngemfundvo? Kute lokufanele kubaluleke kakhulu kitsi kwendlula kukhonta Jehova. (Mat. 22:37, 38; Fil. 3:8) Ngako sizatfu sekufundzela kufanele kube kutsi ufuna kutisekela njengobe unake kukhonta Jehova ngenhlitiyo yakho yonkhe.​—Fundza Matewu 6:33.

⁹ Naka naku lokwasita lamanye emaKhristu kutsi abe nembono lokahle ngekufundzela. Josefina, waseChile utsi: “Ngafundzela kuze ngitfole umsebenti lotawenta kutsi ngicitse sikhatsi lesinyenti emsebentini waJehova. Ngenta konkhe lokusemandleni ami kuze ngiciniseke kutsi imigomo yami ekukhonteni Nkulunkulu ngiyo lebaluleke kakhulu kunaloko bengikufundzela.” Lomunye dzadze lokutsiwa nguMorine wakhetsa kufundzela kwenta bantfu tinhloko, lokwatsatsa umnyaka. Ngasiphi sizatfu? Utsi: “Umgomo wami bekukusita lapho kunesidzingo lesikhulu khona sebamemeteli. Ngako ngafundzela intfo lebeyitangisita ngifinyelele lomgomo. Nasengicedzile kufundzela, ngasebentisa loko lengakufundza kuze ngente bantfu tinhloko futsi ngabekela eceleni imali yekutfutsa. Nasengitfutsele lakunesidzingo lesikhulu khona, loko lengakufundzela kwangisita kutsi ngitfole umsebenti.” Iris, lowafundzela kuba ngudokotela wematinyo futsi lokutsatsa sikhatsi lesidze kukufundzela utsi: “Kufundzela kunebuhle bako, kodvwa akuyuze kukwente uphumelele mbamba nobe wenetiseke mbamba. Kulula lokufanele ukwente nawufuna kujabula mbamba: Nangabe Jehova eta kucala ekuphileni kwakho, nakanjani utawujabula futsi wenetiseke.” Nangabe bungani betfu naJehova bubaluleke kakhulu ekuphileni kwetfu, sitawenta tincumo letitawenta sijabule kuze kube phakadze.

CABANGISISA NGALEMFUNDVO

10. Singasisebentisa njani simiso lesikuDutheronomi 32:29 nasenta sincumo lesimayelana nekufundzela?

¹⁰ Kungenteka sewuvele unako engcondvweni loko lotakufundzela. Kodvwa kungakusita nekucabanga nangaletinye tintfo longatifundzela, kungaba ngulokufana naloko lofuna kukufundzela nobe lokunye lokwehlukile. (Catsanisa neTaga 18:17.) Lamuhla, kunyenti lesingakhetsa kuko kunaloko bekukhona ngaphambili, njengekufundzela usebentisa tebuchwephesha. Ngetulu kwaloko, ungakhohlwa nekucabanga ngekutsi ungakhona yini kutinakekela ube ungakafundzeli. Nasi sibonelo, Johanna waseFinland akazange afundzele. Utsi: “Ngemuva kwekucedza sikolwa, ngacala kusebenta ngemalanga latsite futsi ngaba lihlahlandlela. Ngente imisebenti leyehlukahlukene, futsi ngiyibonile indlela Jehova lebakahlale asifeza ngayo setsembiso sakhe sekutsi utasiniketa loko lesikudzingako.” Khumbula kutsi tonkhe tincumo letimayelana nekufundzela, kungaba kutsi uyafundzela yini nekutsi ufundzela ini, tinebuhle bato nebubi bato. Ngako tibute: ‘Lobuhle bato buncono khashane yini kunebubi bato?’ (Fundza Dutheronomi 32:29; 1 Khor. 10:23) Ase sicoce ngaletinye tintfo letingakusita kutsi uphendvule lombuto.

11. Kubaluleke ngani kucabanga ngema-awa lotawacitsa ufundza? (Buka netitfombe.)

¹¹ Ema-awa lotawacitsa. Cabanga ngekutsi utawucitsa ema-awa langanani njalo ngeliviki useklasini, uceceshwa futsi ubhala umsebenti wesikolwa ekhaya. Usetawuba naso yini sikhatsi sekuchubeka neluhlelo lwakho lwekukhonta Nkulunkulu nesekwenta imisebenti yasekhaya? (Fil. 1:10) Lolotakufundzela kutakwenta udzinwe kakhulu yini engcondvweni uze ungasakhoni kulungiselela imihlangano yelibandla nobe kutidadishela liBhayibheli? Nguloko lokwenteka kuJeroz, waseNdiya. Utsi: “Bekumatima kwenta tintfo letiphatselene nekukhonta Nkulunkulu. Ngaletinye tikhatsi bengingayi emihlanganweni yelibandla. Nangibuka emuva, ngiyabona kutsi ngadlala ngesikhatsi sami nemandla ami.” Kantsi lokunye longakufundzela akusidli sikhatsi lesinyenti; lokunye ungakufundzela emalanga latsite evikini, kantsi lokunye kunemsebenti wesikolwa lomncane lokumele uwubhale ekhaya. Nasi sibonelo, Rabeca waseMozambique uyajabula ngaloko lakhetsa kukufundzela. Utsi: “Bengifundza ema-awa lamabili nje kuphela ngelilanga. Loko kwenta kutsi ngikhone kuchubeka ngilihlahlandlela lelivamile.”

