Dambudziko Revapoteri—Mamiriyoni Evanhu Anotiza muUkraine

Russia yakarwisa Ukraine musi wa24 February 2022 zvichibva zvaita kuti vanhu vakawanda vari muUkraine vatize hondo.a

“Taiona mabhomba achiputika. Zvaityisa chaizvo zvekuti zvakaoma kuzvitsanangura. Patakaziva kuti paiva nezvitima zvaitakura vanhu, takabva tafungawo kubuda muUkraine. Munhu mumwe nemumwe aibvumirwa kungopinda muchitima nebhegi rimwe chete diki. Chatakangokwanisa kutakura mapepa anokosha, mishonga, mvura nezvekudya zvishomanana. Zvimwe zvese zvakasara, tichibva taenda kunokwira chitima uku mabhomba achiputika.”—Nataliia, anobva kuKharkiv, Ukraine.

“Hatina kumbofungidzira kuti kungaitika hondo. Ndainzwa mabhomba achiputika mutaundi uye mahwindo aizununguka. Ndakafunga kuti regai ndibude muUkraine, ndichibva ndangotora zvinhu zvishoma zvinokosha. Ndakabuda mumba na8 dzemangwanani ndikabva ndaenda kuLviv nechitima ndobva ndazokwira bhazi ndakananga kuPoland.”—Nadija, anobva kuKharkiv, Ukraine.

Munyaya ino

• Dambudziko iri revapoteri riri kukonzerwa nei?

• Chii chingapedza dambudziko riri kusangana nevapoteri?

• Bhaibheri ringabatsira vapoteri here mazuva ano?

Dambudziko iri revapoteri riri kukonzerwa nei?

Kunyange zvazvo dambudziko revapoteri vakabva kuUkraine rakatanga pakarwiswa nyika iyi neRussia, Bhaibheri rinotaura zvikonzero zvinoita kuti pave nematambudziko aya:

• Hurumende dzevanhu dzakundikana kupa vanhu zvavanoda. Kakawanda kacho, vanhu vari muhurumende vanoshandisa simba ravainaro kuti vadzvinyirire vamwe.—Muparidzi 4:1; 8:9.

• Satani Dhiyabhorosi “mutongi wenyika” ari kuita kuti vanhu vaite zvakaipa zvekuti Bhaibheri rinotaura nezvake richiti: “Nyika yese iri musimba reakaipa.”—Johani 14:30; 1 Johani 5:19.

• Kuwedzera pamatambudziko ashungurudza vanhu kwemakore, iye zvino tiri kurarama panguva yakataurwa neBhaibheri kuti: “Mumazuva ekupedzisira, nguva dzakaoma, dzinonetsa kurarama madziri dzichasvika.” (2 Timoti 3:1) Nguva iyi yaizenge yakazara hondo, njodzi dzinongoitika dzega, nzara uye zvirwere zvinopararira. Zvese izvi zvaizoita kuti vanhu vatizire kune dzimwe nzvimbo kana kuti kune dzimwe nyika.—Ruka 21:10, 11.

Chii chingapedza dambudziko riri kusangana nevapoteri?

Bhaibheri rinotaura kuti Musiki wedu Jehovha,b ndiMwari ane rudo uye anonzwira tsitsi vapoteri uye vanhu vanenge vatiza misha yavo. (Dheuteronomi 10:18) Anovimbisa kuti achapedza matambudziko anosangana nevapoteri achishandisa hurumende yake iri kudenga inonzi Umambo hwaMwari. Hurumende iyi ichabvisa hurumende dzese dzevanhu dziri panyika. (Dhanieri 2:44; Mateu 6:10) Jehovha achashandisa Umambo hwake kuparadza Satani Dhiyabhorosi. (VaRoma 16:20) Umambo ihwohwo ihurumende ichatonga pasi rese uye huchabvisa zvinhu zvinoita kuti vanhu vasabatana, zvakadai semiganhu yenyika. Vanhu vese vachange vava mhuri imwe chete. Hapana achazotiza musha wake nekuti Bhaibheri rinovimbisa kuti: “Mumwe nemumwe achagara pasi pemuzambiringa wake nepasi pemuonde wake, uye hapana achaita kuti vatye, nekuti muromo waJehovha wemauto wataura.”—Mika 4:4.

Umambo hwaMwari chete ndihwo huchapedza zvachose dambudziko revapoteri ririko mazuva ano. Jehovha achashandisa Umambo hwake kuti abvise matambudziko anoita kuti vanhu vazopedzisira vava vapoteri. Inzwa zvimwe zvaachaita:

• Hondo. “[Jehovha] ari kugumisa hondo munyika yese.” (Pisarema 46:9) Kuti uzive kuti Mwari achapedza sei hondo, verenga nyaya yakanzi, “Zvichafamba Sei Kuti Pasi Rose Pave Nerugare?”

• Kudzvinyirirwa uye kurwiswa. “[Jehovha] achavanunura pakudzvinyirirwa nepakurwiswa.” (Pisarema 72:14) Kuti uone kuti zvii zvingaitwa nevanhu kuti vachinje unhu hwakaipa hwavava nemakore vainahwo, verenga nyaya yakanzi “Kuvengana Kungapedzwa Sei.”

• Urombo. “[Jehovha] achanunura murombo anochemera kubatsirwa.” (Pisarema 72:12) Kuti uone kuti Mwari achapedza sei dambudziko reurombo, verenga nyaya yakanzi “Pachazombova Nehurumende Inoita Kuti Vanhu Vese Vawane Zvavanoda Pakurarama Here”

• Nzara. “Panyika pachava nezvirimwa zvakawanda chaizvo.” (Pisarema 72:16) Kuti uone kuti Mwari achaita sei kuti pasava nemunhu anofa nenzara, verenga nyaya yakanzi “A World Without Hunger?”

Bhaibheri ringabatsira vapoteri here mazuva ano?

Ehe. Kunze kwekungovimbisa vapoteri ramangwana rakanaka, Bhaibheri rinogona kuvabatsira pamatambudziko avainawo iye zvino.

Zvinotaurwa neBhaibheri: “Musazvidya mwoyo nezvechinhu chero chipi zvacho, asi panyaya dzese zvikumbiro zvenyu ngazviziviswe Mwari muchinyengetera uye muchiteterera pamwe chete nekuonga; uye rugare rwaMwari runopfuura kunzwisisa kwese ruchachengetedza mwoyo yenyu nepfungwa dzenyu.”—VaFiripi 4:6, 7.

Zvazvinoreva: Nguva dzese ramba uchikumbira Mwari kuti ugadzikane mupfungwa kuti usaramba uchishushikana. Verenga nyaya yakanzi “VaFiripi 4:6, 7—‘Musazvidya Mwoyo Nezvechinhu Chero Chipi Zvacho.’”