Iwe Unoyeuka Here?

Wakasanopa ngwariro here kuzvinyorwa zvemisi ichangobva kupfuura iyi zveNharireyomurindi? Kana zvakadaro, zvimwe uchakuwana kuchifadza kuyeuka zvinotevera:

▫ Chii chiri “chiratidzo chinoreva runako” icho Jehovha anoitira vateveri vetsoka dzaJesu? (Pisarema 86:17, NW)

Wakanga uri “mufaro womudzimu mutsvene” uyo wakasimbisa maKristu apakuvamba kuti atsungirire zvimiro zvakasiana-siana zvechitambudzo zvakavawira. (1 VaTesaronika 1:6, NW) Ndizvimwe chetezvo nhasi, uye Jehovha, Mupi we“chipo chiri chose chakanaka nechipiwa chiri chose chakakwana,” anofara ku“pa mudzimu mutsvene kuavo vanomukumbira.” (Jakobho 1:17; Ruka 11:13, NW) Naizvozvo ndiwo mufaro womudzimu mutsvene uyo unoita nokuda kwavateveri vaJesu “chiratidzo chinoreva runako.”—12/15, mapeji 18-19.

▫ Neiko kuchikosha kuti tigamuchire murangariro waMwari wokureva nhema?

Pisarema 5:6 rinotaura kuti Mwari “achaparadza vanoreva nhema.” Zvakazarurwa 21:8 inotaurazve kuti mugumo wavarevi vose venhema “rufu rwechipiri.” Nokudaro, kugamuchira murangariro waMwari wokureva nhema kunotipa chikonzero chakasimba chokutaura zvokwadi naizvozvo ndokugamuchira chipo chake choupenyu.—12/15, peji 23.

▫ Chii chaiumba chimiro chechiSamaria chokunamata? (Johane 4:20)

VaSamaria, mukunamata kwavo kwakavhenganiswa, vaigamuchira soRugwaro bedzi mabhuku mashanu okutanga aMosesi, Pentateuch. Munenge muzana ramakore rechina P.N.V., ivo vakavaka tembere paGomo reGerizimi, mukukwikwidzana netembere yaMwari muJerusarema. Kunyange zvazvo tembere yavaSamaria yakaparadzwa, kusvikira kuzuva rino vanova nokuchengetwa kwegore negore kwePaseka paGerizimi.—1/1, peji 25.

▫ Ko maKristu anodikanirwa kusimudzira mipimo yokudzivisa kushatisa kana kuti yokuchenesa here?

Apo akanga ari pasi pano, Jesu haana kuedza kupedza zvinetso zvose zvenzanga zvomuzuva rake. Apo Jehovha kupfurikidza noUmambo hwake hwouMesia anoita kuti nheyo dzake dzakarurama dzishandiswe pamwero wenyika yose, zvinetso zvemhoteredzo zvichapedzwa zvechigarire. Nokudaro, Zvapupu zvaJehovha zvinova nomurangariro wakadzikama. Rudo nokuda kwomuvakidzani runozvisunda kuratidza ruremekedzo nokuda kwezvinhu zvavamwe, asi zvinoisa nenzira yakarurama kuparidzirwa kweshoko roUmambo hwaMwari pakutanga. (Mateo 6:33)—1/1, peji 31.

▫ Jesu akabatira somutakuri wechiedza munzirai? (Johane 8:12)

Jesu akazvipa amene kukuparidzira mashoko akanaka oUmambo hwaMwari. (Ruka 4:43; Johane 18:37) Iye akafumurawo nhema dzorudzidziso uye nokudaro akagovera rusununguko rwomudzimu nokuda kwaavo vakanga vakasungwa muusungwa hworudzidziso. (Mateo 15:3-9) Nenzira yakatanhamara, iye akabvumikisa kuva chiedza chenyika kupfurikidza nokuvanzarika upenyu hwake hwakakwana hwohunhu sorudzikinuro. (Mateo 20:28; Johane 3:16)—1/15, mapeji 10-11.

▫ Ndezvipi zviri zvikonzero nei tichifanira kuzviisa pasi paJehovha Mwari?

Jehovha ndiye Changamire Wechisiko chose, uye nokuda kweichi chikonzero tinofanira kuzviisa pasi pake. Uyewo, sezvo Jehovha ari wamasimba ose, hakuna munhu anogona kumushora nenzira inobudirira, naizvozvo hatigoni kufuratira kuzviisa kwedu pasi pake. Zvisikwa zvose zvakangwara zvakasikwa kuti zvibatire donzo roMuiti wazvo, uye ikoku kunoisa zvose mumusengwa wokuzviisa zvimene pasi paMwari mumativi ose.—2/1, mapeji 10-11.

▫ Chii chakabetsera Josefa kudzivisa kuita ufeve nomudzimai waPotifari?

Josefa aiva nesimba rine simba rinonyandura ndangariro yake. Iye aiziva ukama hwake naJehovha uye ainzwisisa kuti chiito choufeve chaizova kutadzira kwete bedzi murume wake asi, zvinokosha zvikuru, Mwari.—2/15, peji 21.

▫ Chii chakareva Jesu apo akati: “Ndini . . . zvokwadi”? (Johane 14:6, NW)

Jesu haana kungotaura chete ndokudzidzisa zvokwadi; iye akararama ndokuratidzira zvokwadi. Nokudaro, chiKristu hachisati chichingova zvacho pfungwa; inzira youpenyu.—3/1, peji 15.

▫ Chidzidzoi chinonyaradza chiri muPisarema 51?

Iri pisarema rinotibetsera kuziva kuti kana tikawira muchivi asi tichipfidza zvirokwazvo, Baba vedu vokudenga vane rudo vachanzwa kuchema kwedu nokuda kwengoni ndokutidzivisira kuora mwoyo. Zvisinei, tinofanira zvikurukuru kuitira hanya ruzvidzo rupi norupi runounzwa pazita raJehovha.—3/15, peji 18.

▫ Chii chinoratidzirwa norubhapatidzo rwomumvura?

Rubhapatidzo chiratidzo chokunze chetsauriro yomunhu kuna Jehovha Mwari. Kunyudzwa pasi pemvura kunoratidza kuti avo vari kubhapatidzwa vari kufa kunzira youpenyu yakananga pavari vamene. Kubudiswa mumvura kunoratidzira kuti ivo zvino vapenyu kukuitwa kwokuda kwaMwari, vachikuisa pakutanga muupenyu hwavo. (Mateo 16:24)—4/1, mapeji 5-6.