Si ta ruajmë zellin?
1 Zelli me të cilin shërbeu Apoli na kujton të bashkëkrishterët e sotëm, të cilët janë vërtet të zellshëm në veprën e predikimit. (Vep. 18:24-28) Të gjithëve në fakt na jepet kjo këshillë: «Jini të papërtuar në punët tuaja. Jini të zjarrtë në frymë.» (Rom. 12:11) Çfarë mund të na ndihmojë që të bëhemi të zellshëm dhe të ruajmë zellin që kemi për shërbimin e krishterë?
2 Të nxitur nga njohuria: Pasi Jezui iu shfaq dy prej dishepujve të tij dhe «u shpjegoi në të gjitha Shkrimet gjërat që kishin të bënin me të», ata thanë: «A nuk na digjej zemra kur ai na fliste rrugës?!» (Luka 24:27, 32) Po kështu edhe neve, a nuk na digjet zemra nga gëzimi kur fitojmë më shumë kuptueshmëri për Fjalën e Perëndisë? Po, besimi rritet nga njohuria. Romakëve 10:17 shpjegon: «Besimi vjen pasi dikush ka dëgjuar.» Kur mbushemi me besim nga premtimet e Perëndisë, nuk mund të rrimë pa folur për ato që kemi mësuar.—Psal. 145:7; Vep. 4:20.
3 Nuk mund të mbështetemi vetëm te njohuria që kemi marrë nga studimi i mëparshëm që të ruajmë dashurinë tonë të fortë për Jehovain dhe zellin për shërbimin e tij. Duhet të vazhdojmë ta shtojmë kuptueshmërinë për të vërtetën dhe ta bëjmë më të fortë dashurinë për Jehovain. Përndryshe, dalëngadalë shërbimi ynë do të bëhet mekanik. (Zbul. 2:4) Fjala e Perëndisë na nxit ‘të vazhdojmë . . . të rritemi në njohurinë e saktë të Perëndisë’.—Kolos. 1:9, 10.
4 Zakonet tona të studimit: Prandaj, bëjmë mirë të shqyrtojmë zakonet tona të studimit. Për shembull, mund të jemi të zotë për të nënvizuar përgjigjet në artikujt e studimit në revistën Kulla e Rojës dhe për të dhënë komente të sakta. Por, a i lexojmë në Bibël shkrimet e dhëna dhe a mendojmë se si zbatohen në jetën tonë? Në leximin javor të Biblës, a përpiqemi të bëjmë kërkime shtesë, nëse kemi mundësi, dhe a meditojmë për mësimet që nxjerrim nga ky lexim? (Psal. 77:11, 12; Prov. 2:1-5) Sa shumë dobi nxjerrim nëse bluajmë në mendje Fjalën e Perëndisë dhe zhytemi në të! (1 Tim. 4:15, 16) Një studim kaq domethënës do ta ushqejë zemrën tonë dhe do të na shtojë energjitë për të qenë «të zellshëm për vepra të shkëlqyera».—Titit 2:14.