Timiso TeliBhayibheli​—Tibaluleke Ngani?

1-2. (a) Yini lengenta kutsiwe liBhayibheli liyincwadzi yakadzeni? (b) Yini leyenta liBhayibheli lichubeke lilusito nalamuhla?

LIBHAYIBHELI liyincwadzi yakadzeni kakhulu. Lacala kubhalwa eminyakeni lengaba ngu-3 500 leyendlulile, futsi lacedvwa eminyakeni lengaba ngu-2 000 leyendlulile. Nanobe kunjalo, “liVi laNkulunkulu” lelikulo liyaphila futsi linemandla lamuhla. (Heb. 4:12; 2 Thim. 3:16, 17) Tigidzi tebantfu tiyakufakazela kutsi liBhayibheli libasitile kutsi bakhone kubeketelela kuphila lamuhla.

² Kodvwa kwenteka njani kutsi lencwadzi yakadzeni ichubeke ilusito nalamuhla? Kungenca yetizatfu letimbili letibalulekile. Sekucala, umlayeto walo uvela “kuNkulunkulu lophilako,” lohlakaniphe kwendlula nobe ngabe ngubani. (1 Thim. 4:10; Rom. 16:26, 27) Kwesibili, liBhayibheli linetimiso letingaphelelwa sikhatsi. Letimiso tichubeka tilusito ngisho nobe umuntfu aphila ngasiphi sikhatsi nobe anatiphi tinkinga.

3. Ngumiphi imibuto letawuphendvulwa kulesihloko?

³ Tiyini timiso teliBhayibheli? Yini leyenta tibaluleke kitsi lamuhla? Singatibona njani nasifundza liBhayibheli? Lesihloko sitawuphendvula lemibuto. Sitawuphindze sibone kutsi loko Jesu lakufundzisa kukuveta njani kubaluleka kwetimiso.

TIYINI TIMISO TELIBHAYIBHELI?

4. Tiyini timiso teliBhayibheli?

⁴ Timiso teliBhayibheli ngemaciniso lasisekelo lapho imitsetfo yaNkulunkulu isekelwe khona. Ngalesinye sikhatsi, simiso singavela ngalokucacile emtsetfweni. (Mat. 22:37) Nobe kunjalo, timiso tingetulu kwemitsetfo. Kusebenta kwemitsetfo letsite kungaba nemincele. Lemitsetfo ingabekwa ngesikhatsi lesitsite nobe ngenca yetimo letitsite. Kodvwa timiso teliBhayibheli tiyiveta ngemcondvo lobanti indlela Jehova lacabanga ngayo. Timiso tingachazwa ngekutsi ngito letenta kube nemitsetfo. Kuyo yonkhe imitsetfo yaJehova, kunesimiso lesibalulekile lesibangele kutsi ibe khona. Kodvwa letimiso lokusekelwe kuto lemitsetfo tingasetjentiswa etimeni letingafanani, futsi atiphelelwa sikhatsi. (Hla. 119:111) Imitsetfo kungahle kudzingeke kutsi ishintjwe, kodvwa timiso atiphuphi nobe tiphelelwe sikhatsi.​—Isa. 40:8.

5. Singawufanekisa njani umehluko emkhatsini wemitsetfo netimiso? (Buka netitfombe.)

⁵ Kuze siwucondze kancono umehluko losemkhatsini wemitsetfo netimiso, cabanga nganangu umfanekiso. Make angatjela umntfwana wakhe lomncane atsi: ‘Ungasitsintsi sitofu.’ Lowo ngumyalo nobe umtsetfo. Kodvwa nasi simiso lesente kwaba nalomtsetfo: Ungayitsintsi intfo leshisako, ngale kwaloko utawusha. Lesimiso asisebenti esitofini nje kuphela. Singasebenta naku-ayina, ebhodweni lelishisako, nobe kunobe yini lenye leshisako lengamlimata. Lesimiso asisebenti nje kuphela ekhaya lalomndeni kodvwa sisebenta nakuletinye tindzawo. Kuliciniso kutsi njengobe lomntfwana akhula, kungenteka asisebentise sitofu. Nobe kunjalo, kusetawudzingeka acaphele kutsi angasitsintsi ngendlela letamlimata. Ngako umtsetfo ungashintja, kodvwa simiso lokusekelwe kuso lomtsetfo asishintji.

YINI LEYENTA TIMISO TELIBHAYIBHELI TIBALULEKE?

6. (a) Yini Jehova lasinikete yona eVini lakhe? (b) Jehova ukhombise njani kutsi uyasihlonipha?

