VECHIDIKI VANOBVUNZA KUTI

Ndingaita Sei Kana Vabereki Vangu Vari Kurambana?

Kurambana kwevabereki ndeimwe nyaya inogona kushungurudza vana zvakanyanya. Mazano api angakubatsira kuti utsungirire?

Zviri munyaya ino

Zvinhu zvitatu zvausingafaniri kuita

1. Kuzvipa mhosva

“Amai vangu vakambondiudza kuti kusawirirana kwavo nababa kwakatanga pandakaberekwa, saka ndaifunga kuti ndini ndakakonzera kuti varambane.”—Diana.

Yeuka izvi: Haisi mhosva yako kuti vabereki vako vakarambana. Inyaya dzekusawirirana kwavo pachavo. Matambudziko avo haana kukonzerwa newe uye matambudziko iwayo haugoni kuagadzirisa. Ivo ndivo vane basa rekugadzirisa nyaya dziri kunetsa muwanano yavo.

“Mumwe nemumwe achatakura mutoro wake.”—VaGaratiya 6:5.

2. Kuramba wakagumbuka

“Ndakagumbukira baba vangu chaizvo nekuti vakatadza kuramba vakatendeseka kuna amai. Zvichandiomera kuti ndizovimba navo zvakare.”—Rianna.

Yeuka izvi: Pamwe wakatsamwa nemhaka yezviri kuitika kuvabereki vako, uye izvozvo zvinonzwisisika. Asi hazvina kunaka kuti munhu arambe akagumbuka. Zvinogona kukanganisa utano nepfungwa dzako. Ndosaka zvichinzi kuramba uine chigumbu kwakafanana nekunwa muchetura uchida kuti munhu akakutadzira azorwariswa nawo.a

“Rega kutsamwa, usiye hasha.”—Pisarema 37:8.

3. Kutyira kuti kana ukazova muwanano hauzofari

“Ndinotya chaizvo kuti pamwe ndichazoita zvakaitwa nababa vangu. Ndinotya kuti kana ndikaroorwa ndoita vana, ndinogona kuita zvakaitwa nevabereki vangu izvo zvakazoita kuti varambane.”—Jessica.

Yeuka izvi: Kana vabereki vako vakarambana hazvirevi kuti wanano yako ichapararawo. Chokwadi chiripo ndechekuti unogona kuwana zvidzidzo zvinokosha pane zvakaitika kuvabereki vako. Semuenzaniso, unogona kunge wava kunyatsoziva unhu hunofanira kunge huine munhu waunoda kuroorana naye. Kurambana kwevabereki vako kunogona kuita kuti ude kuva neunhu huchaita kuti uve murume kana kuti mudzimai akanaka.

“Munhu mumwe nemumwe ngaaongorore zvaanoita.”—VaGaratiya 6:4.

Mukomana ari kumazera ekuyaruka akaiswa plaster pagumbo akagara pasofa achishandisa laptop iri pamakumbo. — Kubvuma kuti vabereki vako vakarambana kwakada kufanana nekupora kunoita bhonzo rinenge ratyoka. Marwadzo anopera nekufamba kwenguva

Zvinhu zvitatu zvaunogona kuita

1. Taura. Vanhu vasingaudzi vamwe zvinhu zvinenge zvichivanetsa vanogona kuzopedzisira vava kuita zvinhu zvinovakuvadza, zvakadai sekunwisa doro kana kuti kushandisa madhiragi. Saka kuti izvozvo zvisaitika, edza kuita zvinotevera:

Taura nevabereki vako. Kana baba vako kana kuti amai vakaedza kuita kuti upindire munyaya dzavo, vatsanangurire zvakajeka asi wakadzikama kuti izvi zviri kukukanganisa sei. Kana uchiomerwa nekutaura navo muchionana, unogona kunyora tsamba kune mumwe wavo kana kuti kwavari vese.

Musikana ari kumazera ekuyaruka ari achinyora tsamba.

Taura neshamwari yaunovimba nayo. Kungowana mumwe munhu anonyatsokuteerera kunogona kukubatsira. Bhaibheri rinotaura kuti “shamwari yechokwadi ine rudo nguva dzese uye ihama yakaberekerwa kubatsira panguva yekutambudzika.”—Zvirevo 17:17.