12. Umuntfu angasisebentisa njani kahle sikhatsi sakhe nakutiwa endzabeni yemfundvo? (Umshumayeli 12:1)

¹² Kufundzelwa sikhatsi lesingakanani. Cabanga ngekutsi tingakhi tinyanga neminyaka lotayicitsa ufundzela. Utawube usisebentisa kahle yini sikhatsi sakho nawufundzela loko lofuna kukufundza? (Ef. 5:15-17) Nawusesemusha, loko lotakufundzela kutakuvumela yini kutsi unikete Jehova lokuncono kakhulu ngemalanga akho ebusha, njengekwenta umsebenti wasikhatsi sonkhe? (Fundza Umshumayeli 12:1.) Kukhona yini longakufundzela lokutsatsa sikhatsi lesifishane lokuphose kufane naloko bewukufuna? Sibonelo nje, kufundzela emakhono kungenta kutsi ngesikhatsi lesincane nje ube sewunemakhono langakusita, futsi ubhadale imali lencane kunaleyo bewungayibhadala enyuvesi. Mario waseChile, utsi: “Ngakhetsa kufundzela iminyaka lemibili, futsi bekushiphile kunemali bengitayikhipha enyuvesi. Bengifundza emalanga lamane ngeliviki, lokwenta kutsi ngikhone kuba lihlahlandlela.”

13. Yini lengenteka nangabe loko lotakufundzela kutawenta ungasahlali ekhaya?

¹³ Indzawo. Ungatfola sikolwa lesidvutane nasekhaya longafundzela kuso. Kodvwa kutsiwani nangabe usitfola khashane nasekhaya? Nobe kutsiwani nangabe kudzingeka uyohlala esikolweni? Caphela kutsi kuhamba ekhaya kungaba yingoti lenkhulu ebuhlotjeni bakho naJehova, ikakhulukati nangabe utawuhlala nebantfu labangamkhonti Jehova. (Taga 22:3; 1 Khor. 15:33) Matias waseMozambique wafundzela umnyaka, lokungazange kumdulele. Nanobe kunjalo, uyatisola ngesincumo sakhe. Ngasiphi sizatfu? Utsi: “Kwadzingeka kutsi ngihlale esikolweni sonkhe leso sikhatsi. Onkhe malanga bengilingeka kutsi ngente tintfo letimbi. Ngingabakhutsata labanye kutsi bafundzele intfo letawenta bahlale ekhaya.” Lomunye dzadze waseRussia utsi: “Ngagwema tingoti kanye netilingo ngekutsi ngihlale ekhaya nebatali bami kunekutsi ngihlale esikolweni.” Ungakhona ngisho nekufundzela lokutsite usebentisa tebuchwephesha.

14. Simiso lesikuLukha 14:28 singakusita njani nawufuna kufundzela?

¹⁴ Tindleko. Lokunye longakufundzela akukaduli, nobe kungenteka hulumende uyakubhadalela. Etimeni letinjalo, kufundzela kungaba yindlela leshiphile yekutfola lwati kanye nemakhono langakusita kutsi utfole umsebenti. Kodvwa kuletinye timo, kufundzela kudulile. Kungenteka kunetindleko letibhacile, njengekubhadala thishela lotakufundzisa kuze wemukelwe lawufuna kufundzela khona. Kantsi lokunye kushiya umfundzi nesikweleti lokufanele asibhadale iminyaka leminyenti. Adilson waseMozambique, uyatisola ngaloko lakhetsa kukufundzela. Utsi: “Umndeni wakitsi wadzela kutsenga kudla naletinye tintfo lotidzingako kuze ungibhadalele ngesikhatsi ngifundzela iminyaka lemine.” Njengobe ucabangisisa ngaloko lotakufundzela, tibute: ‘Kungumalini? Batali bami, nobe mine ngitawukhona yini kubhadala? Kukhona yini lengingakufundzela lokungakaduli?’ (Fundza Lukha 14:28.) ‘Nakwenteka ngiba nesikweleti, kutangitsatsa sikhatsi lesinganani kusibhadala? Imali lengitayitfola nasengisebenta itawukhona yini kunakekela tidzingo tami futsi ngibhadale lesikweleti?’​—Taga 22:7.