⁶ Ngenca yekutsi Jehova usitsandza kakhulu, usinikete imitsetfo lokufanele siyilalele kuze sigweme kutilimata nekulimata labanye. (Jak. 2:11) Ngetulu kwaloko, usisita kutsi sicondze timiso nobe sizatfu lesente kwaba naleyo mitsetfo. Jehova akasiniketi imitsetfo lesebenta kuto tonkhe timo. Kodvwa usiniketa sicondziso lesihlakaniphile eBhayibhelini lesingasisita kuze sente tincumo letikahle, futsi sente lokulungile ngisho nobe kute umtsetfo. Ngekutsi asinikete timiso, Jehova uyasihlonipha futsi usiniketa inkhululeko yekutentela tincumo letikhombisa kutsi siyamtsandza futsi siyatitsandza netimiso takhe.​—Gal. 5:13.

7. Singakufananisa nani kubaluleka kwetimiso teliBhayibheli? (Buka nesitfombe.)

⁷ Kuze sifanekise kutsi timiso teliBhayibheli tisisita njani, cabanga ngetimphawu temgwaco letibonwa bashayeli emigwacweni kulamanye emave. Linyenti laletimphawu lisitjela kutsi kubekwe imitsetfo lotawutsi nawuyephula uhlawule. Letimphawu tingahle tivete kutsi litubane lohamba ngalo lingagcina kubani nobe tikhombise kutsi umshayeli kufanele eme. Nobe kunjalo, timphawu letinyenti tecwayisa umshayeli ngetintfo letingaba yingoti. Sibonelo nje, tingahle timecwayise ngekutsi kungenteka umgwaco uyashelela, nobe kunetilwane letewela umgwaco. Umuntfu losanesikhatsi ashayela uyisebentisa kahle ingcondvo, futsi ushayela ngekucophelela nakabona letimphawu letimecwayisa ngetintfo letiyingoti. Sibonelo nje, nangabe liyana, lomshayeli utawushintja indlela lashayela ngayo kulesimo lesiyingoti. Ngendlela lefanako, nanobe emaKhristu agwema nobe ngukuphi kutiphatsa lokungavunyela liVi laNkulunkulu, agwema nobe ngumiphi imicabango nobe kwenta tintfo letingaholela kutsi ephule imitsetfo yaNkulunkulu. Loku kudzinga kutsi asebentise kahle ingcondvo.

8. Njengobe kuvetwe KubaseRoma 12:1, 2, kungasicecesha kutsi senteni kufuna timiso teliBhayibheli?

⁸ Nanobe kunjalo, kunaletinye tindlela letibalulekile lokusisita ngato kufuna timiso teliBhayibheli futsi siphile ngato. Sibonelo nje, siceceshwa kutsi sicondze indlela Jehova lacabanga ngayo ngendzaba letsite. Nasifundza tindzaba letibhalwe emiBhalweni, sifundza kufuna tifundvo kuto. Sitibuta kutsi yini leyente Jehova wafaka letifundvo eVini lakhe, nekutsi tingasisita njani. Ngaleyondlela, sifundza kutsi singayisebentisa njani “ingcondvo” yetfu kuze sikhonte Jehova. Siyatitfolela loko ‘lokuyintsandvo yaNkulunkulu, sikwati lokuhle, lokwemukelekako nalokuphelele.’​—Fundza KubaseRoma 12:1, 2.a

9. Kuphindze kusisite njani kuphila ngetimiso teliBhayibheli? (KumaHebheru 5:13, 14)

⁹ Kufundza kuphila ngetimiso teliBhayibheli kusisita kutsi sibe ngemaKhristu lavutsiwe. Nasiphila ngetimiso teliBhayibheli, buhlobo betfu naJehova buyatfutfuka. (Fundza KumaHebheru 5:13, 14.) Bantfwana bangahle badzinge imitsetfo leminyenti kuze bati loko labangakwenta nakuvela timo letehlukahlukene. Bangalalela lemitsetfo ngenca nje yekutsi besaba kujeziswa. Kodvwa Jehova akasiphatsi njengebantfwana labancane, kunaloko usiphatsa njengebantfu labadzala labavutsiwe. Uyasetsemba kutsi sitawenta tincumo letihambisana nentsandvo yakhe, futsi nasenta njalo ujabula kakhulu.​—Hla. 147:11; Taga 23:15, 26; 27:11.

SINGATIBONA NJANI TIMISO TELIBHAYIBHELI?

