Kuvandudza Unyanzvi Hwedu Muushumiri—Kupa Vanhu Bhuku raBhaibheri Rinombodzidzisei?

Sei Zvichikosha? Pazvinhu zvatinoshandisa kudzidza nevanhu Bhaibheri, bhuku raBhaibheri Rinombodzidzisei? ndiro ratinonyanya kushandisa. Asi kuti tizodzidza nemumwe munhu bhuku iri, tinofanira kutanga tamupa bhuku racho. Saka tose tinofanira kushanda nesimba kuti tive neunyanzvi hwekupa vanhu bhuku raBhaibheri Rinombodzidzisei? muushumiri. (Zvir. 22:29) Pane nzira dzakawanda dzinogona kushandiswa, uye vaparidzi vanogona kusarudza dzinovaitira.

Maitirwo Azvo:

Bvunza saimba mubvunzo unoita kuti ade kunzwa zvakawanda unopindurwa mune chimwe chitsauko chiri mubhuku racho. Unogona kusarudza mumwe chete pamibvunzo iri panotangira chitsauko chimwe nechimwe. Pashure pekunge saimba apindura, verenga rugwaro rwakakodzera uye muratidze ndima inotaura nezvenyaya yacho wobva waikurukura naye kwenguva pfupi.
Unogonawo kushandisa zviri pamapeji 3-7 kuti saimba afarire, wobva wamuratidza panowanika mhinduro yeBhaibheri mubhuku racho. Semuenzaniso, unogona kutaura nezvenjodzi ichangobva kuitika yakabuda munhau wotaura kuti vanhu vakawanda vanoshaya mhinduro dzemibvunzo iri papeji 3. Kana kuti unogona kutaura kuti uri kushanyira vavakidzani vako kuti uvaudze nezveramangwana rakanaka. Zvadaro, muratidze mifananidzo iri papeji 4 ne5 womubvunza kuti, “Pazvinhu zvatiri kuvimbiswa naMwari ndechipi chaunoda kuona chichizadzika?” Chimwe chaungaita kutaura kuti uri kushanya kwenguva pfupi kuti ubatsire vanhu kuwana mhinduro dzemibvunzo mikuru yeupenyu. Kana wadaro, ratidza saimba mibvunzo iri papeji 6, womubvunza kuti ndeupi waanoda kuti upindurwe.
Taura zvakananga kuti unoda kudzidza naye Bhaibheri. Unogona kuti: “Tiri kuratidza vavakidzani vedu bhuku iri rinoshandiswa pakudzidza Bhaibheri. Makamborionawo here? [Rega apindure.] Kana muine maminitsi mashomanana, ndingada kukuratidzai kuti rinodzidzwa sei tichishandisa Bhaibheri renyu.”

Edza Izvi Mwedzi Uno:

Dzidzirai mharidzo dzacho pamunenge muchiita kunamata kwenyu kwemhuri.
Pamunenge muri muushumiri, udza vamwe vaparidzi zvaunoda kuzotaura. (Zvir. 27:17) Chinja mharidzo yako kana isinganyatsoiti kuti vanhu vafarire.