15. Kubaluleke ngani kucabanga ngekutsi utawutfola yini umsebenti ngaphambi kwekuncuma kufundzela lokutsite?

¹⁵ Ukhona yini umsebenti. Cabanga ngekutsi akhona yini ematfuba ekutfola umsebenti lawuhlala khona nobe lawufuna kuyohlala khona. Loko lotakufundzela kutakusita yini kutsi utfole umsebenti? Lokunye lokufundzelwako akubasiti kangako bafundzi kutsi batfole emakhono ladzingekako. Kunaloko, bafundziswa kakhulu loko lokubhalwe phansi, banikwe nelwati kunekutsi bafundziswe emakhono latabasita kutsi batfole umsebenti kuloko labakufundzelako. (Khol. 2:8) Lomunye dzadze waseNdiya utsi: “Loko lengakufundzela akuzange kungisite kutsi ngibe nemakhono ladzingwa bacashi. Ngenca yaloko, angizange ngiwutfole umsebenti kuloko bengikufundzele.” Lokunye lokufundzelwako kute kahle imisebenti. Sublime, waseCentral African Republic wafundzela kulungisa ema-air conditioner. Kodvwa naku lakushoko: “Langihlala khona, bantfu labanyenti bayatilungisela tintfo, ngako kulukhuni kutfola umsebenti.”

16. Kubaluleke ngani kucabanga ngemsebenti lotawenta nasewucedzile kufundzela?

¹⁶ Cabangisisa nangeluhlobo lwemsebenti lokungenteka uwutfole. Utawujabulela yini? (Shu. 3:12, 13) Kutawuba njani emsebentini? Lomsebenti watiwa ngekutsi awukaphephi yini, kunekuncintisana nobe utakucindzetela? Utawuhola malini? Utawukhona yini kutinakekela ngayo? Kutawudzingeka kutsi uchubeke ufundzela yini kuze uchubeke usebenta? Lokubaluleke kakhulu, lomsebenti utakuvumela yini kutsi utente tite kucala tintfo letiphatselene naNkulunkulu? (Shu. 12:13) Kuliciniso kutsi nangabe kulukhuni kutfola umsebenti, singahle singawutfoli lona lesiwutsandzako. Kodvwa sincumo losentako mayelana nemfundvo sitawuba nesandla ematfubeni emsebenti longawutfola esikhatsini lesitako. Tabitha, waseNdiya wakhetsa kufundzela kutfunga tinyanga letisitfupha. Utsi: “Ngabona kutsi kutfunga kutangisita ngibe lihlahlandlela. Lona ngumsebenti lotawuhlale ukhona, unginike sikhatsi futsi ngeke udzinge imali lenyenti kuze ngiwucale.” Loko lakufundzela Tabitha kwamsita watfola umsebenti lomsekelako njengobe alihlahlandlela.

17. (a) UmKhristu angayitfola njani imininingwane layidzingako kuze ente sincumo lesihlakaniphile mayelana nemfundvo? (b) Ngutiphi timiso teliBhayibheli letingamsita kuze ente lesincumo? (Buka libhokisi lelitsi “Timiso TeliBhayibheli Longacabanga Ngato.”)

¹⁷ Sesicoce ngetintfo letehlukahlukene lesingacabanga ngato mayelana nekufundzela. Ungayitfola njani imininingwane loyidzingako kuze wente sincumo lesihlakaniphile? Cwaninga ngalokufundziswako longakhetsa kukufundzela ngekutsi uye kulesikolwa nobe ungene ku-website yaso. Buka kutsi inganani imisebenti letfolakalako kuloko lofuna kukufundzela. Ungaphindze ubute labo lesebacedzile kufundzela nobe lesebavele bacashelwe loko lofuna kukufundzela. (Taga 13:10) Babute: “Yini buhle nebubi bekufundzela loko labakufundzele nobe balomsebenti?” Khuluma nalabanye labakhonta Jehova bajabulile. (Taga 15:22) Batsi yini lencono longayifundzela nobe umsebenti longawenta? Bangahle bakutjele ngemsebenti lebewungakawucabangi.

18. Yini lokufanele siyikhumbule?

¹⁸ Njengobe sesibonile, kufundzela kunebuhle bako nebubi bako. Ngako thantaza futsi ucabangisise ngaloko longakwenta. Khumbula, kufundzela kungakusita kutsi ube nemali leyenele, kodvwa kuphela kwendlela yekutsi ujabule mbamba, kutsi ube nebuhlobo lobuhle naJehova. (Hla. 16:9, 11) Jehova utawuhlale abanakekela bantfu bakhe, ngisho nobe bafundzele nobe bangakafundzeli. (Heb. 13:5) Kodvwa kutsiwani nangabe uncume kufundzela? Yini lengakusita kutsi uhlale usondzelene naJehova njengobe ufundzela? Sitawucoca ngaloko esihlokweni lesilandzelako.