10. Singatibona njani timiso teliBhayibheli?

¹⁰ Nangabe sifuna tifundvo eBhayibhelini, singatfola timiso letisisita sicondze indlela Jehova lacabanga ngayo nalativa ngayo ngendzaba letsite. Singaphindze sitibone timiso nangabe sifuna tizatfu letente kwabekwa imitsetfo letsite. Nasichubeka sicondza kutsi ngutiphi letizatfu, sitamcondza kakhulu Jehova. Kodvwa kuze siyicondze indlela Nkulunkulu lacabanga ngayo, kufanele sithantaze simcele asisite futsi sifundze kuba nelikhono lekusebentisa kahle ingcondvo. (Taga 2:10-12) Singatibuta imibuto lenjengaletsi: ‘Yini leyente Nkulunkulu wasinika lomtsetfo? Nangabe Jehova angayemukeli lendlela lena yekutiphatsa, angativa njani ngalenye indlela yekutiphatsa lefana nalena? Ngusiphi sifundvo lengisifundza kulendzaba leseBhayibhelini, futsi ngingasisebentisa njani ekuphileni kwami?’ Nasesitibonile tizatfu letente kwaba nemitsetfo letsite kanye netifundvo lesititfola kuyo nasetindzabeni letiseBhayibhelini, sitawukhona kwenta tincumo letikahle ekuphileni, lokutincumo letihambisana nentsandvo yaJehova.

11. ENshumayelweni yakhe yaseNtsabeni, Jesu wasikhombisa kutsi singatibona njani timiso teliBhayibheli? (Buka netitfombe.)

¹¹ ENshumayelweni yakhe yaseNtsabeni, Jesu wasikhombisa kutsi singatibona njani timiso teliBhayibheli. Ase sicoce ngetibonelo letintsatfu. Esibonelweni ngasinye, Jesu wacale washo umtsetfo. Ngemuva kwaloko, waveta simiso lesente kwaba nalomtsetfo. Njengobe sicabangisisa ngaloko Jesu lakuveta, sitawubona kutsi letimiso singatisebentisa njani lamuhla. Ngesikhatsi lesifanako, sitawubona kutsi letifundvo tisisita njani ekuphileni.

12. Ngusiphi lesinye simiso lesente kwaba nemtsetfo lokuMatewu 5:21, 22? (Buka nesitfombe.)

¹² Fundza Matewu 5:21, 22. “Ungabulali.” Ngusiphi simiso lesente kwaba nalomtsetfo? Jehova akafuni kutsi senyanye labanye, kungaba ngalesikwentako, lesikushoko, nobe ngisho nangendlela lesicabanga ngayo. Jesu waveta kutsi ngisho nobe kungenteka umuntfu angabulali mbamba, kodvwa angasephula lesimiso lesente kwaba nalomtsetfo nangabe enyanya umnakabo. Nangabe lotsite ‘achubeka atfukutselele umnakabo’ nobe amhlukubete ngemavi, lomuntfu lotfukutsele utawuyiswa “eNkantolo Lephakeme.” Ecinisweni, nguleso kanye simo sengcondvo netento letiholela ekubulaleni.​—1 Joh. 3:15.

13. Singasisebentisa njani simiso lesiku-Matewu 5:21, 22 ekuphileni kwetfu? (Buka netitfombe.)

¹³ Singasisebentisa njani lamuhla simiso lesikuMatewu 5:21, 22? Kufanele sikugweme kuhlala sitfukutsele nobe kubamba emagcubu. (Lev. 19:18; Jobe 36:13) Ngasiphi sizatfu? Ngenca yekutsi loko kungenta kutsi sikhulume nobe sente tintfo letingabanga inzondo. (Taga 10:12) Loko kufaka ekhatsi kuhleba nekunyundzela, lokungalimata nobe kone lidvumela lalabanye. (Taga 20:19; 25:23) Ngisho nangaphambi kwekutsi kube netinhlelo tekuchumana, ema-blogs, i-Internet, nobe tinhlelo tekutfumelelana imilayeto, Jesu washo simiso lesingecwayisa emaKhristu lavutsiwe ngetingoti letingaba khona nawasebentisa letintfo tesimanjemanje. Kodvwa kuto tonkhe letimo, kufanele sikugweme kukhuluma emavi lanenzondo, langenta kutsi konakale lidvumela lalomunye umuntfu.

14. Ngusiphi simiso lesente kwaba nemtsetfo lokuMatewu 5:27, 28? (Buka nesitfombe.)

¹⁴ Fundza Matewu 5:27, 28. “Ungaphingi.” Ngusiphi simiso lesente kwaba nalomtsetfo? Jehova akagcini nje ngekwenyanya kutiphatsa lokubi, kodvwa uphindze enyanye nemicabango lengaholela ekutiphatseni lokubi. Jesu wachaza kutsi nangabe indvodza leshadile ichubeka ibuka umuntfu wesifazane (longasuye umkakhe) ngekumkhanuka, isuke seyivele yonile. Ngako imicabango lengcolile kufanele igwenywe ngato tonkhe tindlela, ngisho nobe loko kungadzinga kutsi sisebente kamatima. (Mat. 5:29, 30) Lesimiso siyasebenta ngisho nakumaKhristu langakashadi.