Taura neMusiki wako. Jehovha Mwari agara achida kukuteerera nekuti Bhaibheri rinoti iye “Munzwi wemunyengetero.” (Pisarema 65:2) Rinotiwo unogona ‘kukanda zvese zvinokudya mwoyo paari, nekuti iye ane hanya newe.’—1 Petro 5:7.

Pavabereki vako, ndeupi waunogona kutaura naye zvakanaka, makadzikama?
Ishamwari ipi yaunovimba nayo (ingava yechidiki kana yechikuru), yaunoona kuti inogona kukubatsira kuti utsungirire?
Inyaya dzipi dzaunogona kunyengetera nezvadzo?

2. Ita zvinoenderana nemamiriro ezvinhu avapo

Kurambana kwevabereki vako kunogona kuita kuti uchinje kwekugara, chikoro, shamwari, uye murarame nemari shoma. Zvinonzwisisika kuti izvi zvinogona kuita kuti unetseke, urwadziwe chaizvo, uye unzwe sekuti upenyu hwako hwese hwaenda musango. Chii chingakubatsira kuti ujairane nemamiriro ezvinhu matsva? Edza kuisa pfungwa dzako pakuti ungaita sei kuti ukwanise kurarama nezvavapo.

Ndechipi chinhu chikuru chawaifanira kuchinja nemhaka yekurambana kwevabereki vako?
Matanho api aungatora kuti ushande nezvavapo?

“Ndakadzidza kugutsikana, pasinei nekuti zvinhu zvakandimirira sei.”—VaFiripi 4:11.

3. Ziva zvinhu zvaunonyatsogona

Kurambana kwevabereki kunogona kuita kuti ushungurudzike zvakanyanya, asi kunogonawo kutoita kuti uzive zvinhu zvaunonyatsogona. Kunogonawo kutoita kuti utange kunyatsogona zvimwe zvinhu zvawaisagona. Jeremy uyo ane vabereki vakarambana aine makore 13 anoti, “Kurambana kwevabereki vangu kwakaita kuti ndigone kuita zvinhu zvakawanda. Ndini ndaiva mukuru, saka ndaifanira kubatsira amai vangu kuita zvinhu zvakasiyana-siyana uyewo kubatsira kamunin’ina kangu.”

Musikana ari kumazera ekuyaruka ari kubatsira munin’ina wake kuita homuweki, amai vavo pavari kubika mukicheni. — Kurambana kwevabereki vako kunogona kuita kuti ukwanise kuita zvinhu zvakasiyana-siyana pamba

Nemhaka yekurambana kwevabereki vako, ndezvipi zvinhu zvawava kuona kuti unogona?
Ndezvipi zvinhu zvaunofunga kuti unofanira kushanda nesimba kuti uzvigone?

“Magwaro ese akafemerwa naMwari uye anobatsira . . . pakururamisa zvinhu.”—2 Timoti 3:16.

a Kuti udzidze zvakawanda, ona nyaya yakanzi, “Ndingadzora Sei Hasha Dzangu?”

Zvinotaurwa nevezera rako

“Munguva pfupi yapfuura, ndakasvika pakubvuma kuti vabereki vangu vakarambana zvechokwadi. Pakutanga ndakanga ndisinganzwisisi kuti chii chaiitika. Asi pandakanga ndava mumakore ekuyaruka, ndakatanga kuvatsamwira. Iye zvino, ndava nemakore 18 uye ndava kunyatsozvibvuma kuti vakarambana, handichanyanyi kufunga nezvazvo.”—Elena.

“Vabereki vangu vakarambana ndiine makore 7. Pandakanga ndava nemakore 21, ndakagara pasi nababa vangu ndikavaudza kuti ndaida kutaura navo pamusoro pezvinhu zvese zvakanga zvaitika. Kwemaawa anenge maviri, takataura zvakakonzera kuti varambane uye kuti zvakandikanganisa sei. Ndinovenga kurambana kwavakaita, asi baba vangu ndinovada uye ndakatanga kuvanzwisisa. Ndakabvuma zvakanga zvaitika uye ndakabva ndanzwa kugadzikana.”—Katelyn.