Ko Rudzidziso Isimba Retsika Dzakanaka Here?

MUMHINDURO kuuyu mubvunzo, mamirioni angabvumirana naGeorge Bernard Shaw, uyo akanyora kuti: “Rudzidziso isimba guru—simba rinosunda chairoiro bedzi riri munyika.” Mukupesana, munyori weEngland womuzana ramakore rechi 19 John Ruskin, achinyora pamsoro pehwaro hwokutendeseka, akanyomba achiti: “Rudzidziso rwamambara nguva dzose ndichinhu chakaipisisa pamsoro pake.” Murangariro upi waunofunga kuti uri pedyo zvikuru nezvokwadi?

Soufakazi hwesimba retsika rorudzidziso, mumwe munhu anganongedzera kumumwe munhu uyo akava “munhu akachinja” apo iye ‘akatsaurira upenyu hwake kuna Jesu Kristu.’ Iyoyo ndiyo nzira iyo imwe magazini yamarudzi ose yakarondedzera nayo “kutendeuka” kwaCharles Colson, uyo akanga abatanidzwa mumhaka yeWatergate. Mumwe munhuwo zvake anganongedzera kuavo vanotaura kuti rudzidziso rwavo rwakavadzivisa paupenyu hwouhure kana kuti udhakwa. Munyika dzisiri dzechiKristu, mamirioni amaBhaibheri akaparadzirwa, uko pasina panikiro kwakabetsera vanhu vazhinji kuvandudza upenyu hwavo mutsika. Sezviri pachena, rudzidziso rwakashandisa pesvedzero yakanaka yetsika pavanhu vakadaro.

Rutivi Rwakashata

Pano rumwe rutivi, rudzidziso rwaHitler rwakanga rwusimbori chidziviso kwaari. Ikoku kwakatungamirira vanhu vakatendeseka kushamisika nei chikumbiro chakaitwa kuna Pope Pius XII chokudzinga Hitler chisina kutongopindurwa. Catholic Telegraph-Register yeCincinnati, Ohio, pasi pomusoro unoti “Akarerwa SomuKaturike Asi Anoshatisa Kutenda Rinodaro Shoko Kuna Papa,” yakashuma kuti: “Chikumbiro chakaitwa kuna Pius XII chokuti Reichsfuehrer Adolph Hitler adzingwe.” Kudai ichi chiito chakanga chaitwa, chingadai chakatapura here muuyo wehondo ndokubetsera kudzivisira rudzi rwomunhu kutambura kukuru? Kunosuruvarisa kutaura, papa haana kutongopindura.

Kuva navarongo kunozivikanwa navose zvikuru mudzimwe nyika dzeKaturike muSouth America. Uye muNorth America mumwe mumonsignor akanyora chikamu chinonyorwa nomupepeti wenhau, kuti: “Itai Kuti Uhure Huve Hwapamutemo—Mushonga Mutsvene.” (Philadelphia Daily News) Rangarirawo migariro iri mudzimwe nyika dzePurotesitendi umo kuchinjana vadzimai, vatano yapamberi peroorano, uye vatano pasina roorano zvinozivikanwa navose zvikuru. Tinowana chikonzero chaikoku chichikarakadzwa mumusoro wepepanhau: “Vafudzi Vakanyarara Pamsoro Pevatano Yapamberi Peroorano.” Nyaya yacho yakati: “Vafudzi veAmerica vave vakanyarara zvakaipa mukuparidzira pamsoro pevatano yapamberi peroorano . . . Ivo vanotya kuti vacharasikirwa navamwe vavagari vavo vomuruwa.” (Telegraph, North Platte, Nebraska) Naizvozvo ko rudzidziso rwose isimba retsika dzakanaka here?

MuchiKristudhomu, kushaiwa kworudzidziso simba retsika kuri pachena zvikurusa mukati menguva yehondo. Ona chaunofunga pamsoro pouku kutaura kunonzwika kuva kwakaisvonaka. Muna 1934 Walter W. Van Kirk, panguva iyeyo, munyori webato reFederal Council of the Churches of Christ muAmerica, akanyora, kuti: “Vaparidzi navanhuwo zvavo vakarwisana zvakakomba nehondo . . . Iri sangano rorugare rechechi rinobva mukupwiswa kuti hondo inopesana chose chose nokuparidzira nomuitiro waJesu.” (Religion Renounces War) Pashure pokududza chechi dzinoverengeka navakuru vorudzidziso, bhuku racho rakagumisa, richiti: “Chechi, zvikurukuru, dzakataura zvakajeka kuti hadzisati dzicharangarirwa savakutsirani mubasa rokuuraya nokuremadza vanhu. Vaparidziri . . . vachiramba kuva nomutoro weropa ravamabiyavo, ivo vari kuparadzana naKesari.”

Zvisinei, kudeya kutaura ikoko kune tariro nenzira inosiririsa hakuna kuitika. Apo Hondo yeNyika II yakatanga, hakuna norumwe rwamarudzidziso makuru echiKristudhomu rwakamira zvakasimba ‘kuramba hondo.’ Ko chechi yomunharaunda menyu yakaita saizvozvo here?

Fenzi Dzetsika Dzakadambuka

Warangarira ufakazi hwapamativi ose ari maviri, haungabvumi here kuti muzvinoitika zvakawanda zvikurusa, marudzidziso akakurumbira enyika ave asati ari simba rakasimba retsika dzakanaka? Magazini yeLook yakazivisa, kuti: “Chechi . . . dzakakundikana kugovera utungamiriri hwetsika, uye nemhaka yokuti mutoro wadzo mukurusa, kundikano yadzo yakaipa zvikurusa. “The Courier-Mail yeBrisbane, Australia, yakatsinhira pamsoro pekundikano yorudzidziso rwechiKristudhomu kugovera chinodzora pautere hwevatano: “Pakunouya kumaBhishopi namaKenoni . . . kunyora kuti vatano yokunze kweroorano ingava chiito chomutsa icho ‘chinozivisa Mbiri yaMwari,’ . . . kuti ufeve hahuna kuipa mahuri humene uyewo upombwe hauna kungoipa zvahwo; ipapo murumewo zvake nomukadzi, uye zvikurukuru mukomana nomusikana vanoyaruka, vanova vanovhiringidzwa pakati pechakarurama nechisina kururama. Muuyo weiyi paradziro yose yeTsika Itsva wave uri kudambuka kwefenzi dzetsika.”

Aiwa, kazhinji kazhinji, marudzidziso enyika haasati ari simba chairoiro retsika dzakanaka. Mukupesana, iwo anofanira kuva nomutoro womugariro unosuruvarisa wetsika nhasi. Zvisinei, sezvo rudzidziso rwuchifungidzirwa kuva runoreva “basa nokunamatwa kwaMwari kana kuti zvinopfuura zvomuzvarirwo,” harufaniri here kuva simba rezvakanaka munyika dzose marwakatekeshera? Chii chiri kushaika? Rudzidziso rwako rwunogona sei kushandisa simba rakadaro nhasi?