Uya ku“Mutauro Wakachena” Kokorodzano Yoruwa
MISIANO mumutauro rave riri simba rinokamuranisa chibviro cheBhaibheri. Ipapo Jehovha akavhiringidza mutauro worudzi rwomunhu ndokukangaidza donzo ravanhu ro‘kuvaka shongwe ndokuzviitira vamene zita rakakurumbira.’ (Genesi 11:4) Musiano mumutauro unogona kuva unokamuranisa sei sezvinoonwa muchakaitika muBelgium. Makore anoverengeka akapfuura, Yunivhesiti yeKaturike paLouvain yakatsemurwa kuva hafu mumitauro.
Mutauro unongova chimwe bedzi chezvikonzero zvamapoka pakati pavanhu. Zvimwe hurudzi, dzidzo, uye mwero wemari. Asi Zvapupu zvaJehovha zvakashanda kukurira zvinhu izvozvi zvose zvinokamuranisa uye zvakabatana zvirokwazvo.
Zhezha rapfuura rakaona kuratidzirwa kunoshamisa zvikurusa kweichi chinzwano mumaguta eChorzów (pedyo neKatowice), Poznan, uye Warsaw muPoland. Zvapupu, zvichitaura inenge mitauro 20 yakasiana-siana, zvaivapo zvichibva kunyika 37. Bva, humwe hunoshamisa hwakaratidzirwa navose. Chii chakakonzera izvozvi? Vose vakataura “mutauro wakachena” wezvokwadi yapaMagwaro. Ikoku kwakadeya kutaurwa nenzira youporofita pana Zefania 3:9, (NW): “Ini [Jehovha Mwari] ndichapa kuvanhu chinjo kumutauro wakachena, kuti vose vagodana pazita raJehovha, kuti vagomubatira nomwoyo mumwe.”
Nechikonzero chakanaka, naizvozvo, kokorodzano dzoruwa dza 1990 dzichava nomusoro unoti “Mutauro Wakachena.” Nemhaka yokusakwana kwohunhu, pesvedzero dzinobva munyika yakaipa yaSatani, uye mabasa amanomano aDhiabhorosi namadhemoni ake, kutaura “mutauro wakachena” nguva dzose hakuuyi nyore. Nguva dzose tinofanira kungwarira kombamiro dzoudyire idzo dzinogona kutikamuranisa.
Neiko Mwari akatipa uyu mutauro wakachena? Kuti tigogona kubatira Jehovha “nomwoyo mumwe.” Dzimwe shanduro dzinoratidzira kuti ikoku kunoreva kubatira Mwari “mujoko rimwe chetero” (The Jerusalem Bible); “nebvumirano” (Moffatt); “newirirano” (An American Translation); uye “kubatira pamwe muasa rake.”—Byington.
Kupfurikidza nehurukuro, mienzaniso, zvinoitika, hurukuro dzavaviri kana kuti vatatu, uye zvinoitika zveBhaibheri paidzi kokorodzano, tichakurudzirwa uye tichanyandurwa kutaura mutauro wakachena zvakanaka zvikuru. Izvo zvichatisundawo kubatira hama dzedu nenzira inobudirira zvikuru uye nenzira inotsinhirana.
Idzi kokorodzano dzichavamba paChina nokukurumidza pashure pa 1:00 p.m. uye dzichaguma panenge pa 4:00 p.m. paSvondo. Ita rongedzero zvino dzokuvapo nokuda kworwiyo rwokutanga nokupinda marusando ose kutozosvikira pamunyengetero wokugumisa paSvondo masikati.
Uyai namaBhaibheri enyu namabhuku enziyo, uye ivai vakagadzirira kunyora zvinonyorwa. Uyaiwo nechido chakanaka chomudzimu, uye muchabva mashongedzerwa zvizere zvikuru kutaura mutauro wakachena nokubatira Jehovha.