Fundza ‘KuNkulunkulu Wayo Yonkhe Indvudvuto’

1. Yini leyenta kudzingeke sidvudvute labanye?

SONKHE ‘sicindzetelwa tilingo letehlukahlukene,’ ngako ngaletinye tikhatsi siyakudzinga kudvudvutwa nekukhutsatwa. (1 Phet. 1:6) Njengobe sijabula nangabe labanye basidvudvuta, kufanele sisheshe kudvudvuta labanye nababhekene netinkinga. (Mat. 7:12) Jehova, ‘longuNkulunkulu wayo yonkhe indvudvuto,’ usikhombisa kutsi ‘singabadvudvuta njani labanye kuko konkhe kuhlupheka kwabo.’ Singasilingisa sibonelo sakhe ngekutsi ‘sidvudvutane.’ (2 Khor. 1:3, 4; 1 Thes. 4:18) Loko asikwenti nje ngobe kufanele sikwente, kodvwa kungenca yekutsi siyabatsandza bazalwane betfu nabodzadze. Kulesihloko, sitawucoca ngekutsi (1) isho kutsini indvudvuto ngekusho kweliBhayibheli, (2) singabadvudvuta njani labanye, nekutsi (3) yini lesingayenta nasidzinga indvudvuto.

ISHO KUTSINI INDVUDVUTO NGEKUSHO KWELIBHAYIBHELI?

2. EBhayibhelini, ligama lelitsi “indvudvuto” lingasho ini?

² EBhayibhelini, ligama lesiGriki lelihunyushwe ngekutsi “indvudvuto” lingasho tintfo letinyenti, kuye ngekutsi kukhulunywa ngani. Lingasho ‘kukhutsata’ nobe ‘kwecwayisa.’ (Rom. 12:8; buka liphuzu lelicwaningiwe lelitsi “encourages.”) Leligama lesiGriki lelitsi “indvudvuto” nalihunyushwe njengobe linjalo lisho kutsi umuntfu ucelwa kutsi eme eceleni kwalotsite kuze amsite. Ngako cabanga ngemngani lota ngekushesha kuze atewusita umngani wakhe lonenkinga, amsite nganobe yini layidzangako nobe amsekele ngaloko lakudzingako. Kunobe nguyiphi indlela lamsita ngayo, indvudvuto sibili iba nemphumela lofanako, lolonenkinga uyakheka futsi acine.

3. Bhanabasi wasibeka njani sibonelo sekudvudvuta labanye? (Buka nesitfombe.)

³ Cabanga ngesibonelo lesiseBhayibhelini. Lomunye umKhristu lokutsiwa nguJosefa bekanelikhono lelimangalisako lekukhutsata nelekudvudvuta labanye kangangekutsi baphostoli baze bambita ngekutsi nguBhanabasi, lokusho kutsi “Lokhutsata Labanye.” (Imis. 4:36) Leligama belimfute kangangekutsi liBhayibheli alizange liphindze limbite ngeligama lakhe. Etikhatsini letehlukahlukene, Bhanabasi wahamba etinyatselweni teligama lakhe ngekutsi asite bazalwane bakhe nabodzadze nabadzinga lusito. Sibonelo nje, ngesikhatsi umfundzi Sawula lebekasandza kugucukela enkholweni yebuKhristu efika eJerusalema, bekafuna kubona bafundzi. Kodvwa bebamesaba ngenca yelidvumela lakhe lekuhlupha emaKhristu. Nobe kunjalo, Bhanabasi wametsemba Sawula futsi wamsita wabonana nebaphostoli.​—Imis. 9:26-28.

INDLELA YEKUDVUDVUTA LABANYE

4. Nguyiphi lenye indlela lekahle kakhulu yekudvudvuta labanye? (KubaseRoma 1:11, 12)

⁴ Bavakashele nawungakhona. Jehova usebentisa tikhonti takhe kuze advudvute labanye. Sibonelo nje, ngesikhatsi Elija acindzetelekile, Jehova wasebentisa ingilosi kuze imkhutsate. (1 Khos. 19:4-7) Umphostoli Pawula wawabona nemandla ekuvakashela bazalwane bakhe nabodzadze kuze abakhutsate babonana buso nebuso. (Fundza KubaseRoma 1:11, 12.) Nawuvakashela lotsite kuze umdvudvute, citsa sikhatsi naye futsi ungajaki kuhamba. (1 Khor. 16:7) Kodvwa nangabe ungakhoni kuvakashela lotsite losenkingeni, ungakhohlwa nekutsi kunemandla kangakanani kushaya lucingo, kubhala incwadzi, likhadi nobe umlayeto kuze umcinise. Utamvumela yini Jehova kutsi akusebentise kuze udvudvute labanye?

