Kurwisana Hakugadzirise Zvinhu

Vanhu vakawanda vanofunga kuti kurwisana ndiko kunogadzirisa zvinhu kana paine zvinoda kugadziriswa kana kuti vatadza kuwirirana. Asi mafungiro iwayo akanyatsosiyana nezvakadzidziswa naJesu Kristu uye zvaaiita. Chimbofunga zvimwe zvaakataura uye zvaakaita.

Zvakataurwa naJesu

Jesu paakapa Mharidzo yakakurumbira Yepagomo, akadzidzisa kuti kuita hasha uye kurwisana hazvisi izvo zvinogadzirisa zvinhu kana paine kusawirirana. Ngatimboonai zvimwe zvaakadzidzisa.

• “Zvinhu zvese zvamunoda kuti vanhu vakuitirei, vaitireiwo izvozvo.” (Mateu 7:12; Ruka 6:31) Murayiro uyu unotikurudzira kuti tibate vamwe semabatirwe atinoda kuitwawo.a Hapana munhu anoda kubatwa zvisina kunaka, saka tinofanira kubatawo vamwe zvakanaka uye tichivaremekedza kunyange patinenge tiine maonero akasiyana.

• “Munhu wese anokurova mbama padama rako rekurudyi, mupewo rimwe racho.” (Mateu 5:38, 39; Ruka 6:29) Jesu akanga asiri kudzidzisa vanhu kuti vangosiya havo vamwe vachivabata zvisina kunaka. Asi aigadzirisa maonero asina kunaka anogona kunge aidzidziswa nevamwe vatungamiriri vezvitendero ekuti hapana chakaipa nekutsiva. Aiudza vateveri vake kuti havafaniri kutsiva asi vanofanira kuramba vakadzikama kunyange pavanotadzirwa.b

• “Rambai muchida vavengi venyu.” (Mateu 5:43, 44; Ruka 6:27) Jesu akadzidzisa kuti tinofanira kuratidza mutsa kuvanhu vanotivenga kana kuti vanotibata zvisina kunaka. Aisareva hake kuti tinofanira kutsigirana navo pazvinhu zvakaipa zvavanoita. cAsi kana tikavabata zvakanaka, zvinogona kuita kuti vasarambe vachitiitira hasha uye zvinogona kutoita kuti vapedzisire vava kutibatawo zvakanaka.

Zvakaitwa naJesu uye zvaachaita

Jesu aidzidzisa kuti kurwisana hakusi iko kunogadzirisa zvinhu, uye aiita zvaienderana nezvaaiparidza. Musi waakasungwa, mumwe wevateveri vake akarwisa achida kuedza kumudzivirira, asi Jesu akati: “Dzorera bakatwa rako parinogara, nekuti vese vanotora bakatwa vachaparara nebakatwa.” (Mateu 26:52) Jesu akaratidza kuti aida vavengi vake nekuregerera vanhu vaimubata zvisina kunaka, uye kutovanyengeterera!—Ruka 23:33, 34; 1 Petro 2:23.

Bhaibheri rinovimbisa kuti Jesu, seMuchinda weRugare, ava pedyo nekuita kuti vanhu vasarambe vachirwisana. (Isaya 9:6, 7) Kuti udzidze zvakawanda nezveramangwana iroro rakazonaka, verenga nyaya yakanzi “Hondo Uye Kurwisana Zvichapera Sei?”