Chikonzero Chipi Chinoita Kuti Ufare?
1. Chikonzero chipi chinoita kuti tifare panopera mwedzi mumwe nomumwe?
1 Panopera mwedzi mumwe nomumwe tinokumbirwa kuunza mishumo yedu yebasa rokuparidza, asi iwe pachako chii chinoita kuti ufare? (VaG. 6:4) Tingave tiri mapiyona chaiwo anoshuma maawa 130 kana kuti tiri vaparidzi vakabvumirwa kushuma maminitsi 15, tose tinofanira kufara nezvatinogona kuita pakushumira Jehovha nemwoyo wose.—Pis. 100:2.
2. Nemhaka yei tichifanira kushanda nesimba chaizvo pakushumira Jehovha?
2 Jehovha zvaari Changamire wezvinhu zvose zvakasikwa, akakodzera kuti timupe zvakanakisisa. (Mar. 1:6) Takatsaurira upenyu hwedu kuti tiite zvaanoda nemhaka yokuti tinomuda. Saka, panovira zuva kana kuti panopera mwedzi tinenge tiine chivimbo chokuti tapa Jehovha zvakanakisisa pasimba redu, nguva yedu, uye matarenda edu pakumushumira uye izvi zvichaita kuti isu pachedu tifare. (Zvir. 3:9) Asi kana hana yedu ichitiudza kuti tinogona kuwedzera pane zvatiri kuita, tinofanira kuona zvatingaita kuti tivandudze.—VaR. 2:15.
3. Nemhaka yei zvisina kunaka kuti tizvienzanise nevamwe?
3 ‘Usazvienzanisa Nomumwe Munhu’: Hakusi kuchenjera kuzvienzanisa nevamwe kana kuti kuzvienzanisa nezvawaimboita uchine utano hwakanaka. Zvinhu zvinochinja. Zvinokwanisa kuitwa nanhingi zvakasiyana nezvinogonekwa nanhingi. Kazhinji kuda kuzvienzanisa nevamwe kunokonzera makwikwi kana kuti kuzviona sokuti haubatsiri. (VaG. 5:26; 6:4) Jesu akanga asingaenzanisi zvaiitwa nevanhu. Asi airumbidza mumwe nomumwe maererano nezvaaikwanisa.—Mako 14:6-9.
4. Zvidzidzo zvipi zvinokosha zvatinogona kudzidza mumufananidzo waJesu wematarenda?
4 Mumufananidzo waJesu wematarenda, mushandi mumwe nomumwe akapiwa matarenda “maererano nezvaaikwanisa.” (Mat. 25:15) Tenzi paakadzoka akati anoda kuziva kuti mumwe nomumwe akafambisa sei basa rake. Akarumbidza vaya vakashanda nesimba zvichienderana nemano avo uye zvavaikwanisa, achibva avati ngavafare pamwe chete naye. (Mat. 25:21, 23) Isuwo kana tikaramba tichishingaira mubasa rokuparidza Umambo, tichava nechivimbo chokuti Mwari achafara uye isuwo pachedu tichafara!