Chubeka Ucinisa Budlelwane Bakho Naloshade Naye

1. Yini leyenta sitsi bangani labakahle basipho lesivela kuJehova?

BANGANI labakahle basipho lesivela kuJehova. (Jak. 1:17) Bayamtsandza Nkulunkulu, futsi natsi bayasitsandza. Bajabula natsi nasijabulile, basidvudvute nasitiva siphansi, futsi basinikete seluleko lesikahle nasisidzinga. Betsembekile, futsi singabetsemba. Bangani labanjalo ‘benta inhlitiyo ijabule’!​—Taga 27:9.

2. Kubaluleke ngani kutsi labashadene bachubeke bacinisa bungani babo? (Matewu 19:6)

² Kubalulekile kutsi indvodza nemfati babe bangani labakhulu. Akukafaneli babubukele phansi bungani babo, ngako kufanele bachubeke babucinisa. Nangabe bangabunaki, bangahle bacale kuba nesitunge, bacansuke futsi baze batfukutsele. Kodvwa nangabe bachubeka bacinisa bungani babo, bangaba nebudlelwane lobuhle kakhulu bantfu lababili labangaba nabo. (Fundza Matewu 19:6.) Kulesihloko, sitawucoca ngekutsi yini labashadene labangayenta kuze bachubeke bacinisa bungani babo. Kodvwa sitawucale sicoce ngekutsi emaKhristu lasengakashadi angamkhetsa njani umuntfu lokahle langashada naye futsi lotawuba ngumngani wawo lomkhulu kuphila kwawo konkhe.

INDLELA YEKUKHETSA UMUNTFU LOTAWUBA NGUMNGANI KUPHILA KWAKHO KONKHE

3-4. Yini lengasisita sitfole umuntfu lokahle lesingashada naye? (Taga 18:22)

³ Ngaphambi kwekutsi sente nobe ngusiphi sincumo lesibalulekile, kufanele sicabange ngekutsi ngutiphi tintfo letimbi naletinhle letingenteka letingaba ngumphumela walesincumo. Tincumo letibalulekile tingasitsintsa kuphila kwetfu konkhe, ngako kubalulekile kutsi sicabangisise ngaphambi kwekutsi sitente.

⁴ Nasikhetsa umuntfu lotawuba ngumngani wetfu kuphila kwetfu konkhe, lokunguloyo lesitawushada naye, sisuke senta lesinye setincumo letibaluleke kakhulu ekuphileni. Njengobe kunguJehova lowasungula umshado, kunengcondvo kutsi setsembele kuye kuze asicondzise nasikhetsa loyo lesitawushada naye. Ufuna indvodza itfole umfati lokahle, nemfati atfole indvodza lekahle. Uhlale akwati loko lokusilungelako. (Fundza Taga 18:22; Isa. 48:17, 18) Timiso letiseVini laNkulunkulu tingasita umKhristu kutsi atfole umuntfu lomlungelako.

5. Kubaluleke ngani kutsi nawukhetsa loyo lotawushada naye ukhetse umKhristu lobhajatisiwe?

⁵ Nasibhajatiswa, siba bangani baNkulunkulu. (Hla. 25:14) Nangabe ufuna kushada, kufanele ukhetse loyo lotawushada naye emkhatsini walabo lababangani baJehova. (1 Khor. 7:39) Nawenta njalo, usuke ukhombisa kutsi uyatihlonipha timiso taJehova, futsi lona loshade naye utamtsatsa njengesipho lesivela kuye. (Taga 19:14) Utawutigwema netinkinga letibangelwa ‘kuboshelwa ejokeni linye’ nemuntfu longasuye Fakazi. (2 Khor. 6:14) Akusiko mbamba kuhlakanipha kutsandzana nemuntfu longasuye Fakazi, mhlawumbe ngobe utitjela kutsi kute umKhristu lokulungelako. Ngetulu kwaloko, akusiko nekuhlakanipha kucabanga kutsi kukahle kutsandzana nemuntfu longasuye Fakazi ngobe unelitsemba lekutsi ngalelinye lilanga utawuba nguFakazi.

