Akaramba Akavimbika Kuna Mwari

MOZISI paakatiza achibuda muIjipiti, mumwe murume nemudzimai wechiIsraeri vakasara vakabereka mwana ainzi Karebhi. Mwana wacho akakurira muuranda, asi akararama kusvikira pakutoona kusunungurwa kwevaIsraeri. Karebhi paakanga ava nemakore 40, Mozisi akadzoka kuIjipiti, asi panguva ino akanga atumwa naJehovha kuti asunungure vanhu vake, vaIsraeri. Karebhi anofanira kunge akafara chaizvo uye akashamiswa paaiona Jehovha achiratidza simba rake paakaunza matambudziko 10 pavaIjipiti, paakapatsanura Gungwa Dzvuku nepakati, uye paakakunda vaIjipiti zvine mutsindo achinunura vanhu vake.

Karebhi haana kuzombofa akanganwa zviitiko izvozvo zvakasimbisa kutenda kwake. Papera mwedzi mishomanana, vaIsraeri vakawanda vakanga vasina kutenda vakapanduka paGomo reSinai, asi Karebhi akaramba akavimbika. Nguva pfupi izvi zvaitika, Karebhi akapiwa basa rinokosha chaizvo rekuenda kunosora Nyika Yakapikirwa pamwe chete naJoshua nemamwe machinda gumi eIsraeri.

Varume vacho 12 vakashinga kupinda muKenani, vakaita mazuva 40 vachiongorora maguta emo, vanhu vacho, uye zvibereko zvenyika yacho. Vakadzoka vaine zvinhu zvekuratidza vamwe vaIsraeri, kusanganisira sumbu remazambiringa rakanga rakakura chaizvo zvekuti raitoda varume vaviri kuti varitakure. Asi pakazosvika nguva yekuti vataure kuti vakanga vafamba sei, Karebhi anofanira kunge akapedzwa simba nezvakataurwa nevamwe vasori 10 vaakanga aenda navo. Bhaibheri rinoti: “Vakaramba vachiudza vaIsraeri mashoko anopedza simba.” Vakachema-chema vachiti vaKenani vaisakundika nekuti vakanga vakanyanya kusimba uye vari varume vakakura. Vakatotaurawo nhema dzekuti vakanga vaona vazukuru vevaNefirimu, asi vaNefirimu vakanga vatoparadzwa kare pamafashamo. Vanhu vese vakabva vaora mwoyo, uye vakatanga kufunga zvekugadza mumwe mutungamiriri kuti avatungamirire vachidzokera kuIjipiti.

Asi Karebhi naJoshua vakaramba vakavimbika kuna Jehovha. Vakaedza kusimbisa vamwe vaIsraeri avo vakanga vasisina kutenda kwakasimba vachiti: “Jehovha anesu. Musavatya.” Asi izvozvo zvakatoita kuti vaIsraeri vatutume nehasha. Vakatotaura kuti vaida kutema Karebhi naJoshua nematombo kusvikira vafa!

Izvi zvakagumbura Jehovha chaizvo. Nezvese zvaakanga avaitira, achivarwira parudzi rwaiva nesimba chaizvo rweIjipiti, vaIsraeri vakanga vatorasa kutenda kwavo munguva pfupi pfupi. Asi Jehovha akacherechedza ushingi uye kutenda kwaiva naKarebhi naJoshua. Jehovha akatotaura nezvaKarebhi achiti: “Muranda wangu Karebhi akaratidza kuti akasiyana nevamwe uye akaramba achinditevera nemwoyo wese.” Jehovha akasarudza kuti chizvarwa chese chevaIsraeri ivavo vakanga vasina kutenda chifire murenje imomo.a Asi Karebhi naJoshua, vaizova pakati pevanhu vashoma vaizoramba vari vapenyu kusvikira vaIsraeri vapinda muNyika Yakapikirwa.

Mumakore ese 40 vaIsraeri pavaidzungaira vari murenje, Karebhi akaramba achiratidza kuti aiva nekutenda uye ushingi. Akaramba akavimbika kuna Mozisi. Mozisi paakafa, Jehovha akagadza Joshua kuti atungamirire vanhu vake kuti vayambuke Rwizi rwaJodhani vachinopinda muNyika Yakapikirwa, uye Karebhi akaramba akavimbikawo kuna Joshua. Kunyange zvazvo akanga akura, Karebhi akaratidza kuti aiva murwi ane unyanzvi uye ane ushingi achirwisa vavengi vaMwari muKenani.

