Kuvandudza Unyanzvi Hwedu Muushumiri—Kubatsira Watinenge Tichishanda Naye

Nei Zvichikosha: Jesu aiziva kuti zvinokosha kuva nemumwe munhu patinoparidza. Saka paakatuma vadzidzi vake 70 kuti vanoparidza, akavatuma vari vaviri vaviri. (Ruka 10:1) Muparidzi anogona kutsigira mumwe wake paanenge aomerwa kana kuti asina chokwadi kuti angapindura sei saimba. (Mup. 4:9, 10) Anogona kuudzawo waanenge achishanda naye zvakaitika uye kumbomupawo mazano anomubatsira kuva muparidzi ane unyanzvi. (Zvir. 27:17) Anogonawo kumukurudzira nokutaura zvinovaka pavanenge vachibva pasuo vachienda pane rimwe.—VaF. 4:8.

Maitirwo Azvo:

Teerera mumwe wako paanenge achiparidza. (Jak. 1:19) Vhurawo Bhaibheri rako panenge pachiverengwa rugwaro. Zvichaita kuti ukwanise kubatsira kana zvichidiwa.
Ona pazvinenge zvakakodzera kuti utaurewo. (Zvir. 25:11) Kana ukaenda nemumwe muparidzi pachidzidzo cheBhaibheri, zvingava zvakanaka kuti umbotaurawo pano neapo. Asi kana muchiparidza paimba neimba, mumwe wako angada kuti umbomusiya achitaura kana wava mukana wake. Ichokwadi kuti kana ari muparidzi mutsva kana kuti asina chokwadi kuti opindura sei mubvunzo kana kuti munhu anenge achida kuramba kuparidzirwa, angafara kana ukamubatsira. Ungave uchishanda nemumwe muparidzi paimba neimba, pakushanyirazve munhu anofarira, kana kuti pachidzidzo cheBhaibheri, usamudimburira achitaura, usabva wamutorera mukana wake wekutaura, kana kutanga imwe nyaya yakasiyana neyanga ichikurukurwa.
Muudzewo zvawakaona zvichishanda. Usarega kana uchikwanisa kumbopa waunenge uchishanda naye mazano anomubatsira kuva neunyanzvi muushumiri. (Zvir. 3:27) Pazvinenge zvakakodzera unogona kutanga nokuti: “Waonawo sei?” kana kuti “Ndingakuudza zvimwe zvinobatsira here?” kana kuti “Izvi ndizvo zvandinoedza kuita.” Yeuka kuti kunyange zvazvo vamwe vachifarira kupiwa mazano pano neapo, vangaora mwoyo kana vachingoudzwa pose pavanenge vakanganisa.

Edza Izvi Mwedzi Uno:

Pashure pokushanda nemumwe muparidzi muushumiri, muudze zvaataura kana kuti zvaaita zvakubatsira.