5. Ngutiphi tinkinga lesingatilindzela?

⁵ Njengobe lamalanga ekugcina aya aba mabi kakhulu, singalindzela kutsi tandze tinkinga lesibhekana nato nasetama kudvudvuta bazalwane betfu nabodzadze buso nebuso. Ngesikhatsi Pawula aboshiwe eRoma, Onesiforusi, lebekawase-Efesu wamfuna nanobe kwenta njalo bekumbeka engotini yekuboshwa nobe yekubulawa. (2 Thim. 1:16-18) BoFakazi BaJehova eRussia bakhombise umoya lofanako nangabe bazalwane babo nabodzadze baphatfwa kabi ngenca yekukholwa kwabo. BoFakazi nabatekiswa emacala, bazalwane babo nabodzadze baba khona etinkantolo kuze babasekele, ngisho nobe loko kungababeka engotini yekutsi nabo baboshwe. Kungaba njani kutsi utilungiselele kulingisa sibonelo sabo sekuba nesibindzi, ngekutsi udadishe ngendlela bantfu baNkulunkulu basesikhatsini lesendlulile nebalamuhla labasekelene ngayo, futsi batfola injabulo ngisho nobe baphatfwa kabi?

6. Singamlingisa njani Jehova nasidvudvuta labanye? (Buka nesitfombe.)

⁶ Balalele. Ngesikhatsi umphrofethi Elija abona ngatsi kuphila kwakhe kusengotini, watfululela sifuba sakhe kuJehova. Nkulunkulu wetfu lonelutsandvo wamlalela Elija njengobe aveta loko bekumkhatsata, ngisho nobe Jehova besekavele akwati loko bekumhlupha. Wamlalela ngesineke ngisho nangesikhatsi Elija aphindzaphindza intfo yinye! (1 Khos. 19:9, 10, 14) Jehova wamvumela nemphrofethi Habakhuki kutsi avete loko bekumkhatsata nekungabata kwakhe ngendlela lebeyibonakala ngatsi ayimhloniphi. (Hab. 1:2, 3) Lamuhla, Jehova uyayilalelisisa imithantazo yetfu ngisho nobe sekavele akwati loko lesikudzingako. Singamlingisa Jehova ngekutsi sibalalelisise bazalwane betfu nabodzadze nabakhuluma futsi sibahloniphe. Njengobe bakhuluma, ‘shesha kulalela’ futsi ukugweme kubaphazamisa nobe kucansuka, ngisho nobe kubonakala ngatsi bakhuluma bangakacabangi nobe baphindzaphindza intfo yinye.​—Jak. 1:19; Shu. 7:9.

7. Singatfola njani kutsi yini layidzingako loyo locindzetelekile?

⁷ Tfola kutsi lomuntfu udzingani. Asikhoni kufundza tinhlitiyo njengaJehova, ngako kufanele simlalelisise lomuntfu kuze sitfole kutsi singamdvudvuta njani. Ungacabangi kutsi uyakwati loko lomuntfu lakudzingako ngenca nje yekutsi wati loko bewungakudzinga kube bewusesimeni lesifanako. Sehlukile sibantfu. Ngako tinike sikhatsi, umlalelisise futsi umbute imibuto ngekuhlakanipha letawusita avete indlela lativa ngayo.​—Taga 20:5.

8. Jesu wamdvudvuta njani Mata naMariya ngemuva kwekushona kwaLazaro? (Buka netitfombe.)

⁸ Cabanga ngendlela Jesu ladvudvuta ngayo Mata naMariya ngemuva kwekushonelwa ngubhuti wabo Lazaro. BoMata naMariya bebasesimeni lesifanako, kodvwa Jesu wabadvudvuta ngetindlela letingafani. Ngemuva kwekutsi Mata akhulume naye, Jesu wamtjela emaciniso lamayelana nekuvuswa kwalabafile futsi wamsita kutsi acinise kukholwa kwakhe kuko. Kodvwa ngesikhatsi Mariya eta kuye akhala, kubonakala ngatsi Jesu akazange akhulume ngendzaba yekuvuswa kwalabafile. Kunaloko wakhala naye, futsi wambuta kutsi bambekephi Lazaro. (Joh. 11:20-35) Yini lesiyifundzako? Nasidvudvuta labo labasenkingeni letsite, kufanele sitfole kutsi yini labayidzingako kunekutsi setame kusebentisa indlela lesike sayisebentisa kulabanye.

