Të kuptojmë domethënien e pagëzimit

1. Ç’gjë tregon se pagëzimi është një mësim themelor i Biblës?

SA NA gëzon zemra kur pagëzohet dikush! Të njëjtin gëzim provuan edhe të krishterët e hershëm në mbledhjen e parë që zhvilloi kongregacioni i krishterë. Në atë rast u pagëzuan shumë veta dhe u mbajt një fjalim ku u shpjegua mësimi themelor i pagëzimit. (Vep. 2:38, 40, 41) Apostulli Pavël shkroi se ‘doktrina fillestare për Krishtin’ përfshin «llojet e ndryshme të pagëzimeve». (Hebr. 6:1, 2) Megjithëse pagëzimi mund të duket një mësim elementar, është e nevojshme ta kuptojmë mirë. Pse?

2. Pse duhet ta kuptojmë mirë mësimin e pagëzimit?

² Ashtu si themelet e forta e bëjnë të qëndrueshme një shtëpi, kur e kuptojmë mirë mësimin e pagëzimit, besimi ynë bëhet i palëkundur. Është e domosdoshme ta dimë rëndësinë e pagëzimit, qoftë nëse po përparojmë drejt këtij synimi, qoftë nëse kemi vite të pagëzuar. Ja pse në këtë artikull do t’u përgjigjemi këtyre pyetjeve: çfarë simbolizon pagëzimi? Çfarë përfshin pagëzimi? Pse duhet të pagëzohemi në emër të Atit, të Birit dhe të frymës së shenjtë?

ÇFARË SIMBOLIZON PAGËZIMI

3. Çfarë simbolizon pagëzimi?

³ Kur pagëzohesh, tregon para të tjerëve se (1) ke pranuar të vërtetën për Perëndinë Jehova dhe Krishtin Jezu, (2) je penduar për mëkatet, (3) ke bërë ndryshimet e nevojshme për t’i shërbyer Jehovait, (4) ke pranuar se Jezui është mjeti që përdor Perëndia për të sjellë shpëtim dhe (5) i ke shprehur në lutje Jehovait se dëshiron me shpirt të bësh vullnetin e Tij si pjesë e organizatës e tij. Pasi bën këtë premtim, ose kushtim, dhe pagëzohesh, nis rrugëtimin drejt jetës së përhershme.

4. Çfarë simbolizon zhytja e plotë në ujë? (Shih edhe figurën.)

⁴ Kur pagëzohesh, zhytesh plotësisht në ujë dhe pastaj del.a Ndonjëherë kjo krahasohet me varrosjen dhe me ringjalljen. (Krahaso Kolosianëve 2:12.) Pse është me vend një krahasim i tillë? Sepse kur zhytesh në ujë, tregon se ke hequr dorë nga mënyra e mëparshme e jetesës. E kur del nga uji, nis një jetë të re të përqendruar në bërjen e vullnetit të Perëndisë.

5. Me çfarë mund ta krahasojmë punën që bëjmë për t’u përgatitur për pagëzimin, dhe pse? (1 Pjetrit 3:18-21)

⁵ Lexo 1 Pjetrit 3:18-21. Punën që bëjmë për t’u përgatitur për pagëzimin mund ta krahasojmë me punën që bëri Noeja për të ndërtuar arkën. Nëse sapo ke filluar ta njohësh Jehovain, puna drejt pagëzimit mund të të duket mjaft e vështirë, mbase aq e vështirë sa ndërtimi i arkës gjigante të Noesë. A ia vlen të bësh kaq shumë përpjekje? Në rastin e Noesë, përpjekjet e tij u shpërblyen. Projektuesi i arkës ishte vetë Perëndia, dhe Noeja duhej ta ndiqte pikë për pikë projektin që të shpëtonte jetën nga Përmbytja. Noeja kishte besim te Jehovai, prandaj u bind dhe e ndërtoi arkën me ndihmën e Tij. Njësoj si Noeja, edhe ti mund të veprosh në përputhje me ‘të gjitha ato që ka urdhëruar Perëndia’.—Zan. 6:22.

6. Në ç’kuptim na shpëton pagëzimi?

⁶ Në vargun 21, apostulli Pjetër shkroi: «Pagëzimi . . . po ju shpëton.» Natyrisht, në vetvete nuk është zhytja në ujë që sjell shpëtimin apo faljen e mëkateve. Vetëm gjaku i Jezuit mund të na pastrojë nga çdo mëkat. (1 Gjon. 1:7) Megjithatë, pagëzimi është thelbësor nëse duam t’u bindemi urdhërimeve të Jehovait dhe shërben si ‘kërkesë drejtuar Perëndisë për një ndërgjegje të mirë’. Jehovai mezi pret që të na falë në bazë të flijimit të Jezuit. Ja pse themi se pagëzimi na «shpëton» ose na hap dyert drejt jetës përgjithmonë.

