Një pikëpamje më pozitive për tiparet që të bezdisin te bashkëshorti

• Ty të pëlqen spontaniteti; bashkëshorti yt e do gjithçka të planifikuar.

• Ti je tip i qetë dhe i rezervuar; bashkëshorti yt është tip ekstrovert, ose i hapur, që vdes të jetë gjithmonë me njerëz.

A ka bashkëshorti yt ndonjë tipar që të bezdis? Nëse fiksohesh aty, kjo mund ta dëmtojë martesën. Në fakt, Bibla thotë se «kush nuk pushon së foluri për [një çështje], ndan shokët e ngushtë».—Proverbat 17:9.

Në vend që t’i lejosh tiparet e bezdisshme të kthehen në mollë sherri mes teje dhe bashkëshortit, mund të mësosh t’i shohësh këto tipare nga një këndvështrim më pozitiv.

Në këtë artikull

• Një këndvështrim më pozitiv për tiparet që të bezdisin

• Ja ç’thonë çiftet

• Pyetje për diskutim

Një këndvështrim më pozitiv për tiparet që të bezdisin

Karakteristika që të bezdis te bashkëshorti, mund të ketë lidhje me një cilësi që në fakt e admiron. Mendo për këta tre shembuj:

«Shpesh, burri im vonohet shumë për t’i bërë gjërat ose për t’u bërë gati që të shkojë diku. Ama, po ky tipar e bën njeri të duruar—edhe me mua. Ndonjëherë ngadalësia e tij më bezdis, por njëkohësisht është pjesë e një cilësie që e dua shumë tek ai.»—Çelsa.

«Gruaja ime i planifikon gjërat me detaje; ka nevojë të ndiejë se ka gjithçka nën kontroll, dhe kjo mund të jetë acaruese. Nga ana tjetër, vëmendja që u kushton detajeve do të thotë se nuk ia lë kurrë gjërat rastësisë.»—Kristoferi.

«Im shoq mund të duket indiferent, dhe kjo është acaruese. Por, njëkohësisht, qetësia me të cilën i bën gjërat, është një nga cilësitë që më tërhoqi tek ai që në fillim. E admiroj aftësinë e tij për të ruajtur qetësinë edhe në situata stresuese.»—Daniela.

Ashtu siç kuptuan Çelsa, Kristoferi dhe Daniela, shpesh pikat e forta dhe të dobëta të bashkëshortit janë thjesht aspekte të ndryshme të së njëjtës cilësi. Në këto raste nuk mund të shpërfillësh pikat e dobëta pa humbur bashkë me to edhe pikat e forta; janë dy anë të së njëjtës medalje.

S’diskutohet, disa tipare nuk kanë aspekte pozitive. Për shembull, Bibla pranon se disa njerëz janë ‘zemërakë’, pra marrin flakë kollaj. (Proverbat 29:22) Nëse dikush nxehet kollaj, duhet të bëjë ç’është e mundur që të heqë «çdo vrer shpirtlig, zemërim, furi, të bërtitur, sharje».a—Efesianëve 4:31.

Megjithatë, kur një tipar është thjesht i bezdisshëm, ndiq këtë këshillë të Biblës: «Vazhdoni të duroni . . . njëri-tjetrin, edhe nëse ndokush ka arsye për t’u ankuar.»—Kolosianëve 3:13.

Veç kësaj përpiqu të dallosh aspektin pozitiv të atij tipari të bashkëshortit—aspekt që madje mund të të ketë bërë për vete në fillim. Një bashkëshort që quhet Xhozef, thotë: «Të fiksohesh te një tipar acarues, është si të kesh në dorë një diamant dhe të përqendrohesh te cepat e mprehtë në vend që të shijosh gjithë bukurinë e shkëlqimin e tij.»

Pyetje për diskutim

Në fillim, secili nga ju të shqyrtojë më vete pyetjet e mëposhtme. Pastaj, përgjigjet diskutojini me njëri-tjetrin.

• A ka bashkëshorti yt një tipar që, sipas teje, krijon tension në martesë? Nëse po, çfarë tipari?

• A është vërtet një e metë serioze apo është thjesht një tipar i bezdisshëm?

• A ka ndonjë aspekt pozitiv ky tipar? Nëse po, cilin, dhe pse e vlerëson këtë aspekt të personalitetit te bashkëshorti yt?