6-7. Ngumiphi imibuto lokufanele batibute yona nabasatsandzana laba lababili?

⁶ Kuliciniso kutsi akusuye wonkhe muntfu lobhajatisiwe lokulungelako kutsi ungashada naye. Nangabe kunalotsite longatsandza kushada naye, kungaba kahle kutibuta nayi imibuto.a ‘Uwuphatsa njani umndeni wakubo? Uyacabangela futsi uyahlonipha yini? Bobani bangani bakhe? Wenta njani nangabe kunekungaboni ngaso linye? Uma acine yini embonweni wakhe, nobe ukulungele kwemukela umbono walabanye nangabe kute simiso seliBhayibheli lesephulwako? Unamuphi umbono ngemali?’

⁷ Ungatibuta nayi leminye imibuto: ‘Lomngani wami umtsandza ngalokujulile yini Jehova? Uyabugcoka yini “buntfu lobusha”? Utangisita yini kutsi ngichubeke ngimentela lokunyenti Jehova? Sinemigomo lefanako yini ekukhonteni Nkulunkulu? Ngiyatibona yini mine naye singagcini nje ngekuba bangani kodvwa sibe bangani labakhulu?’ (Khol. 3:9, 10) Nangabe ungudzadze, lomzalwane lotsandzana naye utawuba ngumngani lokahle yini nenhloko yemndeni lekahle? (1 Khor. 11:3) Nangabe ungumzalwane, lodzadze lotsandzana naye utawuhlale akulungele yini kuhlonipha ligunya lakho lekuba yinhloko yemndeni ngisho nobe unemaphutsa? Kutsatsa sikhatsi kuphendvula imibuto lenjengalena. Ngako sebentisa sikhatsi senu sekutsandzana kuze umati kahle lona lotawushada naye.

8-9. Yini lengasita umuntfu lotsandzana nalotsite kutsi ente sincumo lesihlakaniphile? (Buka nesitfombe.)

⁸ Nanisatsandzana, manyenti ematfuba ekutsi wente sincumo lesihlakaniphile nangabe wetama kutfola kutsi lomuntfu unjani. Tfola kulabanye kutsi bamati angumuntfu lonjani. Ungabuta ngelidvumela lakhe nangebuntfu bakhe. Sibonelo nje, watiwa ngekutsi utfobekile yini, unemusa, nangekusebentisa kahle ingcondvo? Lomunye dzadze waseFrench Guiana lokutsiwa nguSarah lowashada nalomunye umzalwane lokutsiwa nguDaniel, utsi: “Ngatfola kutsi Daniel ungumuntfu lonjani kulomunye umzalwane lebekahlala naye futsi alihlahlandlela kanye naye, kulomunye lomdzala wasebandleni lakulo, kulabanye lababangani betfu sobabili, nakubodzadze lebebasebandleni bekakulo.” Ngemusa ungabuta lomuntfu lotsandzana naye kutsi tikhona yini tintfo lokudzingeka utati letentekile kuye esikhatsini lesendlulile nobe nyalo, ngobe ngekuhamba kwesikhatsi letinye tintfo nobe imikhuba ingabanga tinkinga letinkhulu emshadweni.

⁹ Ungacali ungakunaki nobe ngukuphi kungabata lonako, nobe lokuvetwa bangani bakho labavutsiwe, nobe tintfo letiliciniso lotibonako nobe labatibonako nabo. Nawenta njalo, utawukhona kuncuma kutsi kukuhlakanipha yini kuchubeka utsandzana nalomuntfu nobe cha.b Nyalo asesicoce ngalabo lesebavele bashadile.