ÇFARË PËRFSHIN PAGËZIMI

7. Si duhet të kryhet pagëzimi?

⁷ Bibla tregon se, që të pagëzohet, një person duhet të zhytet plotësisht në ujë, por nuk jep shumë detaje të tjera. Gjithsesi, me anë të Shkrimeve mund të kuptojmë çfarë është e përshtatshme në këtë rast. Për shembull, parimet e Biblës i ndihmojnë kandidatët për pagëzim të vendosin çfarë të veshin. Gjithashtu i ndihmojnë ata që janë të pranishëm të dinë si të sillen. (1 Kor. 14:40; 1 Tim. 2:9) Zakonisht pagëzimi kryhet nga një plak. Duam të bëjmë kujdes që të mos u japim tepër vëmendje vëllezërve që e kanë këtë privilegj. (1 Kor. 1:14, 15) Një pagëzim është i vlefshëm pavarësisht nga numri i të pranishmëve që e ndjekin këtë rast.—Vep. 8:36.

8. Cilat pyetje u drejtohen kandidatëve për pagëzim, dhe pse? (Veprat 2:38-42) (Shih edhe figurën.)

⁸ Bibla thotë se duhet të bëjmë ‘shpalljen publike të besimit që çon në shpëtim’, pra ta shprehim besimin. (Rom. 10:9) Këtë e bëjmë jo vetëm kur predikojmë, por sidomos në ditën kur pagëzohemi. Për këtë arsye kandidatëve për pagëzim u drejtohen dy pyetje. E para është: «A je penduar për mëkatet e tua, a i je kushtuar Jehovait dhe a e ke pranuar se ai na shpëton nëpërmjet Jezu Krishtit?» Kjo pyetje përqendrohet tek ajo që tashmë ka bërë kandidati që të kualifikohet për pagëzim dhe ngjason me nxitjen që i dha Pjetri turmës së njerëzve që ishin mbledhur në Festën e Ditës së Pesëdhjetë. Pyetja e dytë është: «A e kupton se kur pagëzohesh, identifikohesh si Dëshmitar i Jehovait dhe bëhesh pjesë e organizatës së Jehovait?» Kjo pyetje na kujton se, që të jetojmë në përputhje me kushtimin tonë, duhet të ndjekim drejtimin që marrim nga organizata e Jehovait dhe t’i shërbejmë Perëndisë krah vëllezërve e motrave, njësoj si dishepujt e shekullit të parë. (Lexo Veprat 2:38-42.) Ata që u përgjigjen me gjithë zemër «po» këtyre pyetjeve, kualifikohen për t’u pagëzuar.

9. Çfarë hapash duhet të ndjekim të gjithë që të fitojmë miratimin e Jehovait?

⁹ Ndoshta para se të merrje të vërtetën bëje një jetë të rregullt dhe nuk kishe kryer ndonjë mëkat të rëndë. Ose je rritur nga prindër Dëshmitarë që të kanë ndihmuar ta duash Jehovain. A është e nevojshme që edhe ti të pendohesh dhe të pagëzohesh? Po. Meqë të gjithë lindim mëkatarë, kjo na pengon të jemi miq me Perëndinë. (Psal. 51:5) Por, teksa e njohim më mirë Jehovain, vendosim t’i japim përparësi vullnetit të tij. Pas kësaj pendohemi për gjërat që kemi bërë dhe kthejmë rrugë—kështu fillojmë një mënyrë të re jetese që i pëlqen Atit tonë qiellor. Vetëm atëherë mund të pagëzohemi.—Vep. 3:19.

10. Çfarë duhet të bësh nëse ke qenë i pagëzuar në një fe tjetër?

¹⁰ Është e nevojshme të pagëzohesh si Dëshmitar i Jehovait edhe nëse ke qenë i pagëzuar në një fe tjetër. Pse? Sepse në atë kohë nuk e kuptoje plotësisht të vërtetën për Perëndinë Jehova dhe për Jezuin. Madje, edhe po t’ia kesh kushtuar jetën Perëndisë në lutje, ky premtim nuk ka qenë i bazuar në njohurinë e saktë për vullnetin e Jehovait. Kur apostulli Pavël takoi në Efes disa burra që ishin pagëzuar pa e ditur të vërtetën për Jezuin, mori masa që të pagëzoheshin sërish.b (Vep. 19:1-5) Edhe sot, pagëzimi është i vlefshëm vetëm nëse bazohet te njohuria e saktë për kërkesat e Jehovait.