15. Singasetjentiswa njani lamuhla simiso lesiku-Matewu 5:27, 28? (Buka netitfombe.)

¹⁵ Singasisebentisa njani lamuhla lesimiso lesikuMatewu 5:27, 28? Kufanele sikugweme kuhlale sicabanga tintfo letingcolile. (2 Sam. 11:2-4; Jobe 31:1-3) Kusebaleni kutsi umKhristu lovutsiwe utigwema tonkhe tinhlobo tetitfombe letingcolile. Akacabangi kutsi kukahle kubuka titfombe nobe ema-video lakhombisa kungcola, kuphela nje nakangatenti tintfo letingcolile. Akabeki taba tekutsi letitfombe latibukelako atikangcoli kakhulu, njengobe labanye batsi atisitimbi kunekubukela letikhombisa kungcola mbamba. Ngesikhatsi saJesu, bekute tintfo tebuchwephesha, ema-movie nobe titfombe. Nobe kunjalo, Jesu wasitjela simiso lesisifundzisa ngendlela Jehova lativa ngayo ngetintfo letitfolakala etintfweni tebuchwephesha lamuhla. Loku kusisita sicondze kutsi Jehova angaphatseka kabi kangakanani nangabe senta tintfo letentiwako lamuhla, lokufaka ekhatsi kutfumelelana titfombe letingcolile, ema-video, kucoca nobe kutfumelelana imilayeto lengcolile ngetincingo. Kusebentisa lesimiso kusita umuntfu loshadile kutsi agweme kungetsembeki kuloyo lashade naye. (Mal. 2:15) Kuphindze kusite onkhe emaKhristu, kungaba ngulashadile nobe langakashadi, kutsi agweme nobe yini lengaholela ekutiphatseni lokubi.​—Taga 5:3-14.

16. Ngusiphi simiso lesente kwaba nemtsetfo lokuMatewu 5:43, 44? (Buka nesitfombe.)

¹⁶ Fundza Matewu 5:43, 44. “Kufanele utsandze makhelwane wakho.” Ngusiphi simiso lesente kwaba nalomtsetfo? Jehova ufuna kutsi bonkhe bantfu sibatsatse njengabomakhelwane betfu futsi sibakhombise lutsandvo. Lokubuhlungu kutsi emaJuda angesikhatsi saJesu bekawusebentisa kabi lomyalo, acabanga kutsi usho kutsi angatenyanya titsa tawo. Kodvwa Jesu bekati kutsi bekungasiso leso sizatfu lesente kwaba nalomtsetfo. Bekati kutsi Babe wakhe wasezulwini lonelutsandvo ulindzele kutsi sitsatse bonkhe bantfu njengabomakhelwane betfu, ngisho nobe banamaphi emasiko nobe buve.​—Mat. 5:45-48.

17. Kusisita ngani kusebentisa simiso lesiku-Matewu 5:43, 44 ekuphileni kwetfu? (Buka netitfombe.)

¹⁷ Singasisebentisa njani lamuhla lesimiso lesikuMatewu 5:43, 44? Kutsandza makhelwane kutawusenta kutsi singavumi kungenela timphi kanye netincabano letikhona emhlabeni. (Isa. 2:4; Mik. 4:3) Kutasisita nekutsi sibaphatse kahle labo labanebuve, emasiko nobe tinkholelo letehlukile kunetetfu. (Imis. 10:34, 35) Kutasisita nekutsi sicolele labo labasivise buhlungu nobe labaphetse kabi bantfu lesibatsandzako.​—Mat. 18:21, 22; Mak. 11:25; Luk. 17:3, 4.

TIMISELE KUPHILA NGETIMISO TELIBHAYIBHELI

18. (a) Yini lokufanele sitimisele kuyenta? (b) Sitawucoca ngani esihlokweni lesilandzelako?

¹⁸ Sibonga kakhulu ngekutsi Jehova usiphatsa njengebantfu labadzala, hhayi njengebantfwana labancane! Ufuna sisebentise timiso teliBhayibheli letitasisita njalo nasenta tincumo. (1 Khor. 14:20) Njengobe sisenta letincumo, shengatsi singatimisela ‘kuchubeka sicondza kutsi iyini intsandvo yaJehova.’ (Ef. 5:17) Kutsandza Jehova, hhayi kwesaba kujeziswa, kutasisita kutsi sente tincumo letihambisana nentsandvo yakhe. Kodvwa sikhona lesinye sipho lesitasisita kuloku. Ngunembeza. Sitawucoca ngaloko esihlokweni lesilandzelako.