Papera makore 6 kubva pavakayambuka Rwizi rwaJodhani, vaIsraeri vakanga vatotora maguta akawanda muNyika Yakapikirwa. Nguva yakanga yazosvika yekuti Karebhi asarudze kwaaida kuzogara. Akasarudza Hebroni, nzvimbo iya yakanga yambotaurwa nevasori vaya vakanga vasina kutenda kuti yaiva nemazirume akakura asingakundike. Kunyange zvazvo Karebhi akanga ava nemakore 85, aiva nechokwadi chakazara chekuti Jehovha aizomubatsira. Akati: “Jehovha achava neni, uye ndichavadzinga, sezvakavimbiswa naJehovha.” Ndizvo chaizvo zvakaitika. Karebhi akatora guta racho, akatanga kugara mariri. Bhaibheri rinobva ratiudza kuti: “Uye nyika yakazorora pahondo.”

Makore akawanda chaizvo izvi zvisati zvaitika, Mozisi akanga amboudza Karebhi kuti: “Wakatevera Jehovha Mwari wangu nemwoyo wako wese.” Zviri pachena kuti mararamiro akaita Karebhi upenyu hwake kusvikira paakazofa anonyatsoenderana nemashoko iwayo. Uye tine chokwadi chekuti paachazorarama zvakare acharamba achitevera Jehovha nemwoyo wake wese!

Verenga nyaya yacho muBhaibheri:

• Numeri 13:1–14:​12, 20-38

• Joshua 14:​6-15

Mubvunzo wekukurukura:

Karebhi akaratidza sei ushingi?

Wedzera Kuongorora

1. 1. Nei tingati mashoko ari pana Numeri 13:23 anenge asiri kuwedzeredza paanotaura nezvezvibereko zvemuNyika Yakapikirwa? (w06 6/15 16 ¶1-2-wcgr)

   Mhinduro yako

2. 2. Ichokwadi here kuti Nyika Yakapikirwa yaiva “nyika inoyerera uchi nemukaka,” sezvakataurwa naKarebhi naJoshua? (Num. 14:8; w11 3/1 15-wcgr) Ona mufananidzo A

   Mhinduro yako

   

   Institute of Archaeology/Hebrew University © Tel Rehov Excavations

3. 3. Mozisi paakatuma vasori 12 kubva kuKadheshi vaIsraeri vakanga vari kure zvakadini neNyika Yakapikirwa? (w04 10/15 17 ¶11-12-wcgr) Ona mufananidzo B

   Mhinduro yako

   

4. 4. Jehovha akakomborera sei Karebhi nekuratidza kwaakanga aita kutenda uye ushingi? (w06 10/1 18 ¶11-wcgr)

   Mhinduro yako

Zvidzidzo Zvatinowana

• Kunyange zvazvo Karebhi akaratidza kuti aiva nekutenda, aitofanirawo kudzungaira pamwe chete nevaIsraeri vese murenje. Asi pasinei naizvozvo, akaramba achiratidza kuzvininipisa uye achivimba naJehovha. Ndepapi patingatevedzera zvakaitwa naKarebhi?

  Mhinduro yako

• Zvakaitwa naKarebhi zvingatibatsira sei patinosangana nemuedzo wekuda ‘kutevera vanhu vazhinji’? (Eks. 23:2) Ona mufananidzo C

  Mhinduro yako

  

• Ndepapi pamwe patingatevedzera ushingi hwaiva naKarebhi?

  Mhinduro yako

Mibvunzo Yekufunga Nezvayo

• Nyaya iyi inondidzidzisei nezvaJehovha?

  Mhinduro yako

• Nyaya iyi inobatana papi nechinangwa chaJehovha chaakasikira nyika nevanhu?

  Mhinduro yako

• Zvinhu zvipi zvandinoda kuzobvunza Karebhi paachamutswa?

  Mhinduro yako

Dzidza Zvimwe

Ongorora kuti kutenda kwaiva naKarebhi kwakamubatsira sei kuti aratidze ushingi.

“Shingiswa Nekutenda Uye Nekutya Mwari” (w06 10/1 16-19 ¶1-12-wcgr)

Paakanga ava nemakore 85, nei Karebhi akakwanisa kutaura kuti “ndakatevera Jehovha Mwari nemwoyo wangu wese”? (Josh. 14:8)

“Unotevera Jehovha Zvizere Here?” (w93 5/15 26-29-wcgr)