T’u bindesh prindërve është si të paguash një borxh në bankë; sa më i besueshëm të tregohesh, aq më shumë besim (kredi) do të të jepet
PËR TË RINJTË
10—Besueshmëria
ÇFARË DO TË THOTË
Njerëzit e besueshëm fitojnë besimin e prindërve, të miqve dhe të punëdhënësve të tyre. Ata u përmbahen rregullave, e mbajnë fjalën dhe thonë gjithnjë të vërtetën.
PSE KA RËNDËSI
Gati në çdo rast, besimi që ke fituar me kalimin e kohës nga të tjerët, do të ndikojë drejtpërdrejt te liria që do të marrësh.
«Mënyra më e mirë për të fituar besimin e prindërve është t’u japësh prova se je i matur e i përgjegjshëm, jo vetëm kur je me ta, por edhe kur je vetëm.»—Saraja.
PARIMI BIBLIK: «Vazhdoni të provoni çfarë jeni ju vetë.»—2 Korintasve 13:5.
Ç’MUND TË BËSH
Nëse dëshiron që të të besojnë më shumë ose të rifitosh besimin e humbur, hapat e mëposhtëm mund të të ndihmojnë.
Ji i ndershëm. Njerëzit do ta humbin shpejt besimin te ti, nëse thua gënjeshtra. Nga ana tjetër, kur je i ndershëm dhe nuk i fsheh gabimet, mund të fitosh besimin e të tjerëve.
«Është e lehtë të jesh i ndershëm kur gjërat shkojnë mirë. Ama, po të jesh i ndershëm për diçka që të nxjerr keq në sytë e të tjerëve, do të fitosh më shumë besimin e tyre.»—Kajmani.
PARIMI BIBLIK: «Duam të sillemi me ndershmëri në çdo gjë.»—Hebrenjve 13:18.
Ji i besueshëm. Sipas një sondazhi në SHBA, 78% e specialistëve të burimeve njerëzore thanë se, besueshmëria «është një nga tri cilësitë kryesore për të fituar një vend pune». Nëse mëson të jesh i besueshëm që tani, do të nxjerrësh dobi në të ardhmen.
«Prindërit e vënë re kur jam e përgjegjshme dhe bëj punët e shtëpisë edhe pa më ndenjur mbi kokë. Sa më tepër e marr vetë iniciativën, aq më tepër më besojnë.»—Sara.
PARIMI BIBLIK: «Jam i sigurt se do ta marrësh parasysh kërkesën time, . . . sepse e di se do të bësh edhe më shumë nga ç’të kam kërkuar.»—Filemonit 21.
Ji i duruar. Ndryshe nga rritja fizike, që bie në sy menjëherë, shpesh duhet më shumë kohë që të tjerët të kuptojnë se je bërë më i pjekur dhe më i përgjegjshëm.
«Nuk e fiton dot besimin e prindërve dhe të të tjerëve thjesht që me herën e parë. Mund ta fitosh gradualisht duke u treguar vazhdimisht i përgjegjshëm.»—Brendoni.
PARIMI BIBLIK: «Vishuni me . . . durim.»—Kolosianëve 3:12.