Zvinhu Zvitatu Zvinotibatsira Kuti Tivimbe naJehovha

Dhavhidhi akakunda Goriyati nekuti aivimba naJehovha. (1Sa 17:45) Jehovha anoda kuratidza simba rake achibatsira vashumiri vake. (2Mak 16:9) Tingaratidza sei kuti tinovimba naye pane kuvimba neuchenjeri hwedu kana kuti nesimba redu? Pane zvinhu zvitatu zvatinogona kuita:

• Gara uchinyengetera. Usangonyengetera uchikumbira ruregerero paunenge wakanganisa, asi nyengeterawo uchikumbira kuti Jehovha akupe simba paunenge uchisangana nemiedzo. (Mt 6:12, 13) Usangonyengetera uchikumbira kuti Jehovha akomborere zvaunenge wasarudza kuita, asi nyengeterawo uchikumbira kuti akutungamirire usati wasarudza zvekuita.—Jak 1:5

• Iva nepurogiramu yakarongeka yekuverenga uye kudzidza Bhaibheri. Verenga Bhaibheri mazuva ese. (Pis 1:2) Zvipe nguva yekudzamisa pfungwa nezvevanhu vaunenge uchiverenga muBhaibheri uye shandisa zvaunodzidza. (Jak 1:23-25) Gadzirira usati wabuda muushumiri kwete kungovimba neruzivo rwauinarwo. Kuti unyatsobatsirwa nemisangano, wana nguva yekugadzirira

• Tsigira zvinotaurwa nesangano raJehovha. Fambirana nemirayiridzo mitsva inobva kusangano uye kurumidza kuita zvinenge zvataurwa. (Nu 9:17) Teerera mazano nemirayidzo zvinobva kuvakuru.—VaH 13:17

ONA VHIDHIYO INONZI NEI PASINA CHIKONZERO CHEKUTI TITYE KUTAMBUDZWA?, WOZOPINDURA MIBVUNZO INOTEVERA:

• Zvii zvaityiwa nehama nehanzvadzi?

• Chii chakavabatsira kuti vakurire kutya ikoko?