CITSANI SIKHATSI NDZAWONYE NICINISA BUNGANI BENU

10. Kubaluleke ngani kutsi indvodza nemfati bacitse sikhatsi ndzawonye futsi banakane?

¹⁰ Indvodza nemfati bangacinisa bungani babo nemshado wabo ngekutsi bacitse sikhatsi ndzawonye ngisho nobe babantfu labamatasa kangakanani. Loko kubanika litfuba lekucoca ngetintfo letenteke ngalelo langa, lekukhuluma ngaloko lomunye nalomunye lakucabangako nendlela lativa ngayo, bakhombisane lutsandvo, futsi babe nesikhatsi lesimnandzi ndzawonye.

11. Yini lengalimata bungani emkhatsini wendvodza nemfati?

¹¹ Indvodza nemfati lababangani labakhulu banconota kuhlala ndzawonye kunekuhlala ngekwehlukana. Kuliciniso kutsi ngalesinye sikhatsi kungadzingeka kutsi bangahlali ndzawonye sikhashana. Kodvwa kungabi ndzawonye sikhatsi lesidze kungaba yingoti. Sibonelo nje, labanye bavume kuyosebenta kulelinye live, lokubenta babe khashane sikhatsi lesidze nemindeni yabo. Nanobe kungenteka loko kwente babe nemali lenyenti, kuba khashane sikhatsi lesidze kungawulimata umshado.

12-13. (a) Yini lamanye emaKhristu lashadile layentile kuze acitse sikhatsi naloyo lashade naye? (Buka nesitfombe.) (b) Kufanele bubaluleke kanganani budlelwane bakho naloyo loshade naye? (Buka libhokisi lelitsi “Kufanele Abaluleke Kanganani Loyo Lengishade Naye?”)

¹² Naka naku lokwentiwe ngulabanye labashadene kuze baciniseke kutsi bahlale bacitsa sikhatsi ndzawonye. Leah, waseGuam utsi: “Mine nendvodza yami siyakutsandza kwenta tintfo letehlukahlukene ndzawonye. Asikavami kushiyana nangabe simenywa emcimbini lotsite nobe nasitikhipha.” Roxanne, waseMelika, wengeta utsi: “Njengoba tiya tandza tintfo letifuna sikhatsi setfu, sibone sidzingo sekuhlela sikhatsi sekuba ndzawonye, njengobe nje senta nangabe kunemcimbi lobalulekile lokufanele siye kuwo.” (Catsanisa na-Amose 3:3.) Naku lokushiwo nguDamien, waseFrance: “Ngamunye wetfu ufundze kunaka nekutsandza tintfo letitsandvwa ngulolomunye.” (Mat. 7:12) Katie, naye waseMelika, utsi: “Ngalesinye sikhatsi sikhweshisa tincingo tetfu kuze tingasiphazamisi.”

¹³ Ngetulu kwako konkhe, citsani sikhatsi ndzawonye nenta tintfo letiphatselene naNkulunkulu. Myriam, waseFrance, utsi: “Onkhe malanga ekuseni sifundza liBhayibheli futsi sicoce ngemaphuzu lesiwatsandzile, naloko lesingakusebentisa ekuphileni kwetfu. Ngititsandza kakhulu letikhatsi leti.” Wengeta utsi: “Ngiyajabula nalapho sithantaza ndzawonye futsi ngiva indlela indvodza yami lemtsandza ngayo Jehova.” Katie, lesike sakhuluma ngaye, utsi: “Sikhatsi lengisitsandzako lesiba naso ndzawonye, kulapho sishumayela. Kumnandzi kuva ngamunye wetfu aveta kukholwa kwakhe, futsi sihlale sifundza lokusha kulomunye nalomunye.”​—Taga 27:17.

BAMBISANANI NAKUVELA TINKINGA

14-15. Kubaluleke ngani kutsi labashadene bente konkhe lokusemandleni abo kuze bancobe tinkinga letingaba khona emshadweni wabo? Fanekisa.