«NË EMËR TË ATIT, TË BIRIT E TË FRYMËS SË SHENJTË»

11. Çfarë do të thotë të pagëzohemi «në emër të Atit, të Birit e të frymës së shenjtë»? (Mateu 28:18-20)

¹¹ Jezui udhëzoi që dishepujt e rinj të pagëzoheshin «në emër të Atit, të Birit e të frymës së shenjtë». (Lexo Mateun 28:18-20.) Çfarë donte të thoshte? Në Bibël, fjala «emër» shpesh nënkupton reputacionin e dikujt. Veç kësaj, mund të nënkuptojë pozitën dhe autoritetin që ka dikush. Ndaj, kur bëjmë diçka «në emër të» dikujt ose të diçkaje, pranojmë autoritetin që përfaqëson ky emër. Le të shqyrtojmë si mund ta pranojmë pozitën dhe autoritetin e Atit, të Birit, si edhe rolin e frymës së shenjtë të Perëndisë.

12. Çfarë do të thotë të pagëzohemi në emër të Atit? (Zbulesa 4:11) (Shih edhe figurën.)

¹² Në emër të Atit. Ne e pranojmë Jehovain si Atin tonë qiellor, pra si Jetëdhënësin. Ai është Perëndia i plotfuqishëm, Krijuesi i të gjitha gjërave. (Lexo Zbulesën 4:11.) E dimë se ai është Dëgjuesi i lutjes dhe e përdorim emrin e tij me respekt dhe pa ngurrim kur i lutemi dhe u flasim të tjerëve për të. (Psal. 65:2) Megjithatë, pagëzimi në emër të Atit përfshin më tepër se kaq. Ata që po e dëgjonin Pjetrin në Festën e Ditës së Pesëdhjetë, e njihnin Jehovain, por tani duhej të pranonin se Jehovai jepte jetë të përhershme vetëm nëpërmjet Jezu Krishtit.—Rom. 5:8.

13. Çfarë do të thotë të pagëzohemi në emër të Birit? (Shih edhe figurën.)

¹³ Në emër të Birit. Ne e pranojmë se Jezui është Biri i vetëmlindur i Perëndisë. Ai është «udha», pra i vetmi nëpërmjet të cilit mund të gëzojmë një miqësi të ngushtë me Jehovain. (Gjoni 14:6) Jezui është edhe Shpenguesi, i cili vdiq që ne të kemi jetë. Kjo na motivon të ecim në gjurmët e tij çdo ditë të jetës sonë, jo vetëm në ditën e pagëzimit. (1 Gjon. 2:6) Ashtu si Jezui, predikojmë me zell duke mos lejuar asgjë që të na pengojë. (Luka 4:43) Madje jemi të gatshëm të durojmë edhe përndjekje, ngaqë i shërbejmë besnikërisht Perëndisë. (2 Tim. 3:12) E respektojmë Jezuin si ‘kreun e kongregacionit’, prandaj u nënshtrohemi me kënaqësi atyre që u ka besuar të marrin drejtimin dhe të kujdesen për dishepujt e tij.—Efes. 4:8, 11, 12; 5:23.

14. (a) Çfarë do të thotë të pagëzohemi në emër të frymës së shenjtë? (Shih edhe figurën.) (b) Çfarë pagëzimesh të tjera ka për të mirosurit? (Shih kutinë «Pagëzime të tjera për të mirosurit».)

¹⁴ Në emër të frymës së shenjtë. Ne e pranojmë të vërtetën për frymën e shenjtë, pra se nuk është person ose pjesë e një Triniteti, por forca vepruese e Perëndisë. E dimë se profetët dhe shkrimtarët e Biblës folën dhe shkruan të shtyrë nga fryma e shenjtë, ndaj e lexojmë rregullisht Biblën dhe e përputhim jetën me mësimet e saj. (2 Pjet. 1:20, 21) Gjithashtu përpiqemi fort të mos kryejmë mëkate të rënda, sepse kështu do të pengonim frymën e Perëndisë jo vetëm në jetën tonë, por edhe në kongregacion.—Efes. 4:30.

15. Për çfarë duhet të jemi të vendosur?

¹⁵ Nëse je i pagëzuar, vazhdo t’i kujtosh vetes rëndësinë e pagëzimitc dhe të mbash premtimin që i bëre Jehovait kur i kushtove jetën dhe u pagëzove. Po nëse nuk je pagëzuar akoma? A ka diçka që po të pengon? Në artikullin e radhës do të shqyrtojmë si mund të vazhdosh të përparosh drejt pagëzimit.