9. Singalisebentisa njani liBhayibheli kuze sidvudvute labanye? (KubaseRoma 15:4, 5)

⁹ Sebentisa liBhayibheli. Nawudvudvuta lotsite ‘ngendvudvuto lesiyitfola emiBhalweni,’ ungamsita kutsi aphindze abe nelitsemba. (Fundza KubaseRoma 15:4, 5.) Lelitsemba litamdvudvuta futsi limkhutsate. (Isa. 40:31) Ungalitfola njani livesi kuze ukhutsate lotsite? Labanye baneluhla lwemavesi labawasebentisako njalo nakuvela sidzingo, njengalawo latfolakala encwadzini letsi ImiBhalo Lecondzisa Kuphila KwemaKhristu, ngephansi kwesihloko lesitsi “Indvudvuto.” Cela Jehova akusite usebentise liVi lakhe ngendlela lekahle kakhulu kuze ukhutsate labanye. Umoya wakhe ungakusita kutsi ukhumbule emavesi lakahle ngesikhatsi lowadzinge ngaso.​—Joh. 14:26.

10. Kubaluleke ngani kutsi sikhulume ngemusa nasetama kukhutsata lotsite?

¹⁰ Khuluma ngemusa. Ligama lesiGriki lelitsi “indvudvuto” lingaphindze lihunyushwe ngekutsi “kwecwayisa,” nobe “kukhutsata.” Ngalesinye sikhatsi, kungadzingeka ucwayise nobe ukhutsate lomuntfu lomdvudvutako kutsi ashintje indlela lacabanga ngayo. Nangabe kudzingeka kutsi ukwente loko, cabangisisa ngaphambi kwekutsi ukhulume naye kuze emavi akho elaphe kunekutsi alimate. (Taga 12:18) Jehova wasibekela sibonelo lesihle ngesikhatsi akhuluma na-Elija. Elija bekacabanga kutsi bekunguye yedvwa lebekasolo akhonta Jehova nekutsi bekangumphrofethi waNkulunkulu losehluleki. Ngemusa, Jehova wamsita kutsi alungise indlela lacabanga ngayo, abe angambeki emabala ngemaphutsa akhe. (1 Khos. 19:15-18) Nawe ungakwenta loko ngekutsi ube nemusa futsi ucabangisise ngaphambi kwekutsi ukhulume. Nawubeka tinkhulumo nobe nawuphendvula emihlanganweni yelibandla, hlale ukhuluma ngemusa futsi ukhulume kahle njengobe wetama kukhutsata nekucinisa bazalwane bakho nabodzadze.

11. Ngalokuvamile, yini ledzingwa ngulabo labanetinkinga? (1 Johane 3:18)

¹¹ Basite ngetintfo labatidzingako. Ngalokuvamile, labo labacindzetelekile badzinga lokungetulu nje kwemavi endvudvuto. (Fundza 1 Johane 3:18.) Bhanabasi wasibekela sibonelo lesihle ngesikhatsi atsengisa indzawo yakhe futsi anikela ngalemali kuze kusekelwe bazalwane bakhe nabodzadze lebebasandza kubhajatiswa lebebeswele. (Imis. 4:36, 37) Bazalwane betfu nabodzadze labanyenti lamuhla balingisa sibonelo sakhe lesihle ngekusita labo labadzinga lusito. Gabriela, wasePoland, weva buhlungu kakhulu ngesikhatsi sikhukhula silimata indlu yakhe kamatima. Utsi: “Mine nebatali bami lebebahlala nami besesaba kakhulu futsi sikhatsatekile. Ngatibuta kutsi sengitawenta njani. Kodvwa bazalwane nabodzadze labavela emabandleni ladvutane beta futsi benta umsebenti lomnyenti ngelilanga linye nje. Loko kwangicinisekisa kakhulu kutsi Jehova usebentisa bantfu bakhe kuze advudvute labo labanetinkinga.”