¹⁴ Njengobe labo labashadile banesono, titawuba khona tinkinga emshadweni wabo. LiBhayibheli licinisile nalitsi bantfu labashadile “batawuba nelusizi enyameni.” (1 Khor. 7:28) Liphuzu lelicwaningiwe lalelivesi litsi lamavi “asho tinkinga labavame kuba nato labo labashadile.” Nativela tinkinga letinjalo, kubaluleke ngani kutsi bente konkhe lokusemandleni abo kuze babambisane futsi batincobe?

¹⁵ Cabanga nganangu umfanekiso. Nangabe sakhiwo lesidvumile silimala, manyenti ematfuba ekutsi banikati baso bakhetse kusilungisa. Bangacitsa timali letishisiwe nesikhatsi lesinyenti basilungisa, lokungenteka kutsatse iminyaka kutsi kuphele. Ngasiphi sizatfu? Ngenca yekutsi lesakhiwo siligugu kubo. Ngendlela lefanako, yonkhe imishado iligugu. Ngisho nemshado lokahle uba nato tinkinga. Nobe kunjalo, njengobe nje lesakhiwo lesilimele singalungiseka, nemshado lonetinkinga nawo ungalungiseka. Kungenteka loko kutawutsatsa sikhatsi futsi kudzinge nekusebenta kamatima, nobe kunjalo, Jehova utawujabula nangabe labashadile basebenta kamatima kuze bacinise umshado wabo futsi bachubeke bahlala ndzawonye. (Mal. 2:16) Nabenta njalo, abagcini nje ngekukhombisa kutsi bayatsandzana futsi bayahloniphana, kodvwa bakhombisa nekutsi bayamtsandza futsi bayamhlonipha Jehova, lokunguye lowasungula umshado.

16. Ngekusho kwa-1 KubaseKhorinte 13:4-8a, yini lengasita labashadene labanetinkinga letimatima emshadweni wabo? (Buka sitfombe kanye nelibhokisi lelitsi “Yini Lengakusita Ucinise Budlelwane Benu?”)

¹⁶ Nakuvela tinkinga emshadweni wakho, ungasheshi kufuna kuhlala ngekwehlukana. (1 Khor. 7:10, 11) Kunaloko tibute: ‘Kukhona yini lokunye lengingakwenta kuze ngicinise bungani betfu?’ Dadisha ngaloko liBhayibheli lelikushoko mayelana nekukhombisa lutsandvo, futsi utibute kutsi kukhona yini lawungatfutfukisa khona endleleni yekukhombisa tintfo lokukhulunywa ngato ku-1 KubaseKhorinte 13:4-8a. (Fundza.) Kunekutsi ufune indlela yekuphuma kulomshado, yenta konkhe lokusemandleni akho kuze ufune indlela yekubuyela enhlitiyweni yalona loshade naye. Naka loko wena longakwenta kuze uphindze wakhe lobudlelwane benu. Thantaza kuJehova ucele akucondzise. Funa lusito loludzingako etincwadzini tetfu nakuma-video, kulabadzala belibandla kanye nakumaKhristu lavutsiwe. Nawetsembela kuJehova, loyintsambo yesitsatfu nalecine kakhulu ‘kulentsambo lenemicu lemitsatfu,’ intsambo yenu, lokungulomshado, “angeke isheshe idzabuke.”​—Shu. 4:12.

17. Labo labafuna kushada nalabo lesebashadile bangayitfola njani injabulo?

¹⁷ Jehova ufuna kutsi bonkhe bantfu bakhe bajabule, lokufaka ekhatsi labo labafuna kushada nalabo lesebavele bashadile. Ngako nangabe usengakashadi futsi ufuna kushada, mkhetse kahle loyo lotawuba ngumngani wakho kuphila kwakho konkhe. Nangabe sewushadile, chubeka ucinisa bungani bakho naloyo loshade naye. Timisele kulungisa nobe ngutiphi tinkinga letingahle tivele emshadweni wakho, wetsembele kuJehova kuze akusite. Nawenta letintfo, ‘utawujabulela kuphila’ naloyo lomtsandzako loshade naye!​—Shu. 9:9.