Një rojë burgu mëson të vërtetën

Në Filipi, jetonte një skllave që e kishte pushtuar një demon. Me anë të këtij demoni, ajo parashikonte fatin dhe pronarët e saj fitonin shumë para. Kur Pavli dhe Sila erdhën në Filipi, ajo i ndoqi për shumë ditë. Demoni e bënte të thërriste: ‘Këta njerëz janë skllevër të Më të Lartit Perëndi!’ Më në fund, Pavli i tha demonit: ‘Në emër të Jezuit, dil prej saj!’ Demoni doli nga vajza.

Kur pronarët e vajzës kuptuan se nuk mund të fitonin më pará prej saj, u zemëruan shumë. I çuan zvarrë Pavlin dhe Silën para magjistratëve dhe u thanë: ‘Këta njerëz po thyejnë ligjin dhe po bëjnë rrëmujë gjithë qytetin.’ Ata zyrtarë dhanë urdhër që Pavli dhe Sila të rriheshin dhe të futeshin në burg. Roja i burgut i futi në pjesën më të brendshme e më të errët të burgut dhe ua vuri këmbët në fallaká.

Pavli dhe Sila i këndonin lavde Jehovait, dhe të burgosurit e tjerë i dëgjonin. Papritur, në mes të natës, ra një tërmet aq i fortë sa burgu u trondit nga themelet. Dyert e burgut u hapën në çast dhe të burgosurve iu zgjidhën vargonjtë dhe fallakatë. Roja vrapoi në brendësi të burgut dhe pa që dyert ishin hapur. I sigurt se të gjithë të burgosurit ia kishin mbathur, mori një shpatë për të vrarë veten.

Kur ja, Pavli i thirri: ‘Mos i bëj keq vetes! Jemi të gjithë këtu!’ Roja i burgut vrapoi dhe ra përmbys para Pavlit e Silës. Ai i pyeti: «Ç’duhet të bëj që të shpëtoj?» Ata iu përgjigjën: ‘Ti dhe familja jote duhet të keni besim te Jezui.’ Pastaj Pavli e Sila i mësuan rojës së burgut dhe atyre të shtëpisë së tij fjalën e Jehovait dhe të gjithë u pagëzuan.