12. Kucinisela ngekwetsembeka nawunetinkinga kubasita njani bazalwane bakho nabodzadze?

¹² Cinisela nawunetinkinga. Pawula watjela baseThesalonika kutsi bekatfole indvudvuto futsi emandla akhe avuseteleka ngesikhatsi eva ngekucinisela kwabo. Bekati kutsi bewungakabi lite umsebenti wakhe wekubasita. (1 Thes. 3:5-8) Pawula bekati nekutsi nangabe naye ahlala etsembekile kuJehova nakabhekene netinkinga, loko bekutabakhutsata bazalwane bakhe nabodzadze kutsi bahlale betsembekile. (Khol. 2:1, 2) Ngendlela lefanako, nangabe bazalwane betfu nabodzadze babona indlela Jehova lasisita ngayo kutsi sicinisele nasinetinkinga, bakhutsateka kakhulu.

13. Yini lokufanele sichubeke siyenta njengobe sikhutsata labanye?

¹³ Bani nesineke. Bazalwane nabodzadze labadvumatekile bangahle bangasitakali ngekushesha nasetama kubadvudvuta. Kodvwa imiBhalo isitjela kutsi ‘sichubeke sikhutsatana.’ Emavi latsi “chubekani nikhutsatana” achaza intfo lechubekako. (1 Thes. 5:11) Bani nesineke njengobe uchubeka udvudvuta labo labadzinga lusito lwakho. (1 Thes. 5:14) Kuliciniso kutsi ngalesinye sikhatsi, ngamunye wetfu utakudzinga kudvudvutwa. Yini lesingayenta?

NAWUDZINGA KUDVUDVUTWA

14-15. Yini lokufanele siyente nangabe sikhatsatekile nobe sicindzetelekile?

¹⁴ Thantaza kuJehova. Mcele akudvudvute nawukhatsatekile nobe nawucindzetelekile. (Hla. 94:19) Kusho ngalokucondzile loko lokuthantazelako, utfululele sifuba sakho kuye. (Hla. 62:8) Kuliciniso kutsi Jehova uyayati indlela lotiva ngayo ngisho nangaphambi kwekutsi uthantaze kuye. Kodvwa kumtjela loko lokusekujuleni kwenhlitiyo yakho kukhombisa kutsi unekukholwa kuye. Ngetulu kwaloko, Jehova uhlale enta lokutsite kuze asite umuntfu lonekukholwa kuye. (Mak. 11:24) Umbhalo waKubaseFiliphi 4:6, 7 usikhutsata utsi: “Ticelo tenu atatiwe nguNkulunkulu ngekuthantaza, ngekuncusa nangekubonga; futsi kuthula kwaNkulunkulu lokwendlula konkhe kucondza kutawulondvolota tinhlitiyo netingcondvo tenu.”

¹⁵ Cela labanye bakusite. Tjela umngani lovutsiwe indlela lotiva ngayo nobe lomdzala welibandla lometsembako. Bazalwane bakho nabodzadze bangaba ngumtfombo wendvudvuto, kodvwa kungenteka bangayati indlela lotiva ngayo nobe loko lokudzingako, ngaphandle nangabe ubatjela. (Taga 14:10) Ungabacela kutsi bakulalele njengobe ubachazela indlela lotiva ngayo nobe bakukhombise umbhalo nobe sihloko lesibadvudvutako.

16. Yini lengahle yenteke nangabe labanye betama kukudvudvuta, kodvwa yini lokufanele uyikhumbule?

¹⁶ Bani nesineke futsi ucolele. Kungenteka bazalwane bakho nabodzadze bente liphutsa nabasetama kukukhutsata. Sibonelo nje, kungenteka basho lokutsite nobe bente intfo lekucedza emandla mbamba kunekutsi utive uncono. Nangabe loko kwenteka, babeketelele. (1 Khor. 13:4, 7) Ngetulu kwaloko, khumbula emavi lakuJakobe 3:2 latsi: “Nangabe kukhona longoni ngemavi, loyo muntfu ute sono.” Ngako naka kutsi bazalwane bakho nabodzadze bafuna kukusita. Khumbula nekutsi “umoya . . . uyalangatelela, kodvwa inyama ibutsakatsaka.”​—Mat. 26:41.

17. Yini lokufanele sitimisele kuyenta?

¹⁷ Sonkhe siyakudzinga kudvudvutwa nekukhutsatwa, futsi lesidzingo sitawuchubeka sikhula kakhulu njengobe emalanga ekugcina aya aba mabi kakhulu, futsi netitsa taNkulunkulu tisihlasela kamatima. Ngako shengatsi singatimisela kwenta konkhe lesingakwenta kuze sidvudvutane.