Kana Mwana Achida Kuzviuraya

Mumakore achangobva kupfuura nhamba yevechidiki vari kuzviuraya iri kuramba ichiwedzera zvakanyanya mune dzimwe nyika. Chii chiri kuita kuti zvidaro? Mwana wenyu angavawo aine pfungwa dzekuda kuzviuraya here?

Zviri munyaya ino

• Nei vabereki vachifanira kunetseka nezvenyaya yekuzviuraya kwevana?

• Mungaziva sei kana mwana wenyu aine pfungwa dzekuda kuzviuraya?

• Mungaita sei kana mwana wenyu aine pfungwa dzekuda kuzviuraya?

Nei vabereki vachifanira kunetseka nezvenyaya yekuzviuraya kwevana?

Kubva muna 2009 kusvika muna 2019, nhamba yevana vari kusekondari vane zviratidzo zvechirwere chedepression yakawedzera ne40% muUnited States. Nhamba yevanhu vaizviuraya yakawedzerawo panguva iyoyo.a

“Vechidiki mazuva ano vari kusangana nematambudziko asina kumbosanganikwa nawo kare . . . Matambudziko aya ari kukonzera kuti vave nezvirwere zvepfungwa.”—Vivek H. Murthy, U.S. Surgeon General.

Zvinotaurwa neBhaibheri: “Kusuruvara kunopedza simba remunhu.”—Zvirevo 17:22.

Mungaziva sei kana mwana wenyu aine pfungwa dzekuda kuzviuraya?

Funga nezvezvinhu zvinotevera.

• Zvakaitika. Mwana wenyu ane here zvinhu zvinorwadza zvaakasangana nazvo zvakadai sekurambana nemumwe munhu, kufoira, kukundikana kuita zvimwe zvinhu kana kuti kufirwa nemumwe munhu waanoda? Kana zviripo, zvinhu izvozvo hazvisi kumukanganisa zvakanyanya here kupfuura zvamungava muchifunga?

• Maitiro Ake. Mwana wenyu haachashamwaridzani nevanhu vaaimbotamba navo here kana kutandara nevamwe vemumhuri? Haachanakidzwi nekuita zvinhu zvaaimbofarira here? Akagova zvinhu zvake zvaaikoshesa here?

• Zvaanotaura. Mwana wenyu ari kutaura nezvekufa here kana kutaura mashoko akadai sekuti, “Dai ndafa hangu?” Anombotaura here nezvekuti haachadi kuramba achikuremedzai?

  Ichokwadi kuti mamwe mashoko aanotaura anogona kunge angori ‘mashoko ekuvhurumuka.’ (Jobho 6:3) Asi zvimwe zvacho zvinogona kunge zvichitoratidza kuti ari kutoda kubatsirwa. Saka kana mwana wenyu akataura chero chinhu chine chekuita nekuzviuraya, musangosiya zvakadaro.

Kana mwana wenyu akati akambofunga nezvekuda kuzviuraya munogona kumubvunza kuti, “Saka wakatofunga here kuti ndiriini pauchazviita uye kuti uchazviita sei?” Zvaachataura zvichakuratidzai kuti mwana wenyu ari kuda rubatsiro nekukurumidza zvakadii.

“Sevabereki tinogona kusada kubvunza vana vedu mibvunzo nekuti tinenge tichitya kunzwa zvavachataura. Asi zviri nani kuti vataure kuitira kuti tigare tichiziva kuti vari kunzwa sei.”—Sandra.

Zvinotaurwa neBhaibheri: “Pfungwa dziri mumwoyo memunhu dzakaita semvura yakadzika, asi munhu ane ungwaru anodzibudisa.”—Zvirevo 20:5.

Mungaita sei kana mwana wenyu aine pfungwa dzekuda kuzviuraya?

• Ivai nemwoyo murefu uye edzai kuziva zviri mupfungwa nemumwoyo memwana wenyu. Tangai nekumutenda kuti akubudirai pachena. Munogona kubva mazoti: “Ndiri kuda kunzwisisa zviri kuitika muupenyu hwako uye kuti zviri kuita kuti unzwe sei. Ungandiudzawo here kuti zvii zvanga zvichiitika?” kana kuti, “Nditsanangurirewo kuti uri kunzwa sei”

  

  Nyatsoteererai uye ivai nemwoyo murefu mwana wenyu paanenge achitaura. Musataura kuti manzwiro ake haakoshi uye musakurumidza kumupa mazano ekuti angagadzirisa sei matambudziko aari kusangana nawo.

  Zvinotaurwa neBhaibheri: ‘Kurumidza kuteerera, nonoka kutaura, uye nonoka kutsamwa.’—Jakobho 1:19.

• Rongai kuti mungamubatsira sei. Batsirai mwana wenyu kuti acherechedze zvinhu zvinotevera uye azvinyore pasi:

  Kuona matangiro azvinoita. Zvii zvaanga achiita kana kuti achifunga nezvazvo paanga asati atanga kufunga nezvekuzviuraya?

  Zvinhu zvinogona kumubatsira. Zvinhu zvipi zvaangaita zvinogona kumubatsira kuti asanyanya kunetseka kana kuti zvinogona kubvisa pfungwa dzake panyaya yekuda kuzviuraya?

  Vanhu vanogona kubatsira. Mwana wenyu ane here vamwe vanhu vaanogona kuenda kwavari kana achida rubatsiro. Vanhu vacho vanogona kusanganisira imimi, mumwe munhu mukuru waanovimba naye, chiremba wezvirwere zvepfungwa, kana kuti sangano rine vanhu vakadzidziswa kubatsira vaya vane pfungwa dzekuda kuzviuraya.

  

  Zvinotaurwa neBhaibheri: “Zvirongwa zvemunhu anoshanda nesimba zvinoita kuti abudirire.”—Zvirevo 21:5.

• Garai makangwarira. Kunyange kana mwana wenyu akatanga kuita sekuti haasisina pfungwa dzekuda kuzviuraya, rambai muchingwarira.

  “Mwanakomana wangu paakandiudza kuti akanga asingachafungi nezvekuda kuzviuraya, ndakafunga kuti dambudziko rake rakanga rapera. Ipapo ndipo pandakakanganisa. Munhu anogona kusangana nerimwe dambudziko rinoita kuti atangezve kufunga nezvekuda kuzviuraya, uye izvozvo zvinogona kungoerekana zvaitika.”—Daniel.

  

  Batsirai mwana wenyu kuti anzwisise kuti manzwiro edu anogara achingochinja-chinja. Rimwe bhuku rinonzi The Whole-Brain Child rinoti: ‘Manzwiro edu akafanana nemamiriro ekunze. Kana mvura ichinaya, hazvina musoro kuti munhu amire panze achinayiwa achiita sekuti hakusi kunaya. Asi hakusiwo kungwara kufunga kuti kucharamba kuchingonaya uye kuti zuva harisi kuzobuda.”

• Itai kuti mwana wenyu arambe achivimba nemi: Udzai mwana wenyu kuti munomuda uye kuti mucharamba muchimutsigira. Munogonawo kumuudza kuti, “Ndichaita zvese zvandinogona kuti ndikubatsire kutsungirira.”

  Zvinotaurwa neBhaibheri: “Shamwari yechokwadi ine rudo nguva dzese uye ihama yakaberekerwa kubatsira panguva yekutambudzika.”—Zvirevo 17:17.