Manyengetedzero Atingaita Vamwe
1 Muapostora Pauro akawana mukurumbira wokuva mushumiri anonyengetedza. (Mab. 19:26) Kunyange Mambo Agiripa akamuudza kuti: “Ungandinyengetedza kuva muKristu nenguva pfupi.” (Mab. 26:28) Chii chaiita kuti ushumiri hwaPauro hunyengetedze zvakadaro? Airangarira zvine pfungwa kubva muMagwaro, achichinjira hurukuro dzake kuvateereri vake.—Mab. 28:23.
2 Tichitevedzera Pauro, isuwo tinofanira kunyengetedza muushumiri hwedu. Sei? Nokushandisa nzwisiso pakutaura nevamwe uye kuvateerera. (Zvir. 16:23) Nhano nhatu dzinokosha dzichatibatsira kuita izvi.
3 Nyatsoteerera: Mumwe munhu paanenge achitaura, teerera pane chamunobvumirana chaungatangira pachiri. Kana akaramba kudavira zvaunotaura, edza kuona chikonzero chacho. Zvaizobatsira kuziva chaizvoizvo zvaanodavira, nei achizvidavira, uye zvakamuita kuti adaro. (Zvir. 18:13) Nokungwarira ita kuti ataure.
4 Bvunza Mibvunzo: Kana munhu achitaura kuti anodavira Utatu, ungabvunza kuti: “Makagara muchidavira Utatu here?” Wozoti: “Makambonyatsodzidza zvinotaura Bhaibheri panyaya yacho here?” Ungabvunzawo kuti: “Kudai Mwari ari Utatu, taisagona kutarisira kuti Bhaibheri raizotaura kudaro zvakajeka here?” Mhinduro dzaunowana dzichakubatsira kukurukura zvinotaura Magwaro nomunhu wacho.
5 Shandisa Mienzaniso Yakanaka: Chimwe Chapupu chakabvunza mumwe mukadzi aidavira kuti Jesu aiva Mwari chichiti: ‘Kana muchiedza kuenzanisira kuti vanhu vaviri vakaenzana, ukamai hwemhuri hwamungashandisa?’ Akapindura kuti: “Ndingashandisa mukoma nomunun’una.” Chakatizve: “Zvichida kunyange mapatya. Asi mukutidzidzisa kuti tione Mwari saBaba uye iye soMwanakomana, Jesu akanga ari kupa shoko rokutii?” Mukadzi wacho akaona kuti mumwe mukuru uye ane chiremera chikuru. (Mat. 20:23; Joh. 14:28; 20:17) Pfungwa dzake nomwoyo zvakanga zvabayiwa nounyanzvi hwokunyengetedza.
6 Hungu, havasi vose vanogamuchira chokwadi, pasinei nokuti mharidzo dzedu dzingave dziine musoro uye dzakarurama zvakadini. Asi saPauro, ngatishingairirei kutsvaka vane mwoyo yakatendeseka mundima yedu, tichivanyengetedza kugamuchira shoko roUmambo.—Mab. 19:8.